shadow
Diocese de Dili > NOTÍCIAS > Articles by: Departamento Comunicação Diocese Dili

HOTU-HOTU MAUN ALIN

Reflexão DOMINGOCOMUM XXX/Ano A/2020

Ex 22,21-17 Tes 1,5c-10 Mt 22:34-40

 

Iha dia 3 de Outubro, Papa Franciso assina Enciclica Foun ida ho título “Fratelli Tutti” (Tradução Literal: Hot-hotu maun-alin). Encilica ida ne’e tuir mai publica iha dia 4 iha Assisi; terra natal São Francisco de Assis nian.

Papa publica Enciclica ida ne’e ho motivo atu sociedade hamoris hikas sentido  fraternidade (persaudaraan) no amizade social concreto. Progresso tecnológico halo com que ita hotu tendencioso liu ba amizade virtual (persahabatan virtual) liu housi media social hanesan facebook, youtube, whatsapp,…nst.

Pandemia Covid19 sai motivo eh pano de fundo (latar belakanh) ba Enciclica refere. Emergência saúde global hatudu ona indicação global ida katak la iha ema ida bele moris mesak. Pandemia loke ema nia fuan hodi tulun malu iha susar laran. Too ona tempo atu ema hotu kaer ba mehi ida katak ita nobun mesak comunidade ida; mesak maun alin nebé hanaran sociedade ser humano.

Iha Primeira Leitura no Evangelho Mateus nian, ita nobun hetan alarme kona ba sentido domin-amor-cinta kasih. Afinal, sentido no aplicação lolos housi amor (domin) ne’e mak; Domin ba Maromak no domin ba ema seluk. Sentido domin/amor rua ne’e ida nunca bele haketak ho ida seluk. Compara hanesan osan coin eh centavo ida nebé sor-sorin maibé, valor ida deit. Ho expressão aswuain (heroico/kepahlawanan) nian dehan; domin ba Maromak no ba ema hanesan espada de dois gumes (samurai ho kroat sor-sorin).

Se mosu maun alin ruma dehan fiar deit no lee deit Bíblia ita tama ona lalehan, talves ne’e laos Igreja Católica nia hanorin basá, fiar nebé la hatudu iha hahalok, fiar ne’e buat kalen mamuk ida. Nune’e mos domin nebé la expressa iha moris sarani nian, domin ne’e, domin falso ida.

Iha Antigo Testamento, expressão amor/domin ba Maromak tenke hatudu liu housi tau matan ba feto faluk sir, oan kiak sira, orfanato sira. Regra ne’e mos afirma katak ema nebé la aplica domin no tulun ema seluk, ema ne’e merece hetan castigo.

Ita compara situação socio-política iha rai laran post-covid19, mosu tensão, mal interpretação, dun mali, hadau malu, no politiza sasan. Wainhira lider carismático Kayrala Xanana Gusmão lao volta território laran hodi fahe apoio hahan ao mesmo tempo hodi socializa kona ba perigo no impacto housi virus covid, quadros no apoiante partido Fretilin ho partido balu tan acusa dehan Xanana lao haleu buka votos, lao taka falta, lao ba hamaus ema nia simpatia.

Enquanto, governo horas ne’e namanas hela debate oinsa realiza plano apoio sexta básica ba população hotu nebé hetan impacto económico durante pandemia covid19.

Atu keta dun malu, kmanek liu wainhira partido hot-hotu nebé hetan assento iha Parlamento, concretiza mos apoio caritativa hirak ne’e ba ema hotu tuir partido ida-ida-idak nia capacidade financeira no sentido hodi fo honra no agradecimento ba povo nebé hili ona político sira sai governante.

Nune’e, lalika besik eleição mak foin hakbesik povo hodi hais voto maibé, diak liu no kmanek liu mak antes, antes ne’e, fo apoio dau-daun ba atu wainhira povo fo votos mos, fo ho dignidade tomak.

Relato Evangelho semana ne’e, contem fonts (we matan) fundamental fiar povo judeu nian: “Rona mai isarel, hadomi imi Nai, imi nia Maromak ho fuan tomak nolaran tomak, no ho kbiit tomak (Deut. 6,4-5)”. Ne’e mak Fundamento housi moris religiosa judeu nian maibé, princípio ne’e aumenta tan ho expressão: “hadomi ema seluk hanesan o-an rasik: Hau mak Nai (Lev. 19,18)”.

Evangelho semana ne’e mos hatudu ba ita oinsa mosu diferença ideia entre fariseu ho saduceu perante Jesus. Grupo rua ne’e motivação atu ataca Jesus hanesan maibé, sira nia doutrina ou ideologia mak diferente. Jesus considerado nudar mestre  maske nia la conhecido iha escola lei  moises nian. Na verdade, fariseu, escriba ho saduceu sira, povo considera hanesan périto (ahli) kona ba lei sira.

Precisa ita hatene katak; housi lei moises nian, fariseu sira conhece ukun fuan hamutuk 613 nebé contem iha livro lima pentateuco nian. Housi ukun fuan 613 refere, iha ukun funa 248 ho caracter positivo ou obrigatório no 365 negativo ou bandu. Tanba ukun fuan barak demais, então, sira mos confusão no aproveita situação hodi koko Jesus:”Mestre, Ukun-fuan ida nebé mak boot liu?”.

Jesus fo resposta prudente no fundamentado dehan:“Ó sei hadomi Na’i, ó nia Maromak, ho laran ho neon tomak, ho hanoin hotu! Ukun-fuan ida seluk hanesan mos ida ne’e: Ó sei hadomi ó maluk nu’udar ó an rasik! Ukun-fuan hotu ho profeta sira la’o hamutuk  ho ukun-fuan rua ne’e”.

Resposta ne’e automaticamente sulan kedas fariseu, escriba ho saduceu sira nia ibun kuak tanba liu tiha ne’e, sira la iha tan argumento atu contra Jesus.

Polémica fahe sasan inclui plano governo kona ba sexta básica, la seluk la leet nudar concretização domin estado ba povo nebé mesak Maromak oan. Problema eh polémica mosu wainhira plano siak sira ne’e, falun ho interece política, buka persen, fahe osan, hili malu, monopólio, buka cargo, buka naran,….nst.

Baut nebé precisa tau iha consideração mak; hadomi Maromak liu sasan hot-hotu no hadomi ema seluk hanesan ita-an rasik.

Labele hadomi poder liu nação no povo nia prosperidade. Pior ainda, kaer ukun hodi habokur grupo, partido, família no pemilik partai. Too iha ponto ne’e, hadomi Maromak no hadomi ema seluk mak nebé?

