shadow
Diocese de Dili > NOTÍCIAS > REFLEXÃO > HALOOS NAI NIA DALAN TERIK

HALOOS NAI NIA DALAN TERIK

Reflexão & Leituras Segundo  Domingo ADVENTO, Ano B, 2020

Is. 40. 1-5, 9-10  Sal. 84(85), 9ab-10,11-12, 13-14  2. Ped. 3, 8-14  Mc 1,3

 

 

Ilustração: Houri tempo uluk, iha liurai ida nebe Ukun nia povo ho matenek no justo. Povo hotu hadomi los liurai nee. Liurai nee horik iha nia palácio boot tebtebes. Iha palácio nee nia oin, iha mos luron boot ida nebe povo barak liu ba-mai hodi halao sira nia actividade moris. Husi palácio nee duni mak liurai nee bele observa nia povo sira liu ba-mai nodi conhece sira ida-idak.

Iha kalan boot ida, liurai haruka nia guarda sira dudu fatuk boot ida ba hatuur los iha luron boot nee nia klaran. Iha loron tuir mai, hanesan bai-bain, liurai tuur iha nia trono hodi observa oinsa nia povo sira nia reacção wainhira sira haré fatuk boot nebe latan dau-daun iha Estrada klaran nee. Observa tiha durante semana ida ho balun, liurai foti conclusão katak maioria hosi nia povo la importa eh la interece ba fatuk nebe satan hela Estrada nee. Sira hasees-an ba ninin buka dalan seluk hodi lao liu deit wainhira lao liu hosi luron nee.

Entre povo hirak nee hotu, liurai só interessado deit ninia povo nain ida, nebe sente preocupado wainhira lao liu ba-mai husi neba. Ema nee haré fatuk nee hanesan impedimento boot ida ba nia-an wainhira passa husi neba. Iha lorokraik ida, ema nee mai, hulan ho besi tomak boot ida iha nia kbaas hodi muda sees tiha fatuk boot husu luron nee. maske fatuk nee boot liu maibé, nia esforsu-an duni hodi consegue hasees tiha dalan husi dalan boot nee.

Hatene katak ema nee iha esforço duni no sacrifica-an maske mesmesak, ikus mai liurai bolu nia hodi fo condecoração ba nia no convida nia ba jantar hamutuk iha liurai nia palácio basá, maske nia ema fraco maibé, nia hakas-an duni hodi hasees tiha fatuk boot nee husi luron nee atu nia no mos ema barak bele liu ba-mai ho livre. ***

“Ha’u haruka Ha’u manu-ain ba uluk ó oin, hadi’a dalan ba ó. Lian ida haklaken: “imi hadi’a Na’i nia dalan iha rai fuik maran. Imi loke dalan terik ida ba Na’i iha rai fuik. Rai klean sei nakonu, foho no kaletek sai tetuk; rai tarak sei kawer, rai lulun sei tetuk. Semana ida nee Uma Creda Católica hakat tan passo ida ba segundo Domingo Advento nian. Nunee, ita la sente katak tempo Advento liu ona loron 7 ba kotuk. Progresso espiritual saida mak ita hakat liu ona iha semana ida liu ba nia laran? Nai Maromak nia futar Lia Fuan segundo Domingo semana nee nian bolu ita nia atenção ba lia fuan Hadia Nai nia dala, haloos Nai nia dalan terik (Is 40,3; Mc 1,3).

Maromak hadomi liu ema hodi fo capacidade intelectual, moral, emocional inclui mos capacidade física. Maromak hadomi ema liu sasan hot-hotu. Hanesan contempla iha Maromak nia UKUN FUAN SANULU nebe resumo dehan; HADOMI MAROMAK LIU SASAN HOT-HOTU no HADOMI EMA SELUK HANESAN ITA-AN RASIK. Baseia ba domin ida nee duni mak; wainhira ita ema hasoru tentação hodi monu ba sala, Maromak preocupado teb-tebes hodi haruka Maromak Oan mai mundo atu liberta ita husi domínio tentação sira.

