shadow
Diocese de Dili > NOTÍCIAS > LETURA DIÁRIA > Sexta-Feira, XXIX Tempo Comum (ANO A)

Sexta-Feira, XXIX Tempo Comum (ANO A)

Primeira Leitura                             Ef. 4. 1-6

Lia housi São Paulo nia Surat ba sarani sira iha Éfeso:

Maun alin sira: Ha’u, ema dadur  ida iha Na’i, husu imi atu moris lolós tuir imi nia vocação. Tulun malu ho domin, la hodi hanoin imi an rasik, maibé ho laran maus no paciência. Halo buat hot-hotu atu imi bele sai laran ida de’it iha Espírito, housi dame nebé halibur imi hamutuk. Iha isin ida de’it, espírito ida de’it, nu’udar Maromak bolu imi hotu nia esperança ida de’it, uainhira Nia bolu  imi. Iha Na’i ida de’it, fiar ida de’it, baptismo ida de’it no Maromak ida de’it. Nia mak ema hot-htou nia Aman; Nia ukun ida hot-hotu, Nia book an housi ita  hot-hotu no Nia iha ita hot-hotu.

Maromak Futar Lia.

 

Salmo  Responsorial                                                                                                                    Sal. 23(24). 1-2, 3-4ab, 5-6 (R. cf. 6)

Refrão : Ema otas ne’e mak buka Na’i!!! Repete-se

Rai no buat hotu nebé iha nia, Na’i Nian;

Mundo no buat tomak hôrik iha nia.

Maromak hatur rai iha  tasi leten,

Hametin rai iha laloran leten. Refrão

 

Sé mak bele sa’e ba Maromak Nia foho,

Eh hôrik iha Nia kadunan santo?

Ema nebé laran mós no liman la sala,

Ema nebé la jura lia bosok. Refrão

 

Ema ne’e sei simu Na’i Nia bensa,

Nia sei hetan kolen housi Maromak, nia Maksoi.

Ema otas ne’e mak buka Na’i,

Be buka Jacob nia Maromak Nia futar oin. Refrão

 

Aclamação                                                                                                                                                                                     cf. Mt. 11. 25

Refrão : Aleluia, Aleluia!! Repete-se

Rahun di’ak ba Ita, Aman, Na’i lalehan no rai nian, tan

Ita hatudu mistério reino lalehan nian ba kiik sira.  Refrão

 

Evangelho                                                                                                                                                                                     Lc. 12. 54-59

Na’i Jesus Cristo nia Evangelho nu’udar São Lucas haktuir:

Iha tempo nebá, Jesus dehan tan ba ema lubun boot: “Uainhira imi haré kalohan ida iha loromonu, imi dehan katak udan sei tau, no mosu duni nune’e. Uainhira anin huu housi tasimane, imi dehan katak loron sei manas, no mosu duni nune’e. Imi ema laran makerek sira! Imi hatene si’ik buat nebé mosu iha lalehan no iha rai, nusa mak imi la hatene si’ik otas ne’e?  Tan sá imi rasik la haré buat nebé lós? Ne’e duni, uainhira  ó ba tribunal hamutuk ho ó nia funu baluk, buka hadame malu ho nia iha dalan; keta halo be nia lori ó ba juiz, hafoin juiz saran ó ba guarda, no guarda hatama o iha dadur laran. Ha’u dehan ba o katak ó sei la sai housi nebá to’o ó selu hotu”.

Lia Maksoyn.

Leave a Reply

Your email address will not be published. Required fields are marked *