shadow
Diocese de Dili > NOTÍCIAS > Articles by: Departamento Comunicação Diocese Dili

HADIA NAI NIA DALAN TERIK SIRA……..U Grande…????

Tecnologia halo ita nia valor moral tun ba bebeik. Advento nudar biban atu ita prepara-an nudar Cristão Católico nebe diak. Hadia Nai nia dalan terik, haloos nia fohon sira.Relato Evangelho Mateus (3,1-2) ba Domingo semana nee, inclui mos Evangelista nain tolu seluk hanesan São Marcos (1,1-8), São Lucas (3, 3-9.15-17 no Evangelho São João (1, 19-28). Sira hotu fo afirmação importante ida kona ba importância conversão lolos ba ema fiar nain sira nebé deseja salvação. Figura nebé, bolu ita nia atenção iha segundo Domingo Advento semana nee laos Jesus maibé João Baptista nebé mai uluk hodi anuncia Maksoin nia mai. Mensagem principal nebe João Baptista haklaken mak paz no fraternidade. Mensagem nee mos profeta Isaías hatoo antes ona nudar ita rona iha Primeira Leitura Domingo semana nee (Is 11,1-10). Conversão radical/profundo necessário liu hodi atinge ideal Paz no fraternidade nebe confirmado iha Segunda Leitura (Rm 15,4-9).

Profeta Isaías iha nia escrito declara:”prepara Nai nia dalan iha rai fuik maran, haloos Nai nia dalan terik sira” (Is 40,3). Saida mak João Baptista hakarak hatoo basea ba profeta Isaías nia declaração nee? João Baptista hakarak bolu ita nia atenção ba processo preparação (conversão) hodi simu Maksoin tuir dalan los.

Pano do fundo (Latar Belakang) husi afirmação João Baptista kona ba deserto (rai fuik maran) nee, nudar analogia ida kona ba situação  no condição concreta nebe acontece iha rai Palestina iha altura neba. Jerusalém cercado tiha husi rai fuk maran. Ema hirak nebe atu hakat ba Jerusalém iha momento neba, nia tenke lao liu duni husi deserto nee ho dalan terik nebe tun-sae. Antes hakat too Jerusalém, ema sei hasoru buat oi-oin nebe impede viagem, no impedimento hirak nee precisa hadi tiha hanesan ateru tiha rai kuak sira, hatetuk laletek sira nebe keluk ba mai. Nee mak ema Judeu sira tenke halo wainhira sira atu halo viagem ba Jesusalém hodi celebta loron boot sira hanesan páscoa.

Baseia ba realidade ida nee mak João Baptista bolu ema hotu hodi hakribit pecado atu simu Maksoin be ema nobun hein. Buat nebe hatudu eh aparece físicamente, João baptista utiliza ida nee hodi justifica buat nebe la aparece. Ho lia fuan seluk ida bele dehan; João Baptisa uza analogia exterior hodi fanun ema nobun hadi moris interior atu nunee, bele merece simu Maksoin. Realmente, João Baptista uza metafora ou seja ai-knanoik bas’a, nia hakarak ema hotu entende katak desafio nebe teri netik ema moris fiar precisa haloos tiha. Por exemplo durante tempo Advento nee, ita precisa ba confessa no halo ação caritativa ruma. Ita nia hahalok no fuan mak deserto nebe João Baptista menciona iha metafora nee. Dalan los no mos mak critério principal  atu simu Maksoin. Iha contexto fiar Católica, tempo Advento sai ocasião importante hodi hakribi sala liu husi sacramento Confessa no atu halao penitência, bele mos hatudu iha lalaok caritativa ruma basá, caridade nee mos parte ida husi princípio fiar sarani nian.

Conversão nudar lalaok todan ba ema fiar nain nebe seidauk hatoman-an ho moris sarani nian. Conversão mos nudar experiência moruk ida ba ema nia moris tan tenke cumpri regra oi-oin tuir Maromak nia vontade. Lalaok hirak nee bele compara eh analogia ho Jerusalem nebe cercado (hadulas) husi rai maran (deserto) sira. Jerusalem nebe deserto haleu nia, bele compara hanesan ita nia fuan nebe hasoru dificuldade oi-oin hanesan situa,cão política rai laran nebe incerteza, vida economia povo Timor nian nebé depende demais ba produto husi liur, desemprego halo jovem barak ba forma iha embaixada Portugal hodi hetan netik serviço oan ruma, tina-tinan gradução acontece iha universidade sira maibé, infelizmente campo de serviço mínimo tebes. Político sira nebe iha responsabilidade moral ba rai ida nee, hadau malu poder hodi hamosu incerteza política iha rai laran. Nee mak sentido husi simbologia deserto (rai fuik maran) nebe haleu lesuk cidade Jerusalém.

Vaidade, ambição poder, defamação, vingança política oras nee harame palco política Timor Leste. Iha Aspecto religioso, sarani barak haré tempo advento hanesan tempo preparação sosa hena foun laos conversão ka cofessa no ação caritativa. Foin deit dia 1 de Dezembro Timor Plaza, Colmera, Bidau no loja sira oioin hahu toca ona música Natal. Música hirak nee lori sarani barak imagina ona ambiente Natal maibé, nudar Católico, ita precisa tuir etapa religioso sira hanesan Advento durante semana haat mak foin tama ba tempo Natal too início fulan Janeiro.

Sarani Católico precisa tau iha consideração ida katak; música Natal sira nebe ema toca iha loja nee iha motivo económico (business) hodi hetan lucro. Até que too momento balu, ema sira iha loja mos la compreende sentido Natal ho Advento. Maske foin tempo Advento deit, ema começa celebra ona Natal bersama, hemu lanu, sunu fogete, dansa bulak rai iha tasi ibun sira. Too ponto hirak nee, ema começa considera Advento ho Natal hanesan deit ritual cerimonial nebe lakon ona ninia sabor religioso.

João Baptista nia convite ba conversão, tuir los relevante tebes atu ita tur iha momento ruma hodi hanoin sentido moris sarani nian. Tanba nee mak João Baptista dehan:”hadia Nai nia dalan terik sira”. Precisa prepara didiak ita nia klamar nudar Católico diak hodi tuir etapa moris arani nian. Advento durante semana 4 fo biban hodi halo netik buat diak ruma ba moris sarani nee. Ohin loron ema haré missa (eucaristia) hanesan cerimónia baibain deit. Ema baruk ona ba confessa tanba sente-an la halo pecado mortal iha moris nee maibé, iha quinto-canto tolok malu, abortos, droga, mafia, oportunista, jual-beli jabatan, fahe projecto, nst.

