shadow
Diocese de Dili > NOTÍCIAS > LETURA DIÁRIA > IV Domingo Advento (ANO B)

IV Domingo Advento (ANO B)

Primeira Leitura    2Sam, 7, 1-5, 8b-11, 16

Lia housi Livro Profeta Samuel:

David horik iha nia uma, Na’i haraik tulun, nia moris hakmatek iha funu-baluk sira hotu nia leet. Liurai dehan ba profeta Natã: “Ó haré, ha’u hela iha uma ida, halo ho ai-Cedro maibé, Maromak nia ai-balun (Arca) horik iha taka baluk ida nia okos”. Natã hatan ba liurai: “halo buat nebé ó fuan husu ba ó basá, Na’i hamutuk ho ó”. Maibé, iha kalan ne’e duni, Na’i lia tun a Natã dehan: “Ó ba dehan ba Ha’u atan David; Na’i koalia nune’e: ó mak sei halo kadunan ida mai Ha’u, atu Ha’u horik ba?…Ha’u hasai ó housi rai balada han fatin, housi balada atan, atu ó sai Ha’u povo Israel nia ulun. Ha’u hamutuk nafatin ho ó, iha fatin hotu nebé ó lao, hodi halakon housi ó oin, ó nia funu baluk sira hotu. Ha’u sei halo o naran sai naran boot ida hanesan rai nia boot sira naran. Ha’u sei fihir fatin ida, atu Ha’u nia povo horik ba. Nia sei la hetan tan susar, ema aat sira sei la hanehan tan nia hanesan uluk, wainhira Ha’u tau juiz sira iha Ha’u nia povo Israel nia oin; Ha’u sei halo ó moris hakmatek iha o funu baluk sira hotu oin; Na’i dehan katak, Nia sei halo uma ida ba ó. Ó uman no ó ukun, iha nafatin Ha’u oin, Ó nia trono metin nafatin tinan ba tinan”.

Na’i nia Futar Lia.

 

Salmo Responsorial                                                                                                                                      Sal 88 (89) 2-3, 4-5, 27, 29

Refrão : Na’i, ha’u sei hananu Ita laran luak tinan ba tinan!!! Repete-se

Ha’u sei hananu tinan ba tinan Na’i laran luak,

Oan ba bei-an, Ha’u sei haklaken Nia diak.

Nia dehan: “Graça harí tinan ba tinan,

Laran mos metin iha lalehan. Refrão

 

Ha’u halo moruk ida ho Ha’u povo,

Ha’u jura ba David Ha’u atan.

O nia geração sei nafatin,

O trono nafatin tinan ba tinan. Refrão

 

Nia sei hasae lia mai Ha’u,

“Ita ha’u Aman, ha’u Maromak, ha’u Maksoin

Ha’u sei tulun nafatin nia,

Ami rua nia moruk rohan laek”. Refrão

 

Segunda Leitura                                                                                                                                                                    Rom. 16, 25-27

Lia housi São Paulo nia surat ba sarani sira iha Roma:

Maun-alin sira: Maromak mak fo kbiit, atu ita nia fiar metin nafatin, tuir Ha’u nia Evangelho no Na’i Jesus Cristo nia hanourin, nu’udar hatudu mistério subar kleur ohin loron foin fó sai. Hodi Escritura mak Maromak rohan laek haruka dehan nanis; Mistério ida ne’e, fó hatene ba gentio sira hotu, atu sira moris tuir fiar, Ba Maromak mesak nebé matenek, hodi Na’i Jesus Cristo, ba Nia, glória tinan ba tinan! Amen.  

Na’i nia Futar Lia.

 

Aclamação                                                                                                                                                                                           Lc. 1, 38a

Refrão : Aleluia, Aleluia!! Repete-se

Na’i, atan feto mak ne’e,

halo tuir deit Ita Futar Lia ba. Refrão

 

Evangelho                                                                                                                                                                                         Lc 1, 26-38

Na’i Jesus Cristo nia Evangelho nu’udar São Lucas haktuir:

Iha tempo nebá, Na’i Maromak haruka Anjo Gabriel ba cidade iha Galileia, naran Nazaré, atu koalia ho feto virgem ida, mane ida naran José, housi uma kain David, nia noiva. Feto virgem ne’e naran Maria. Tama tiha iha feto virgem ne’e nia uma, Anjo hatete: “Ave, feto kmanek wain tebes, Na’i ho ita”. Rona tiha ida ne’e, ho laran taridu feto virgem ne’e hanoin iha nia laran, lia Anjo hateten, katak sa los ba nia. Nune’ee Anjo hatete: “Maria keta tauk! Basá, o rahun diak tebes iha Maromak futar oin.! Ó sei kous no tuur ahi oan mane ida; ó sei hanaran Nia JESUS.” Oan ne’e sei sai ema boot ida; ema sira sei hanaran Nia, Maromak boot nia Oan! Na’i Maromak sei haraik ba Oan ne’e, nia Aman David nia reino. Nia mak sei ukun iha uma kain Jacob! Nia ukun sei la hotu”. Maria hatan ba Anjo: “ne’e sei sai oinsa los? Ha’u la hola mane!” Anjo hatan ba: Espírito Santo sei hôrik ho ó! Maromak nia kbiit sei hamahan ó! Tan ne’e, Santo nebé atu moris, hanaran-An Maromak Oan! Ó nia parente Isabel mós ko’us oan mane ida, maske ferik. Nia ko’us fulan neen ona; nia, ida be ema hateten katak la ko’us, basá, ba Maroma buat ida la susar!” Nune’e, Maria dehan: “Ne’e sá, Na’i atan oan mak ne’e. Halo tuir Ita lia fuan ba”

Lia Maksoin.

Leave a Reply

Your email address will not be published. Required fields are marked *