shadow
Diocese de Dili > NOTÍCIAS > REFLEXÃO > VIGILÂNCIA

VIGILÂNCIA

Reflexão & Leituras Domingo ADVENTO 1, Ano B, 2020

 

Facebooker ida iha início fulan Novembro ne’e, halo quote cómico dehan nune’e: “Hei…! agora foin Novembro, imi ne’e seidauk tama Dezembro (Natal), imi toca ona música Natal. Imi ne’e la jaga liu Novembro nia perasaan (sentimento)”. Quota ne’e hanesan piadas ida ba ita Católico nebé influenciado housi ema comerciante sira basá, foin mak Novembro klaran de’it, música natal toka lem-lemo iha loja sira, presépio Natal (christmass Tree/pohon Natal) hahu monta iha cidade nia canto sira.

Anónimo ida dehan: “Melihatlah ke atas untuk urusan akhiratmu dan melihatlah ke bawah untuk urusan duniamu maka hidup akan tenteram

Nu’udar sarani, ita precisa coloca tempo bai-bain ho tempo Advento-Natal tuir nia fatin ou círculo litúrgico atu valor Natal ne’e fo ksolok ba ita. Se lae, foin mak atu Advento de’it, ema hot-hotu rame-rame celebra ona Natal.

Igreja católica tinan- tinan fo tempo semana 4 tu-tuir malu ba sarani sira hodi halo preparação molok simu Jesus Maksoin  iha tempo Natal.

Durante tempo Advento hirak ne’e, nudar tempo oportuno atu sarani ida-idak prepara moris tuir dalan sarani nian.

Normalmente, durante tinan ida tomak, Igreja Católica hafahe ciclo litúrgico ba parte sira hanesan: Advento, Natal, Comum (bai-bain), Qauresma, Páscoa, fila ba Advento tuir rotação ano litúrgico A, B, C.

Nune’e, Tempo Advento nudar oportunidade di’ak atu sarani sira prepara moris tuir dalan los hodi hasoru kbiit demónio, kbiit nakukun, ema bosok ten sira, hadau malu poder sira, probelemas quinto-canto, iha ne’e inclui seita sira hanesan jeova ho adventista sabatikal ho tan denominação bar-barak nebé oras ne’e lao housi uma ba uma no halo promoção iha facebook. Tanba ne’e mak São Marcos Evangelista hatete:“Ne’e duni, imi Matan moris neon nain ba, basá, imi la hatene wainhira Nai  too mai” (Mc 13, 35).

História murak ida hakerek iha jornal diário STL edição quarta feira loron 22 fulan  setembro tinan 2010 hanesan tuir mai: Infermeira ida naran BETTY  residência iha Boston América.  Nia forma família durante tinan 30 ona, tek-tekil iha loron 3 fulan Maio tinan 2010, nia foin hakfodak katak ninia kadeli casamento nebé halo housi osan mean no hafutar tan ho diamante (berlian) monu lakon no pior liutan,  nia mos la hatene katak kadeli ne’e lakon  iha serviço fatin ka iha uma. Nia hakas-an hodi buka tiha ona ba mai iha fatin serviço, iha uma no iha fatin balu nebé nia deskonfia katak kadeli casamento ne’e lakon iha nebá maibé,  infelizmente la consegue hetan.

Iha hospItal, fatin nebé infermeira BETTY  serviço ba, nia fo hatene ba ninia kolega infermeiro sira seluk atu ajuda buka netik kadeli nebé lakon ne’e maibé la iha ema ida interece hodi ajuda nia buka hetan fila fali kadeli casamento ne’e. Nuudar ema neon nain, infermeira ne’e la desesperado no fiar-an hodi buka nafatin nia kadeli ne’e, basá nia fiar katak loron ida nia sei hetan fila fali duni kadeli ne’e, maske la hatene bainhira. Iha loron ida, ninia maluk ida naran Bonie Filicicha hakbesik-an ba nia hodi fo hatene katak se BETTY hakarak hetan fali kadeli ne’e, di’ak liu  nia tur hakmatek, hanoin didi’ak momento ikus nia hatene cadeli sei iha nia liman harohan hodi sura ho Maromak nia  tulun no nia hetan fila fali ninia kadeli casamento nebé lakon.