Tentação reb-rebo mak mai ataca ita nia moris maibé, dala ruma mos ita rasik mak hamosu tentação ka sai fali tentador ba ita nia moris rasik. Tanba nee mak Iha Evangelho Domingo Advento semana kotuk nian, Jesus rasik sei temi lia fuan Matan moris neon nain (Vigiai). Lia fuan ida nee hanesan chamada de atenção ida husi Maromak. Iha Evangelho Domingo Advento ba dala rua nee, Nai Maromak bolu fali ita nian concentração ba nia Lia Fuan; “Hadia Nai nia dalan, Haloos nia dalan terik”(Mc 1,3). Passagem evangélica nee endereça ita nia fuan ba hahalok hamos isin no klamar nian molok celebra Nai nia Natal.

Experiência husi ai-knanoik nee, hakarak fo hanoin mai ita kona ba sensibilidade ita ema nian nudar sarani hodi hasees tiha impedimento sira nebe ita rasik hamosu iha ita nia moris atu ita bele lao livre  iha ita nia dalan ba hasoru malu ho Maromak.

Husi sorin seluk, ai-knanoik nee mos hakarak provoca ita nudar sarani Católico nodi haré fila fali ba ita nia lalaok moris nian hodi descobre liu tan ita nia problema sira nebe impede hela ita nia moris hodi ba hetan salvação iha Jesus Cristo.

Fatuk boot iha Estrada klaran, nudar ai-knanoik haktuir mak ita nia nia attitude ka hahalok sira nebe lori  ita fuan ba nakukun, hakotu ita nia relação ho Maromak, halo fraco ita nia comunicação ho maun alin sira, no pior liu tan  hamout ita nia moris iha tahu klean sala foer nian. Tanba nee mak iha Evangelho ita rona ona são João Baptista nia lian hakilar iha rai fuik maran dehan:”Hadia Nai nia dalan, Haloos nia dalan terik” (Mc 1,3). Lia fuan ida nee, laos bolu ita ba sentido concreta hanesan wainhira chefe aldeia sira bolu nia povu ba hatetuk Estrada rural sira, hafoin selu ho 3 dolar ho fos saka oan ruma maibé,  lia fuan be temi iha leten, bolu ita nobun nia atenção tomak ba sentido conversão ka hakribit salan nian. Ita nia salan mak dalan terik nebe precisa ita haloos tiha nudar João Baptista hateten iha Evangelho são Marcos nian. Ita nia hahalok aat sira mos sai hanesan fatuk nebe além de impede ita nia contacto ho Maromak, impede mos ita nia relação ho família, kolegas,  parentes, vizinhos, no mos maun alin sira iha ita nia moris lorloron hanesan sarani Católico.

Iha Sagrada Escritura, liliu iha livro Gênesis nia conteudo; haktuir momos katak causa ka penyebab husi pecado laos mai husi Maromak maibé mai husi ita ema rasik. Basá, uluk nanain, Maromak Halo mundo no buat hotu mesak diak, hafoin tuir mai, cria mos ema tuir Maromak nia imagem rasik atu ema mos bele moris tuir Maromak nia vontade no bele sai santo mos hanesan Maromak.

Maibé, iha realidade saida mak acontece tuir mai? Ita nia beila sira hanesan Adão ho Eva ho liberdade tomak halo hahalok aat hodi kontra Maromak nia bandu sira, hafoin mane duun fali nia sala ba feto, feto tau todan liu ba samea inocente. Husi nee mak pecado hahu tama mai iha mundu. Infelizmente, sala ka pecado hafoer tiha ita ema nudar imagem Maromak nian.

Ita tama ona iha Domingo ba dala rua tempo Advento nian. Uma Creda bolu hikas ita nobun nodi ba hanoin no reflecte leitura sira Domingo semana nee nian. Oinsa Maromak nia lia fuan sira bolu ita nia atenção, no fanun ita nia fuan nebe sei toba dukur hela; Ita la sente katak falta deit semana oan rua ita tama ona iha festa Natal.

Iha reflexão semana uluk nian, ita hamutuk reflecte ona tema kona ba VIGILÂNCIA ka matan moris neon nain. Iha Domingo semana nee, Jesus Cristo liu husi leitura sira, bolu hikas ita tomak, atu haré fila fali ita nia lalaok sira durante nee atu nunee, bele sai hanesan Estrada loos nebe la iha fatuk boot ruma teri netik. Buat nebe teri netik ita nia dalan mak ita nia hahalok sala sira. Impossível Maromak bele mai hela iha ita nia fuan nebe seidauk mos. Basá, Marmak nee Lulik. Ita lee rasik iha Evangelho, são João Baptista dehan: atu hakruuk hodi kore nia sandálias talin mos hau la soi.

