shadow
Diocese de Dili > NOTÍCIAS > REFLEXÃO > MATENEK NABILAN KMOOK NAFATIN, LENO NIA-AN BA EMA SIRA NEBÉ HADOMI NIA, HATUDU-AN BA EMA HOTU NEBÉ BUKA NIA (Sab 6, 13)

MATENEK NABILAN KMOOK NAFATIN, LENO NIA-AN BA EMA SIRA NEBÉ HADOMI NIA, HATUDU-AN BA EMA HOTU NEBÉ BUKA NIA (Sab 6, 13)

Maun alin doben sira,

Ita hotu nebé oras ne’e halibur-an iha ne’e ho idade nebé ita ida idak iha, ita koko rasik ona moris ne’e oinsa? Moris ne’e ninia di’ak no at, moruk no midar oinsa. Nune naturalmente ita hakasan ho maneira sira hotu no ho força no kbiit be ita iha atu halo moris ne’e facil liu tan no fo ksolok mai ita, tamba hatene katak moris la facil, precisa halao moris ne’e diadi’ak mak ita hotu hotu hahu kedas ita kiik mai ita buka apreende liu husi ita nia inan aman ho família sira no liu husi escola hodi ita bele matenek naton hodi halao moris ne’e didi’ak los no halao moris ne’e facil liu tan.

 

Primeira leitura fo hanoin mai ita kona ba matenek ne’e se, no matenek ne ita tem que buka oinsa? Dehan katak matenek lolos ne’e mak sabedoria; Hatene Maromak. Hatene Maromak basa Maromak hatudu ninia-An ba ita ema sira. Ema hotu nebé hakbesik-an hodi buka Nia sei sei hetan duni Nia. Hetan matenek ida nebé lolos katak hetan Maromak no wainhira hetan lolos ona Maromak hodi horik hamutuk ho nia, ita sei la susar tan. Los duni wainhira ita horik ho Maromak ita sei la susar tan. Nune’e maun alin doben sira, matenek lolos iha rai klaran ne’e mak matenek ida nebé HATEN NA’I MAROMAK, hodi Moris halo tuir de’it ninia hakarak sira, basa nune’e lori ba moris ida nebé facil no fo ksolok liu, fo laran metin mai ita katak moris ne’e sei sai di’ak no sei nakonu ho ksolok, domin no paz lolos basa Nia horik hamutuk ho ita. Ida ne’e mak segredo kona ba matenek lolos, kona ba Maromak ninia tulun no ninia hakarak ninia domin no ninia moris hamutuk ho ita ema sira.

 

Doben maun alin sira, iha tempo no mundo sira ohin loron nian tamba necessidade moris nian halo ema barak buka matenek to iha inteligencia de’it la too iha sabedoria, tan ne’e halo sira fiar de’it iha ciência nebé sira apreende no iha sasan sira be hanesan tecnologia ne’e mak sai nudar sira nia Maromak ba sira basa sira la conhece Maromak be Matenek lolos ninia na’in. Wainhira ita sai hanesan sira hodi para de’it iha ciencia no tecnologia ita la matenek lolos, basak ita la hakat ba too iha Maromak. Hakat ba too iha Maromak laos hanesan conhecemento maibé hakatak ba too Maromak iha fiar no iha moris hamutuk ho nia, wainhira moris ona nune mak ita sai matenek lolos, maibé wainhira moris too de’it iha ciencia no tecnologia ita ladauk matenek lolos basa ciencia no tecnologia laos eterno, sei mohu no hotu iha ita-an wainhira ita ninia moris hotu iha mundo raiklaran ne’e ho mate, ciencia no tecnologia  la lori ema ba too eternidade, maibé matenek lolos be mak Maromak rasik ne’e eterno no lori ema ba too eternidade iha moris. Segunda leitura haktuir mai ita kona duni ba realidade ida ne’e.

Maun alin sira wainhira ita hatene Maromak ka ita sai matenek lolos mak ita mos sei hatene katak moris lolos ne’e mak oinsa? Moris lolos ne’e laos mak moris ida nebé halao de’it iha rai ne’e no loron ida sei hotu iha rai ne’e maibé, moris lolos ne’e mak moris rohan laek ka eterno ne’e. Eterno iha moris ida nebé ksolok, domin, no dame nebé ita hetan hahu ona iha rai ne’e sei la hotu de’it iha rai ne’e maibé sei continua too iha Lalehan. Segunda leitura hakturi lolos ida ne’e mai ita hodi dehan katak ita lalika beik kona ba experiencia mate nian be acontece mai ita hotu maibé ita tem que hatene ka sai matenek lolos kona ba moris ne’e iha moris rohan laek nebé tamba fiar iha Cristo ita hotu sei hetan duni, Cristo mak sei halo ita hetan matenek lolos no moris rohan laek lolos tamba ita fiar iha Nia. Ita rona haktuir mai ita dehan “too nia tempo, ita nebé sei moris hodi hein loron nebé Na’i sei hiit an fila fali mai,  sei hasoru  Na’i rasik nebé hiit an mai tun husi lalehan, uluk nana’in sei moris hias sira nebé mate ona iha Cristo. Hafoin  ita nebé sei moris, ita sei sae hamutuk ho sira ba leten aas, ba hasoru malu ho Cristo, nune ita sei hela nafatin ho Nia no ita nia ksolok sei rohan laek.” Atu bele too iha neba maun alin sarani doben sira, ita buka atu halao moris ne’e ho neon moris nafatin hodi lao tuir no fiar metin nafatin ba Maromak matenek nia na’in no matenek lolos ninia hun perseverantemente, laos momentaneamente ka temporalmente de’it. Ita buka lao hamutuk ho Maromak no moris tuir nafatin ba nafatin ninia hakarak sira iha buat hotu be ita halo, iha momento hotu hotu no iha tempo hotu hotu hanesan ohin ai knanoik haktuir mai ita iha evangelho, katak ita tem que sai matenek hanesan feto na’in lima be matenek ne’e, neon moris nafatin no pronto nafatin atu halao tuir Maromak ninia hakarak iha tempo no fatin hotu-hotu. Amen.

 

Becora, 08 Novembro 2020

DC XXXII, ANO A, Pb.

Leave a Reply

Your email address will not be published. Required fields are marked *