Padre Martinho Gusmão halo reflexão klean kona ba Enciclica Fratelli Tutti ne’e iha ninia acount Facebook. Buat nebé ita precisa tau iha contexto Timor mak, lalika trata malu tanba deit diferente cor partido, hot-hotu maun alin, lolo liman hodi lori Timor sai nabilan iha futuro. Labele político sira nia família deit mak luxo no nabilan, enquanto povo nafatin halerik be mós, saúde ho estrada. (Assim Seja e Bem Haja. Ignas)

XXX DOMINGO TEMPO COMUM (ANO A)

Primeira Leitura                        Ex, 22, 21-27

Lia housi Livro Êxodo:

Na’i lia tun nune’e: “Keta fo susar ba ema la’o rai, keta fo terus ba nia. Uluk imi rasik la’o rai iha rai Egipto. Keta fo terus ba ema feto faluk, ba ema ki’ak. Ó halo terus sira ne’e ida karik, nia husu tulun mak Ha’u, Ha’u sei rona nia lian susar. Ha’u sei halo Ha’u laran nakali, hodi halo imi hotu mate housi surik. Imi fen sei sai faluk, imi oan sira sei sai oan ki’ak. Ó fo karik osan hodi tulun Ha’u nia povo ida, fo ba ki’ak nebé moris besik ó, keta hare nia hanesan ema nebé iha tusan ho ó. Keta sisi nia funan. Ó maluk ruma fo karik nia tais hanesan penhor, molok lokraik ó sei fo fila, tan nia iha hena mesak ne’e atu taka;  hena nebé falun nia isin. Oin seluk, nia bele toba oin sa?  Nia husu tulun karik mai Ha’u, Ha’u sei rona nia, tan Ha’u laran luak”. 

Maromak Futar Lia.

 

Salmo Responsorial                                                                                                                            Sal. 17(18), 2-3ª. 3bc-4. 37.  51ab

Refrão : Na’i, ha’u hadomi Ita; Ita ha’u nia kbiit!!! Repete-se

Na’i, ha’u hadomi Ita, Ita ha’u nia kbiit!

Na’i tahan ha’u, ha’u nia beran, ha’u nia Maksoyn. Refrão

 

Maromak ha’u nia tato’o nebé tahan ha’u,

ha’u nia kaklili, ha’u Maksoyn, ha’u nia loho.

Sei harohan ba Na’i nebé di’ak atu hahi,

Nia sei soy ha’u housi ema aat. Refrão

 

Na’i sei moris, kmanek ba ha’u nia tato’o,

kbiit ba Maromak, ha’u nia Maksoyn.

Nia halo nia liurai manan funu,

hamutuk nafatin ho nia santo. Refrão

 

Segunda Leitura                                                                                                                                                                         1 Tes. 1, 5-10

Lia housi São Paulo nia surat ba sarani sira iha Filipo:

Maun-alin sira:  Imi hatene ami nia hahalok iha imi leet, atu halo di’ak ba imi. Imi buka tuir duni ami nia hahalok no Maromak nian. Imi simu Maromak nia lia-fuan, iha terus ua’in nia laran, ho ksolok nebé Espirito Santo haraik ba imi. Nune’e, imi fo exemplo di’ak ba sarani sira hotu iha Macedónia ho Acaia. Tebes, iha imi leet mosu duni Maromak futar lian:  La’os iha Macedónia no Acaia de’it, maibé, iha fatin hotu-hotu nebé haklaken ona fiar ba Maromak; ne’e duni, ami lalikan ko’alia tan kona ba fiar. Sira rasik haktuir oin sá imi simu di’ak ami; oin sá imi husik lulik hodi mai Maromak. Nune’e, imi bele serbi Maromak nebé moris, Maromak lós, hodi hein Nia Oan Jesus tun housi Lalehan mai, nebé Nia halo moris hias housi mate. Jesus ne’e soy ita ho justiça lós nebé sei mai.

Maromak Futar Lia.

 

Aclamação                                                                                                                                                                                  Mt. 22, 37. 38

Refrão : Aleluia, Aleluia!! Repete-se

Sei hadomi Na’i, ó nia Maromak, ho laran tomak.

Hadomi ó maluk nu’udar ó an rasik. Refrão

 

Evangelho                                                                                                                                                                                   Mt. 22, 34-40

Na’i Jesus Cristo nia Evangelho nu’udar São Mateus haktuir:

Iha tempo nebá, ema fariseu sira, rona dehan katak Jesus halo ema saduceu sira nonok tiha. Sira halibur hamutuk, hafoin, sira ida matenek ukun nian, husu hodi koko nune’e: “Mestre, Ukun-fuan ida nebé mak boot liu?” Jesus hatan ba nia: “Ó sei hadomi Na’i, ó nia Maromak, ho laran ho neon tomak, ho hanoin hotu! Ukun-fuan ida seluk hanesan mos ida ne’e: Ó sei hadomi ó maluk nu’udar ó an rasik! Ukun-fuan hotu ho Profeta sira la’o hamutuk ho ukun-fuan rua ne’e”.

Lia Maksoyn.

Sábado, XXIX Tempo Comum (ANO A)

Primeira Leitura                           Ef. 4. 7-16

Lia housi São Paulo nia Surat ba sarani sira iha Éfeso:

Maun alin sira: Ita ida-idak simu graça nia kmanek oi-oin nu’udar Cristo hakarak fó. Ema dehan: “Uainhira Nia sa’e ba leten aas, nia lori ema dadur  barak; Nia fahe kmanek oi-oin ba ema sira.” “Sa’e ba leten aas” ne’e katak sá? La’os uluk knanain Nia tun ba rai okos? Ida nebé tun mak Nia mós nebé sa’e aas liu fali lalehan tomak atu halo nia nakonu. Nia foti balun nu’udar apóstolo, balun profeta, balun tan evangelista no seluk tan bibi atn no mestre, ba santo sira hotu no di’ak lolós, ba serbisu ministério nian no atu harii Cristo nia isin lolon, to’o tempo nebé ita hotu hetan laran ida de’it iha fiar no iha matenek kona ba Maromak nia Oan Mane, nu’udar ema boot lolós ona, hanesan ho Cristo rasik nia kmanek hotu.

Maromak Futar Lia.

 

Salmo  Responsorial                                                                                                                       Sal. 121(122). 1-2, 3-4ª, 4b-5 (R. 1)

Refrão : Ho ksolok, ita sei la’o ba Na’i Nia Uma!!! Repete-se

Ha’u haksolok uainhira ema dehan mai ha’u:

“Ita la’o ba Na’i Nia Uma”.

