shadow
Diocese de Dili > NOTÍCIAS > REFLEXÃO > “LIA-FUAN MAK NAROMAN LOLOS ”

“LIA-FUAN MAK NAROMAN LOLOS ”

Iha tinan 1914, acontece funu entre Alemanha (Alemanha), Inglaterra ho França. Iha fulan Dezembro, li-liu iha kalan Natal, soldado sira housi força armada nação hirak ne’e, ida-idak abrigo metin iha sira nia subar fatin tan udan tun makas iha kalan nakukun ne’e. Soldado sira sente saudades ka rindu tebes hodi halibur hamutuk sira nia família iha kalan Natal ne’e. Sira hanoin fali katak se la acontece funu karik, então kalan ida ne’e, sira sei halibur hamutuk ho família sira iha uma hodi celebra hamutuk Natal, ba missa hamutuk, festa hamutuk no haksolok hamutuk. Iha sorin seluk, soldado Inglaterra nian lobuk be hetan tiru no kanek todan, toba hakilar-halerik hela iha abrigu fatin ne’e. Comandante  mos tuur tanis no triste hela tan iha kalan Natal ne’e, nia la bele hamutuk ho família no oan sira tan agora nia halo hela funu.

Iha kalan boot ne’e,Teki-tekil, housi parte soldado Inglaterra nian haré Naroman kiik ida mosu sae neneik iha parte soldado Alemanha nian. Tan saudades tebes ba família no ba festa Natal, soldado Alemanha nian ida halo tiha presépio kiik oan ida no sunu lakan lilin ida iha presépio ne’e nia laran hodi foti sae ba leten. Foti dau-daun presépio kiik ne’e, soldado ne’e mos hamrik neneik housi nia subar fatin hodi hatudu-an ba soldado Inglaterra nian. Soldado ne’e la tauk mate no nia hamrik lao ba oin hodi hananu música; kalan Natal. Música Natal ne’e doko tebes soldado Inglaterra sira nia fuan no sira nia saudades.

Tuir mai, soldado Inglaterra nian ida mos foti nia trombeta hodi hu acompanha música kalan Natal nebé soldado Alemanha ne’e hananu dau-daun. Rona tiha música ne’e, soldado sira hotu hamrik no lao sai housi sira nia subar fatin hodi hananu hamutuk, hakuak malu, tanis tan sira la bele ba Missa no la consegue celebra Natal iha sira ida-idak nia uma maibé, celebra de’it iha funu laran. Lalaok ne’e mos, soldado inimigo sira imita tuir hodi hananu música hanesan tuir sira nia língua. Sira celebra Natal simples de’it iha situação funu ne’e, hodi haluha lai sira nia odio malu, sira nia vingansa ba malu entre força Alemanha ho Inglaterra.***

 

Maromak nia futar Lia Fuan iha Festa Natal tinan ne’e, sani ita hotu nudar Cristão Católico atu oinsa ita bele simu Naroman nebé lakan nabilan iha Nakukun laran. Too ponto ida ne’e, ita rasik mak bele decide ita hakarak simu Naroman ko continua mout ha nakukun rohan laek?

São João Evangelista bolu hikas ita hotu atu ba conhece clean liu tan Jesus Cristo nudar Naroman be haroman nakukun mundo nian. Leitura sira  Natal 24 no 25 nian mos sei ajuda ita loke ita neon, ita fuan ba Nai Jesus Cristo nudar NAROMAN no maksoin ita sarani nian.

 Istória badak ne’e, motiva ita hodi reflecte hamutuk katak sentido Natal la hela de’it iha situação di’ak nia laran maibé, iha situação funu mos ema bele celebra loron Natal naran katak fiar iha Cristo nudar Naroman na moris ema nian. Iha funu laran, ema sente moris ne’e iha nakukun laran. Nune’e’e,  ema mehi hodi hetan naroman iha nakukun laran. Mehi hetan naroman ne’e mak; wainhira ema hotu moris iha paz hodi hasees-an husu funu. Moris iha unidade wainhira interece política la hanesan. Natal bolu ita nobun ba saudades ka kerinduan hodi hanoin Jesus Cristo nia Natal. Natal bolu ema ba moris iha dame laran, housik funu, housik odio malu ba kotuk hodi foti Naroman dame nian tau ba oin. Foti Jesus Cristo tau iha fuan nudar centro dame no fiar nian. Haré Jesus Cristo nudar lalenok hodi haroman ita nia-an hanesan ema fiar nain.

