shadow
Diocese de Dili > NOTÍCIAS > LETURA DIÁRIA > Segunda-Feira, XXXIII Tempo Comum (ANO A)

Segunda-Feira, XXXIII Tempo Comum (ANO A)

Primeira Leitura            Ap. 1. 1-4;  2. 1-5ª

Lia Housi Livro Apocalipse:

Ne’e mak buat nebé Maromak hatudu ba Jesus Cristo atu Nia bele fó hatene ba Nia atan sira kona ba buat sira nebé sei mosu lalais; Maromak haruka nia anjo atu fó hatene ba nia atan João, no João fó sasin ba Maromak nia liafuan no ba Jesus Cristo nia lia sasin, hodi haktuir buat nebé nia haré. Rahun di’ak ba ema nebé lê lia menon ida ne’e, no rahun di’ak ba sira nebé rona nia, no halo tuir buat nebé hakerek iha nia, basá tempo to’o ona.

Housi João, ba kreda hitu Ásia nian: graça no dame ba imi housi Nia nebé iha ohin, uluk no tempo atu mai, housi espírito hitu nebé hela iha Nia kadunan nia oin.

Ba anjo kreda nian iha Éfeso hakerek nune’e, ‘Ne’e mak lia menon housi ida nebé káer fitun hitu sira iha nia liman kuana, nebé ahi-oan fatin hitu osan mean nian hale’u: Ha’u hatene buat hotu kona ba ó: oin sá lós ó serbisu maka’as no barak, oin sá lós ó terus ho paciência. Ha’u hatene katak ó la bele tahan ema áat sira, no oin sá ó koko bosokteen sira nebé hanaran an apóstolo maibé ikus mai hatudu katak sira bosokteen. Ha’u hatene mós katak ó paciência barak, no hetan terus barak tanba Ha’u, hodi la hanoin kole. Maibé ha’u kesar kona ba ida ne’e: Ó husik ona ó nia domin uluk nian. hanoin didi’ak ba ó nia moris molok ó monu; hakribi ó nia sala ba, no halo hahalok sira nebé ó halo uluk.

Maromak Futar Lia.

 

Salmo Responsorial                                                                                                                            Sal. 1. 1-2, 3, 4, 6 (R. Apo. 2. 7b)

Refrão : Ba ema be manan, ha’u sei fó han housi ai-hun moris nian!!! Repete-se

Ksolok ba ema nebé la tuir ema áat nia lia,

La tuir dalan maksalak.

Ksolok ba sira be la hadulur ho ema áat;

Maibé haksolok ho Na’i Nia ukunfuan,

Hodi hanoin nia kalan-loron. Refrão

 

Na’i hanesan ai-kudan ida iha ué-inan ninin;

Nafuan tuir nia tempo, nia tahan la namlaik,

Buat hotu nebé nia halo, sai di’ak de’it. Refrão

 

Maibé, ema áat sira nia moris oin seluk,

Sira hanesan háre-kain be anin lori,

Nia hatene ema lós nia dalan,

Dalan ema áat sira nian, lori ba rahun áat. Refrão

 

Aclamação                                                                                                                                                                                             Jo. 8. 12

Refrão : Aleluia, Aleluia!! Repete-se

Na’i dehan: Ha’u mundo nia roman; ema sé tuir Ha’u,

Sei hetan roman moris nian. Refrão

 

Evangelho                                                                                                                                                                                     Lc. 18. 35-43

Na’i Jesus Cristo nia Evangelho nu’udar São Lucas haktuir:

Iha tempo nebá, Uainhira Jesus hakbesik Jericó, ema matan delek ida tur iha dalan ninin hodi husu esmola. Roha tiha ema lubun boot liu daudaun, nia husu sáida mak mosu. Sira hatan, “Jesus housi Nazaré liu daudaun.” Ne’e duni, nia hakilar: “Jesus, David nia oan, sadi’a atan ha’u!” Sira nebé la’o iha oin haksi’ak nia atu nonok tiha, maibé nia hetok foti lia maka’as liu tan: “David nia oan, sadi’a atan ha’u!” Jesus para hodi haruka sira lori nia mai. Uainhira ema matan delek ne’e hakbesik, Jesus husu ba nia: “Ó hakarak Ha’u halo sáida ba ó?” Nia hatan: “Na’i, atu ha’u haré fali!” Jesus dehan ba nia: “Haré fali ba; ó nia fiar soi tiha ó.” Nia haré kedasno hahu tuir Jesus hodi hauélok Maromak. Haré tiha ne’e, povo tomak hahí Maromak.

Lia Maksoyn.

Leave a Reply

Your email address will not be published. Required fields are marked *