shadow
Diocese de Dili > NOTÍCIAS > REFLEXÃO > “TALENTO NU’UDAR GRAÇA HOUSI MAROMAK”

“TALENTO NU’UDAR GRAÇA HOUSI MAROMAK”

Reflexão & Leituras DOMINGO COMUM XXXIII/Ano A/2020

Prov. 31, 10-13. 19-20. 30-31  Sal. 127(128), 1-2. 3. 4-5   1Tes. 5, 1-6   Mt. 25, 14-30

 

Rahun di’ak ba ida nebé tuir Maromak nia dalan.Santa Teresa de Calcutá hatete: “se ita pertence ba Jesus, ita aprende atu fiar, se ita aprende atu fiar, ita aprende mos atu hadomi. Se ita hadomi ita aprende atu servi ho haraik-an hanesan Cristo”.  “Halolo imi nia liman hodi servi no imi fuan hodi hadomi>><<…ida simu talento lima, ida seluk rua no ida ikus ida de’it >>(Mt 25,15).

Santa Teresa de Calcuta hakerek Ninia experiência ida nune’e; iha kalan boot ida, teki-tekil, ema ida mai too madre sira nia hela fatin hodi hateten katak; <<iha família ida ho oan nain walu, sira la han buat ida iha loron tomak tan sira ai-han la iha>> rona tiha notícia ne’e,  madre Teresa foti kedas ai-han ruma, hafoin lori rasik hodi too ba fatin nebá. Wainhirania too ihafamília ne’e nia horik fatin, nia haree labarik oan sira oin nakfilak triste tan sira hamlaha. Sira oin nakraik tan terus resin ba kabun.

Simu tiha ai-han housi madre Teresa, labarik sira ne’e nia inan la dauk fahe kedas ba oan sira maibé, senhora ne’e sei fahe fali tan ai-han ne’e sorin baluk ba bandeija ida hodi lori sai ba liur. Wainhira senhora ne’e fila hikas mai, Madre Teresa husu  nia foin ba iha nebé?. Ho haraik-an Senhora ne’e fo hatene ba madre katak <<vizinho iha uma sorin mos hamlaha hela>>.

Haree tiha lalaok ne’e, madre Teresa hakfodak no foin compreende katak afinal maske sira hamlaha atu mate dau-daun ona mos sira la haluha-an nu’udar ema hodi fahe tan ai-han be sira simu ba mos sira nia vizinho. Ai-han nebé sira foin simu housi madre Teresa ne’e, dalaruma nu’udar Talento ida ba família ne’e. Maske simu ai-han oitoan de’it, afinal sira sei koko hodi fahe netik ba ema seluk.*

Experiência ne’e, bele mos acontece iha ita rain. Ita Timor oan iha costume kmanek ida mak sentimento social (rasa solider) nebé forte tebes. Wainhira maluk ida monu iha susar laran, maluk balu fo ho laran, balu fo tanba relação familiar maibé infelizmente, balu fali fo hodi hein no sura sira nia kolen.

Nu’udar ema fiar nain, Jesus iha Evangelho São Mateus habook ita fuan atu se fodik ita tilun ba ema laek sira nia halerik, hodi lolo liman atu sikat netik ita nia tulun. Laos atu ita sai heroi ka pahlawan maibé pelo menos sai netik belun no kadoras ida nodi hasuli mos graça nebé ita simu gratuitamente housi Maromak tuir ida-idak nia capacidade atu satan netik laloran terus ita nia maluk sira be kuran liu iha sira nia moris, ba sira be hamlaha ba justiça, hamrok ba paz, kiak ba ksolok, mukit ba ai-han lorloron ni’an.