Ami tau ona ain iha ó odamatan, Jerusalém. Refrão

 

Jerusalém, cidade be hari metin,

Hari metin no kmanek tebes!

Atu uma kain sira hotu sa’e ba,

Uma kain Na’i Nian. Refrão

 

Tuir lisan  Israel nian,

Atu haliban Na’i Nia naran,

Iha nebá iha tribunal justiça nian

Tribunal housi uma kain David nian. Refrão

 

Aclamação                                                                                                                                                                                           Ez. 33. 11

Refrão : Aleluia, Aleluia!! Repete-se

Na’i dehan, Ha’u lakohi ema sala-na’in nia mate, maibé

Atu fila fali mai Ha’u no bele moris. Refrão 

 

Evangelho                                                                                                                                                                                           Lc. 13. 1-9

Na’i Jesus Cristo nia Evangelho Nu’udar São Lucas haktuir:

Iha tempo nebá, ema mai fó hatene ba Jesus kona ba ema Galileia sira nebé Pilatos haruka kahur sira ran ho balada sira nia ran, nebé sira hasa’e ba lulik. Jesus hatan ba sira: “Imi hanoin katak ema Galileia sira ne’e áat liu fali ema Galileia sira seluk tanba sira terus nune’e? La’e, Ha’u dehan ba imi; maibé imi la hakribi karik imi nia sala, imi mós sei mate hanesan sira. Hanesan mós sira sanulu resin  ualu nebé uma andar Siloé nian hanehan mate uainhira uma ne’e monu: imi hanoin katak  sira áat liu fali sira seluk iha Jerusalém? La’e, Ha’u dehan ba imi; maibé imi la hakribi karik imi nia sala, imi hotu sei mate hanesan sira”.

Nia dehan tan aiknanoik ida ne’e ne’e.”Ema ida kuda tiha ai figuera ida iha nia to’os loron ida nia ba buka nia aifuan, maibé la hetan. Tan ne’e nia hateten ba to’os atan: ‘Tinan tolu ona ha’u mai buka aifuan iha aihun ne’e, maibé la hetan ida. Tesi tiha nia tansá nia susu leet rai bokur?’ Maibé to’os atan hatan: ‘Nai, husik nia tinan ida ne’e tan, atu ha’u sei ke’e hadulas nia hun hodi tau mós rai metan. Tinan oin mai nia sei fó fuan karik, di’ak; lae karik, mak ha’u sei tesi tiha nia’’’.

Lia Maksoyn.

Sexta-Feira, XXIX Tempo Comum (ANO A)

Primeira Leitura                             Ef. 4. 1-6

Lia housi São Paulo nia Surat ba sarani sira iha Éfeso:

Maun alin sira: Ha’u, ema dadur  ida iha Na’i, husu imi atu moris lolós tuir imi nia vocação. Tulun malu ho domin, la hodi hanoin imi an rasik, maibé ho laran maus no paciência. Halo buat hot-hotu atu imi bele sai laran ida de’it iha Espírito, housi dame nebé halibur imi hamutuk. Iha isin ida de’it, espírito ida de’it, nu’udar Maromak bolu imi hotu nia esperança ida de’it, uainhira Nia bolu  imi. Iha Na’i ida de’it, fiar ida de’it, baptismo ida de’it no Maromak ida de’it. Nia mak ema hot-htou nia Aman; Nia ukun ida hot-hotu, Nia book an housi ita  hot-hotu no Nia iha ita hot-hotu.

Maromak Futar Lia.

 

Salmo  Responsorial                                                                                                                    Sal. 23(24). 1-2, 3-4ab, 5-6 (R. cf. 6)

Refrão : Ema otas ne’e mak buka Na’i!!! Repete-se

Rai no buat hotu nebé iha nia, Na’i Nian;

Mundo no buat tomak hôrik iha nia.

Maromak hatur rai iha  tasi leten,

Hametin rai iha laloran leten. Refrão

 

Sé mak bele sa’e ba Maromak Nia foho,

Eh hôrik iha Nia kadunan santo?

Ema nebé laran mós no liman la sala,

Ema nebé la jura lia bosok. Refrão

 

Ema ne’e sei simu Na’i Nia bensa,

Nia sei hetan kolen housi Maromak, nia Maksoi.

Ema otas ne’e mak buka Na’i,

Be buka Jacob nia Maromak Nia futar oin. Refrão

 

Aclamação                                                                                                                                                                                     cf. Mt. 11. 25

Refrão : Aleluia, Aleluia!! Repete-se

Rahun di’ak ba Ita, Aman, Na’i lalehan no rai nian, tan

Ita hatudu mistério reino lalehan nian ba kiik sira.  Refrão

 

Evangelho                                                                                                                                                                                     Lc. 12. 54-59

Na’i Jesus Cristo nia Evangelho nu’udar São Lucas haktuir:

Iha tempo nebá, Jesus dehan tan ba ema lubun boot: “Uainhira imi haré kalohan ida iha loromonu, imi dehan katak udan sei tau, no mosu duni nune’e. Uainhira anin huu housi tasimane, imi dehan katak loron sei manas, no mosu duni nune’e. Imi ema laran makerek sira! Imi hatene si’ik buat nebé mosu iha lalehan no iha rai, nusa mak imi la hatene si’ik otas ne’e?  Tan sá imi rasik la haré buat nebé lós? Ne’e duni, uainhira  ó ba tribunal hamutuk ho ó nia funu baluk, buka hadame malu ho nia iha dalan; keta halo be nia lori ó ba juiz, hafoin juiz saran ó ba guarda, no guarda hatama o iha dadur laran. Ha’u dehan ba o katak ó sei la sai housi nebá to’o ó selu hotu”.

Lia Maksoyn.

Quinta-Feira, XXIX Tempo Comum (ANO A)

Primeira Leitura                         Ef. 3. 14-21

Lia housi São Paulo nia Surat ba sarani sira iha Éfeso:

Maun alin sira: Ne’e duni, ha’u hakneak iha Aman nia oin. Housi Nia, família ida-idak iha lalehan eh iha rai simu nia naran. Housi nia glória kmanek liu, Nia haraik ba imi nia biit housi nia espírito, atu imi nia laran bele sai maka’as liu tan, atu Cristo bele moris iha imi nia fuan housi fiar, no nune’e, ho imi nia abut no hun ida domin, imi bele hetan biit hamutuk ho santo  sira hotu atu hatene luan no naruk, aas no kle’an, to’o uainhira imi hatene ona Cristo nia domin, nebé aas liu matenek hotu, imi sei sai nakonu ho Maromak nia kmanek tomak.