Tecnologia halo ita nia valor moral tun ba bebeik. Advento nudar biban atu ita prepara-an nudar Cristão Católico nebe diak. Hadia Nai nia dalan terik, haloos nia fohon sira. (Ignas)

II Domingo Iha Tempo Advento (ANO A)

Primeira Leitura                      Is. 11, 1-10

Lia housi Livro Profeta Isaías :

Iha loron hirak neba, delum ida sei moris housi Jessué nia hun, tubun ida sei nakboas housi Jessué nia abut. Nai nia Espírito sei hamahan Nia; Espírito fo matenek no ulun mamar ; Espírito fo sasin-an no kbiit; Espírito atu hanourin no hamtauk Na’i. Ho hamtauk Maromak, Nia sei la tesi lia tuir nia haré, tuir ema hateten. Nia sei tesi lia tuir justiça ba ema kiak sira, Nia sei tesi lia lolós  ba ema kiak sira. Hodi Nia lia fuan makas, hasoru ulun sira nebe fo terus povo; ho deit Nia i’is, sei oho ema la hamtauk Maromak. Nia, ema justiça nain, ema laran ida deit; asu fuik sei hela hamutuk ho bibi malae; leopardo sei toba hamutuk ho bibi timur; karau ho leão sei lao hamutuk; labarik oan ida mos, bele kesi sira; karau vaca sei han du’ut hamutuk ho urso; sira nia oan sei toba hamutuk. Leão sei han du’ut hanesan karau. Labarik nurak sei halimar iha samean nia knu’uk; Labarik oan, husik ona susu, sei sokar liman ba samodok nia ria-koak. Ema ida sei la halo a’at ona, iha Hau nia foho santo, basá, Maromak nia matenek sei nakonu iha rai, nu’udar we nakonu iha tasi. Iha oron nebá, tubun Jessé nian sei mosu, nu’udar bandeira povo sira nian. Ema rai tomak sei mai buka nia mahan atu horik bá.

Maromak Futar Lia.

 

Salmo Responsorial                                                                                                                                      Sal. 71(72), 2. 7-8. 12-13. 17

Refrão : Na’i Liurai justiça no damen, hiit-an mai!!! Repete-se

Maromak, Mharaik ba liurai tesi lia ho neon,

Ba liurai oan, ita lia lós.

Liurai sei ukun Ita povo ho justiça,

Tau matan hanesan ba kiak oan sira. Refrão

 

Justiça sei buras iha nia loron,

Damen sei naruk too loron ikus.

Tasi mane, tasi feto, Nia sei ukun,

Housi mota boot too rai ulun rai ikun. Refrão

 

Liurai sira housi rai Társis no rai kiik,

Mai selu rai ten;

Housi Sabá too Arábia hatama sira soin;

Iha Nia futar oin, liurai hotu tuku-tur ba rai. Refrão

 

Nia sei rona ema kiak sira lian;

Nia sei sadia ema neon susar.

Sei hanoin ema kbiit laek haraik-an

Nia soy ema ki’ak sira. Refrão

 

Segunda Leitura                                                                                                                                                                         Rom. 15, 4-9

Lia housi São Paulo nia surat ba sarani sira iha Roma:

Maun alin sira: Lia hotu nebe hori uluk ema hakerek, sira hakerek hodi hanourin ita, atu ita hetan laran metin housi laran badinas no ksolok Escritura nian. Maromak laran badinas no ksolok nian, tulun ita ba, atu imi iha ba malu, hanoin ida deit, tuir Cristo Jesus. Nunee, ho neon ida, lia ida imi sei hahi Maromak, Ita Nai Jesus Cristo nia Aman. Ne’e duni, imi sei tulun malu nudar Cristo mos tulun imi atu hahi Maromak. Tan ne’e hau dehan: Cristo halo-An ba atan atu servi judeu sira hodi hatudu katak, Maromak mak lós, hodi hametin mos lia hakotu ba ita nian bei-ala sira. Housi gentio sira, sira mós hahi Maromak, tan Nia laran luak, nu’udar hakerek nanis:”Tan ne’e, hau sei hanai hawelok Ita boot iha gentio sira leet, no mos sei hanai hahi Ita naran”.

Maromak Futar Lia.

 

Aclamação                                                                                                                                                                                            Lc. 3, 46

Refrão : Aleluia, Aleluia!! Repete-se

Hadi’a Ita Na’in Nia dalan halós Nia dalan inuk;

Criatura tomak sei hare Maksoyn mai housi Maromak. Refrão

 

Evangelho                                                                                                                                                                                           Mt 3, 1-12

Na’i Jesus Cristo nia Evangelho nu’udar São Mateus haktuir:

Iha loron hirak nebá, João Baptista mosu iha rai klés maran Judeia nian, hanorin namanas, nia dehan:”Hakribit imi an ba, hodi fila ba diak basá, Reino Lalehan besik too ona”. Konaba João nee mak profeta Isaías koalia dehan:”ema kiak ida, iha kles maran: Hadia Nai’i nia dalan, halós Ninia dalan terik”. João nee duni, taka tais ida, soru ho kuda camelo fulun, kesi konotak ho futu-kabun kulit ida. Ninia hahan mak lalaek no wani wen fuik, Iha nee, ema husi Jerusalém, husi Judeia, husi rai besi-besik Jordão, ba hasouru nian, hodi hakkribit salan, atu simu Baptismo husi motaJordão. Wainhira nia haré katak ema Saduceu ho Fariseu  wain mai simu ninia baptismo, nia dehan ba sira:”samea oan sira, sé mak fo lia ba imi  atu halai husi Maromak nia castigo todan, nebé atu too dau-daun mai? Imi sei buka deit hahalok diak hodi hatudu katak imi hakribit duni imi salan. Imi keta hanoin katak imi bele dehan:’Abraão mak imi nia aman!’ Basá, Hau dehan ba imi: Maromak bele halo oan ba Abraão husi fatuk sira nee. Baliun iha ona ai-abut sira leten. Tan nee, ai sira nebé la fo fuan diak sei huan no soe tiha ba ahi. Hau sarani imi hodi we atu halo imi hakribit salan. Maibé, Ida nebe sei mai tuir hau, Nia iha kbiit liu hau; hau la soin atu lori Ninia sandális talin. Nia sei sarani imi hodi Espírito Santo no ahi. Nia kaer lafatik hodi haliri: Nia sei hamós no tau hamutuk hare eh trigo iha luhu. Maibé, hare eh trigo kain, Nia sei soe ba ahi, nebé la mate!”.