Iha Evangelho, Jesus haktuir katak talento nain ne’e bolu atan sira hodi fo hela osan mutin eh talento tuir ida-idak nia kbiit ho quantidade nebédiferente. Talento nain  ne’e mos  conhece duni atan hirak ne’e no tau nia confiança tebes ba emar hirak ne’e. Hanesan hakerek iha livro profeta Naum Testamento tuan ni’an dehan<<Nai ne’e di’ak…nia conhece ema sira be hamahan-an iha Nia>> (Na 1,7).

Tan ne’e, atan ida simu talento lima, ida fali rua no ida ikus simu ida, (Mt 25,15); maibé,  entre atan hirak ne’e la iha ema ida mak la simu buat ida.Talento eh Osan mutin nia nain nu’udar haktuir iha Evangelho mak Maromak rasik nebé halo-An ba ema iha Jesus Cristo nia pessoa tomak.

 Iha sorin seluk,  talento ka osan mutin nebé confia hela ba atan sira iha ai-knanoik Evangelho mak Graça/Dom especial ida nebé Maromak fo gratuitamente ba ema ida-idak atu bele desenvolve tuir nia posição iha mundo ne’e. Ho expressão seluk, graça eh talento nebé Maromak haraik ba ema ida-idak, ne’e nu’udar responsabilidade ida atu ema aplica iha rai ne’e no Maromak bele haré nia resultado. Housi dom especial ne’e, ema laos ona atan ba pecado maibé, graça ne’e transforma ema sai colaborador Maromak ni’an. Ema hotu be simu graça gratuita ne’e la precisa liki nia kosar wen, buka osan hodi sosa maibé basta fiar ho neon no laran tomak, colabora ho Maromak nia providência ho fidelidade hodi lori graça ne’e ba halekar ba ema hotu atu bele nafunan-nafuan wain liu tan, tuir lia-menon Nai Jesus ni’an iha Evangelho São João nebétenik: Eu vim para que tenham vida e a tenham em abundância // Hau mai atu ema hetan moris, hodi hetan moris ne’e wain liutan(Jo 10,10).

Iha mundo nebé nakonu-naresin ho problema oi-oin, Jesus Cristo bolu nafatin ema wa’in ba wa’in hodi ba colabora hamutuk ho Nia nodi hatan eh servi ba malu hanesan ema, nodi hakman netik terus mundo ni’an. Hanesan São Pedro nia lia-bolu iha nia carta dehan:<<imi ida-idak simu graça ruma, uza graça ne’e ba maluk sira nu’udar servidor graça Maromak ni’an>>. Nune’e, Graça nebé Maromak haraik gratis de’it ne’e, la significa katak fahe de’it atu nune’e ema ida-idak bele uza ba sira nia-an rasik maibé, hodi lori ba halekar ba ema wain hanesan mina morin eh perfume nebé ema wain mos bele sente netik nia morin, ba ida ne’e São João Crisóstomo afirma: ita fó karik tulun ba kiak sira, ne’e ita fó buat nebé pretence ba sira //se dais alguma coisa aos pobres, dais aquilo que lhes pertencem.

Iha Biblia Antigo Testamento ni’an, Maromak haraik graça ba ema lobuk hodi sai mata dalan no manu-ain ba povo Maromak ni’an. Graça nebé Nai fó nakonu ho perspectiva oi-oin. Graça mak dom maksoin ni’an, hanesan Noe nebé fiel tan hetan graça hodi salva nia família tomak housi tsunami (dilúvio) (Cf Gn 6).

Kmanek seluk, Abraão hetan graça Maromak ni’an hodi sai mata-dalan fiar povo Maromak ni’an no sai israelita sira nia bei-ala(Cf Gn 12,1-50). Rahun-di’ak lubuk ida mós Nai hasuli ba José, Jacob nia oan hetan graça eh rahun di’ak housi Maromak, hodi prepara ai-han iha Egipto atu nia aman Jacob ho ania maun-alin sira labele mate tan hasoru rai hamlaha (Cf. Gn 42). Tan graça, Moises sai Maromak nia profeta eh manu-ain hodi lori povo Israel sai housi ditadura liurai Faraó-Egipto ni’an. Maromak nia graça halo Samuel sai makaer fukun (Juiz) hodi tesi lialos ba povo tomak be hakilar bebeik justiça(cf 1 Sam 7,1-17). Graça mos habrani ema atu ukun povo ho di’ak, nu’udar eleição David ni’an, atu sai liurai hodi ukun povo Israel hasoru povo Gentio sira.