Glória ba Nia! Nia biit nebé book an iha ita nia laran, halo barak liu fali buat nebé ita husu ka hanoin, glória ba Nia houri otas ba otas iha Kreda no iha Cristo Jesus tinan ba tinan. Amen.

Maromak Futar Lia.

 

Salmo  Responsorial                                                                                                         Sal. 32(33). 1 e 3, 4-5, 11-12, 18-19 (R. 5b)

Refrão : Na’i Nia laran di’ak nakonu iha rai!!! Repete-se

Hahí Na’i ba, imi sira be laran mós,

Ema fuan sira be lós hahí Nia.

Hananu ba Nia knananuk foun ida,

Hananu ba Nia ho lian midar no ho fuan. Refrão

 

Na’i nia liafuan lós tebes,

Bele laran metin iha Nia liman nia hahalok sira,

Na’i hadomi justiça no lialós,

Nia domin nakonu iha rai tomak. Refrão

 

Na’i Nia plano hela ba nafatin,

No Nia fuan ni desenho ba derasaan hotu.

Ksolok ba povo be fiar iha Na’i, nu’udar nia Maromak,

Povo be Nia hili ba Nia lima-rohan. Refrão

 

Na’i tau matan ba sira be hamta’uk Nia,

Ba sira be hein iha Nia laran di’ak,

Atu hasai sira klamar housi mate,

No fó han uainhira sira hamlaha. Refrão

 

Aclamação                                                                                                                                                                                      Filip. 3. 8-9

Refrão : Aleluia, Aleluia!!! Repete-se

Ha’u hakribi sasan hotu nu’udar buat folin laek atu bele

Fó fatin ba Cristo no hasouru malu ho Nia.  Refrão

 

Evangelho                                                                                                                                                                                     Lc. 12. 49-53

Na’i Jesus Cristo nia Evangelho nu’udar São Lucas haktuir:

Iha tempo nebá, Jesus lia tun ba escolante sira, “Ha’u mai atu lori ahi ba raiklaran, no Ha’u hakarak teb-tebes ahi ne’e lakan duni. Ha’u sei simu baptismo ida, no Ha’u sei  la hakmatek to’o buat ne’e mosu. Imi hanoin katak Ha’u mai atu lori dame  ba raiklaran? Ha’u dehan ba imi  katak lae; maibé atu halo ema haketak malu. Basá houri ohin ba oin, ema na’in lima iha uma laran, sira lia sei la tuir malu: na’in tolu hasouru na’in rua, na’in rua hasouru na’in tolu; aman hasouru oan mane, oan mane hasouru aman; inan hasouru oan feto, oan feto hasouru inan; banin feto hasouru feto foun, feto foun hasouru banin feto”.

Lia Maksoyn.

Quarta-Feira, XXIX Tempo Comum (ANO A)

Primeira Leitura                             Ef. 3. 2-12

Lia housi São Paulo nia Surat ba sarani sira iha Éfeso:

Maun alin sira: Imi rona tiha ona karik kona ba knaar graça nian nebé Maromak saran mai ha’u ba imi nia di’ak; Nia rasik fó hatene mai ha’u mistério nebé ha’u foin haktuir ne’e. Imi lê  tiha ona karik ha’u nia liafuan, imi sei hatene katak ha’u haré naruk liu iha Cristo nia mistério. Mistério ne’e nebé ohin Espírito fó sai ba apóstolo no profeta sira, mistério ne’e ema iha otas uluk  nian la hatene liu. Ne’e katak ohin, gentio sira halo parte ona iha liman rohan ida de’it;  gentio sira isin lolon ida de’it nia liman-ain; sira simu promessa ida d’eit,iha Cristo Jesus, housi Evangelho. Maromak foti ha’u atu sai Evangelho ne’e nia atan, housi presente graça nian housi Nia, nebé fó ida ne’e mai ha’u ho nia rasik nia biit. Maromak saran graça  kmanek ne’e mai ha’u, nebé kiik liu santo sira hotu, la’os de’it atu haklaken ba gentio sira Cristo nia rikusoi ua’in, maibé mós atu fó sai oin sá bele fahe ba ema mistério ida ne’e. Hori otas ua’in, mistério ne’e subar hela iha Maromak, nebé hakiak buat hot-hotu. Tan sá? Atu biit na’in  no ukun na’in sira iha lalehan bele hatene ohin housi Kreda, Maromak nia matenek ua’in teb-tebes, lolós tanba hakarak nebé iha ona Nia houri otas  iha Cristo Jesus, ita Na’i. Tan ne’e  mak ami barani atu hakbesik ba Maromak ho laran metin, housi ami nia fiar iha Nia.

Maromak Futar Lia.

 

Salmo  Responsorial                                                                                                                                      Is. 12. 2, 3, 4bde, 5-6 (R. 3)

Refrão : Imi ba ho ksolol oha wé matan maksoyn!!! Repete-se

Maromak mak ha’u Maksoyn,

Ha’u laran metin, ha’u la ta’uk.

Na’i mak ha’u biit, ha’u ksolok.

Na’i ha’u maksoyn. Refrão

 

Ho ksolok imi kuru ué ih ué matan maksoyn.

Fó agradece ba Na’i, bolu ba Nia naran.

Tatoli ba povo sira, Nia hahalok kmanek,

Haklaken ba hotu katak Nia naran santo. Refrão

 

Hananu ba Na’i, basá Nia halo kmanek  ua’in,

Haklaken housi rai ikun to’o rai ulun.

Hananu  no haksolok ba, sira be hôrik iha Sião,

Tan iha ona iha imi leet Israel nia Santo. Refrão

 

Aclamação                                                                                                                                                                                Mt. 24. 42ª, 44

Refrão : Aleluia, Aleluia!! Repete-se

Imi matan moris neon na’in ba basá iha oras nebé imi

la hanoin hetan mak Mane Maksoi sei mai.  Refrão

 

Evangelho                                                                                                                                                                                     Lc. 12. 39-48

Na’i Jesus Cristo nia Evangelho nu’udar São Lucas haktuir:

iha tempo nebá, Jesus lia tun ba escolante sira nune’e: Imi rona didi’ak ba: uma na’in hatene  karik tuku hira mak na’ok ten atu mai, nia sei la husik nia tama iha nia uma. Imi hein hela ba, basá iha oras nebé imi la hanoin kona, Oan Mane sei hi’it an mai.”

