shadow
Diocese de Dili > NOTÍCIAS > LETURA DIÁRIA > Sábado, XXIX Tempo Comum (ANO A)

Sábado, XXIX Tempo Comum (ANO A)

Primeira Leitura                           Ef. 4. 7-16

Lia housi São Paulo nia Surat ba sarani sira iha Éfeso:

Maun alin sira: Ita ida-idak simu graça nia kmanek oi-oin nu’udar Cristo hakarak fó. Ema dehan: “Uainhira Nia sa’e ba leten aas, nia lori ema dadur  barak; Nia fahe kmanek oi-oin ba ema sira.” “Sa’e ba leten aas” ne’e katak sá? La’os uluk knanain Nia tun ba rai okos? Ida nebé tun mak Nia mós nebé sa’e aas liu fali lalehan tomak atu halo nia nakonu. Nia foti balun nu’udar apóstolo, balun profeta, balun tan evangelista no seluk tan bibi atn no mestre, ba santo sira hotu no di’ak lolós, ba serbisu ministério nian no atu harii Cristo nia isin lolon, to’o tempo nebé ita hotu hetan laran ida de’it iha fiar no iha matenek kona ba Maromak nia Oan Mane, nu’udar ema boot lolós ona, hanesan ho Cristo rasik nia kmanek hotu.

Maromak Futar Lia.

 

Salmo  Responsorial                                                                                                                       Sal. 121(122). 1-2, 3-4ª, 4b-5 (R. 1)

Refrão : Ho ksolok, ita sei la’o ba Na’i Nia Uma!!! Repete-se

Ha’u haksolok uainhira ema dehan mai ha’u:

“Ita la’o ba Na’i Nia Uma”.

Ami tau ona ain iha ó odamatan, Jerusalém. Refrão

 

Jerusalém, cidade be hari metin,

Hari metin no kmanek tebes!

Atu uma kain sira hotu sa’e ba,

Uma kain Na’i Nian. Refrão

 

Tuir lisan  Israel nian,

Atu haliban Na’i Nia naran,

Iha nebá iha tribunal justiça nian

Tribunal housi uma kain David nian. Refrão

 

Aclamação                                                                                                                                                                                           Ez. 33. 11

Refrão : Aleluia, Aleluia!! Repete-se

Na’i dehan, Ha’u lakohi ema sala-na’in nia mate, maibé

Atu fila fali mai Ha’u no bele moris. Refrão 

 

Evangelho                                                                                                                                                                                           Lc. 13. 1-9

Na’i Jesus Cristo nia Evangelho Nu’udar São Lucas haktuir:

Iha tempo nebá, ema mai fó hatene ba Jesus kona ba ema Galileia sira nebé Pilatos haruka kahur sira ran ho balada sira nia ran, nebé sira hasa’e ba lulik. Jesus hatan ba sira: “Imi hanoin katak ema Galileia sira ne’e áat liu fali ema Galileia sira seluk tanba sira terus nune’e? La’e, Ha’u dehan ba imi; maibé imi la hakribi karik imi nia sala, imi mós sei mate hanesan sira. Hanesan mós sira sanulu resin  ualu nebé uma andar Siloé nian hanehan mate uainhira uma ne’e monu: imi hanoin katak  sira áat liu fali sira seluk iha Jerusalém? La’e, Ha’u dehan ba imi; maibé imi la hakribi karik imi nia sala, imi hotu sei mate hanesan sira”.

Nia dehan tan aiknanoik ida ne’e ne’e.”Ema ida kuda tiha ai figuera ida iha nia to’os loron ida nia ba buka nia aifuan, maibé la hetan. Tan ne’e nia hateten ba to’os atan: ‘Tinan tolu ona ha’u mai buka aifuan iha aihun ne’e, maibé la hetan ida. Tesi tiha nia tansá nia susu leet rai bokur?’ Maibé to’os atan hatan: ‘Nai, husik nia tinan ida ne’e tan, atu ha’u sei ke’e hadulas nia hun hodi tau mós rai metan. Tinan oin mai nia sei fó fuan karik, di’ak; lae karik, mak ha’u sei tesi tiha nia’’’.

Lia Maksoyn.

Leave a Reply

Your email address will not be published. Required fields are marked *