shadow
Diocese de Dili > NOTÍCIAS > LETURA DIÁRIA > Sexta–Feira, XXXII Semana Tempo Comum (ANO A)

Sexta–Feira, XXXII Semana Tempo Comum (ANO A)

Primeira Leitura                             2Jo. 4-9

Lia housi São João nia Segunda Surat:

Ha’u haksolok tebes uainhira ha’u hatene katak ita boot nia oan balun la’o tuir lialos, tuir ukunfuan nebé ita simu housi Aman. Ohin ha’u husu ita, na’in feto, la’os nu’udar ida nebé hakerek ukunfuan foun, maibé nu’udar houri uluk ita hotu simu ona, katak imi hadomi malu; no ne’e mak domin: katak ita hotu la’o tuir nia ukunfuan sira. Ukunfuan mak ne’e: katak ita hotu la tuir domin, nu’udar imi rona ona houri uluk kedas.

Ohin bosokteen barak mosu ona iha rai; sira ne’e la fiar katak Jesus Cristo halo an ba ema. Ida ne’e mak lohidor no anti-Cristo. Imi rasik haré ba; atu imi keta lakon buat nebé imi hetan ona ho imi nia serbisu, maibé manan imi nia kolen. Ema tomak nebé la la’o tuir no la hôrik iha Cristo nia hanourin la hela iha Maromak; ida nebé laran metin ba hanourin ne’e hela iha Aman no iha Oan.

Maromak Futar Lia.

 

Salmo Responsorial                                                                                                                 Sal. 118(119). 1, 2, 10, 11, 17, 18 (R. 1b)

Refrão : Ksolok ba ema nebé moris tuir Na’i Nia ukunfuan!!! Repete-se

Ksolok ba sira nebé moris tuir dalan rohan laek,

Hodi la’o tuir Na’i Nia lei.

Ksolok ba sira nebé halo tuir Na’i Nia hanourin,

Buka Nia ho fuan tomak. Refrão

 

Ho fuan tomak ha’u buka Ita,

Keta husik ha’u hadook-an housi Ita lei.

Ha’u rai iha ha’u fuan Ita futar liafuan,

Atu keta sala hasouru Itaboot. Refrão

 

Haraik di’ak ba Ita atan,

Ha’u sei moris no halo tuir Ita liafuan.

Na’i, loke ba ha’u matan

Atu haré Ita ukunfuan nia kmanek. Refrão

 

Aclamação                                                                                                                                                                                           Lc. 21. 28

Refrão : Aleluia, Aleluia!! Repete-se

Imi hamriik ba hodi foti imi ulun, basá

imi nia maksoin besik ona. Refrão

 

Evangelho                                                                                                                                                                                      Lc. 17. 26-37

Na’i Jesus Cristo nia Evangelho nu’udar São Lucas haktuir:

Iha tempo nebá, Jesus lia tun ba escolante sira: “Nu’udar mosu tiha ona iha Noé nia loron, nune’e mós sei mosu  iha Oan Mane nia loron sira: sira han hemu, mane sira hola feto, feto sira hola mane to’o loron nebé Noé tama iha ro laran no udan tau maka’as nebé halakon sira hotu. Sei mosu mós hanesan iha Lot nia loron: sira han hemu daudaun, sira sosa no faan, sira kuda no harii uma. Maibé iha loron nebé Lot sai tiha housi Sodoma, ahi no enxofre tun housi lalehan hodi oho sira hotu. Nune’e mós sei mosu iha loron nebé Oan Mane sei hatudu an.

Iha loron nebá, ema nebé iha uma nia kakuluk keta tun atu hola nia sasan sira; nune’e mós ida nebé iha to’os keta fila fali ba buat nebé nia husik. Imi hanoin fali Lot nia feen.”

“Ema nebé hakarak soi nia moris, sei lakon moris ne’e; no ema nebé lakon nia moris, sei soi nia. Ha’u dehan ba imi: iha kalan nebé ema na’in rua sei toba iha fatin ida: sei lori ida hodi husik ida seluk. Feto na’in rua sei tuku batar hamutuk: sei lori ida, hodi husik ida seluk.” Sira simu dehan: “Na’i, buat ne’e sei mosu iha lós nebé?” Nia hatan ba sira: “Iha fatin nebé isin mate hela, iha nebá mós mak manu makikit sira sei halibur hamutuk.”

Lia Maksoyn.

Leave a Reply

Your email address will not be published. Required fields are marked *