Lia Maksoyn.

Sábado, I Semana Iha Tempo Advento (Ano A)

Primeira Leitura               Is. 30. 19-21, 23-26

Lia housi livru Isaías nian:

Na’i Maromak, Santo Israel nian, lia tun nune’e: “Povo Sião ne’ebe hela iha Jerusalém, ó sei la tanis tan. Na’i sei rona ó nia harohan, Na’i sei hanoin ó; rona tiha ó lian, Nia sei hatan kedas ba ó. Na’i bele haraik ba´pão la barak, wé mós uitoan de’it ba ó, maibe ida ne’e hanorin ó, Nia sei la subar Nia áan, ó nia matan sei haré Ida rasik be hanorin ó, ó bele ba housi kuanan eh ba housi karuk, ó nia tilun sei rona liafuan hirak ne’e tutuir ó: “dalan mak ne’e, buka la’o tuir nia”. Na’i sei haraik udan ba aihan fini ne’ebe ó sei kari ba rai no pão ne’ebe rai fó, ikus mai sai barak no kbi’it wa’in. Iha loron ne’eba, ó nia balada sira sei han du’ut iha rai luan be luan. Karau no kuda buru sira ne’ebe serviço iha rai, sei han du’ut maran kahur ho masin, hamos hodi kanuru no garfu du’ut nian. Iha foho áas tomak no iha foho oan áas sira hotu, sei moris mota oan no wé inan; iha loron ema mate barak, wainhira uma-áas torre sira naksobu. Iha tempo ne’eba, fulan nia roman sei nabilan hanesan loro-manas, loron nia roman sei maka’as liu dala hitu, hanesan roman loro hitu nian.

Iha loron ne’eba, Na’i sei tau matan ba Nia povo kanek, Nia sei halo di’ak kanek sira be povo terus”.

Maromak Futar Lia.

 

Salmo Responsorial                                                                                                                                       Sal. 146(147). 1-2, 3-4, 5-6

Refrão : Rahun di’ak ba sira be hein iha Na’i!!! Repete-se

Hananu ba Na’i tan Nia di’ak;

Hananu ba ita nia Maromak, tan Nia soi ba ita domin.

Na’i hafoun fali Jerusalém;

Halibur Israel oan sira be namkari. Refrão

 

Fuan sira kanek, Nia halo di’ak fali;

Nia sadia sira kanek.

Nia sura fitun sira hotu,

Fó naran ba ida-idak. Refrão

 

Maromak bo’ot no bele buat hotu;

Nia matenek hun rohan laek.

Na’i tulun ema sira be haraik aan;

Ema áat sira, Nia hamonu ba rai. Refrão

 

Aclamação                                                                                                                                                                                              Is. 3. 22

Refrão : Aleluia, Aleluia!! Repete-se

Na’i mak ita nia ukun na’in, ita nia juíz, ita nia liurai.

Nia hi’it-aan mai soi ita. Refrão

 

Evangelho                                                                                                                                                                         Mt. 9. 35-10. 1, 6-8

Na’i Jesus Cristo nia Evangelho nu’udar São Mateus haktuir:

 Iha tempo ne’eba, Jesus la’o lemo ba cidade no knua laran sira tomak hodi hanorin ema sira iha sira nia Sinagoga; haklaken lia foun di’ak reino nian, no fó fali isin di’ak ba ema moras sira.

Wainhira, nia haré ema lubun bo’ot ne’e, Nia hanoin liu sira teb-tebes, tan sira la’o kole no oin nakraik, hanesan bibi sira la iha mahein. Ne’e duni, Jesus lia tun ba escolante sira dehan: “To’os bo’ot maibe serviço nain sira uitoan de’it. Ne’e duni, imi sei husu ba to’os na’in atu haruka serviço na’in sira ba Nia to’os”.

Lia Maksoyn.

ATU ASSEGURA PROCESSO APRENDIZAGEM, ESCOLA BALUN DIDIN DE’IT HO BEBAK NO HADAK

DCAD Vigário Episcopal Assunto Educação Arquidiocese de Dili Pe. Guilhermino da Silva atual Pároco Santo António Motael dehan hato’o nia preucupação lia hirak ne’e iha Inaguração Edifício 2 ho Sala 4 iha Escola Católica São José Operário Remexio. Iha Vigário Episcopal Assunto Educação Arquidiocese de Dili Pe. Guilhermino da Silva nia discurço hateten: “Hakarak fó parabens ba Aman-Inan sira, Professoares no Estudantes sira hotu iha fatin ida ne’e tanba ita hetan tulun housi maluk sarani sira Australia nian hodi bele hari tan edifício 2 ho sala de Aula 4 iha tempo ida ne’e. Tanba ne’e usa didiak fatin ida ne’e; tanba completo ho Laboratório Computador nian no Laboratório Exata nian ho tan Biblioteca completo. Ne’e hanesan buat ne’ebe extraordinário ne’ebe ha’u hetan iha escola Católica iha Arquidiocese nia laran tanba iha escola sira ne’ebe ha’u visita balu ninia edifício usa de’it bebak ka hadak no kalen oan balu taka hodi escola iha tempo barak ona. Ne’e duni agradece tanba bele dehan escola ne’ebe luxu. Tanba ne’e cuidado ba tau matan didiak no importante liu usa didiak atu bele manan matenek iha fatin ida ne’e”.

Sorin Seluk Diretor da Escola Católica São José Operário Remexio Pe. Mariano Neto mos hateten: “Escola Católica São José Operário Remexio ida ne’e hari iha tinan 2003 iniciativa Padre Armindo hamutuk ho Autoridade sira Posto Remexio nian.  Escola Católica São José Operário Remexio ida ne’e hari tanba exigência housi Povo no sarani Posto Admistrativo no Paróquia ida ne’e nian tanba iha Remexio laiha Escola Católica e alunos sira barak acaba iha Pre-Secundária maibe labele continua tan ba fatin seluk tanba condição sira.

Hanesan Escola Católica ne’ebe mak existe iha posto ida ne’e, escola ida ne’e nia missão atu forma estudante sira sai ema ne’ebe integrado iha isin no klamar; iha ne’ebe mak intelectualmente, Espiritualmente no Humanamente tem que diak atu nune’e estudante sira bele sai hanesan contribuitório hodi contribui ba desemvolvimento Igreja no nação. Ida ne’e precisa ita hotu nia colaboração.

