shadow
Diocese de Dili > NOTÍCIAS > LETURA DIÁRIA > Quinta-Feira, III Semana Iha Tempo Advento (ANO B)

Quinta-Feira, III Semana Iha Tempo Advento (ANO B)

Primeira Leitura                        Is. 54. 1-10

Lia housi livro IsaIas nian:

“Haksolok ba, ó be la kô’us, ó be la hetan oan. Hakilar ho ksolok boot tebes, ó be la koko terus feto tur-ahi nian; tanba feto mesak nia oan sira wa’in liu fali feto kabena’in nia oan sira”, Na’i lia tun.

Haluan tan ó nia tenda fatin, halo naruk tan; keta hanoin ba osan, halo barak tan hena sira be taka o nia uma laran. Dada ó nia tali sira halo naruk tan, tidiin aisuak, sira halo metin. Ó sei loke tan ba sorin kuana no karuk. Ó nia bei-oan sira sei manan nação sira, ó sei hôrik iha cidade sira be ema husik mamuk.

Keta ta’uk, ema sei la hasusar ó, keta moe, tan ema sei la haraik ó nia oin. Ó sei haluha moe moris klosan, ó mós sei la hanoin tan naran laek tan moris faluk. Ó nia criador mak sei sai ó nia la’en, Nia naran ‘Buat-hotu-Na’in’. Ó nia Maksoi mak Santo Israel nian, nebé hanaran ‘Maromak rai tomak nian’. Hanesan féen ida mesak no laran susar, Na’i bolu fali ó: ‘Bele ema ida soe nia féen moris klosan nian?’ Ó nia Maromak lia tun.

Lalais oan de’it Ha’u husik ó mesak, maibé sei simu fali ó ho laran luak wa’in tebes. Tan laran hirus ho lalais, Ha’u subar Ha’u nia oin ba ó la kheur, maibé, ho domin rohan laek, Ha’u sadi’a ó, Na’i, ó nia Maksoi futar lia tun.

Ha’u nafatin hanesan iha tempo Noé nian, wainhira Ha’u jura atu wé boot la bele sobu tan raiklaran. Nune’e mós Ha’u jura atu la hirus tan hasouru ó, la halo tan fali áat ba ó. Bele foho sira book-an no foho oan sira nakadoko, Ha’u domin sei la husik ó mesak, Ha’u nia moruk dame nian sei metin nafatin”. Na’i, be sadia ó lia tun.

Maromak Futar Lia.

 

Salmo Responsorial                                                                                                             Sal. 29(30). 2, 4, 5-6, 11-12a, 13b (R. 2a)

Refrão : Na’i, ha’u sei hahí Ita, tan Ita soi ha’u!!! Repete-se

Na’i, ha’u hakarak hahí Ita tan Ita soi ha’u;

Ita Ia husik funu baluk sira hamnasa ha’u.

Ita hasai ha’u klamar housi rai horun mate nian;

Ita hamoris fila fali ha’u,

wainhira ha’u tun daudaun ba raikuak. Refrão

Hananu ba Na’i, imi hotu be hadomi Nia,

agradece ba Nia futar naran santo.

Nia siak lalais de’it, Nia laran di’ak iha moris tomak.

Ita tanis karik iha loraik,

iha fali dader sei hetan ksolok. Refrão

Rona ha’u, Na’i, sadi’a ha’u ba;

tan Ita nia graca, hi’it-An mai tulun ha’u!

Ha’u nia taka metan nakfila ba ksolok.

Na’i, ha’u agradece Ita nafatin. Refrão

Aclamacão                                                                                                                                                                                          Lc. 3. 4, 6

Refrão : Aleluia, Aleluia!! Repete-se

Hadi’a Na’i Nia dalan! Halos Nia dalan inuk!

No criatura tomak sei haré Maromak nia maksoyn! Refrão

Evangelho                                                                                                                                                                                       Lc. 7. 24-30

Na’i Jesus Cristo nia Evangelho nu’udar São Lucas haktuir:

wainhira João Baptista nia manu-ain sira ba ona, Jesus hahu ko’alia ba ema lubun boot: “Imi ba haré sáida iha rai-fuik-maran? Onu ida anin huu ha mai? Ne’e sá, imi ba haré sá lós? Ema ida hatais hena lahan lotuk? Sira be hatais hena lahan lotuk, moris riku, hela iha liurai sira kadunan! Imi ba haré sáida lós? Profeta? Tebes, Ha’u dehan ba imi: liu fali profeta. Kona ba nia, hakerek nanis: ‘Ha’u haruka Ha’u nia manuain ba uluk ó atu hadi’a dalan iha ó oin’. Basá, Ha’u hateten ba imi: Iha feto nia oan sira leet, la iha ida boot liu João. Maibé, ida be kiik liu iha Maromak nia reino, boot liu nia”. Povo tomak rona Nia ho publicano sira mós hatudu laran mós ba Maromak hodi simu João nia baptismo. Maibé, fariseu ho doutor lei sira, tan la simu baptismo housi nia, sira halakon Maromak nia hanoin lós kona ba sira.

Lia Maksoyn.

Leave a Reply

Your email address will not be published. Required fields are marked *