shadow
Diocese de Dili > NOTÍCIAS > LETURA DIÁRIA > II Domingo Advento (ANO B)

II Domingo Advento (ANO B)

Primeira Leitura                  Is. 40, 1-5, 9-10

Lia housi livro profeta Isaías:

Ita Maromak lia tun nune’e: “imi haksolok, haksolok Ha’u nia povo. Imi fo kbiit ba Jerusalem nia fuan hodi hakilar ba nia, katak; Nia knaar to’o ona rohan, nia salan kasu tiha ona; nia simu tiha ona husi Na’i futar liman castigo maka’as ba nia salan sira hotu”. Lian ida haklaken: “imi hadi’a Na’i nia dalan iha rai fuik maran. Imi loke dalan terik ida ba Na’i iha rai fuik. Rai klean sei nakonu, foho no kaletek sai tetuk; rai tarak sei kaber, rai lulun sei tetuk. Iha loron ne’e, sei hatudu Na’i nia Glória, criatura tomak sei hamutuk sei haré Glória ne’e, basá, Na’i futar ibun ko’alia!” Sa’e ba foho aas ida, ó be haklaken lia-foun di’ak ba sião! Foti lia maka’as, ó be haklaken lia foun ba Jerusalém! Foti ó lian, keta ta’uk, hodi hetan ba Judá nia cidade sira: “Imi nia Maromak mak nebá!” Na’i Maromak atu to’o dau-daun ho kbiit: Nia futar liman sei hatudu kbiit maka’as. Nia prémio mai ho Nia; Nia kolen mai uluk liu Nia. Nu’udar bibi-atan nebé tau matan ba nia bibi sira. Nia kaer bibi-oan sira iha liman, ko’us, la’o tuir bibi-inan sira be fo susu”.

Maromak Futar Lia.

 

Salmo Responsorial                                                                                                                              Sal. 84(85) 9ab-10, 11-12, 13-14

Refrão : Hatudu ita domin mai ami, haraik ita maksoyn mai ami!!! Repete-se

Ha’u rona daudaun buat sá Na’i dehan;

Maromak haklaken damen.

Nia maksoyn besik ba ema be hamta’uk Nia,

Nia glória horik iha ita rain. Refrão

 

Ksolok no domin sei hasoru malu

Damen no justiça sei re’i malu.

Laran mos sei mosu husi rai

Justiça tun husi lalehan. Refrão

 

Na’i  haraik buat nebé Di’ak

Ita rain sei fo fuan.

Jusitiça sei la’o iha Nia futar oin,

Damen sei la’o tuir Nia ain-fatin. Refrão

 

 

Segunda Leitura                                                                                                                                                                      2. Ped. 3, 8-14

Lia housi São Paulo nia surat ba sarani sira iha Corinto:

Doben sira: Buat ida mak imi la bele haluhan; loron ida iha Na’i futar oin, hanesan tinan rihun ida; Tinan rihun ida, hanesan loron ida. Na’i hein kleur, atu halo tuir buat nebé Nia dehan hela, hanesan ema balu hanoin kona ba kleur ne’e; ne’e tan Na’i laran di’ak mai ita, tan nia lakoi ema balun lakon, maibé ema hotu bele hakribiit salan. Maibé, Na’i nia loron sei to’o mai hanesan ahu-na’in ida: iha loron ne’e, lalehan sira sei liu ho tarutu, ema isin sira hotu ho manas sei namkari hotu, rai ho ninia book-an, sei sai mohu. Buat hotu atu naksobu hanesan ne’e, oinsá mak la sai di’ak tebes kona ba moris santo no oração, hodi hein áhi sai naksobu hotu buat isin sira ho manas sai nabén! Maibé, tuir Nia hakotu lia, ita hein lalehan foun, rai foun, nebé horik Justiça. Ne’e duni, doben sira: wainhira imi hein buat hirak ne’e hotu, buka moris di’ak, sala laek, atu Na’i hetan imi iha damen laran.

Maromak Futar Lia.

 

Aclamação                                                                                                                                                                                            Lc. 3, 46

Refrão : Aleluia, Aleluia!! Repete-se

Imi hadi’a Na’i nia dalan, halós Nia dalan terik;

Kriatura hotu sei haré maksoyn mai husi Maromak. Refrão

 

Evangelho                                                                                                                                                                                            Mc. 1, 1-8

Na’i Jesus Cristo nia Evangelho Nu’udar São Marcos haktuir:

Jesus Cristo, Maromak Oan nia lia-foun di’ak, Nia hahú: “Ha’u haruka Ha’u manu-ain ba uluk ó oin, hadi’a dalan ba ó. Lian be hakilar iha rai-fuik maran: “Hadi’a Na’i nia dalan, halós nia dalan terik!” Nune’e mak João Batista mosu iha rai-fuik maran, hodi haklaken baptismo ida penitência nian atu kasu salan. Ema rai Judeia tomak, ema Jerusalém hotu ba hasoru nia, hodi confessa sira salan. João hatais kamelo fulun, kesi knotak ho futu kabun na’an kulit ida. Nia han lalaek no wani wén. Nia hanourin hodi dehan: ”Tuir ha’u, sei to’o mai ida nebé maka’as liu ha’u la soin atu hakru’uk hodi kore Nia sandailas talin. Ha’u sarani imi ho wé, maibé Nia sei sarani imi ho Espírito Santo”.

Lia Maksoyn.

Leave a Reply

Your email address will not be published. Required fields are marked *