shadow
Diocese de Dili > NOTÍCIAS > LETURA DIÁRIA > Sexta-Feira, XXVIII Semana Tempo Comum (ANO A)

Sexta-Feira, XXVIII Semana Tempo Comum (ANO A)

Primeira Leitura                       Ef. 1. 11-14

Lia housi São Paulo nia Surat ba Sarani sira iha Éfeso:

Maun alin sira: Iha Cristo mak Maromak bolu mós ami nu’udar ema nebé Nia fihir tuir nia laran luak; Nia nebé hala’o buat hotu tuir Nia hakarak, atu ami bele hahí nia glória, ami nebé tau ona ami nia esperança iha Cristo. Iha Nia mós mak Maromak bolu imi uainhira imi rona liafuan lialos nian, katak Evangelho ita nia maksoin nian, hodi fiar Nia. Imi simu ona sinal Espírito Santo nian nebé Nia hakotu; Nia mak murak nebé hametin ona ita nia liman rohan atu ita bele manan ita nia maksoin, ba Nia glória.

Maromak Futar Lia.

 

Salmo Responsorial                                                                                                                    Sal. 32(33). 1 e 3, 4-5, 12-13 (R. 12b)

Refrão : Rahun di’ak ba povo nebé Na’i hili ba Nia lima rohan!!! Repete-se

Ema justo sira, haklaken Maromak,

Sira be fuan lós, sei hahí Nia.

Hananu ba Nia knananuk foun ida,

Hananu ho lian midar no ho fuan tomak. Refrão

 

Na’i Nia liafuan lós tebes,

Bele laran metin iha Nia liman nia hahalok sira,

Na’i hadomi justiça no dalan lós,

Rai nakonu ho Na’i Nia laran di’ak. Refrão

 

Rahun di’ak ba povo be hili Na’i ba nia Maromak,

Reino nebé Maromak hili ba Nia lima-rohan.

Housi áas lalehan Na’i hanoin ho neon,

Nia haré hela ema hot-hotu. Refrão

 

Aclamação                                                                                                                                                                                Sal. 32(33). 22

Refrão : Aleluia, Aleluia!! Repete-se

Haraik Ita kmanek mai ami;

Na’i, ami hein Ita tulun. Refrão

 

Evangelho                                                                                                                                                                                           Lc. 12. 1-7

Na’in Jesus Cristo nia Evangelho nu’udar São Lucas haktuir:

Iha tempo nebá, wainhira ema lubun boot teb-tebes halibur an hamutuk to’o sia hanehan malu, Jesus hahu ko’alia ba nia escolante sira dehan: “Imi matan moris ba kona ba fariseu nia fermento, katak sira nia laran makerek. Buat hotu nebé taka hela, sei nakloke; no buat hotu nebé subar hela, sei fó hatene sai. Tan ne’e, buat nebé imi dehan iha nakukun laran, ema sei rona iha loron nabilan; no buat hotu nebé imi hateten nei-neik ba ema nia tilun sub-subar, ema sei fó sai maka’as iha uma nia kakuluk.

Ha’u nia belun sira, Ha’u dehan ba imi: keta ta’uk sira nebé oho isin, hafoin la bele halo tan buat ida. Ha’u sei dehan ba imi se lós mak imi tenki ta’uk: imi sei ta’uk ida nebé, oho tiha isin, iha mós biit atu soe ema ba infernu. Tebes, Ha’u dehan ba imi, Nia mak imi tenki ta’uk. Ema la faan manulin lima ho osan rua? Maibé Maromak la haluha sira ne’e ida. Fu’uk lahan housi imi nia ulun sura tiha hotu; ne’e duni, keta ta’uk, basá imi folin liu manulin barak”.

Lia Maksoyn.

Leave a Reply

Your email address will not be published. Required fields are marked *