Ita tama dadaun ona iha ambiente celebração festa Natal Nai nian. Nune’e’e, iha leitura sira, Maromak nia lia-fuan sai hanesan naroman hodi leno ema tomak nebé belit no hamout–an iha nakukun sala nian. Provérbio Português ida dehan; O ERRO É HUMANO ou Manusia tidak pernal terlepas dari kesalahan. Erro ka defeito técnico ne’e normal; Por exemplo; kaer motor la cuidado soke tun sae, motor aat lalais, maibé, erro ka falhanço ida lori ema ba pecado ne’e mak la normal tanba hasees-an housi Maromak nia graça; por exemplo ema kaben nain sira selingkuh tun sae, governantes balu comete actos corrupção, oportunista sira sai paracita ba estado, diferença política, hamihis respeita malu, nst, ne’e mak pecado lolos.

Mensagem murak ba Natal tinan ne’e mak; Haré Kosok oan Jesus hanesan Naroman dame ba mundo.  

La iha dame, ksolok na rahun di’ak karik iha tempo ohin loron, ne’e tan ema barak seidauk aprende haraik-an hodi hatene lolos maksoin Jesus Cristo. Iha Bíblia Antigo Testamento nian, Maromak la housik povo Israel lao mesak iha dificuldade laran, li-liu iha deserto laran nebé maran dekor; be atu hemu de’it mos araska, rai uut semo ba mai, ai-horis hun ida mos la iha, Wainhira Povo Israel sira sai housi Egipto hodi mai too rai Cana/Palestina, Maromak acompanha povo ida ne’e iha loron no mos kalan.

Iha kalan wainhira povo lao, Maromak haroman sira nia dalan atu sira la bele monu ba nakukun nia ukun, li-liu housi povo gentio sira be la tau fiar no confiança iha Maromak Israel nian.

Nudar sarani ba otas ohin loron nian, ita hatene katak; konta ho Nai Maksoin kosok oan, ita moris ona iha Naroman laran. Nune’e’e, sarani nebé moris iha naroman laran mak ema sira nebé hatene cria situação damen ba nia-an, ba nia família, ba nia sociedade, hodi moris iha hakmatek, damen no ksolok.

Lia fuan Dame facil tebes ema temi maibé, dificil tebes atu ita aplica iha moris. Iha discurso público sira, ita nia governantes sira mos sempre convida ema hot-hotu atu moris iha dame laran.  Wainhira hatto mensagem Natal, ema hotu sempre deseja Natal nakonu ho dame.

Maromak nia Nailulik sira mos sempre hatete bebeik atu sarani hotu moris iha dame no tolerância. Maibé, lia fuan mak lia fuan; ema ida rua de’it mak halo tuir. Situação nune’e’e mos acontece ona iha tempo João Baptista nian: wainhira João Baptista fo hatene povo tomak katak; Hadia Nai nia dalan, Haloos Nai nia dalan terik”.

Ohin loron são João Baptista nia saseluk mak amu lulik sira; amu sira mos hakilar bebeik maluk sarani sira maibé, housi número maioria católico ne’e, oitoan de’it mak housik tempo atu rona. Barak liu, preocupa ho isin nia hakarak. Loos duni katak ita hotu mehi ba moris iha dame laran hodi fihir Jesus Cristo kosok-oan hanesan espelho naroman no dame nia hun hodi nune’e’e, ita bele moris iha ambiente dame nia laran. Maibé, realidade contrário ida mak ema barak nunca haraik-an hodi hasees tiha hahalok nakukun nian hanesan; corrupção, adultério, violência domêstica, hadau malu poder, kan ten poder, loko-an, cria situação desordem no ambiente la hakmamtek ba maluk seluk nebé mehi ba moris dame nian. Tuir lolos, Lia-fuan dame kosok-oan Jesus Cristo nian mak Naroman  lolos ba ita ema nia lalaok sira.

Ba mentalidade corrupção, adultério, violência, odio malu no oho malu sira ne’e hotu, livro ben Sirac bolu atenção dehan;”keta ulun toos resik hodi hamtauk Maromak no keta hakbesik-an ba Maromak wainhira o nia fuan la fo ba Maromak”(sir 1,28).

