Primeira Leitura Ap. 22. 1-7
Lia housi Livro Apocalipse:
Na’i nia Anjo hatudu mai ha’u, João, mota be moris nian, nabilan hanesan vidru, sai housi Maromak no Bibi Oan nia kadunan liu housi dalan cidade nian, nia klaran. Iha mota ne’e nia sorin rua iha ai-hun moris nian nebé fó fuan dala sanulu resin rua iha tinan ida nia laran, fuan oin ida ba fulan ida-idak, no nia tahan aimoruk di’ak ba nação sira. La iha tan buat ida nebé iha malisan. Maromak no Bibi Oan nia kadunan sei hela iha nia fatin iha cidade; nia atan sira sei hana’i Nia. Sira sei haré Nia oin ba oin, no Nia naran sei hakerek iha sira nia reentos. Kalan la iha ona no sira sei la precisa tan ahi oan eh loro nia naroman, basá Na’i mak Maromak sei leno sira. Sira sei ukun ba nafatin.
Anjo dehan mai ha’u, “Liafuan sira ne’e lós tebes duni no sira sei mosu. Na’i Maromak, nebé haraik espírito ba profeta sira, haruka tiha nia anjo atu fó hatene ba Nia atan buat nebé sei mosu mai. La kleur ha’u sei mai lalais.”
Rahun dia’k ba sira nebé rai hela ho laran lia menon profeta nian iha livro ne’e.
Maromak Futar Lia.
Salmo Responsorial Sal. 94(95). 1-7 (R. 1Cor. 16. 22b; Ap. 22. 20)
Refrão : Marana tha! Mai, Na’i Jesus!!! Repete-se
Mai hotu haksolok iha Na’i,
Ita hahí Maromak, ita Maksoi;
Ita ba Nia futar oin, fó agradece,
Ita hahí Na’i ho lian knananuk nian. Refrão
Rai kle’an sira iha Nia liman,
No foho tutun sira Ninian;
Tasi Ninian, basá Nia mak hakiak,
Hari metin rai hodi Nia futar liman. Refrão
Mai hotu, takrabat ba rai,
Adora Na’i be halo ita moris,
Na’i mak ita Nia Maromak,
Ita, Ninia povo, bibi sira housi Ninia luhan. Refrão
Aclamação Lc. 21. 36
Refrão : Aleluia, Aleluia!! Repete-se
Imi matan moris hodi hamulak nafatin atu imi bele
hamriik ho laran metin iha Mane Maksoi Nia futar oin. Refrão
Evangelho Lc. 21. 34-36
† Na’i Jesus Cristo nia Evangelho nu’udar São Lucas haktuir:
Iha tempo nebá, Jesus lia tun ba escolante sira hodi dehan: “Imi matan moris neon na’in ba, keta laran todan tan hahalok áat sira, tan lanu, tan fó neon resin ba moris ne’e atu loron ne’e keta to’o teki-tekir de’it hanesan hani; basá nia sei monu hanesan hani ida ba ema hotu nebé tur iha raiklaran tomak. Ne’e duni, matan moris hodi hamulak nafatin ba, atu imi bele hetan biit hodi hadook an housi buat nebé sei mosu no bele hamriik metin iha Oan Mane nia oin.”
Lia Maksoyn.