Iha biban hanesan Diretor Calybrida Australia iha ninia mensagem ba Sarani comunidade Remexio katak; “Ami agradece teb-tebes ba Paróquia Remexio basá bele fó ona biban hodi simu ami iha Remexio. Hare ba Sala sira ne’ebe foin mak remata nia construção ho hirak ne’e hotu ami hakarak hato’o ami nia parabens ba Remexio ona sira”.

Admistrador Posto Admistrativo Remexio hateten: “Ohin bele inaugura edifío foun rua tanba graça Na’i Maromak nian ne’e liu housi Nailulik sira ne’ebe uluk liu housi Paróquia ida ne’e ho sira nia esfórço no dedicação sira hamutuk ho família no Parseiro sira atu tulun Remexio oan sira. tanba ne’e hanesan autoridade Posto ida nian hakarak agradece ba imi nia laran luak tanba hakarak duni ho laran atu tulun ami oan sira iha nível desemvolvimento Intelectual, Humana no Espiritual nian. (Ceko)

ATU VOCAÇÃO MISSIONÁRIO NIAN BURAS NAFATIN TEM QUE REZA

Ohin ita celebra São Francisco Xavier nia Festa, Ita mai ho centimento ida de’it atu agradece hare fila fali tinan tomak ida ne’e nia laran ne’ebe São Francisco Xavier sai nu’udar mahein ba comunidade sarani nu’udar Paróquia Hatulian nian ba tinan 17 no nu’udar missão 98. Ita hare ba história ne’e hatudu katak tempo naruk ida ona mak sarani comunidade ida ne’e hamahan ana iha São Francisco nia okos. Iha ita nia ksolok, iha ita nia terus, iha diak no a’at nia laran ita halai nafatin ba buka nia husu nia harohan da’et liu housi nia intercessão atu fó nafatin kbi’it no matak malirin ba sarani sira hotu.

Ne’e duni, obrigado Na’i fó mai ami Santo ida, ami nia mahein ne’ebe loron kalan lao ho ami iha tempo naruk ne’e nia laran. Dala barak ita hatene de’it husu, maibe atu fó obrigado ne’e ita moe. Atu tane liman ita la moe, maibe atu fó obrigado ne’e ita moe. Ne’e duni ita hanoin fila fali loron boot ida ne’e sai mos opurtunidade ida mai ita atu hare ba iha ita nia Padroeiro São Francisco Xavier missionário boot. Iha Uma Kreda reconhece katak missionário ne’ebe boot liu ona mak São Paulo tanba nia mak lao ba fatin barak hodi haklaken. Tuir fali mai Uma Kreda mos reconhece São Francisco Xavier nu’udar missionário boot mos liu-liu Apóstolo ida ba ita Oriente. Amo Papa Pio XI haklaken ba mundo tomak katak São Francisco Xavier laos Santo bai-bain de’it, maibe Padroeiro Universal das Missões.

Santo ida ne’e se iha sinal ruma ne’ebe hatudu teb-tebes ninia Espírito Missionário mak ninia gelo ba salvação. Gelo katak nia iha nia paixão, nia preucupa, nia cuidado, nia iha dedicação boot ida atu lori Liafuan diak ita Nain Jesus Kristo ninia cruz ne’ebe nia kaer iha nia liman lori ba mundo rai klaran. Nia la hare ba nia kolen, la hare ba distância, maibe ninia domin ba Maromak no nia domin hodi lori Evangelho Nai Maromak ninin ba ema hirak ne’ebe sidauk hatene liu-liu ba ita hirak ne’ebe sidauk conhece Maromak. São Francisco Xavier iha nia gelo Pastoral ne’e inspira ita nia missionário lubuk ida atu lori Evangelho to’o mai ita nia rain ne’e. iha ita nia rain ita mos hatene katak iha missionário barak mos mate iha ita nia rain hanesan; iha Cailaco, Leimeia nian mos, ne’e hotu hatudu katak tanba domin boot ba Maromak nia Liafuan sira ba lakon sira nia vida tanba Evangelho. Ida ne’e mak ita koalia kona ba Missionário sira nia laran manas, lori Maromak nia liafuan la sente kole, la sente mos baruk atu ba haklaken Maromak  nia Liafuan.

Se ita boot sira sei hanoin hetan Segunda Leitura Carta São Paulo nian ne’ebe iha I Dominggo ADVENTO ne’e ita rona, koalia kona ba Nakukun no naroman; imi buka hatais imi nia an ho hatais naroman ninian. Husik tiha buat ne’ebe nakukun ninian. Dala barak ita rona tiha Maromak nia Liafuan, ita sarani tiha ona, Liafuan diak ne’e todan tiha ona mai ita, maibe dala barak ita sei prefere, ita sei gosta liu hili atu moris iha makukun nia laran duque moris iha naroman nia laran. Ita gosta liu moris tuir isin nia hakarak duque buka buat ne’ebe Espírito ninian. Tan ne’e mak São Paulo dehan; Tempo ADVENTO nian ne’e tempo opurtuno, favorável. Tan ne’e, atu liu housi Festa São Francisco nian ne’e convida ita atu husik hahalok nakukun ninian hodi buka hatais hahalok naroman ninian. Ida ne’e mak nu’udar missionário ida. Ita hare iha São Francisco Xavier ninia hahalok ida tan; Generosidade. Katak nia la serviço ba nia an maibe nia hakasan serviço ba ema hotu nia diak.

Kna’ar missionário nian ne’e la termina de’it ho Escolante sira e Missionário nian mos la termina ho São Fancisco Xavier. Kna’ar missionário nian ne’e continua hadaet ba ita, tatoli ba ita. Ohin se mak tem que ser sai missionário; uluk nanain Amo Papa, Amo Bispo sira, Nailulik sira, Madre sira, Catequista sira, Gela sira, Apostulado de Oração no grupo oi-oin laos de’it ona Padre ho Madre, maibe sarani hotu-hotu iha obrigação ida ne’e. Tinan ida ne’e ita taka ano Jubileu Extraordinário Missionário amo Papa nia convite ba sarani mundo tomak mak Sarani hotu-hotu ba no haklaken (Batizados e Enviados). Sarani hotu-hotu simu obrigação ida ne’e atu haklaken, fó sasin kona ba Liafuan diak.

Fó sasin oinsa? Hanesan ohin ita rona katak iha ita nia rai sei iha buat ne’ebe nakukun nian ne’ebe marca ho trata malu ninian, insulta malu ninian, violência, hana malu, soe Bebé, tuda malu, desconhecido, ne’e liafuan ne’ebe ita tama tun sae iha Timor ne’e ita rona bebeik. Karik uluk ita la rona, maibe liafuan ida agora dehan hana malu, soe bebé, tuda malu, sunu uma, tá malu, sadik malu, tolok malu, hirak ne’e hotu ita bele dehan katak sei buras los iha ita nia sociedade laran.

