shadow
Diocese de Dili > NOTÍCIAS > LETURA DIÁRIA > I Domingo Advento (ANO B)

I Domingo Advento (ANO B)

Primeira Leitura                       Is. 63, 16b-17; 64, 1. 3b-8 (63, 16b-17.19b; 64, 2b-7)

Lia housi livro profeta Isaías:

Na’i, Ita Bo’ot ami Aman: Hori uluk kedas Ita naran “ami Maksoyn!” Na’i, tan sá Ita husik ami la’o dook housi Ita dalan, la hamta’uk ItaBoot? Tan Ita atan no tamba povo Ita liman rohan Ita hiit-an fila mai. Tebes Ita lés karik lalehan, hiit-an tun mai karik, foho sai tetuk hotu  iha Ita boot futar oin. Ita boot tun tebes duni, foho sira sai tetuk duni iha Ita futar oin! Tilun ida seidauk rona, matan mos la dauk haré katak Maromak seluk ida halo nune’e, hodi tulun sira nebé laran metin ba Nia.  Ita ba hasoru sira nebé ho ksolok moris tuir Justiça;  iha Ita dalan, sira hanoin Ita. Ita hirus tamba ami maksalak;  maibé, ami sei hetan maksoyn! Ami houtu nu’udar buat foer, ami nia hahalok di’ak, sai tiha nu’udar hena fo’er. Ami hotu monu hanesan ai tahan, ami salan lori ami hanesan anin. La iha ema ida temi Ita naran eh hader atu simu tulun husi Ita. Ne’e, tamba Ita subar Ita futar oin mai ami, hodi husik la’o lerek tuir ami salan. Maibé, Na’i  ami Aman, ami hotu sai housi Ita futar liman.

Maromak Futar Lia.

 

Salmo Responsorial                                                                                                                             Sal. 79(80) 2ac. 3b, 15-16, 18-19

Refrão : Na’i, ami Maromak halo ami fila, hatudu Ita futar oin mai ami, ami hetan maksoyn!!! Repete-se

Israel bibi-atan, rona hela mai;

tur nabilan iha Querubin sira fohon!

Hatudu Ita kbiit, mai sadia ami. Refrão

 

Maromak buat tomak nian, hiit-an mai hias,

Housi lalehan aas ba, haré mai!

Haré Ita toos, tahan nia,

Basá, Ita futar liman mak kuda nia! Refrão

 

Lolo liman ba ema be Ita hili,

Ba sira nebé Ita tau Ita kbiit,

Ami sei la husik tan Ita.

Haraik moris mai ami, atu ami temi Ita naran. Refrão

 

Segunda Leitura                                                                                                                                                                           1 Cor. 1, 3-9

Lia housi São Paulo nia surat ba sarani sira iha Corinto:

Maun-alin sira: Ita Aman Maromak no Na’i Jesus Cristo haraik dame no graça ba imi. Ha’u fo agradese nafatin ha’u nia Maromak tan graça nebé Nia haraik ba imi iha Jesus Cristo. Imi simu kbiit iha Nia ba imi lia fuan no ba imi neon, tuir imi testamunha lolós Cristo nian. Nune’e imi la kuran naran ona graça ida, imi sira be hein Ita Na’in Jesus Cristo ninia hatudu. Nia mak sei hametin nafatin  imi nia fiar, sei halo imi  mos nafatin to’o Na’i  Jesus Cristo nia loron. Maromak nebé bolu imi  atu hamutuk ho Nia oan, Ita Na’in Jesus Cristo, sei halo tuir duni nia liafuan.

Maromak Futar Lia.

 

Aclamação                                                                                                                                                                                    Sal. 84-85, 8

Refrão : Aleluia, Aleluia!! Repete-se

Na’i, hatudu Ita domin mai ami,

Haraik Ita Maksoyn mai ami. Refrão

 

Evangelho                                                                                                                                                                                    Mc. 13, 33-37

Na’i Jesus Cristo nia Evangelho Nu’udar São Marcos haktuir:

Iha tempo neba, Jesus lia tun ba escolante sira:”Matan moris neon nain, basá, imi la hatene sa loron”. Hanesan ema ida nebé lao ba rai dook; molok husik nia uma, nia fahe knaar ba atan idaidak, fo mos kbii tomak ba sira, hafoin haruka hela atan odamatan nian tau matan ba sira. Nee duni, imi matan moris neon nain basá, imi la hatene wainhira Nai too mai: Lorokraik, kalan fahe rua, manu kokorek, dadersan nakukun. Nia tekitekil  mai keta hetan imi toba hela…………buat nebé Hau dehan ba imi, Hau dehan ba hothotu: matan moris neon nain!

Lia Maksoyn.

Leave a Reply

Your email address will not be published. Required fields are marked *