Sarani barak dehan fiar Maromak maibé, nunca hatudu fiar ne’e iha hahalok testemunha nian. Iha família ida, dala ruma fen ho oan sira mak ba missa maibé, laen antar fen ho oan sira too odamatan boot Igreja de’it hafoin fila fali. Sai sasin katak halo tuir de’it Maromak nia hakarak no banati tuir Jesus Cristo nia doutrina sira. São Tiago dala ida tan bolu teni mai ita;”Fiar nebé la hatudu iha hahalok/ testemunha, fiar ne’e laek”.

Profeta Isaias mos la kole hodi koalia bebeik kona ba Cristo nudar Naroman hodi dehan;”povo be tur iha nakukun laran, Naroman boot ida mosu ba sira.(Is 9,1).  Nudar Cristão Católico, ita nia laran metin ba loron ikus mak Jesus Cristo nudar Naroman be halo-an ba ema hodi sente mos susar no moruk, malirin no manas ema otas horas ne’e nian.

Nune’e’e, Cristo moris nudar kosok-an ida hodi sai los nudar ema. Maromak, liu housi Jesus Cristo, hakarak nakfila mundo nia fuan no muda mos ema nia mentalidade hodi sai hanesan naroman oan basá Cristo rasik mak Naroman nia we-matan. Ba realização plano salvação ne’e, liu housi kosok-oan nia Natal, Maromak bolu tenik ita hot-hotu atu colabora no participa mos iha plano oinsa lori Naroman ba mundo iha ita nia vida hodi transforma mundo nia fuan sai Naroman nia horik fatin.

Ohin loron ita brani no esperto tebes hodi fo sasin kona ba nakukun do que  fo sasin naroman nian. Ita fasil liu tolok malu, ita fasil liu jura falsu temi Maromak naran, ita halo presépio laos hodi hanoin Jesus Cristo maibé, ita halo presépio hodi sai fatin hemu tua no sai fatin toca música festa nian.

Presépio muda nia função sai centro halibur malu hemu tua nian. Ita nia governante balu mos brani tebes halo corrupção hodi naok ita nia maluk sira nia direito maske iha tempo campanha garganta los combate corrupção, cria campo de trabalho, ita seluk buka hasees-an wainhira rona Maromak nia manu-ain ou amu lulik sira koalia kona ba Naroman.

Hahalok laek hirak ne’e la seluk la leet dada ita ba sai mensageiro ou manu ain diabo nian  do que sai manu-ain Maromak nian. Ba mentalidade sira ne’e hotu, livro ben sirac bolu atenção ba sarani ohin loron nian dehan;”keta ulun toos resik hodi hamtauk Maromak no keta hakbesik-an ba Maromak wainhira o nia fuan la fo ba Maromak”(sir 1,28). Sarani barak dehan fiar Maromak maibé nunca hatudu fiar ne’e iha hahalok testemunha nian. Sai sasin katak halo tuir de’it Maromak nia hakarak no banati tuir Jesus Cristo nia doutrina sira. São Tiago dala ida tan bolu teni mai ita;”Fiar nebé la hatudu iha hahalok/ testemunha, fiar ne’e buat mamuk ida”.

Durante fulan Dezembro nia laran, iha fatin barak, ema hotu, hahu housi kiik too boot  koalia no temi bebeik lia fuan Natal. Natal tinan ida ne’e mos sai kmanek liu tan tanba ema wain hafutar presépio ho música Natal termasuk musika nebé laos Natal nian. Presépio sira mos mesak rebo-rebo ho lampu pisca-pisca inclui tan atributo Natal sira seluk. Nune’e’e, ambiente Natal sente animado tebes. Situação hanesan ne’e fo kesan ka impressão ida katak iha Natal tinan ne’e, ema hotu sente Naroman Jesus Cristo nian leno tebes ema nia moris. Tanba ne’e mak são Paulo iha nia carta ba Tito hakerek dehan:”Maromak nia rahun di’ak mosu mai ona, lori maksoin ba ema hothotu (Tit 2,11). 