Ohin São Francisco hanorin ita sai missionário aprende atu hamnasa. Wainhira iha ita nia oin hatudu hamansa ne’e katak iha laran iha domin, maibe se iha ita oin mak la hatudu ita nia hamnasa iha fuan atu iha domin ne’e susar ituan, fuan atu iha perdão ne’e susar ituan, fuan atu iha generoso no haraikan ne’e susar ituan. Tan ne’e mak São Francisco nia liafuan mai ita ida de’it mai ita aprende atu lori ita nia cruz, mai ita aprende atu hadomi ita nia cruz.

Tan ne’e ita husu ba São Francisco Xavier liu-liu iha loron ida ne’e ne’ebe ita celebra ita nia Padroeiro, ita reza atu vocação missionário iha rai Hatulia ne’e bele buras nafatin. Ita hanoin kona ba missionário ita mos tem que reza nafatin ba vocação missionário ninian, vocação Amolulik ninian. Diocese Dili sidauk haruka Padre ida ba Missionário, maibe liu housi Congregação Religioso/a sira missionário barak ne’ebe housi Timor ba serviço iha rai seluk, maibe ita tem que nafatin reza ba iha vocação missionária ninian.

Sexta-Feira, I Semana Iha Tempo Advento (Ano A)

Primeira Leitura                      Is. 29. 17-24

Lia housi livru Isaías nian:

Na’i Maromak lia tun nune’e: uitoan tan de’it ona, Líbano la’os atu sai jardim ida? Jardm ne’e la’os atu sai ai-laran ida? Iha loronn ne’eba, ema tilun diuk sira sei rona liafuan housi livro Maromak nian; sai tiha housi kalan no nakukun laran, matan delek sira sei haré.

Ema ki’ak sira sei haksolok fali iha Na’i. Sira be ki’ak liu iha ema sira le’et, sei haksolok iha Santo Israel nian. Ukun na’in laran áat sei la iha tan. Ema be toman hakribit maluk sira sei lakon mohu. Ema laran makerek sira sei la iha tan, ema ne’ebe hateten áat malu sei lakon tiha no sira be hanoin atu halo áat, sei mate hotu. Sira be, hodi liafuan, dada malu bab salan, sira iha odamatan oin buka halakon juíz, no sira be, tan buat folin laek, hasusar ema di’ak. Tan ne’e dun mak Na’i ko’alia nune’e ba uma kain Jacob nian, Na’i be haraik liberdade ba Abraão: “housi ohin ba oin, Jacob labele moe, nia oin la bele kamutis tan, basá wainhira nia haré iha nia oin sira Ha’u liman nia hahalok, nia sei dehan ha’u naran santo”. Sira sei fó hatene Jacob nia santo nia moris santo, hodi hamta’uk Israel nia Maromak. Sira be neon la metin, sei hetan matenek; sira bemamun hasoru, sei simu lia haklaken.

Maromak Futar Lia.

 

Salmo Responsorial                                                                                                                                               Sal. 26(27). 1, 4, 13-14

Refrão : Na’i mak ha’u nia roman no Maksoyn!!! Repete-se

Na’i mak ha’u roman no maksoin;

Ha’u sei ta’uk fali sé?

Na’i mak tahan ha’u nia moris;

Sé lós mak bele halo ha’u nakdedar? Refrão

 

Buat ida de’it ha’u buka hodi husu ba Na’i,

Horik iha Nia kadunan iha ha’u nia moris tomak;

Koko Na’i Nia graça

Hodi hateke ba Na’i Nia uma lulik. Refrão

 

Ha’u hein atu haré Na’i nia laran luak

Iha ema moris sira rain.

Aten barani! Hein iha Na’i!

Laran metin ba! Hein Na’i Maromak! Refrão

 

Aclamação                                                                                                

Refrão : Aleluia, Aleluia!! Repete-se

 Na’i sei mai ho kbi’it liurai.

Nia sei haraik roman ba Nia emar sira matan.

 Ou

Lalehan sira, haruka maha wen housi leten áas ba;

kalohan sira, fakar justiça tun mai; rai nakloke ba, halo mosu maksoin. Refrão

 

Evangelho                                                                                                                                                                                      Mt. 9.  27-31

Na’i Jesus Cristo nia Evangelho nu’udar São Mateus haktuir:

Iha tempo ne’eba, Jesus liu daudaun, wainhira matan delek na’i rua la’o tuir Nia  hodi hakilar maka’as: “David nia Oan, sadia ami”.

Wainhira Nia tama tiha iha uma laran, matan delek sira hakbesik ba Nia. Jesus husu ba sira: “ Imi far katak Ha’u bele halo buat ne’ebe imi husu?” sira hatan: “Na’i ami fiar”. Ne’e duni, Jesus tau liman ba sira matan, hodi dehan: “sai diak fali ba tuir imi fiar”. Hafoin sira matan nakloke. Jesus lia tun ba sira: “Haré ba, ema ida la bele hatene buat ne’e!” Maibe, sai tiha, sira haklaken Jesus nia naran ba rai tomak ne’eba.

Lia Maksoyn.

Quinta-Feira, I Semana Iha Tempo Advento (Ano A)

Primeira Leitura                             Is. 26. 1-6

Lia housi livru Isaías nian:

Iha loron ne’eba, ema sei hananu knananuk ne’e iha rai Judá: “Ami iha cidade bo’ot makas, ema harí fatuk hada metin atu tulun ami. Loke odamatan atu povo tama ida-idak, povo ida be fó laran metin mai ami. Nia, povo ida laran mós. Na’i halo nia hetan duni dame, tanba nia fiar Ita bo’ot. Imi fiar metin Na’i ba tamba Na’i fatuk inan ida rohan laek. Nia hatun ema sira be hela iha fatin áas; Nia hatun cidade be foti-an, hatun nia to’o rai, latan nia ba rai rahun. Ema neon susar sira ain, ema kiak sira ain tuban sama nia ba rai.

Maromak Futar Lia.

 

Salmo Responsorial                                                                                                                         Sal. 117(118). 1. 8-9, 19-21, 25-27ª

Refrão : Rahun diak ba ida be mai hodi na’i Nia naran!!! Repete-se

Agradece ba Na’i, tan Nia di’ak.

Nia laran luak metin ba nafatin.

Diak liu buka mahan iha Na’I,

Keta laran metin ba ema sira.