Maromak nia Graça nebé naksuli tun ba ema la hotu de’it iha Antigo Testamento maibé, iha mos Testamento Foun. Liu housi Jesus Cristo nebé Maromak no ema dala ida, graça ne’e sei suli la nahas nafatin too minuto ida ne’e.

Hanesan livro lamentação hakerek: <<Nai nia laran luak/misericordia rohan laek, Nia graça la nahas>>(Lm 3,22). Liu housi Jesus Cristo nia mistério encarnação, Maromak nia graça sai kmanek liutan hodi prova/membuktikan duni katak graça naksuli housi nia we-matan domin ida de’it mak Maromak. Basá, hanesan São João hateten:<<Maromak mak domin. Ema nebé horik ho domin, Nia horik ho Maromak no Maromak iha nia>>(1 Jo 4, 16).

Liu housi Jesus Cristo, ema sei la hamrook tan Maromak basá, hanesan evangelista São Joao hateten:<<Maromak lian (Oan) halo-An ba ema, mai horik ona ho ita………..Nia nakonu ho graça no lia los >>(Jo 1,14). Ema hotu be simu Talento eh graça hetan rahun di’ak iha Maromak futar oin hodi servi fali nia maluk sira be hamrook teb-tebes Maromak, kuran tebes ai-han ba isin nomos klamar ni’an. Tan ne’e mak madre Teresa de Calcuta hateten: <<se ita pertence ba Jesus, ita aprende atu fiar, se ita aprende atu fiar, ita aprende mos atu hadomi. Se ita hadomi ita aprende atu servi ho haraik-an hanesan Cristo>>.

Ne’e mak motivação kmanek liu atu graça Maromak ni’an ne’e, ita labele lori ba hakoi de’it iha ita nia rai kuak egoismo ni’an, ambição poder ni’an, kanten cargo política ni’an, baruk ten serviço ni’an, atitude corrupção ni’an…… nst  maibé, Graça eh Talento gratuita ne’e tenke hatudu iha prática hanesan fé ida. Tanba ne’e mak São Tiago iha ninia carta dehan:<<fé nebé la hatudu iha hahalok, fé ne’e buat mamuk boot ida). Ba ida ne’e, madre Teresa mos haklean liutan hodi hatada nia lian:<<halolo imi nia liman hodi servi no imi fuan hodi hadomi>> basá, la ses housi São Tiago nia lia fuan, Madre Teresa hatoo nia convicção liu housi nia hanoin dehan; fé iha acção ne’e katak serviço. Fruto eh ai-fuan fé ni’an mak serviço. Ai-fuan housi serviço ni’an mak paz/hakmatek no ksolok. Nune’e, ema hotu tenke serviço ba Paz, nu’udar haktuir iha livro provérbio Antigo Testamento ni’an dehan;<<lolo liman ba ema susar, loke liman ba ema kiak>>(prov. 31,20) .

Maibé, Infelizmente, Talento balu monu sala iha ema balu hodi ba hakoi de’it iha rai kuak hanesan lalaok nebé ema escriba no Fariseu sira prática iha Jesus nia tempo. Ema escriba no fariseu sira mak atan aat no baruk ten nebé ba hakoi Talento iha rai okos. Sira taka torneira graça nebé naksulin liu housi sira. Sira fila tiha torneira graça ne’e ba lei reb-rebo hodi hatur sira-an iha mentalidade fingido, ambição, kaan poder hafoin dehan ba sira-an; <<damen no hakmatek>> hela iha ita (Cf 1Tes 5,3), sira sei hetan susar wainhira Talento nain fila hikas <<Nai nia loron se mai hanesan ahu nain ida>>(Cf 1Tes 5.2).