Iha fulan Dezembro ne’e nia laran mos, Cristão iha fatin hot-hotu iha lalehan okos ne’e, sente Naroman boot ida hafalun sira nia moris be kmanek. Maromak kosok-oan ninia solidariedade ho ita ema, hanorin atu brani moris hamutuk iha damen no domin nia laran. São Paulo dala ida tan hahisik lia murak iha nia carta ba Tito dehan;”basá, Maromak nia graça mosu ona, hodi lori maksoin ba ema tomak, no hanorin ita  buat hotu nebé ita sei halo atu housik buat hotu nebé la lori ba Maromak no housik tiha hakarak aat mundo ne’e nian hotu. Ita sei ukun an hodi moris di’ak no hamtauk Maromak iha mundo ne’e.// Karena kasih karunia Allah yang menyelamatkan semua manusia sudah nyata.Ia mendidik kita supaya kita meninggalkan kefasikan dan keinginan-keinginan duniawi dan supaya kita hidup bijaksana, adil dan beribadah di dalam dunia sekarang ini (Tit 2,11-12).

Maibé, durante fulan Dezembro  tinan ida ne’e, ita mos rona notícia ka berita triste bar-barak housi Televisão ho Rádio nomos housi jornais sira katak acontece corrupção, violação sexual, violência domêstica, funu, adultério ka selingkuh, aborto, oho malu, naok sasan, acidente tráfico no desastre wain tan iha sikun mundo nian inclui ita rain Timor Leste.

Maske ita hotu mehi ba situação dame no hakmatek laran, hodi konta ho Maromak nia tulun iha Naroman kosok-oan Jesus nian, maibé, factos lobuk ida iha realidade hatudu katak ita nia maluk sarani balun sei hadulur-an metin hela iha domínio nakukun nian, governantes balu hola feto rua too tolu, seluk tan ba passa fim de semana iha Bali-Indonésia ho osan estado nian.

Ffoin sae barak seidauk hetan campo de serviço, feto aat sira lalin-an housi nação barbarak mai buka osan dollar iha Timor liu housi actividade prostituição, Droga tama mai Timor hamesan sasan mercado sira. Estudante feto barak isin rua cedo de’it. Mane kabe nain sira barak liu contamina virus HIV/AIDS tanba ba toba arbiru ho feto aat sira nebé hetan moras AIDS. Buat pior liu nebé ita Timor halo ba ita nia nia maluk Timor oan seluk mak odiu malu too oho malu tan de’it ita nia grupo la hanesan, tan de’it ita nia partido ideologia diferente, tan de’it ita nia interece rasik hodi haluha katak ema seluk nebé ita hanoin aat ba ne’e mesak ita nia maluk sarani de’it, mesak ita nia Católico maluk de’it nebé precisa moris di’ak no hetan Naroman Maromak nian.

Dala ruma Ita sente bangga wainhira ita hakanek ka oho ema seluk maibé ita haluha katak ita nia moris ne’e sementara de’it. Reflecte ba realidade hirak ne’e hotu, Maromak liu housi kosok-oan Jesus, bolu ita hotu hodi hakribi nakukun sala mortal nian hodi loke fuan ba Naroman kosok-oan nian iha Natal ida ne’e.

Natal sei sai hanesan lia fuan mamuk ida enquanto iha prática; ita sei funu malu nafatin, político sira sei pormessa falssa nafatin, lider sira sei se kotuk ba malu nafatin. Ita haluha ita nia identidade katak neon ida laran ida fiar iha Maromak ida de’it no mos neon ida laran ida mesak Timor oan de’it.

Natal hanorin ita atu hatene taka liman husu tulun Maromak nian hodi fo netik Naroman maksoin nian, leno ita fuan, hodi muda hahalok odio no oho malu nian, violência nian, li-liu corrupção no adultério nian. Ba hahalok hirak ne’e, profeta Isaias husu ba Maromak hodi hateten;”Ita halakon sira nudar dadur, Ita silu tohar ema aat sira nia oe be hakanek povo nia kabas”(Is 9,3). Dala ida tan  livro ben sirac nian bolu tenik ita nobun  dehan;”keta ulun toos resik hodi hamtauk Maromak no keta hakbesik-an ba Maromak wainhira o nia fuan la fo ba Maromak”(sir 1,28).  Se ita nia ulun mamar hodi cria siutação dame-hakmatek maka ita mos colabora ona ho Maromak hodi sai Naroman nia oan no fihir Jesus kosok-oan hanesan Naroman nia hun lolos.