Buka Mahein iha Na’i

Di’ak liu fali fiar iha ema kbi’it na’in sira. Refrão

 

Ita loke mai ha’u odamatan manan funu nian,

Ha’u sei tama atu agradece ba Na’i.

Ne’e odamatan Na’i nian,

Nakloke ba ema hotu be laran mós!

Ha’u agradece Ita, tan rona ha’u,

Ita sai nu’udar ha’u maksoin. Refrão

 

Na’i, haraik maksoyn mai ami,

Halo buat hotu la’o di’ak ba oin.

Rahun di’ak ba ida be mai hodi Na’i Nia naran!

Ami hahi Nia housi Maromak nia fatin santo.

Na’i halo Nia roman lakan tun mai ita. Refrão  

 

Aclamação                                                                                                

Refrão : Aleluia, Aleluia!! Repete-se

Buka Na’i ba, wainhira sei bele hetan;

harohan ba Nia wainhira Nia sei besik

Ou

Hakilar ba ho lian makas, ó be haklaken lia foun ba Jerusalém!

Na’i Maromak atu to’o daudaun ho kbi’it. Refrão

 

Evangelho                                                                                                                                                                                Mt. 7. 21, 24-27

Na’i Jesus Cristo nia Evangelho nu’udar São Mateus haktuir:

Iha tempo ne’eba, Jesus lia tun ba escolante sira: “La’os ema hotu be dehan: “ Na’i, Na’i, sei tama iha reino lalehan, maibe sei tama de’it ida ne’ebe halo tuir Ha’u Aman iha lalehan nia hakarak”.

“Ema hotu be rona Ha’u nia liafuan hirak ne’e hodi halo tuir, ema ne’e hanesan mane neon na’in ne’ebe harí uma iha fatuk leten. Udan tau, mota tun, anin huu maka’as baku hasoru uma ne’e, la monu tamba harí iha fatuk leten. Maibe ema hotu be rona Ha’u nia liafuan hirak ne’e, la halo tuir, ema ne’e sei sai hanesan mane neon la’ek ne’ebe halo nia uma iha rai henek leten. Udan tau, mota tun, anin huu maka’as baku hasoru uma ne’e, uma ne’e monu, uma rahun liu”.

Lia Maksoyn.

OBRIGA EMA FILA KOTUK BA MAROMAK, NE’E HAHALOK SATANAS NIAN

DCAD Arcebispo Arquidiocese Metropolita de Dili Dom. Virgílio do Carmo da Silva hato’o nia preucupação hirak ne’e Iha Festa Padroeiro São Francisco Xavier Dare iha loron 3 fulan Desembro 2019.

Arcebispo de Dili Dom Virgílio do Carmo da Silva,SDB haklaken katak; “Nakukun ne’e hahalok Satanas ninian. Força Satanas ninian mak buat hotu ne’ebe buka obriga ema atu fila kotuk ba Na’i Maromak nia hanorin, fila kotuk ba Maromak nia hakarak. Satanas hakiak iha ita mak: hahalok foti an ninian, karakten ninian, kanten ninian, hanoin de’it ba nia an nunca se hanoin ema seluk nia precisa. Satanas nia hahalok mak buka ódio malu, hahalok sira egoistas ninian ne’ebe dala barak ita hotu hakiak iha ita nia an. Tan ne’e iha Evangelho dehan; dalan único atu ita bele hasoru/conquista/manan satanas nia hahalok ho dalan ida de’it katak wainhira ita fila fali ba Maromak”.

Liu tan ne’e, Arcebispo de Dili Dom Virgílio do Carmo da Silva,SDB hateten; “Ita nia moris lor-loron ne’e Satanas haleu nafatin ita. Santo sira dehan katak; ema ida ne’ebe santo liu ne’e loron ida nia monu iha sala dala 7. Ita sira ne’e fali la hatene dala 7 ou 70 dala 7 karik. Tan ne’e mak se ita monu karik ba sala precisa Sacramento Confissão no Eucaristia. Comfessa no Eucaristia precisa bebeik laos hein de’it Natal ho Páscoa mak comfessa. Maibe precisa bebeik atu nune’e ita bele dehan katak ita nia fuan ne’e ba los Na’i Maromak”.

Atu taka, Arcebispo de Dili Dom Virgílio do Carmo da Silva,SDB desafia sarani hatete; “Ha’u hakarak nafatin desafia liu-liu foinsa’e sira, Inan-Aman sira além de Uma Kreda atu bele defende ita nia an iha ema seluk nia oin, ita ida-idak mos tem que hatene atu defende ita nia fiar tanba ohin loron mos iha religões oi-oin, Seitas oi-oin ne’ebe tama sai ita nia bairro to’o iha Aldeia sira hakarak atu atrai ita, desvia ita housi housi ita nia fiar. Tanba ne’e hakasan atu labele monu ba laço sira. Tanba ita nia fiar ne’e laos sosa ho Supermie ida ka motor ida. Jesus rasik la sosa ita fiar la ho Motor ida, maibe Nia sosa ho Nia Ran. Ho Ninia ran ne’ebe fakar iha cruz mak sosa ita iha Batismo no kasu ita nia sala. Ne’e duni precisa fiar metin nafatin. Ita hare missionário sira ne’ebe mate ran fakar iha ita nia rai tanba defende fiar Católica, fiar sarani nian”. (Ceko)

“LAO BA MUNDO TOMAK HAKLAKEN LIAFUAN DIAK BA CRIATURA HOTU”

Ohin comunidade Dare haksolok tanba ita halibur hamutuk atu festeza ita nia mahein São Francisco Xavier nia Festa ba tinan 51, decade 5 nia laran mak Paróquia ida ne’e hamahan an iha São Francisco Xavier ninia okos. Durante tempo naruk nia laran ita lao iha ita nia susar no ksolok, iha ita nia fiar no iha tempo a’at nia laran ita halai ba buka hodi husu Intercessão São Francisco Xavier ninian.

Tan ne’e tinan ida dala ida atu ita halibur hamutuk atu agradece. Obrigado ba Maromak tanba fó mai ita São Francisco Xavier atu sai Paróquia Dare nia mahein. Maibe dala barak tinan ida dala ida susar mos mai ita atu fó ita nia nia minuto ida ka oras ida atu halibur hamutuk nu’udar comunidade atu agradece ba Maromak ba presença São Francisco Xavier nian iha ita nia comunidade nia le’et.