Loos duni, infermeira BETTY ne’e reza badinas no harohan ba Maromak atu nia bele hetan fali kadeli casamento ne’e. Nune’e, liu tiha fulan tolu, teki-tekil iha dadersan ida, iha loron 28 fulan agosto tinan 2010, infermeira ne’e hetan fali kadeli casamento ne’e iha nia karreta laran wainhira nia atu ba serviço. Afinal ho oração, buat nebé impossível no hamate Ita nia vontade bele sai possível wainhira Maromak hakarak.

História ilustrda hanesan ne’e laos inventa maibé, ne’e realidade ida nebé além de acontece ba infermeira hanesan BETTY, bele mos acontece ba Ita lobuk ida iha Ita nia vida hanesan Cristão Católica. Lição murak nebé Ita bele aprende housi história badak ne’e mak; neon nain no confiança iha Maromak liu housi Ita nia oração loro-loron nian. Basá, Maromak fo confiança no Domin mai Ita hodi halao moris iha mundo ne’e. Oração nudar meio ida hodi facilIta ema nia comunicação gratuita ho Maromak. Comunicação entre ema ho ema liu housi telemóvel talvés tende precisa osan hodi carrega pulsa maibé comunicação entre ema ho Maromak liu housi oração ne’e gratis só precisa de’it mak Fiar no laran kmaan hodi comunica ho Maromak.

Ema balun dehan: Doa memberikan kekuatan pada orang yang lemah, membuat orang tidak percaya menjadi percaya dan memberikan keberanian pada orang yang ketakutan.Liu housi oração mak bele expressa Ita nia-an hanesan sarani nebé matan moris neon nain iha esperança hodi hein Nai Maksoin nebé sei mai iha loron ikus. Tan ba ne’e mak iha Evangelho são Marcos nian, Nai Jesus dehan: “Ne’e duni, imi Matan moris neon nain ba, basá, imi la hatene wainhira Nai  too mai” (Mc 13, 35).

Nu’udar craitura nebé fraco no limItado, Jesus nia lia murak ne’e hafanun Ita hodi matan moris neon nain, reza no se tilun ba Nai Maromak Nia futar lia fuan de’it mak Ita bele hetan tulun housi  Maromak ba knaar nebé nia fó hela mai Ita ida-idak no Ita mos bele alcança buat nebéIta mehi iha moris ne’e por exemplo hanesan acontece ba infermeira BETTY nebé neon nain no la desesperado hodi ikus mai consegue hetan fila fali ninia cadeli casamentu nebé lakon durante fulan tolu.

Ita hahu hakat tama ona ba Domingo uluk tempo Advento nian. Uma Creda Católica iha mundo rai klaran tama ona iha Ano Litúrgico foun ida, iha ciclo nebé celebra evento principal liu hot-hotu hodi  hanoin no halo preparação espiritual-físico ou preparação isin no klamar sarani nian ba Nai Jesus Cristo nia hiit-an mai ba dala rua iha loron ikus.

Tema importante iha tempo Advento mak vigilância ka matan moris neon nain. Evangelho nebé Ita rona iha Domingo semana ne’e, São Marcos Evangelista hakarak convida Ita atu matan moris neon nain. Hodi matan moris neon nain, reza no se tilun ba Nai Maromak Nia futar Lia Fuan de’it mak Ita bele hetan graça la nahas housi Nai Maromak ba knaar nebé NIA fó hela mai Ita ida-idak.

Laos halo vigilância de’it maibé, hodi hamulak ou halo oração, basá nudar sarani, Ita hetan obrigação hodi cumpri eh halo tuir Maromak nia hakarak tomak. Obrigação ida mak halo oração (reza) husu Maromak nia bensãobasá, Ita la hatene wainhira tempo ne’e sei too mai atu Nai maksoin sei hiit-an hikas mai iha mundo (Cf. Mc 13, 33)  ou ita nia fim do mundo mosu mai wainhira ita mate iha qualquer tempo. Vigilância ka matan moris neon nain iha Ita nia contexto fiar sarani nian, exige Ita nia fé, esperança, no caridade. Ne’e mak virtude fundamental Ita sarani Católica nian.