Pedro dehan ba Nia: “Na’i, Ita haktuir aiknanoik ida ne’e mai ami de’it, ka ba ema hot-hotu mós?” Na’i simu: “Se mak atan di’ak no matenek nebé uma na’in haruka atu haré nia familia hodi fahe aihan ba sira tuir oras lolós? Ksolok ba atan nebé nia na’in hetan halo nune’e uainhira nia to’o mai. Tebes, Ha’u dehan ba imi katak  nia sei fó knaar ba atan ne’e atu haré nia rikusoi tomak. Maibé atan ne’e dehan karik  ba nia an: ‘Ha’u nia na’i kleur atu to’o mai, hafoin hahu  baku atan mane no feto sira, hodi han no hemu to’o lanu, nia na’i sei to’o mai iha loron nebé nia la hein no iha oras nebé nia la hanoin, na’i sei fó todan ba nia, hodi tau nia hamutuk ho ema áat sira. Atan nebé hatene nia na’i nia hakarak, maibé la hadi’a an hodi halo tuir buat nebé nia husu, sei hetan kastigu barak. Maibé atan nebé la hatene, no halo buat nebé soi kastigu, sei hetan kastigu kmaan de’it. Ba ema nebé simu barak, sei husu mós barak; no ema nebé simu knaar boot, barak liu mak ema sei husu ba nia”.

Lia Maksoyn.

Terça-Feira, XXIX Tempo Comum (ANO A)

Primeira Leitura                          Ef. 2. 12-22

Lia housi São Paulo nia Surat ba sarani sira iha Éfeso:

Maun alin sira: Ne’e duni, imi la iha Cristo no la tama iha uma-kain Israel nian, nu’udar malae nebé la halo parte iha moruk Maromak nia promessa nian, la iha esperança no la iha Maromak iha mundo ne’e; maibé ohin iha Cristo, imi nebé uluk dook teb-tebes, Cristo nia ran lori imi besik mai. Nia mak ita nia dame; Nia halo povo rua ne’e sai ida de’it; Nia hatun tiha muru nebé haketak ita, hodi  sobu iha Nia an rasik laran hirus malu nian; Nia halo folin laek iha nia isin rasik ukunfuan nia haruka sira, atu  halo iha nia an ema foun ida de’it housi uma-kain rua ne’e, hodi nune’e harii dame iha sira leet. Ho nia cruz,  Nia halo uma-kain rua ne’e hadame malu iha isin ida de’it iha Maromak. Iha Nia an rasik, Nia oho tiha laran hirus malu nian. Nia mai atu lori liafuan di’ak dame nian; dame ba imi nebé hela dook no dame ba sira nebé hela besik. Housi Nia, ita rua hetan espírito ida de’it atu barani hakbesik ba Aman.

Ne’e duni, imi la’os tan malae eh ema la’o rai; imi rai na’in hanesan santo sira hotu, no imi emar iha Maromak nia uma laran . Imi halo parte uma boot ida: apóstolo no profeta sira mak uma ne’e nia hun, no Cristo Jesus mak nia fatuk inan. Fatuk ai ida-idak tuir Nia. Imi mós iha Nia sa’e ba daudaun ba uma ida nebé Maromak hôrik ba, iha nia Espírito.

Maromak Futar Lia.

 

Salmo  Responsorial                                                                                                         Sal. 84(85). 9ab-10, 11-12, 13-14 (R. cf. 9)

Refrão : Na’i, haklaken dame ba Nia povo!!! Repete-se

Ha’u rona bua Na’i dehan:

Maromak fó hatene dame ba Nia povo no Nia emar,

Nia maksoyn besik ba ema be hamta’uk Nia,

Nia glória hôrik iha ita rain. Refrão

 

Laran di’ak no domin sei hetan malu,

Dame no justiça sei hako’ak malu.

Neon lós sei tubun  housi rai,

Justiça sei tun mai housi lalehan. Refrão

 

Na’i sei haraik buat nebé di’ak,

Ita rain sei fó fuan.

Justiça sei la’o iha Nia oin,

Dame sama tuir Nia ain fatin. Refrão

 

 Aclamação                                                                                                                                                                                          Lc. 21. 36

Refrão : Aleluia, Aleluia!! Repete-se

Imi neon moris hodi hamulak nafatin atu imi bele hamriik

ho laran metin iha Mane Maksoyn Nia futar oin.  Refrão

 

Evangelho                                                                                                                                                                                     Lc. 12. 35-38

Na’i Jesus Cristo nia Evangelho nu’udar São Lucas haktuir:

Iha tempo nebá, Jesus lia tun ba escolante sira, dehan: “Kesi metin imi nia futukabun no halo imi nia ahi oan lakan nafatin. Halo imi an hanesan ema sira nebé hein sira nia na’in uainhira nia mai housi festa kaben nian, atu loke kedas odamatan iha oras nebé nia to’o mai hodi tuku odamatan. Ksolok ba atan sira nebé Na’i hetan hader hela uainhira Nia to’o. Tebes, Ha’u dehan ba imi katak, nia sei kesi hena  ba nia knotak, sei halo sira tur iha mesa, hafoin Nia sei liu housi sira leet hodi serbi sira. Nia to’o mai karik iha ronda rua ka tolu, hodi hetan sira nune’e, ksolok duni ba sira.

Lia Maksoyn.

Segunda-Feira, XXIX Tempo Comum (ANO A)

Primeira Leitura                            Ef. 2. 1-10

Lia housi São Paulo nia Surat ba sarani sira iha Éfeso:

Maun alin sira: Imi mate tiha ona tanba hahalok áat no sala, nebé imi halo uainhira imi moris hela tuir mundo ne’e, hodi halo tuir ida nebé ukun nia, espírito nebé book an iha ema ulun tós sira nia laran. Uluk, ita hotu tama mós iha sira leet, hodi moris nu’udar ema laran fo’er, nebé ita nia hakarak áat no ita rasik nia hanoin áat mak ukun; nnune’e, tan ita an rasik mak ita mós, hanesan mundo tomak, soi Maromak nia laran nakali. Maibé Maromak hadomi ita teb-tebes. Nia haua’in nia laran luak mai ita. Maske ita mate tanba ita nia sala, Nia halo ita moris hi’as ho Cristo; housi graça mak imi hetan maksoyn; hodi foti ita hamutuk ho Nia no fó fatin mai ita hamutuk ho Nia iha lalehan, iha Cristo Jesus.