Ne’e duni, loron ida ne’e ba Paróquia no Dare tem que ser sai loron ida ne’ebe importante. ita ida-idak tem que sente diak ruma ne’ebe ita simu housi ita nia mahein. Ne’e duni ita ida-idak koko atu haraikan hodi hare fila fali diak ne’ebe ita simu. Então ida ne’e mak halo ita sente orgulho wainhira ita halibur hamutuk atu agradece ba diak ne’ebe ita simu housi Na’i Maromak liu housi Intercessão ita nia mahein São Francisco Xavier nian. Ida ne’e mak razão ne’ebe iha dader ida ne’e convida ita hotu atu halibur hamutuk hodi reza, Canta, hodi hasae ita nia agradece.

Tan ne’e ha’u convida sarani sira ohin liu-liu iha tinan 51 aniversário Paróquia Dare nian ne’e atu lori ita renova ita nia an, hadia ita nia an, ita nia relação ho ita nia mahein, nia ne’ebe bali ita tempo naruk nia laran. Bispo sira iha tempo ruma troca malu, Pároco sira mos troca malu, maibe Mahein nia nafatin hamutuk ho ita, ida ne’ebe conhece, acompanha no ida ne’ebe hatene ita nia diak no a’at sira.

Se ita hare ituan Evangelho ohin loron ninian koalia mai ita kona ba; ‘Jesus nia mandato ba iha nia Escolante sira’: ‘Lao ba mundo tomak haklaken liafuan diak ba Criatura hotu-hotu’. Iha Uma Kreda reconhece katak missionário ne’ebe boot liu ona mak São Paulo tanba nia mak lao ba fatin barak hodi haklaken. Tuir fali mai Uma Kreda mos reconhece São Francisco Xavier nu’udar missionário boot mos liu-liu Apóstolo ida ba ita Oriente. Tanba nia nu’udar missionário iha rai Japão, rai Índia.

Amo Papa Pio XI haklaken ba mundo tomak katak São Francisco Xavier laos Santo bai-bain de’it, maibe Padroeiro Universal das Missões. Tan ne’e ita sente contente tanba ita nia paróquia bele foti nia nu’udar ita nia padroeiro. Santo ida ne’e se ita hare didiak katak, nia iha sinal ruma ne’ebe hatudu teb-tebes ninia Espírito Missionário mak ninia gelo ba salvação. Gelo katak nia iha nia paixão, nia preucupa, nia cuidado, nia iha dedicação boot ida atu lori Liafuan diak ita Nain Jesus Kristo ninia cruz ne’ebe nia kaer iha nia liman lori ba mundo rai klaran. Nia la hare ba nia kolen, la hare ba distância, maibe ninia domin ba Maromak no nia domin hodi lori Evangelho Nai Maromak ninin ba ema hirak ne’ebe sidauk hatene liu-liu ba ita hirak ne’ebe sidauk conhece Maromak. São Francisco Xavier iha nia gelo Pastoral hodi lori Maromak nia liafuan hafoin ita nia missionário lubuk ida hatutan. Então ida ne’e mak ita bele hare iha São Francisco nia vida (gelo Pastoral). Buka serviço ba klamar sira.

Ita nia Papa ida agora ne’e sempre usa liafuan ida dehan; Periferia katak sira ne’ebe iha dook liu Evangelho la to’o ba sira, sira ne’ebe sei moris iha nakukun laran, sira ne’ebe sidauk hatene atu sira mos bele hatene ida ne’e. ita foin hahu tempo ADVENTO. Se ita boot sira sei hanoin hetan Segunda Leitura Carta São Paulo nian ne’ebe iha dominggo ADVENTO ne’e ita rona, koalia kona ba Nakukun no naroman; imi buka hatais imi nia an ho hatais naroman ninian. Husik tiha buat ne’ebe nakukun ninian. Dala barak ita rona tiha Maromak nia Liafuan, ita sarani tiha ona, Liafuan diak ne’e todan tiha ona mai ita, maibe dala barak ita sei prefere, ita sei gosta liu hili atu moris iha makukun nia laran duque moris iha naroman nia laran. Ita gosta liu moris tuir isin nia hakarak duque buka buat ne’ebe Espírito ninian. Tan ne’e mak São Paulo dehan; Tempo ADVENTO nian ne’e tempo opurtuno, favorável. Tan ne’e, atu liu housi Festa São Francisco nian ne’e convida ita atu husik hahalok nakukun ninian hodi buka hatais hahalok naroman ninian. Ida ne’e mak nu’udar missionário ida. Ita hare iha São Francisco Xavier ninia hahalok ida tan; Generosidade. Katak nia la serviço ba nia an maibe nia hakasan serviço ba ema hotu nia diak.

Ohin se ita rona didiak Evangelho São Mateus ninian wainhira koalia kona ba liafuan nakukun São Mateus dehan: Nakukun ne’e hahalok Satanas ninian. Força Satanas ninian mak buat hotu ne’ebe buka obriga ema atu fila kotuk ba Na’i Maromak nia hanorin, fila kotuk ba Maromak nia hakarak. Satanas hakiak iha ita mak: hahalok foti an ninian, karakten ninian, kanten ninian, hanoin de’it ba nia an nunca se hanoin ema seluk nia precisa. Satanas nia hahalok mak buka ódio malu, hahalok sira egoistas ninian ne’ebe dala barak ita hotu hakiak iha ita nia an. Tan ne’e iha Evangelho dehan; dalan único atu ita bele hasoru/ conquista/ manan satanas nia hahalok ho dalan ida de’it katak wainhira ita fial fali ba Maromak.

Tan ne’e mak São Francisco ohin convida ita fila fali ba Maromak nia Liafuan, rona Maromak nia Liafuan, loke an ba Espírito Santo.

Ita nia moris lor-loron ne’e Satanas haleu nafatin ita. Santo sira dehan katak; ema ida ne’ebe santo liu ne’e loron ida nia monu iha sala dala 7. Ita sira ne’e fali la hatene dala 7 ou 70 dala 7 karik. Tan ne’e mak se ita monu karik ba sala precisa Confessa no Eucaristia. Comfessa no Eucaristia precisa bebeik laos hein de’it Natal ho Páscoa mak comfessa. Maibe precisa bebeik atu nune’e ita bele dehan katak ita nia fuan ne’e ba los Na’i Maromak. Sacramento Comfessão no Eucaristia convida ita lao ba. Ordem ne’ebe tina 2000 resin liu ba Jesus molok fial fali ba Nia Aman Nia haruka ona Nia Escolante sira ba atu Haklaken.