Iha tempo Advento ida ne’e,  precisa haforte Ita nia esperança eh hein. Ita nia realidade hatudu momos katak dala barak Ita baruk lalais enquanto Ita hein demais buat ruma nebé atu mosu mai maibé seidauk mosu hela de’it mai. Ema indoneásia sira baibain dehan: pekerjaan yang paling membosankan adalah MENUNGGU. Mentalidade ida ne’e mak iha tempu ohin loron sai hanesan veneno ba moris sarani nian.

Wainhira Ita lakon ona esperança ba Maromak maka Ita hahu hases-an neneik neneik housi dalan salvação nian. Ba ida ne’e,  Profeta isaias iha primeira leitura hakilar ba Maromak dehan” Nai tansa Ita housik ami lao dook housi Ita dalan, no la hamtauk Ita boot? Tan Ita atan no tanba povo Ita liman rohan, Ita hiit An fila hikas mai” (Is 63, 17).

Tama ona iha  tempo Advento, iha loja sira, kios sira, iha Timor Plaza, iha radio-Televisão sira, no iha uma sira  no iha fatin barak, ema hahu loke múzika natal nian. Revista no jornal sira mos apresenta imagen ka iklan oioin de’it relaciona ho Natal. Roupa obralan alias cuci gudang mos nabnaban de’it iha trotoar sira no loja oin sira. Ida ne’e fo tada mai Ita katak Natal besik dadun ona. Tinan-tinan enquanto tama ona iha Advento, Ita hatene katak tuir mai Ita sei celebra festa boot Natal Nai nia katak Nai Maksoin Jesus Cristo moris mai iha mundu hodi hola isin ida hanesan Ita ema.

Maibé, festa Natal nebéIta celebra tina-tinan, nudar evento ida nebéIta celebra fila fila hodi hanoin hikas Nai Maksoin Jesus Cristo nebé mai moris iha mundo iha tinan rihun rua resin liu ba. Maibé Ita mos keta haluha katak Ita nia esperança principal liu hotu iha tempo Advento mak hadia didi’ak Ita nia-an isin-kalamar tomak hodi hein Nai Jesus nebé atu hiit-an ba dala rua mai mundo hodi tesi lia ba ema di’ak no ema aat sira nomos ba ema moris no ema mate sira. Ida ne’e mak Ita nia esperança lolos nudar Cristão Católico atu nune’e Ita horik nafatin iha situação eh keadaan matan moris neon nain ou vigilância. Keta halo ba be wainhira loron ho tempo ne’e too de repente mai, Ita sibuk fali mak roupa foun, sapato foun, telemóvel foun mtor foun, kareta prado foun hodi haluha tiha Ita nia klamar.

Evangelho são Marcos nian iha Domingo semana ne’e, Ita rona ona Jesus Cristo nia lian nebé dehan:”Ne’e duni imi matan moris neon nain ba, basá, imi la hatene wainhira Nai too mai: lorokraik, kalan fahe rua, manu kokorek, dadersan nakukun. Nia teki-tekil mai keta hetan imi toba hela karik. Tan ne’e, matan moris neon nain ba”

Jesus tau atenção ba lia fuan hirak ne’e, basá Nia rasik housik hela mundo ne’e molok sae ba lalehan, no Nia  entrega hela  serviço ne’e ba Nia Apóstolo sira no mos ba Ita hotu nebé simu ona we baptismo nudar sarani Católico. Serviço no missão nebé Cristo housik hela  ba Apóstolo sira no Ita hotu mak atu continua haklaken Nai Maromak Nia Reino. Reino nebé sei haklaken ne’e laós serviço kamán maibé  serviço todan ida.

Tan ne’e, precisa sarani hotu nia esforço-an, sacrifício makás hodi halao knaar ida ne’e. Molok entrega missão ida ne’e, Jesus hanorin apóstolo sira, forma sira, no halo sira sai matenek no iha capacidade atu sira bele hasoru problema, dificuldade no conflito sira nebé sei mosu. Nudar São Paulo haktuir iha segunda leitura, iha carta ba sarani sira iha Corinto hateten(1Cor 1, 5-8) “Iha Nia, imi sei riku iha buat  hotu, ho lia fuan no matenek, wainhira fó sasin ba Cristo sai metin iha imi. Nune’e imi la kuran graça espiritual ida wainhira imi hein daudaun Ita Nai Jesus Cristo mosu mai. Nia sei halo imi laran metin too rohan no sala laek iha Nai Jesus Cristo Nia loron”.