Ne’e atu hatudu ba ema hotu iha otas nebé atu mai, housi nia laran di’ak mai ita iha Cristo Jesus, katak nia graça ua’in teb-tebes. Basá housi graça mak ita hetan maksoyn, housi fiar, la’os housi buat ruma nebé mai housi imi, maibé housi presente ida housi Maromak; la’os housi imi nia hahalok ruma, atu nune’e ema ida la bele gaba an. Ita mak Maromak nia hahalok kmanek, nebé Nia hakiak iha Cristo Jesus, atu ita bele moris nu’udar ema di’ak nu’udar Nia hakarak nanis houri uluk kedas.

Maromak Futar Lia.

 

Salmo  Responsorial                                                                                                                                Sal. 99(100), 2, 3, 4, 5 (R. 3b)

Refrão : Na’i, halo ita moris, Ita Ninian!!! Repete-se

Rai klaran tomak hahí Na’i!

Serbi Na’i ho ksolok;

La’o to’o Nia ho knananuk ksolok nian. Refrão

 

Imi hatene ba, Na’i mak Maromak!

Nia mak halo ita moris, ita Ninian.

Ita Ninia povo, bibi sira housi Nia bibi luhan. Refrão

 

Imi tama housi odamatan mai, fó graça,

Tama liu housi Nia uma klabis ho hino hahí nian,

Agradece ba Nia, hahí Nia naran. Refrão

 

Basá, Na’i di’ak!

Nia laran-luak rohan laek.

Ninia neon lós hada’et housi otas ba otas. Refrão

 

Aclamação                                                                                                                                                                                              Mt. 5. 3

Refrão : Aleluia, Aleluia!! Repete-se

Ksolok ba sira be kiak iha espírito basá reino

Lalehan sira nian.  Refrão

 

Evangelho                                                                                                                                                                                      Lc. 12. 13-21

Na’i Jesus Cristo nia Evangelho nu’udar São Lucas haktuir:

Iha tempo nebá, housi ema lubun boot, ema ida dehan ba Nia: “Mestre, hateten ba ha’u nia maun atu fahe ami nia liman rohan.” Nia hatan: “Belun, sé mak foti Ha’u atu tesi lia kona ba imi?” Hafoin Nia dehan ba sira: “Imi haré ba, keta kaan rikusoi, basá, la’os ema nia rikusoi mak halo ema moris liu.”

Tuir mai, Nia haktuir ba sira aiknanoik ida ne’e: “Ema riku ida hetan aihan barak housi nia to’os. Nia hanoin hodi dehan ba nia an: ‘Ha’u sei halo sá lós? Basá ha’u fatin la iha atu rai ha’u nia aihan sira.’ Hafoin nia dehan: ‘Ha’u sei halo nune’e: ha’u sei sobu ha’u nia aihan fatin hodi harii ida seluk boot liu fali ida ne’e; iha nebá ha’u sei rai trigo hotu ho ha’u nia rikusoi tomak. No ha’u sei dehan ba ha’u nia klamar: ‘Ha’u klamar, ó iha sasan barak nebé rai hela ba tinan ua’in; hakmatek ba, han hemu hodi haksolok ba.’ Maibé Maromak dehan ba nia: ‘Beikten! Iha kalan ne’e kedas Ha’u sei husu ó atu saran ó nia klamar; sasan sira nebé ó rai hela sei sai se nian?’ Nune’e mós sei mosu ba ema nebé rai hela rikusoi ba nia an, maibé la sai riku ba Maromak futar matan”.

Lia Maksoyn.

WHAT WE DO IN LIFE, ECHOES TO ETERNITY

Reflexão Domingo Comum XXIX/Ano A/2020

 

Is 45,1,4-6 1Tes 1,1-5b Mt 22,15-21

 

Iha filme Gladiator publicado iha tinan 2000 e tal, autor Russel Crowe (Maximus); nia nu’udar general força armada Romano, wainhira atu hahu funu ho inimigo, nia encoraja (fo aten brani) ba força sira hodi dehan; what we do in life, echoes to eternity (Saida mak ita halo iha moris, ninia ecos sei continua ba eternidade).

Saida mak ita halo iha rai ne’e nu’udar ema Cristão Católico, ninia implicação sei hatutan ba moris eternidade loron aban nia iha mundo seluk.

Seman kotuk Jesus hanorin ona ita nobun ho ai-knanoik ida kona ba ema hirak nebé hetan conivte ba festa casamento maibé, sira rejeita atu participa.Tuir interpretação Bíblica, Jesus nia ai-knanoik ne’e ho objectivo atu convida ita nobun ba dalan conversão espiritual (Fiar hodi moris tuir ukun fuan kreda Católica nian nebé hatutan Jesus nia hanorin sira). Semana ne’e, Jesus la hanorin ho ai-knanoik maibé, hanorin ho afirmação katak:“fo ba César buat nebé César nian, fo ba Maromak buat nebé Maromak nian”.

Jesus nia afirmação eh lia kroat ne’e refere ba princípio fundamental moris ema nian (criatura) perante Maromak (criador) ao mesmo tempo Maromak nia lalaok perante ema; relação reciprocidade ne’e ninia concreto mak; respeita, moris los no justo. Situação Rai Timor hatudu momos oinsa Maromak nia manu-ain (profeta/Nailulik) sira wainhira koalia lia korat hasoru governantes sira, político hirak ne’e sei contra argumento ho hasai batina, mete política, la tau matan ba sarani,….nst.

Relativo ho pergunta dilemático nebé ema fariseu ho herodiano sira halo ba Jesus katak: : “Mestre, ami hatene katak Ita dehan de’it lialos, Ita hanorin lolos Maroma nia dalan, Ita laran la monu ba ema ida, tan Ita la haré ba ema nia hahalok di’ak, Ne’e duni, dehan tok Ita nia hanoin mai ami: bele eh la bele, selu imposto ba César?” Maibé, Jesus hatene sira nia hanoin aat, simu hasoru sira: “tan sa imi hakarak koko Hau? Jesus hatene muito bem katak grupo herodiano ho Fariseu maske hare malu matan la mos maibé tan de’it Jesus nia presença fo ameaça grupo rua nia ideologia, então, sira buka leet atu hamonu Jesus publicamente ho pergunta simples ne’e. Basá, se Jesus fo resposta dehan la bele selu imposto ba Cesar, então grupo Herodiano sei halo queixa ba liurai no condena Jesus nu’udar rebelde nebé la hakruuk ba liurai, la hakruuk ba estado, la hakruuk ba lei eh regulamento sira.

