shadow
Diocese de Dili > NOTÍCIAS > Articles by: Departamento Comunicação Diocese Dili

Terça – Feira, I Semana Tempo Comum (ANO A)

Primeira Leitura                   1Sm. 1. 9-20

Lia housi primeiro livro Samuel nian:

Iha loron hirak nebá, wainhira iha Silo, han no hemu hotu tiha, Ana hamriik, hodi ba hatudu-an iha Na’i nia futar oin. Na’ilulik Eli tur hela iha nia banku, iha odamatan oin, iha Na’i nia fatin Santo. Ho laran susar tebes, hodi tanis wa’in, Ana harohan ba Na’i nune’e: “Na’i Lalehan no Rai nian, ho laran di’ak Ita simu karik ba Ita atan nia susar; hanoin Ita atan ha’u, keta haluha Ita atan, maibé haraik oan mane ida ba nia; ha’u sei hasa’e nia ba Na’i iha moris tomak no tudik sei la liu housi nia ulun”.

Tan nia harohan kleur iha Na’i nia oin, Eli hahu fihir nia ibun. Ana ko’alia ba nia-an rasik, nia ibun de’it mak book-an, maibé, la rona nia lian; Eli hanoin katak nia lanu. Nune’e, Eli dehan ba nia: “Ó sei lanu to’o wainhira? Ó husik tiha tua ne’e”. Maibé, Ana hatan ba nia: “Lae, ha’u na’i, ha’u feto susar na’in ida. Ha’u la hemu tua no la hemu mós tua nebé halo lanu ema; ha’u atu hato’o de’it ha’u nia laran susar iha Na’i Nia Futar Oin. Keta hanoin ó atan hanesan feto seluk ida, basá, ha’u laran susar liu tebes mak lori ha’u atu ko’alia to’o oras ne’e”. Nune’e, Eli hatan ba nia: “Ba ho damen, Israel nia Maromak sei haraik ba ó, buat nebé ó husu ba Nia”. Ana dehan fali ba nia: “Di’ak, ó atan bele hetan di’ak housi ó nia hakaran”. Tuir mai, feto la’o tuir nia dalan, han no hemu hamutuk ho nia la’en, la hanesan ona uluk.

Dader nakukun sira hamriik hodi ba hakneak iha Na’i futar oin; hafoin, sira tuir sira dalan hodi fila ba sira uman iha Ramá. Elcana moris hamutuk ho nia féen Ana, Na’i hanoin hetan nia. Tempo liu daudaun, Ana kô’us duni no hahoris oan mane ida, nebé hanaran Samuel, basá, dehan: “Ha’u mak husu ba Na’i”.

Maromak Futar Lia.

 

Salmo Responsorial                                                                                                                           1Sam. 2. 1, 4-5, 6-7, 8abcd (R. 1ª)

Refrão : Ha’u fuan haksolok iha Na’i, ha’u Makoyn!!! Repete-se

Ha’u fuan haksolok iha Na’i,

Ha’u nia kbiit iha Na’i Maromak.

Loke ha’u ibun hodi sadik funu baluk sira,

Ha’u haksolok tan Ita Maromak tulun. Refrão

 

Ema kbiit sira nia kroat toha lakon,

Ema kbiit laek sira sei hetan kbiit foun.

Sira be iha sasan wa’in, buka aihan,

Sira be hamlaha, bosu fali.

Feto be la kô’us, hetan oan barak;

Inan be kô’us, la hetan tan oan. Refrão

 

Na’i mak haraik moris no mate,

Na’i mak lori ita ba rate no hasai ita housi rate;

Na’i mak halo ita kiak no halo ita riku;

Nia mak hatun ema sira no mós foti sira. Refrão

 

Nia foti housi rai sira be moris hakru’uk,

Hasai ema kiak sira housi asuknu’uk fatin.