Tebes,  Apóstulo sira riku duni, laós riku motor ho kareta nem riku osan iha banco maibé  riku espiritualmente iha Maromak nia graça no matenek tebes iha Maromak Nia lia fuan sira tamba Maromak haraik Espírito Santo nia kmanek oioin atu sira fó sasin kona bá Nia. São Paulo iha nia surat ba sarani sira iha Korinto(1Cor 12, 8-10), hateten teni “ba ema balu Maromak haraik Dom da ciência atu sai matenek, balu Dom da profecia atu haklaken, balu Dom da cura atu bele bali moras sira, tan ne’e mak sira fahe matenek ida ne’e mai Ita, atu Ita matan moris neon nain ba sasán mundo nian”. Maromak hanesan ema lao rai nebé housik hela nia uma hodi haraik kbiit ba atan sira, Ita sei halao ho oração no sei matan moris no neon nain nafatin, hodi hein too loron ikus wainhira Jesus fila híkas mai, ba dala rua nian.

Nai Jesus tau ona confiança tomak iha Nia escolante sira hodi fó ba sira esperança eh laran metin. Ne’e la significa katak Apótolo sira hein de’it hodi kous liman ka moris patarata no goza vida hodi hein Nai Nia hiit an mai, maibé, sira moris tuir no halao missão nebé Jesus entrega hela ba sira ne’e, ho nune’e sira mós iha obrigação  atu concretiza missão nebé Jesus confia hela ba sira iha vida concreta no iha situação difícil. Iha estado esperado ne’e mós, laós atu hein passivamente, maibé, hein activamente. Activo iha hahalok di’ak sira hotu nebé garante ba moris loron ikus nian. Valor sira ne’e mak valor humano, Amizade, justiça, caridade no moris tuir klalaok  Evangelho nian, hodi halo vigilância nafatin. Knaar nebé Maromak tau iha sarani idaidak nia kbaas exige Ita nia responsabilidade no participação hanesan porteiro ka ema nebé hein odamatan.

Ema nebé hein odamatan, iha serviço ida nebé nia tem que halo mak “vigilância ka berjaga-jaga”. Tuir São Marcos “porteiro” ne’e representa ema nebé iha responsabilidade máxima ba comunidade cristã hodi halao nia knaar sira ho di’ak no tau matan, ajuda malu no tahan netik sira dook housi babeur mundo nian. Ba Ita sarani sira, knaar porteiro nebéIta hetan mak; tau matan eh bali Ita nia isin no klamar nudar sasan lulik iha Maromak nia fuar oin. Nudar São Pedro iha nia carta dehan: “matan moris neon nain, tan imi nia funu balun, katak  diabo lao haleu hela imi hanesan Leão ida hodi buka atu han ema ruma” (1 Pe 5, 8). Nune’e,  knaar nu’udar porteiro tem que matan moris neon nain nafatin ba buat hotu.

Iha celebração liturgia advento nian, Igreja hakarak hamoris fali espírito hein ka semangat penantian. Lia fuan hein iha sentido popular mak Ita hanaran ESPERANÇA (ESPERAR) ba Maksoin (Messias); Nune’e, ho Advento, sarani hotu hola parte iha processo preparação molok Maksoin ne’e hiit-an mai. Preparação nebé merece liu mak; laos roupa foun maibé mos klamar nebé foun. Atu fase hamoos klamar laos uza be maibé uza Sacramento Confessa. Tanba ne’e mak Jesus rasik koalia iha Evangelho dehan; Matan moris Neon nain. Keta halo Ita mate de repente ou maksoin ne’e mosu derepente mai mak Ita hakfodak no Maromak sei dehan: terlambat sudah kau datang padaku hanesan Meriam Belina bai-bain hananu.

Saida mak Ita foti nudar lição murak eh hahan hodi habosu Ita nia klamar liu housi reflexão nebé Ita rona iha Domingo Advento semana ne’e?