Se Jesus fo resposta dehan tenke selu imposto ba Cesar, ne’e sei halo fariseu sira ran nakali hodi considera Jesus nu’udar traidor nebé hakruuk ba imperador Romano no la moris tuir Lei Moises nian. Afinal, Jesus nia resposta tesi kotu kedas grupo rua nia intenção aat no soke kona kedas sira nia kalili hun.

Historicamente, durante ocupação Romano sobre rai Palestina, hatuur ona regra ida nebé vigora katak; ema hotu nebé atinge ona idade 12 too 65, tenke selu imposto percapita tuir rendimento loro-loron.

Compara ho estado colonial Portugal, lei ne’e quase hanesan de’it. Too era ukun rasik-an mos lei ne’e mosu nafatin ho foramto seluk. Povo nia osan (osan estado) barak liu mak nasulin ba grupo partidária sira do que resultado serviço iha terreno. Wainhira nai lulik ida rua halo crítica ba situação socio-política rai laran, político ida rua, li-liu sira nebé foin sente midar kaer cargo estado, kebakaran jenggot hotu. Contra argumento nebé mak sai hanesan última bala ao mesmo tempo sai hanesan veneno bosok povo mak; ami ne’e povo mak hili, ami nia partido manan mak ami mai tur iha ne’e, amu sira lalika mete política,….nst.

Iha conteudo pergunta ne’e, fariseu sira nia intenção principal mak oinsa atu hamonu Jesus nia figura no hafoer Jesus nia naran iha público atu nune’e, Jesus nia papel messiánica bele lakon lalais se lae fariseu sira nebé proclama-an hanesan grupo lutador, fundador, cumpridor, sei lakon popularidade iha sociedade tan de’it Jesus nia crítica sira.

Jesus hatene muito bem, backround fariseu sira nia nebé munafik (fingido); kaan ten poder, kaan ten halibur riku soin, kaan ten buka naran. Tanba ne’e mak Jesus fo resposta mais prudente hodi tenik katak: “fo ba César buat nebé César nian, fo ba Maromak buat nebé Maromak nian”. Ho expressão simples, se ita compara ho lalaok ohin loron nian, Jesus hakarak afirma katak; cumpri lei hirak nebé vigora iha estado ida ne’e, la bele kahur interece privado, interece partido, interece família ho interece estado ba bem comum. Politico sira dala barak koalia kona ba povo nia direito, justiça ba ema hotu maibé, na realidade, sira luta ba rak liu ba partido ou lider partido nia interece, grupo familiares nia interece, inclui Asal Bapa Senang, Hau nia cargo (jabatan) aman (seguro). Religioso sira mos, ida rua la consegue moris tuir espiritualidade pobreza no lutar pelas almas, sociedade civil ida rua mos, halo crítica ba estado maibé, seidauk bele fo alternativa concreta balu estado atu soluciona problema socio-política rai ida ne’e.

Expressão: “fo ba César buat nebé César nian, fo ba Maromak buat nebé Maromak nian” bele mos ita observa wainhira besik tempo Eleição Geral, político ida rua começa badinas ba missa, lalin fen-oan, laen, ba missa ho motivo pencitraan enquanto sai husi portão uma kreda, hanoin mai fen kiik, laen kiik, projecto nia persen, tender, regalias sira.

Jesus nia expressão simples ne’e, exige de’it ita ema nia cinceridade (keseriusan) hodi cumpri lei nu’udar cidadão no cumpri mandamento nu’udar ema fiar nain. Labele kahur obrigação nu’udar sarani ho dever cidadania ho motivo atu hentan pode ou atinge metas la tuir dalan. Los duni, mandamento ho lei sira iha ligação ba malu maibé, ninia aplicação tenke tuir ida-idak nia âmbito.

Documento Concílio Vaticano II nu’udar Documento conciliário (Constituição) ida nebé descreve papel Igreja Católica iha mundo actual: Gaudium et Spes (Alegria e Esperança) hakerek: “As alegrias e as esperanças, as tristezas e as angústias dos homens de hoje, sobretudo dos pobres e de todos aqueles que sofrem, são também as alegrias e as esperanças, as tristezas e as angústias dos discípulos de Cristo; e não há realidade alguma verdadeiramente humana que não encontre eco no seu coração. Porque a sua comunidade é formada por homens, que, reunidos em Cristo, são guiados pelo Espírito Santo na sua peregrinação em demanda do reino do Pai, e receberam a mensagem da salvação para a comunicar a todos. Por este motivo, a Igreja sente-se real e intimamente ligada ao género humano e à sua história”. Ema kiak, ema mukit, ema simples, ema kbiit laek, hirak ne’e hotu mesak Cristo nia emar. Sira nia halerik sira nu’udar mos Cristo nia halerik. Sira nia ksolok nu’udar mos Cristo nia ksolok. Ema hotu nebé simu we Baptismo iha Kreda Católica hetan knaar hodi lori ksolok ba mundo laos lori conflito de interece ba sociedade.

Papa emérito Bento XVI iha ninia pensamento social hatete:” Kesamaan martabat, kebebasan dan solidaritas antar manusia harus tercermin di dalam wajah Gereja Kristus di zaman kita sekarang ini, bila ingin tampil dan dinilai otentik oleh masyarakat”. Ne’e mak concretização lolos husi espírito documento Gaudium et Spes. Ita hotu hetan knaar hodi lori mundo ba Maromak. Maromak hakbesik-An ona mai mundo iha Cristo, nune’e mos hamutuk ho Cristo nia hanorin sira, ita nobun nadodon ba Reino Lalehan. Ita harí sociedade ida que justo, hanesan mos ita hetan tiket lalehan nebé kmook tebes. Assim Seja e Bem Haja. (ignaslopes2020)

TAN SA IMI HAKARAK KOKO HAU?

(MT. 22, 15-21)

 

Maun alin sarani doben sira, Na’i Jesus ninia pergunta ida ne’e lori ita ba kedas iha pergunta seluk ida nebé dehan “Se mak koko ita boot Na’i, Haú sa lae” nu’udar resposta autodefesa ida ita ida-idak nian mas que ita la percisa halo auto defesa ba ita ninia-an tamba ita mesak ema sala na’in de’it. Pergunta Jesus ninan ne’e husi sorin seluk mos lori ita ba reconhece ita ninia fraqueza sira seluk nebé dala wain mosu hodi hadook ita husi moris lolos nu’udar discipulo ka povo Maromak ninian, ou nu’udar Maromak oan lolos, nune’e ita mos bele hafoun fila fali ita ninia compromisso moris nu’udar sarani iha maun alin seluk sira ninia leet.