Se mak bele hatan ba mandato Jeusu Cristo nian ne’ebe dehan Ba no Haklaken ba mundo tomak; ida uluk Amo Papa nia serviço, daruak Bispo sira nia serviço, datolu nian; Padre sira nia serviço, dahat nian; Madre sira, dalima nian; Catequista sira, dalanen nian; Apostulado de Oração sira, no ikus mai sarani hotu-hotu. Sarani hotu-hotu ne’ebe simu ona batismo ita hotu iha kna’ar atu dehan Ba no Haklaken. Uluk nanain haklaken ho ita nia moris.

Festa São Francisco Xavier nian ne’e hakarak tatoli mai ita katak sarani liu-liu labarik no foinsae sira Dare ninian hakasan atu soe ba kotuk hahalok sira nakukun ninian, loke imi nia fuan ba hahalok naroman ninian. Ita foin celebra aniversário missionário nian ne’e Amo Papa usa liafuan ida dehan; ‘Batizados e Enviados’. Ida ne’e mak Amo Papa sadik ita hotu atu labele kole no baruk halao kna’ar ida ne’e. São João Paulo II dehan ; ida ne’e mak dever ida sarani ida tem que halo iha comunidade laran atu cria relação ne’ebe diak ho ema hotu. Wainhira sarani ida hola conciêncai katak nia sarani, servico missionário ne’e automático. Se ha’u sarani atu halo diak ne’e labele ema seluk obriga ha’u, se ha’u sarani atu hadomi malu ne’e ha’u nia obrigação.

Sarani ida tem que aprende lori nia cruz. São Francisco hanorin ita atu fiar iha Cristo basá ita nia norma moris nian ne’e mak cruz. tanab ne’e ba foinsae sira São Francisco Xavier sadik imi oinsa mak atu Jovem Apóstolo ba Jovem. São Frnacisco mos nia liafuan ba Inan-Aman sira atu sai Missionário. Missionário ne’e laos ho koalia de’it maibe missionário ho vida, ho hahalok. Tan ne’e ho São Francisco nia Festa convida sarani Paroquiano tomak atu ita hotu hateke ba São Francisco Xavier nia imagem atu ita halo exame de conciência; saida mak ha’u tem que halo hodi ba nati tuir missionário boot ida ne’e nia vida? Oinsa mak ha’u bele sai missionário iha ha’u nia família laran? Oinsa mak ha;u bele sai missionário iha ha’u nia comunidade?

Quarta-Feira, I Semana Iha Tempo Advento (Ano A)

Primeira Leitura                          Is. 25. 6-10ª

Lia housi livru Isaías nian:

Iha loron ne’eba, Na’i halo buat hotu-hotu, sei hadia ba povo sira tomak, iha foho Sião, aihan festa, aihan diak, hemu tua mesak furak; han bokur no tua diak liu nian.

Iha foho ne’e, Na’i sei kasu tiha hena metan be taka povo sira tomak, hena be falun nação sira hotu; Nia sei halakon hodi oin mate. Na’i sei hamaran mata wen housi oin sira tomak. Na’i sei hasai housi rai klaran tomak, lia be hamoe Nia povo, Na’I hateten lolós nune’e.

Iha loron ne’eba, ema sei dehan: “ne’e, ita nia Maromak, housi Nia, ita hein maksoin. Ne’e Na’i ne’ebe ita fiar metin. Ita sei kontente haksolok tamba Nia soi ita”. Na’i haraik Nia futar liman hodi hamahan foho ida ne’e.”

Maromak Futar Lia.

 

Salmo Responsorial                                                                                                                     Sal. 22(23). 1-3ª, 3b-4, 5, 6 (R. 6cd)

Refrão : ha’u sei hela nafatin iha Na’i Nia uma!!! Repete-se

Na’i ha’u nia mahein, ha’u la kuran buat ida;

Lori ha’u ba hakmatek iha du’ut matak,

Lori ha’u ba wé malirin

Hodi haksolok ha’u klamar. Refrão

 

Nia lori ha’u kona dalan lós tan hadomi Nia naran.

Maske ha’u la’o housi rai kle’an nakukun,

Ha’u sei la tauk buat aat ida, tan Ita hamutuk ho ha’u.

Ita nia ai-tonka no ai-tato’an

Fó laran metin mai ha’u. Refrão

 

Ita hadi’a aihan mai ha’u

Iha ha’u funu baluk sira oin.

Ho mina, Ita hamorin ha’u ulun;

Ha’u cálice nakonu resin. Refrão

 

Laran diak no graça sei la’o tuir ha’u

Lor-loron iha ha’u nia moris;

Ha’u sei hela iha Na’i nia uma

Tinan ba tinan nafatin. Refrão

 

Aclamação                                                                                                

Refrão : Aleluia, Aleluia!! Repete-se

Na’i sei hi’it aan mai soi Nia povo;

rahun diak ba sira be hein atu hasoru malu ho Nia. Refrão

 

Evangelho                                                                                                                                                                                     Mt. 15. 29-37

Na’i Jesus Cristo nia Evangelho nu’udar São Mateus haktuir:

Iha tempo ne’eba, Jesus mai iha tasi ninin Galileia nian. Nia sa’e ba foho hodi hatodan-aan iha ne’eba. Ema lubun bo’ot mai hasoru Nia, hodi ema ain áat, kraes, matan delek, monok ho sira seluk tan, lori mai latan iha Jesus futar oin. Nia halo sira diak. Ema lubun bo’ot hakfodak wainhira haré ema monok sira ko’alia, ema kraes sira hetan fali isin diak, ema ain áat sira la’o no mtan delek sira haré. Sira fo glória ba Maromak Israel nian.

Tan ne’e, Jesus bolu Nia escolante sira, hodi dehan: “Ha’u hanoin liu ema lubun bo’ot ne’e: loron tolu ona mak sira hamutuk ho Ha’u; sira la iha buat ida atu han. Maibe Ha’u lakohi haruka sira ba ho kabun mamuk atu sira la bele oin nakukun iha dalan”. Escolante sira hasa’e lia ba Nia: “Iha rai fuik maran ne’e, ami bele hola lós pão barak iha ne’ebe atu bele fó han ba ema lubun bo’ot ne’e?” Jesus husu ba sira: “imi iha pão fuan hira?” Sira hatan ba Nia: “Hitu, no mós ikan ki’ik oan balu”. Jesus haruka ema lubun bo’ot ne’e tur iha rai. Hafoin Nia kaer tiha pão fuan hitu no ikan sira, fó agradece, silu hodi fó ba escolante sira. Hafoin escolante sira fahe ba ema lubun bo’ot ne’e. Sira hotu han to’o bosu. Sira lori baluk sira be resin, luhu hitu nakonu.

Lia Maksoyn.