1). Jesus dehan matan-moris no neon-nain, ba necessidade isin no liliu ba klamar nian; tanba maski espírito forte maibé isin fraco. Ita barak housik Ita nia isin fraco atu Domina fali Ita nia klamar. Nune’e Ita nudar sarani liliu jovem dala barak housi lerek tempo ba haksolok-an de’it ho borboleta-kalan, Ita balun soe tempo ba festa, hodi dansa kalan tomak too dader hodi hewai Ita nia obrigação nudar sarani, hanesan la ba missa, tuur iha Estrada ibun, joga biliard, SDSB, kur-kuru, bingo, bola guling no futu-manu.  

2) Maromak nia Futar Liafuan Domingo semana ne’e mos, convida Ita atu tau teni iha Ita fuan  lição rua:

Primeira, vigilância; São Marcos refere liu ba vigilância isin lolon nian hodi expressa eh hatudo liu ba vigilâcia espiritual. Mai Ita Cristão sira, precisa tau vigilância ba klamarl nian katak Ita bersiap siaga atu Ita la bele hakfodak ba Nai Nia hiit an mai nebéIta la espera. Se ne’e acontece duni Ita sarani sira labele dukur maibé hakbesik-an ba Cristo, tan Nia mak Ita mahon no Ita nia salvador. Mundo ohin loron hasoru força boot rua.  Força boot rua ne’e mak isin no klamar. Isin exige nia direito maibé klamar mós exige nia direito. Sira nia direito principal mak moris. Moris iha presente no iha futuro.  Moris presente mak realidade nebé Ita hasoru iha mundo ohin loron.  Moris ba futuro nian mak agora daudaun Ita hotu-hotu prepara hela atu hasoru. Tamba ne’e hanesan ema Cristão Ita sei halo vigilância lor-loron hodi hein Nai Nia loron atu mai.

Segunda: atu concretiza vigilância espiritual eh klamar nian, Evangelho ohin nian hatuur mai Ita condição rua: 1) Conversão no 2) Oração.

Primeiro caso: Nudar sarani Ita precisa tau iha Ita neon hodi halo conversão. Conversão katak Ita hare ba Ita nia hahalok aat no salan sira iha tempo passado nian hodi hadia fali Ita moris liuhousi sacramento confissão no hametin liutan Ita nia fiar nudar Católico  iha sacramento Eucaristia ou Missa nian. Ita dalabarak la halo vigilância espitual nian hanesan wainhira Ita e Ita nia maluk protestante sira, geova sira kaer Bíblia iha liman hodi tama-uma sai uma iha Ita nia bairro, maibé Ita foti fatuk no duni sira. 

Segundo caso mak halo oração: atu hadia Ita nia moris iha tempo presente nian, nudar sarani liuliu iha tempo Advento nian além halo vigilância ao mesmo tempo haboot tan Ita fiar liuhousi oração(hamulak nafatin-comunica ho Maromak); Maibé, saida mak acontece? Dala wain mak Ita haree no koko katak sarani barak ba participa iha missa, confessa, procissão maibé hafoin remata tiha cerimónia ne’e, fila mai uma, tolok malu, corrupção selingkuh, uza força hodi baku-malu, tuda malu, tolok no sadik malu.

Nudar tempo vigilância: tempo Advento hodi haksolok Nai nia Festa Natal nian, mai Itaida-idak hakiak dadaun espírito forte iha vigilância no haabut Ita nia fé, haburas Ita nia esperança no haboot liutan Ita nia caridade iha Cristo nia liafuannebé hateten; “Matan moris neon nain iha oração atu imi keta monu ba tentação”.

Ita nia riku soin fo ksolok mai Ita loron baluk de’it maibé, Maromak nia Lia fuan sei lori Ita moris rohan laek. Salmo Domingo Advento semana ne’e mos hakerek dehan: Nai, ami Maromak, halo ami fila, hatudu Ita futar oin mai ami, ami hetan maksoin. Ema anónimo ida hakerek liu tan nune’e; Melihatlah ke atas untuk urusan akhiratmu dan melihatlah ke bawah untuk urusan duniamu maka hidup akan tenteram. Assim Seja e Bem Haja. Amen.

Note: Reflexão ne’e publica ona iha Radio Timor Kmanek (RTK) iha tinan 2014.

Leave a Reply

Your email address will not be published. Required fields are marked *