shadow
Diocese de Dili > NOTÍCIAS > LETURA DIÁRIA > Quarta-Feira, XXIX Tempo Comum (ANO A)

Quarta-Feira, XXIX Tempo Comum (ANO A)

Primeira Leitura                             Ef. 3. 2-12

Lia housi São Paulo nia Surat ba sarani sira iha Éfeso:

Maun alin sira: Imi rona tiha ona karik kona ba knaar graça nian nebé Maromak saran mai ha’u ba imi nia di’ak; Nia rasik fó hatene mai ha’u mistério nebé ha’u foin haktuir ne’e. Imi lê  tiha ona karik ha’u nia liafuan, imi sei hatene katak ha’u haré naruk liu iha Cristo nia mistério. Mistério ne’e nebé ohin Espírito fó sai ba apóstolo no profeta sira, mistério ne’e ema iha otas uluk  nian la hatene liu. Ne’e katak ohin, gentio sira halo parte ona iha liman rohan ida de’it;  gentio sira isin lolon ida de’it nia liman-ain; sira simu promessa ida d’eit,iha Cristo Jesus, housi Evangelho. Maromak foti ha’u atu sai Evangelho ne’e nia atan, housi presente graça nian housi Nia, nebé fó ida ne’e mai ha’u ho nia rasik nia biit. Maromak saran graça  kmanek ne’e mai ha’u, nebé kiik liu santo sira hotu, la’os de’it atu haklaken ba gentio sira Cristo nia rikusoi ua’in, maibé mós atu fó sai oin sá bele fahe ba ema mistério ida ne’e. Hori otas ua’in, mistério ne’e subar hela iha Maromak, nebé hakiak buat hot-hotu. Tan sá? Atu biit na’in  no ukun na’in sira iha lalehan bele hatene ohin housi Kreda, Maromak nia matenek ua’in teb-tebes, lolós tanba hakarak nebé iha ona Nia houri otas  iha Cristo Jesus, ita Na’i. Tan ne’e  mak ami barani atu hakbesik ba Maromak ho laran metin, housi ami nia fiar iha Nia.

Maromak Futar Lia.

 

Salmo  Responsorial                                                                                                                                      Is. 12. 2, 3, 4bde, 5-6 (R. 3)

Refrão : Imi ba ho ksolol oha wé matan maksoyn!!! Repete-se

Maromak mak ha’u Maksoyn,

Ha’u laran metin, ha’u la ta’uk.

Na’i mak ha’u biit, ha’u ksolok.

Na’i ha’u maksoyn. Refrão

 

Ho ksolok imi kuru ué ih ué matan maksoyn.

Fó agradece ba Na’i, bolu ba Nia naran.

Tatoli ba povo sira, Nia hahalok kmanek,

Haklaken ba hotu katak Nia naran santo. Refrão

 

Hananu ba Na’i, basá Nia halo kmanek  ua’in,

Haklaken housi rai ikun to’o rai ulun.

Hananu  no haksolok ba, sira be hôrik iha Sião,

Tan iha ona iha imi leet Israel nia Santo. Refrão

 

Aclamação                                                                                                                                                                                Mt. 24. 42ª, 44

Refrão : Aleluia, Aleluia!! Repete-se

Imi matan moris neon na’in ba basá iha oras nebé imi

la hanoin hetan mak Mane Maksoi sei mai.  Refrão

 

Evangelho                                                                                                                                                                                     Lc. 12. 39-48

Na’i Jesus Cristo nia Evangelho nu’udar São Lucas haktuir:

iha tempo nebá, Jesus lia tun ba escolante sira nune’e: Imi rona didi’ak ba: uma na’in hatene  karik tuku hira mak na’ok ten atu mai, nia sei la husik nia tama iha nia uma. Imi hein hela ba, basá iha oras nebé imi la hanoin kona, Oan Mane sei hi’it an mai.”

Pedro dehan ba Nia: “Na’i, Ita haktuir aiknanoik ida ne’e mai ami de’it, ka ba ema hot-hotu mós?” Na’i simu: “Se mak atan di’ak no matenek nebé uma na’in haruka atu haré nia familia hodi fahe aihan ba sira tuir oras lolós? Ksolok ba atan nebé nia na’in hetan halo nune’e uainhira nia to’o mai. Tebes, Ha’u dehan ba imi katak  nia sei fó knaar ba atan ne’e atu haré nia rikusoi tomak. Maibé atan ne’e dehan karik  ba nia an: ‘Ha’u nia na’i kleur atu to’o mai, hafoin hahu  baku atan mane no feto sira, hodi han no hemu to’o lanu, nia na’i sei to’o mai iha loron nebé nia la hein no iha oras nebé nia la hanoin, na’i sei fó todan ba nia, hodi tau nia hamutuk ho ema áat sira. Atan nebé hatene nia na’i nia hakarak, maibé la hadi’a an hodi halo tuir buat nebé nia husu, sei hetan kastigu barak. Maibé atan nebé la hatene, no halo buat nebé soi kastigu, sei hetan kastigu kmaan de’it. Ba ema nebé simu barak, sei husu mós barak; no ema nebé simu knaar boot, barak liu mak ema sei husu ba nia”.

Lia Maksoyn.

Leave a Reply

Your email address will not be published. Required fields are marked *