Molok Jesus Cristo mai moris iha mundo, Nai Maromak Haruka uluk são João Baptista nudar Maromak nia manu-ain atu hodi bolu no prepara ema nobun nia fuan ba Nai Jesus Cristo nebe atu moris mai iha mundo. Nao Maromak nia manu-ain sira ohin loron mak ema hotu nebe simu ona we baptismo hodi sai sarani Católico. Manu ain laos mak Catequista ho Amu lulik no madre sira. Ema hotu tende sai manu ain ba nia vida no mos sai manu ain ba ema seluk.

Iha Evangelho ita mos sei rona são João Baptista hakilar ba povo Israelita hateten;”HADIA NAI NIA DALAN, HALOOS NIA DALAN TERIK”. Lian ida nee ikus mai halibur duni ema atus ba atus, mai husi fatin oioin, dook no besik, sacrifica-an hodi mai too João Baptista nia fatin hodi simu baptismo. Ema hirak nee, maske mai husi fatin dook eh besik maibé, sira mai ho intenção no objectivo ida deit mak: mai hodi hamos sira nia klamar  liu hosi baptismo João Baptista nian. João Baptista laos haklaken deit Reino Lalehan hodi fo baptismo ba ema lobuk nee maibé, liu hosi lian be hakilar; ”HADIA NAI NIA DALAN, HALOOS NIA DALAN TERIK”, João Baptista hakarak fanun fali ita nia fuan sarani nian hodi prepara-an didiak, hamos klamar molok tam ba festa Natal.

Dalan terik nebe João Baptista refere iha Evangelho Domingo semana nee nian mak rona Maromak nia lian hodi leno ita nia fuan, forma ita nia consciência, comportamento, attitude, lalaok, iha moris lorloron nian hanesan sarani Católico. Tanba nee mak iha livro Job nian dehan:”Simu ba saida mak Nai hanorin liu hosi nia ibun, no tau lia fuan nee iha o nia laran” (Job 22,22).

Ema barak nebe rona Maromak nia lian iha João Baptista, sira hamos klamar, simu baptismo hodi hetan salvação.  Dalan salvação laos mai hosi João Baptista maibé, salvação lolos sei mai husi Maromak nebe concretiza iha Jesus Cristo nia Pessoa tomak.

Saida mak conversão ka hamoos klamar? Conversão loloos la hela deit iha ita nia cofessa ba Natal ka pascoa deit maibé,  conversão lolos tuir Maromak nia hakarak mak hamos bebeik ita nia klamar durante ita nia vida tomak.  Maibé, maluk sarani doben sira………..! moras aat ita sarani Católico ohin loron nian mak ba confessa iha deit tempo advento enquanto Natal besik dadaun ona ou iha tempo quaresma bainhira pascoa too dadaun ona. Tanba nee mak ema husi religião seluk considera ita hanesan sarani NAPAS katak sai sarani iha tempo Natal ho Pascoa deit; ou lia fuan seluk mos ema dehan Sarani KTP katak liur Católico maibé, laran mesak sabraut tantanan deit. Iha Certidão sarani maibé, hahalok gentio hela deit.

Se ita gira nafatin deit ho mentalidade hanesan nee, oinsa ita bele hatudu qualidade fiar nudar sarani Católico husi liur too laran?  Dala ida tan João Baptista hakilar ba ita nobum:”hadia Nai nia dalan, haloos nia dalan terik”. Oinsa  Maromak bele mai horik iha ita fuan se ita rasik la prepara fatin diak no fuan nebe merece ba Maromak? Maromak nee santo no Lulik tanba nee mak são João Baptista dehan: Tuir hau, sei too mai Ida nebe makaas liu hau, hau la soin atu kore Nia sandálias talin.

Dala wain ita cuek deit ho buat hotu nebe ita halo hodi budu sala foer sira iha ita laran, no iha liur ita dehan:”Hau nia fiar Maromak mak hatene deit ba”. Ba hahalok hanesan nee são Tiago iha nia carta koalia dehan:”Fiar nebe la hatudu iha hahalok, fiar nee buat mamuk boot ida// a fé sem obras é estéril/ iman tanpa perbuatan adalah iman yang kosong(Tg 2,20). Hasoru são Tiago nia crítica nee, só liu hosi hahalok hakribit salan, hahalok hadomi malu, respeita malu, ajuda malu no seluk tan mak bele justifica katak ita sarani Católico lolos ka lae?