Durante tempo Advento ita hananu tane liman ba Maromak dehan: MAI….!  MAI……! NAI JESUS! LALAIS HIIT-AN MAI, RAI NE’E MATE MALIRIN, AMI KLAMAR LAKON NIA MANAS…….MAUN ALIN LA HADOMI, RAI NE’E LA IHA DOMIN. Durante Advento ne’e, Ita mos rona ona são João Baptista nia lia fuan be dehan: HADIA NAI NIA DALAN-HALOOS NIA DALAN TERIK. Horas ne’e, mai ita festeja Kosok Oan Jesus nia aniversário ne’e.

Lia murak ba ita nudar bukae Natal ba ita sarani nia moris mak;

  • Haburas unidae no Nacionalismo iha ita sarani nia leet atu ita mos sente festa Natal ne’e hanesan Naroman be haroman ita nia moris tomak.
  • Mai hafoun fila fali ita nia espérito dame nian nudar lia murak be kosok-oan Jesus lori mai ita ida-idak nia fuan.
  • Hadomi Maromak liu sasan hot-hotu, nomos hadomi ita nia maluk sira hanesan ita hadomi ita nia-an rasik iha Naroman maksoin nian.
  • Governantes sira hasees-an housi mentalidade corrupção no hadau malu poder hodi hamoe nia-an ho família sira nomos hafoer Igreja Católica nia naran.
  • Tan ne’e, Natal nia sentido klean la bolu ita ba hasae gloria ba Maromak iha lalehan as ba maibé, kosok oan nia moris lori mos paz mai ema mundu rai klaran. Basa hahalok aat sira nebé horas ne’e buras iha Timor no problema seluk tan nebé mosu iha ita rai, sai hanesan sinal ida katak ita laos naroman oan maibé nakukun nia oan.

Ba ida ne’e, salmo Domingo uluk nian mos hahisik aten brani mai ita nobun ho lia fuan murak ne’e: ”Nai, ami Maromak, halo ami fila, hatudu ita futar oin mai ami, ami hetan maksoyn”. Salmo ida ne’e hetan liu tan ninia rohan iha Salmo seluk nebé dehan: RAI ULUN-RAI IKUN HARÉ ONA MAKSOIN, MAROMAK NIA MAKSOIN. Feliz Natal ba ita hotu…………!  (Ignasoliveira)

 

 

Evangelho:

“Nai Jesus Cristo nia Evangelho nudar são João haktuir” (JO 1, 1-18)

Hori uluk kedas,  Lia Fuan iha nanis; Lia-Fuan horik nais hamutuk ho Maromak; Lia Fuan Maromak nanis. Houri uluk kedas Nia horik hamutuk ho Maromak; Maromak halo sasan hotu hodi Nia! La hodi Nia, buat ida la Moris: Nia mak moris nia nain! Moris ne’e mak ema nia naroman! Naroman nabilan hela iha nakukun laran, maibé, nakukun la hatene Nia! Mane ida mosu mai, Maromak mak haruka: nia naran João, nia mai nudar sasin ida atu fo sasin kona ba naroman. Lia Fuan mak naroman loloos, naroman ida be mosu iha rai klaran; leno ema hothotu. Nia horik duni iha rai klaran; rai klaran Nia mak hakiak, maibé, rai klaran la hatene Nia! Nia mak buka Ninian rasik, maibé, Ninian sira la simu Nia! Maibé, ema sira be simu Nia no fiar nia naran, Nia haraik kbiit atu sai Maromak oan! Ema sira ne’e laos moris housi ema nia raan, laos moris tuir ema nia isin nia hakarak, maibeé, sira moris housi Maromak. Lia Fuan ne’e halo-An tiha ba mane, Nia moris duni hamutuk ho ita!  Ami haré tebs nia naroman, naroman ida be oan Mane mesak, simu housi nia Aman. Nudar oan Mane mesak ida kmanek  no loos tebes! João fo sasain kona ba Nia, dehan: “ema ida ne’e ninian mak hau hateten nanis ona: Ema ida nebé sei mai tuir hau, Nia uluk liu tihahau, basá, Nia moris uluk liu hau!” Los duni, housi Ninia di’ak barak tebes, mak ita simu di’ak oioin tutuir malu. Basá, maske ukun fuan mai housi Moises, graça no lia loss mai housi Jesus Cristo. Ema ida la dauk haré Maromak: Oan Mane mesak horik ho Maromak Aman, Nia de’it mak haklaken Maromak mai ita!

Lia Maksoin.

Leave a Reply

Your email address will not be published. Required fields are marked *