 

Iha primeira leitura Na’i Maromak continua revela nafatin ninia-An mai ita hodi hatudu katak Maromak ninia domin mai ita ema sira rohan la’e no atu descobre ida ne’e ita percisa se tilun no rona nafatin ba Maromak be koalia no atua iha ita ninia moris iha momento no tempo hotu hotu. Haktuir iha leitura ne’e katak Na’I Maromak hatudu nina-an nu’udar Maromak mesak ida de’it, laiha tan Maromak ida seluk. Nia Maromak ida nebé bele halo hotu hotu, to’o Nia bele halo ema sira nebé la hatene Nia mos bele sai ninia instrumento ida hodi realiza ninia hakarak ba ema hotu, liu liu ba ninia povo be Nia rasik mak hili no Nia hadomi tebtebes. basa ema sira ne’e tau fiar no laran metin iha los de’it Maromak mesak ida ne’e. Ita rona haktuir katak tamba domin boot ba Jacob no ba Israel Na’i Maromak hili hodi halo Ciro Liurai ida nebé la conhece Maromak sai instrumento ida ba realização ninia maksoin rohan laek ba ninia povo, liu husi Ciro Maromak sei hatudu mos Maromak ninia Gloria hodi ema hotu bele hatene katak laiha tan Maromak seluk ida selaos mak Nia mesak de’it.

 

Doben maun alin sira, iha segunda leitura São Paulo ho ninia colaboradores sira, Silvano no Timoteo encoraja ema sarani sira atu metin iha sira ninia fiar basa Maromak ida nebé hori uluk hori wain kedas too ohin loron hatudu nafatin Ninia domin rohan laek ba povo Israel, no ita fiar katak oras ne’e hatudu mos domin nebé hanesan ba povo tesalonica no mai ita Timor oan sira. Povo Timor be seim duvida sai mos povo ida be tamba domin Nia hili atu fo sasain kona ba Ninia Reino iha mundo rai klaran. São Paulo dehan imi tem que moris nafatin iha sasin moris ida be nakonu ho domin tuir Evangelho nebé haklaken ona ba imi iha tinan 500 nia laran. Evangelho ne’e laos liafuan mamuk de’it maibé Liafuan Moris nian be iha kbiit, haklaken ba imi ho kbiit tomak no ho Espirito Santo ninia kbiit. Kbiit atu haroman, hamoris, haboot, haluan no hametin Maromak oan sira ninia moris nu’udar ema be fiar ba Maromak mesak ida de’it, Aman, Oan no Espirito Santo. Tamba ne’e iha moris hamutuk nu’udar comunidade ema sarani sira ka nu’udar Maromak oan, hotu hotu hamutuk percisa tau laran metin loloos nafatin ba Maromak; Aman, Oan no Espirito Santo. Hodi moris nune mak Maromak sei halo ita sai nafatin instrumento hodi lori ninia Reino ba rai hotu hotu.

 

Maun alin doben sira, iha moris Maromak ninia oan sira nian domin mak sai centro no sai we matan ba hahalok diak sira seluk nebé wainhira ema moris ona iha domin sei suli sai nakonu naresin iha ema sira ninia moris. Wainhira ema la moris ona iha domin nia laran, sei mosu iha sira ninia moris mak laran moras, hakarak at, rai ódio, vingança, bosok, defama, bobar lia, egoisata, rancor no seluk seluk tan no nu’udar ninia consequência mak lakon iha sira ninia moris paz lolos no domin lolos nian. Iha evangelho ohin nian ita rona ema sira be moris nakonu de’it ho hakarak at, hanoin at no laran moras haruka sira ninia belun sira hakbesik-an ba Jesus atu koko Jesus basa Jesus ninia presença halo sira labele tan ona moris tuir de’it sira ninia hakarak, halo sira lakon prestígio be sira goja hela, halo sira ninia fama monu iha povo sira leet. Wainhira Jesus hanorin kona ba Maromak ninia domin no aplica concretamente Maromak ninia domin ne’e ba Maromak ninia povo, ema at sira ne’e ninia falcidade começa hatudu-an, sira ninia urgulho be hakarak buka diak de’it ba sira-an começa monu. Sira ninia la halao knar lolos be sira simu husi Maromak nu’udar ulun sira povo nian hahu mosu, no povo sira hahu lakon confiança ba sira. Nune mak sira la sente hakmatek, nune mak sira laran moras hodi hakarak koko hodi buka atu hamonu Jesus. Doben maun ho alin sira, moris att ida hanesan ne’e ohin loron mos sei mosu nafatin hela iha ita ninia leet, too dala balun mos ita keta halo hotu karik tamba de’it ita la tau fiar no laran metin lolos iha Maromak, tamba de’it ita haluhan tiha katak ita ema sira Maromak Oan be nia hadomi liu, tamba ita ocupado liu ho sasan no moris mundo nian hodi haluha tiha buat lalehan nian sira be Maromak hatudu, no halo ona mai ita liu husi ninia Oan doben ita Na’i Jesus Cristo, hodi mos husu mai ita atu ita ba nati tuir iha ita ninia moris loro-loron.

 

Ohin loron, ho desenvolvimento tecnológico no progresso moris iha vida melhor nebé ita hahu sente dadaun ona halo ema dala wain iha liu tendência atu buka de’it buat sira necessidade material nian hodi haluha tiha valores moris nian sira iha vida espiritual nian hanesan ohin Maromak hatoo mai ita; domin, laran metin, fiar metin, laran diak, la hakarak at ba ema seluk, buka de’it diak ba ema hotu. Maibé doben maun alin sira, Na’i Maromak ninia futar liafuan ohin nian convida ita atu fila fali ba Maromak, atu pausa itoan husi ita ninia atividade sira be foti liu ita ninia atenção hodi preenche necessidade material ita nian hodi fo mos tempo balun ba hakmatek, ba Maromak hodi hafoun fila fali iha ita-an valores sira moris nu’udar Maromak ninia oan doben lolos sira iha ita ninia vida espiritual hanesan; reflexão, oração, rona Maromak ninia futar liafuan, rona maun alin sira seluk, leitura ba ita ninia moris social, prática compaixão, perdão, Misericordia, fidelidade, fé, esperança no caridade. Ho ne’e ita haboot hafoun, haboot no hametin fila fali ita ninia domin lolos ba maun alin sira no ba Maromak hahu kedas ona iha ita niia uma laran, ita ninia grupo, bairro, ita ninia moris hamutuk iha sociedade no iha ita ninia rai Timor Leste. Amen.

 

Casa de Dom. Jaime Garcia Goulart, Vila Verde

DC XXIX ANO-A, 118.10.20, Por: Pb