Halo sira tur ho boot sira rai nian,

Haraik ba sira fatin ida oin na’in. Refrão

 

Aclamação                                                                                                                                                                                         1Tes. 2. 13

Refrão : Aleluia, Aleluia!! Repete-se       

Simu ba ho laran tomak lia menon nebé Na’i hato’o ba imi;

La’os hanesan ema nia liafuan, maibé, nu’udar Maromak Futar Liafuan. Refrão

 

Evangelho                                                                                                                                                                                       Mc. 1. 21-28

Na’i Jesus Cristo nia Evangelho nu’udar São Marcos haktuir:

Iha tempo nebá, Jesus hela iha cidade Cafarnaum. Iha loron sábado ida, Nia tama iha sinagoga, hahu hanourin. Ema hotu hakfodak ho nia doutrina, basá, nia hanourin hanesan ema nebé iha autoridade, la’os hanesan ema escriba.

La kleur mosu iha sinagoga, mane ida diabo iha laran, nebé dehan ho lian maka’as: Ó hakarak sáida ho ami, Jesus Nazaré nian? Ó mai atu halakon ami? Ha’u hateten Ó sé: Maromak Nia santo!” Jesus lia tun ba nia ho siak: “Nonok, sai housi ema ne’e”. Diabo doko maka’as tiha ema ne’e, hakilar maka’as, hodi sai tiha housi ema ne’e. Ema hotu hakfodak teb-tebes hodi husu ba malu: “Ne’e sáida mak ne’e? Doutrina foun ida ho autoridade! Nia haruka mós diabo sira, sira halo tuir nia haruka!” Jesus nia naran boot lalais kedas iha fatin hotu, iha Galileia tomak.

Lia Maksoyn.

Segunda – Feira, I Semana Tempo Comum (ANO A)

Primeira Leitura                       1Sm. 1. 1-8

Lia housi primeiro livro Samuel nian:

Iha loron hirak nebá, iha ema ida housi rai Ramá iha uma-kain Suf nian, housi foho Efraim nian nebé hanaran Elcana. Nia, Jeroão nia oan mane, Eliú nia oan, Toú nia oan, Suf housi Efraim nia oan. Nia féen rua: Ida naran Ana no ida seluk naran fenena. Fenena iha oan barak; maibé Ana la iha oan. Housi nia cidade, ema ne’e tinan-tinan sa’e ba Silo, atu adora Na’i Mundo-raiklaran nian, hodi hasa’e sacrifício ba Na’i. Iha nebá, iha mós Eli nia oan na’in rua: Hofni no Fineias. Sira rua Na’i nia na’ilulik.

Loron ida, Elcana hasa’e sacrifício ida. Nia, bai-bain fó baluk balun housi balada be oho ne’e ba nia féen Fenena no nia oan mane no feto sira hotu. Maibé ba Ana fó de’it baluk oan ida, basá, maski nia hadomi tebes Ana, Na’i halo Ana sai kiuk. Fenena bai-bain hasara Ana hodi halo Ana sai hirus, tan Na’i halo nia sai kiuk. Halo tiha nune’e iha tinan-tinan, wainhira sa’e Na’i nia uma, Fenena hasara Ana hanesan bai-bain. Ana tanis no la han. Nia la’en Elcana dehan ba nia: “Ana, tansá ó tanis hodi la han? Tan sá ó neon nakraik nune’e? Ha’u ba ó la’os folin liu oan sanulu?”.

Maromak Futar Lia.

 

Salmo Responsorial                                                                                                            Sal. 115(116). 12-13, 16-17, 18-19 (R. 17ª)

Refrão : Na’i, ha’u hasa’e ba Ita, sacrifício ida hahí nian!!! Repete-se

Ou            Aleluia!

Oinsá ha’u agradece ba Na’i,

Tan buat kmanek hotu be Nia halo mai ha’u?

Ha’u sei foti cálice maksoyn nian

Hodi hahí Na’i nia naran. Refrão

 

Ha’u sei halo tuir ha’u nia lia hakotu ba Na’i;

Iha povo nian oin,

Iha Na’i futar matan, folin tebes,

Nia sarani sira nia mate. Refrão

 

Na’i, ha’u Ita atan, Ita atan feto na oan mane;

Ita silu tohar ha’u nia besi dadur.

