shadow
Diocese de Dili > NOTÍCIAS > LETURA DIÁRIA > Quarta–Feira, XXXII Semana Tempo Comum (ANO A)

Quarta–Feira, XXXII Semana Tempo Comum (ANO A)

Primeira Leitura                           Tit. 3. 1-7

Lia housi São Paulo nia Surat ba Tito:

Oan doben: Halo sira hanoin katak sira iha knaar atu hamta’uk liurai no na’i ulun sira; sarani sira halo tuir sira nia haruka; sira sei hadi’a an nafatin atu halo hahalok di’ak;  sira la bele halo áat ema nia naran, la buka istoria malu, maibé laran di’ak no hatudu laran maus ba ema hotu. Basá uluk ita mós beik, ulun tós, la’o dalan sala; hakaran áat oi-oin ukun ita, ita moris ho laran áat no laran hirus; odi malu no mós hirus ita an rasik.

Maibé uainhira Maromak, ita Maksoin Nia laran di’ak no domin mosu mai ona, la’os tanba Nia haré buat di’ak ruma iha ita, maibé tanba de’it Nia laran luak, mak Nia soi ita hodi ué moris hi’as nian nebé hamos ita no hafoun ita ho Espírito Santo, nebé Nia fakar ho laran luak housi Jesus Cristo, ita Maksoin. Nia halo ne’e atu ita bele sai lós iha Maromak futar oin tan Nia graça, atu sai lima-rohan na’in nebé hein atu simu moris rohan laek.

Maromak Futar Lia.

 

Salmo Responsorial                                                                                                                          Sal.  22(23). 1-3ª, 3b-4, 5-6 (R. 1)

Refrão : Na’i ha’u nia Mahein, ha’u la kuran buat ida!!! Repete-se

Na’i ha’u nia mahein, ha’u la kuran buat ida;

Lori ha’u ba hakmatek iha du’ut matak,

Lori ha’u ba wé malirin

Hodi haksolok ha’u klamar. Refrão

 

Nia lori ha’u kona dalan lós tan hadomi Nia naran.

Maski ha’u la’o housi rai kle’an nakukun,

Ha’u sei la ta’uk buat áat ida, tan Ita hamtauk ho ha’u.

Ita nia ai tonka no ai tato,an,

Fó laran metin mai ha’u. Refrão

 

Ita hadi’a aihan mai ha’u

Iha ha’u funu baluk sira oin.

Ho mina, ita hamorin ha’u ulun;

Ha’u cálice nakonu resin. Refrão

 

 

Laran di’ak no graça sei la’o tuir ha’u

Lor-loron iha ha’u nia moris;

Ha’u sei hela iha Na’i Nia uma

Tinan-ba- tinan nafatin. Refrão

 

Aclamação                                                                                                                                                                                         1Tes. 5. 18

Refrão : Aleluia, Aleluia!! Repete-se

Fó agradece ba Maromak iha fatin no iha tempo hot-hotu, basá,

Ida ne’e mak Maromak hakarak imi halo iha Cristo Jesus. Refrão

 

Evangelho                                                                                                                                                                                       Lc. 17. 11-19

Na’i Jesus Cristo nia Evangelho nu’udar São Lucas haktuir:

Iha tempo nebá, Jesus liu housi Galileia no Samaria atu ba Jerusalém. wainhira nia tama daudaun ba knua ida, ema moras lepra na’in sanulu mai hasouru Nia. Housi dook sira hasa’e lia dehan: “Jesus, mestre, sadi’a atan ami!” Haré tiha sira, Nia dehan ba sira: “Imi ba hatudu imi an ba na’ilulik sira.” La’o tuir dalan, sira sai mós ona. Sira ida, haré katak nia isin di’ak fali ona, fila fali hodi hahí Maromak ho lia maka’as;  nia taka oin ba rai besik Jesus nia ain hodi agradece. Ema ne’e Samaritano ida. Jesus dehan ba nia: “La’os ema na’in sanulu mak sai mós? Sira na’in sia iha nebé? Sira ida la fila mai atu fó glória ba Maromak, mak ema malae ne’e de’it?” Hafoin Nia dehan ba ema ne’e: “Hamriik, la’o ba! O nia fiar mak soi o!”

Lia Maksoyn.

Leave a Reply

Your email address will not be published. Required fields are marked *