shadow
Diocese de Dili > NOTÍCIAS > LETURA DIÁRIA > Segunda-Feira, XXIX Tempo Comum (ANO A)

Segunda-Feira, XXIX Tempo Comum (ANO A)

Primeira Leitura                            Ef. 2. 1-10

Lia housi São Paulo nia Surat ba sarani sira iha Éfeso:

Maun alin sira: Imi mate tiha ona tanba hahalok áat no sala, nebé imi halo uainhira imi moris hela tuir mundo ne’e, hodi halo tuir ida nebé ukun nia, espírito nebé book an iha ema ulun tós sira nia laran. Uluk, ita hotu tama mós iha sira leet, hodi moris nu’udar ema laran fo’er, nebé ita nia hakarak áat no ita rasik nia hanoin áat mak ukun; nnune’e, tan ita an rasik mak ita mós, hanesan mundo tomak, soi Maromak nia laran nakali. Maibé Maromak hadomi ita teb-tebes. Nia haua’in nia laran luak mai ita. Maske ita mate tanba ita nia sala, Nia halo ita moris hi’as ho Cristo; housi graça mak imi hetan maksoyn; hodi foti ita hamutuk ho Nia no fó fatin mai ita hamutuk ho Nia iha lalehan, iha Cristo Jesus.

Ne’e atu hatudu ba ema hotu iha otas nebé atu mai, housi nia laran di’ak mai ita iha Cristo Jesus, katak nia graça ua’in teb-tebes. Basá housi graça mak ita hetan maksoyn, housi fiar, la’os housi buat ruma nebé mai housi imi, maibé housi presente ida housi Maromak; la’os housi imi nia hahalok ruma, atu nune’e ema ida la bele gaba an. Ita mak Maromak nia hahalok kmanek, nebé Nia hakiak iha Cristo Jesus, atu ita bele moris nu’udar ema di’ak nu’udar Nia hakarak nanis houri uluk kedas.

Maromak Futar Lia.

 

Salmo  Responsorial                                                                                                                                Sal. 99(100), 2, 3, 4, 5 (R. 3b)

Refrão : Na’i, halo ita moris, Ita Ninian!!! Repete-se

Rai klaran tomak hahí Na’i!

Serbi Na’i ho ksolok;

La’o to’o Nia ho knananuk ksolok nian. Refrão

 

Imi hatene ba, Na’i mak Maromak!

Nia mak halo ita moris, ita Ninian.

Ita Ninia povo, bibi sira housi Nia bibi luhan. Refrão

 

Imi tama housi odamatan mai, fó graça,

Tama liu housi Nia uma klabis ho hino hahí nian,

Agradece ba Nia, hahí Nia naran. Refrão

 

Basá, Na’i di’ak!

Nia laran-luak rohan laek.

Ninia neon lós hada’et housi otas ba otas. Refrão

 

Aclamação                                                                                                                                                                                              Mt. 5. 3

Refrão : Aleluia, Aleluia!! Repete-se

Ksolok ba sira be kiak iha espírito basá reino

Lalehan sira nian.  Refrão

 

Evangelho                                                                                                                                                                                      Lc. 12. 13-21

Na’i Jesus Cristo nia Evangelho nu’udar São Lucas haktuir:

Iha tempo nebá, housi ema lubun boot, ema ida dehan ba Nia: “Mestre, hateten ba ha’u nia maun atu fahe ami nia liman rohan.” Nia hatan: “Belun, sé mak foti Ha’u atu tesi lia kona ba imi?” Hafoin Nia dehan ba sira: “Imi haré ba, keta kaan rikusoi, basá, la’os ema nia rikusoi mak halo ema moris liu.”

Tuir mai, Nia haktuir ba sira aiknanoik ida ne’e: “Ema riku ida hetan aihan barak housi nia to’os. Nia hanoin hodi dehan ba nia an: ‘Ha’u sei halo sá lós? Basá ha’u fatin la iha atu rai ha’u nia aihan sira.’ Hafoin nia dehan: ‘Ha’u sei halo nune’e: ha’u sei sobu ha’u nia aihan fatin hodi harii ida seluk boot liu fali ida ne’e; iha nebá ha’u sei rai trigo hotu ho ha’u nia rikusoi tomak. No ha’u sei dehan ba ha’u nia klamar: ‘Ha’u klamar, ó iha sasan barak nebé rai hela ba tinan ua’in; hakmatek ba, han hemu hodi haksolok ba.’ Maibé Maromak dehan ba nia: ‘Beikten! Iha kalan ne’e kedas Ha’u sei husu ó atu saran ó nia klamar; sasan sira nebé ó rai hela sei sai se nian?’ Nune’e mós sei mosu ba ema nebé rai hela rikusoi ba nia an, maibé la sai riku ba Maromak futar matan”.

Lia Maksoyn.

Leave a Reply

Your email address will not be published. Required fields are marked *