Maromak hasuli Talento eh graça oioin liu housi ita ema, no confia ita ema hodi sai hanesan Maromak nia kadoras kmook nebé bele hasuli graça Maromak ni’an ba ema wain. Liu housi Jesus Cristo único maksoin ba mundo tomak, Maromak hasuli talento ou graça wain liu tan atu ita continua habelar Evangelho ou lia fuan ksolok Cristo ni’an. Nune’e, graça suli sai housi we-matan ida de’it mak Maromak no suli daet ba ema fiar nain tanto feto ka mane nu’udar kadoras kmook, suli lekar iha sanak oioin.

Nune’e, sai lolos ona tuir buat nebé São Paulo hakerek iha nia carta ba sarani sira iha Roma dehan; <<tan ne’e, ita simu ona dom (Talento) oi-oin tuir Maromak nia graça nebé naksuli mai ita>> (Cf Rm 12,6). Iha loron ikus Maromak sei la husu” o simu talento hira” maibé Nia sei sisi hodi husu “saida mak o halo ho o nia Talento ?”.

Lição kmanek saida mak ita bele aprende housi Maromak nia Futar Lia sira iha missa santa loron ohin ni’an? Hanesan iha rai selu-seluk, iha ita nia rai doben Timor mos,Ita balun hetan graça eh Talentohodi sai hanesan ukun nain (governantes) be lori povo sarani ba moris justo, hakmatek no próspero. Ita balun tan simu Talentosai depuado hodi koalia lori povo lian laek iha aldeia dook sira laos koalia tuir fali patrão partido nia interece. Ita balun hetan graça sai juizo hodi lolo liman tane netik povo mukit sira be hakilar ba justiça. Ita balun simu Talento sai doutor moras isin ni’an hodi kura ema atus ba atus be hakilar no toba la dukur iha hospital sira. Ita balu simu Talento sai membro polícia no força armada hodi fo segurança ba povo no defende soberania rai ne’e ni’an. Ita balun simu Talento nu’udar professores hodi hasuli ita ni’an matenek ba estudante sira nu’udar futuro rai ne’e ni’an. Ita balun fali simu graça sai comerciante hodi fan ai-han loloron nebé ita la kuda iha ita nia toos. Labarik no foin sae lubuk ida tan graça, sai oan housi família ida hodi hamtauk inan-aman nu’udar Maromak nia saseluk. Ita barak sai inan-aman iha uma laran hetan graça hodi educa oan sira tuir ita nia cultura no tradição inclui valores Cristão ni’an. Maibé, keta haluha mos katak ita hot-hotu hetan graça hamatan ita nia maluk sira be la hetan ai-han ba loron ohin. Hanesan haktuir iha istória badak ohin feto faluk ho nia oan nain walu, nebé fahe mos sorin balu ba nia vizinho nebé sira mukit hanesan de’it. Basá sira mós imagem Cristo ni’an. 

Graça Maromak ni’an hirak ne’e hotu, dudu ita hodi ba desenvolve iha ita nia moris tomak, konta ho Maromak nia tulun. Basá, Maromak cria ita hotu,  no destina ita ba hetan ksolok rohan laek iha Nai nia Reino hanesan lia fuan nebé ohin ita rona iha Evangelho be hateten;<<…….…. mai haksolok hamutuk ho Hau ! >>  (Mt 25,23).  Assim Seja e Bem Haja. (IgnasOliveira2020)

 

Note:

Reflexão ne’e nu’udar paper exame HOMILIETICA nebé apresenta ona ba professor Pe. DR Domingos Sequeira (Fal) iha 2011 no publica ona iha Programa HAFUNAN FIAR Radio Timor Kmanek edição 2014

Leave a Reply

Your email address will not be published. Required fields are marked *