Dala ida tan virtude teologal iha uma Creda Católica nian tolu hanesan; fé, esperança no Caridade, bolu hikas ita tomak atu reflecte fila fali ita nia vida hanesan Povo Maromak nian, liliu oinsa sai sarani Católico iha mundo ohin loron. Nudar sarani, ita iha mehi boot rua; mehi isin nian no mos mehi ba klamar nian. Mehi isin nian mak atu hetan condição moris nebe natoon katak lori liman fuan sanulu halo serviço hodi sustenta moris ba loron ida nian. Iha sorin seluk, mehi klamar nian principal liu mak salvação klamar wainhira ita husik mundo ida nee.

Ba salvação klamar nian, mai ita  fila ba reflecte fila fali João Baptista nia lian hakilar be dehan;”HADIA NAI NIA DALAN, HALOOS NIA DALAN TERIK”. Nunee, ita nia fuan mos, klamar moos mak sai condição principal ka persyaratan utama atu Maromak horik ba wainhira  Nai mai iha loron ikus, basá iha são Pedro nia carta hateten;”Nai nia loron sei too mai hanesan ahu nain ida” (2Ped 3,10).

Dom NORBERTO DO AMARAL dala ida hateten lia fuan nee: “ita nia sala/pecado compara hanesan kanek ida; wainhira ita confessa tiha kanek nee sei sai diak maibé, kanek nee sei husik hela fitar ruma nebe precisa ita halakon liu husi ita nia caridade ba maluk sira be lolo liman husu tulun mai ita”.

Profeta Isaias hakerek:”Nai nia lia tun dehan’ tan povu ida nee mai hakbesik ho nia ibun no hahi hau ho ibun deit maibé, sira laran dook tebes husi hau. Sira nia oração la ho fuan no laran loloos”.(Is 29,13)

Saida mak ita foti nudar lição murak hodi habosu ita klamar ba seman ida nee, liu husi Evangelho no leitura sira domingo aban nian?

Loos duni katak João Baptista cumpri duni nia missão nudar manu-ain Maromak nian hodi prepara ita nobun ba dalan salvação ita nian iha loron ikus. Ita fali, saida mak ita halo ona hodi sai mos Maromak nia manu ain?

 “HADIA NAI NIA DALAN, HALOOS NIA DALAN TERIK” Ita nia lalaok sira nebe la monu ba Maromak nia laran, liu husi João Baptista nia lian tatoli iha leten, bolu teni ita nobun hodi haré fila fali ba idadiak nia-an hanesan ema sarani, hodi hasees tiha fatuk boot nebe satan hela dalan terik Maromak nian iha tempo Advento ida nee.

  • Tan deit cesta básica, keta ita rai ódio hela ba ita nia maun alin sira karik?
  • Tan deit ambição política, ita hasoru malu la cumprementa malu karik?
  • Osan deve ruma nebe seidauk selu, halo ita hakilar malu ho ita nia vizinho uma sorsorin karik?
  • Tan deit organizaçao diferente mak keta maun alin uma laran cria fali problema karik?
  • Partido la hanesan keta halo família uma laran fahe malu karik?
  • Iha Advento ida nee, ita ajuda ona ita nia maluk sira be lolo liman mai ita dala hira ona ?
  • Ita la ba Missa dala hira ona?
  • Ita halo presépio tanba rame-rame ka hodi respeita festa Natal?
  • Ita ba confessa ona molok tama ba tempo Natal ka lae?

Nunee, fiar precisa hatudu iha hahalok no hahalok exige attitude caridade ba ita nia maluk sira be precisa ita nia tulun, nee mak dalan terik nebe precisa hadia iha tempo Advento nee.

Salmo aban nian fo teni aten brani mai ita dehan;”Hatudu Ita Domin mai ami, harik Ita mak soin mai ami”’*** Assim Seja e Bem Haja (Ignas oliveira).

Note:

Reflexão nee publica ona iha Programa Hafunan Fiar; Radio Timor Kmanek 2014.

Leave a Reply

Your email address will not be published. Required fields are marked *