shadow
Diocese de Dili > NOTÍCIAS > LETURA DIÁRIA > XXVIII DOMINGO TEMPO COMUM (ANO A)

XXVIII DOMINGO TEMPO COMUM (ANO A)

Primeira Leitura                      Is. 25, 6-10ª

Lia housi Livro Profeta Isaías:

Iha loron nebá, Maromak, buat hotu nia Na’in, sei tau hahán mesa di’ak de’it no tua mesa furak ba povo hotu-hotu iha foho Sião: hahán mesa bokur de’it no tua di’ak de’it nini’an. Maromak sei hasai iha foho ne’e leten, hena metan nebé hamahan nação tomak; Nia sei halakon nafatin mate. Na’i Maromak sei hamaran ema hotu-hotu nia mata-wén. Na’i Maromak sei hasai housi rai tomak Nia povo nia moe. Maromak mak hakotu nune’e. Iha loron ne’e, sei dehan: “Ita nia Maromak mak ne’e, housi Nia ita nia Maksoyn. Nia, ita Na’in, nebé ita tau laran metin; ita laran haksolok, hawelok tebes, tan Nia soy ita”. Maromak tahan foho ida ne’e ho Nia liman.

Maromak Futar Lia.

 

Salmo Responsorial                                                                                                                                      Sal. 22(23), 1-3ª. 3b-4. 5. 6

Refrão : Ha’u sei moris nafatin iha Na’i nia kadunan!!! Repete-se

Maromak ha’u nia Maksoyn, ha’u la susar.

Halo ha’u kman iha fatin kmook,

lori ha’u ba ué-matan di’ak,

haraik kbiit mai ha’u isin. Refrão

 

Lori ha’u ba dalan di’ak atu hahi Nia naran.

Liu housi nakukun, ha’u la ta’uk:

Maromak ho ha’u, tahan ha’u nafatin. Refrão

 

Iha ema aat sira oin, Na’i tau mesa ida naresin.

Tau mina santo iha ha’u ulun,

tau kusi nakunu to’o suli. Refrão

 

Na’i nia laran luak tahan ha’u,

iha ha’u nia moris tomak.

Ha’u sei hela iha Na’i nia kadunan

iha ha’u nia moris tomak. Refrão

 

Segunda Leitura                                                                                                                                                             Flp. 4, 12-14. 19-20

Lia housi São Paulo nia surat ba sarani sira iha Filipo:

Maun-alin sira:  Ha’u hatene moris ho sasan uitoan de’it, ha’u hatene moris ho sasán wa’in. Iha tempo hotu no iha fatin tomak, ha’u toman atu han wa’in, atu hamlaha, atu moris ho sasán wa’in, atu moris ki’ak. Buat hotu ha’u bele ho Cristo nebé haraik kbiit mai ha’u. Maibé, imi halo di’ak duni, hodi hanoin ha’u nia susar. Ha’u nia Maromak sei tau matan didi’ak ba imi nia susar, tuir Nia soin, ho kmanek wa’in liu, iha Cristo Jesus. Gloria ba Maromak, ita Aman, tinan ba tinan nafatin. Amen.

Maromak Futar Lia.

 

Aclamação                                                                                                                                                                                Mt. 24, 42a. 44

Refrão : Aleluia, Aleluia!! Repete-se

Neon moris, laran mos; wainhira imi la hein,

Mane Maksoin sei mai. Refrão

 

Evangelho  (Forma Longa)                                                                                                                                                       Mt. 22, 1-14

Na’i Jesus Cristo nia Evangelho nu’udar São Mateus haktuir:

Iha tempo nebá, Jesus hateten fali ba boot sacerdote sira nian no ema kbahen povo nian, hodi ko’alia ho aiknanoik nune’e:  “Reino lalehan nian, hanesan liurai ida nebé halo festa ida ba nia oan nia casamento. Nia haruka atan sira ba bolu ema sira nebé simu ona convite, maibé, sira lakohi mosu ba. Nia haruka atan seluk, ho lia hirak ne’e:  ‘Imi ba dehan ba sira nebé simu ona convite: Hahan tau ona iha mesa, ha’u oho tiha ona karau no balada bokur; buat hotu pronto ona. Mai ona han!’  Maibé, hanesan lia la kona sira, balun ba tiha hare to’os, seluk  ba halo nia contrato. Sira seluk kaer liurai nia atan sira, hodi halo aat ba sira, oho sira. Liurai hirus teb-tebes, haruka nia soldado sira atu halakon ema liman-mean sira ne’e, hodi sunu tiha sira nia cidade. Nia dehan ba atan sira: ‘Háhan pronto ona, maibé, ema nebé simu ona convite la soyn mai ha’u. Ne’e duni, imi ba dalan sira ne’e hotu, ema hotu nebé imi hetan, imi convida mai atu han.’  Atan sira ba iha dalan, sira halibur ema hotu nebé sira hetan, di’ak eh aat. Fatin nebé sira halibur atu han ba, naresin tiha. Wainhira liurai tama ba fatin atu hare ema sira ne’e, nia hare ema ida nebé la hatais unuk festa nian; nia dehan ba ema ne’e:  ‘Belun, oin sa ó tama mai iha ne’e la ho unuk festa nian?’  Ema ne’e nonok hela de’it. Liurai ne’e dehan ba atan sira:  ‘Futu nia liman ho ain, hodi soe ba nakukun laran. Iha nebá sei tanis no ruun nehan.’  Tebes, bolu ema wa’in, maibé, hili de’it oituan”.

Lia Maksoyn.

 

Evangelho  (Forma Breve)                                                                                                                                                       Mt. 22, 1-14

Na’i Jesus Cristo nia Evangelho nu’udar São Mateus haktuir:

Iha tempo nebá, Jesus hateten fali ba boot sacerdote sira nian no ema kbahen povo nian, hodi ko’alia ho aiknanoik nune’e:  “Reino lalehan nian, hanesan liurai ida nebé halo festa ida ba nia oan nia casamento. Nia haruka atan sira ba bolu ema sira nebé simu ona convite, maibé, sira lakohi mosu ba. Nia haruka atan seluk, ho lia hirak ne’e:  ‘Imi ba dehan ba sira nebé simu ona convite: Háhan tau ona iha mesa, ha’u oho tiha ona karau no balada bokur; buat hotu pronto ona. Mai ona han!’  Maibé, hanesan lia la kona sira, balun ba tiha haré toos, seluk  ba halo nia contrato. Sira seluk kaer liurai nia atan sira, hodi halo aat ba sira, oho sira. Liurai hirus teb-tebes, haruka nia soldado sira atu halakon ema liman-mean sira ne’e, hodi sunu tiha sira nia cidade. Nia dehan ba atan sira: ‘Háhan pronto ona, maibé, ema nebé simu ona convite la soin mai ha’u. Ne’e duni, imi ba dalan sira ne’e hotu, ema hotu nebé imi hetan, imi convida mai atu han.’  Atan sira ba iha dalan, sira halibur ema hotu nebé sira hetan, di’ak eh aat. Fatin nebé sira halibur atu han ba, naresin tiha.

Lia Maksoyn.

Leave a Reply

Your email address will not be published. Required fields are marked *