Ha’u sei hasa’e sacrifício ida hahí nian,

Hodi bolu, Na’i, Ita naran. Refrão

 

Ha’u sei halo tuir lia hakotu ba Na’i;

Iha povo hotu nia oin,

Iha Na’i kadunan oin;

Iha ó nia muro laran, Jerusalém. Refrão

 

Aclamação                                                                                                                                                                                            Mc. 1. 15

Refrão : Aleluia, Aleluia!! Repete-se       

Maromak Nia reino besik ona;

Imi hakribi imi salan no fiar iha Evangelho. Refrão

 

Evangelho                                                                                                                                                                                      Mc. 1. 14-20

Na’i Jesus Cristo nia Evangelho nu’udar São Marcos haktuir:

Iha tempo nebá, wainhira ema dadur tiha João, Jesus ba Galileia, hahu haklaken Maromak Nia Lia-Foun-Di’ak, dehan: “Tempo to’o ona rohan, Maromak Nia reino besik ona. Imi hakribi imi salan ba hodi fiar Lia-Foun-Di’ak”.

Liu housi tasi ibun Galileia nian, Nia haré Simão ho nia alin Andre soe namanas dai ba tasi, basá, sira hakail-na’in ikan. Jesus lia tun ba sira: “Imi tuir Ha’u mai; Ha’u sei halo imi hakail-na’in ema nian”. Sira husik kedas dai hodi tuir Nia.

Liu tan uit-oan ba oin, Nia haré Tiago, Zebedeu nian, ho nia alin João iha ró laran, hadi’a hela dai; Nia bolu kedas sira. Sira husik sira aman Zebedeu iha ró, hamutuk ho ema sira, hodi tuir Nia.

Lia Maksoyn.

LOLOTOE NIA OAN IDA SAI NAILULIK

DCAD Bispo de Maliana e atual Presidente Conferência Episcopal Timorense Dom Norberto do Amaral ordena Lolotoe nia oan ida ‘diácono Rui Pereira’ ba grau Nailulik nian iha loron 10 fulan Janeiro 2020 iha Paróquia Nossa Senhora de Fátima Lolotoe diocese de Maliana. Participa iha missa ordenação ne’e Padres housi diocese tolu; Maliana, Dili no Baucau, religiosos e religiosas, Autoridade local no nacional, civis e militar, seminaristas, famílias no sarani Lolotoe.

Dom Norberto do Amaral iha ordenação hateten; “ohin ita halo ordenação ne’e katak hili ema ida housi sarani sira nia le’et, laos ita mak hili maibe Jesus mak hili. Wainhira Nia hili tiha ema ida ne’e Nia consagra ema ida ne’e hodi sai Cristo nia saeluk iha mundo raiklaran. Nia função atu sai sinal reino Maromak nian iha sarani sira le’et, sai sentinela ba sarani sira nia moris no sai guardião ba sarani sira nia moris”.

Prelado ne’e reforça tan katak; “Ordenação ne’e laos simu posse/pelantikan hodi sai funcionário hodi manan osan maibe sai atan Cristo nian hodi servi ema, bali ema nia klamar hanesan Jesus rasik mai iha mundo raiklaran maske terus atu mate iha cruz Nia sei dehan Nai Perdua sira basá sira la hatene saida mak sira halo. Ne’e duni Dom Norberto do Amaral husu ba nailulik foun atu hatene obedece no haraikan iha moris”.

Remata tiha missa Pároco Paróquia Nossa Senhora de Fátima Lolotoe iha ninia discurso hateten; “Tinan ida ne’e hanesan tinan ida ne’ebe ami paróquia Lolotoe sente graça domin Maromak nian iha ne’ebe Cruz Jovem mai hamutuk ho ami, ami bele inaugura Igreja Lolotoe ne’ebe kleur ona Lolotoe oan sira hein hela, no tinan ida ne’e mos housi Paróquia ida ne’e nia oan mosu mai nai lulik ida. Liu hosi ordenação ida ne’e atu hatudu mai ami basá moris tomak mai housi Nai Maromak no ida nune’e mos sai convite ida ba Paróqiua Lolote oan sira atu bele hakat mos iha dalan ida ne’e”. (Ceko)

Ida nee, Hau nia Oan doben

Maromak nia futar Lia Fuan Domingo semana nee nian convida ita nobun nudar Católico hodi reflecte didiak sentido husi sacramento Baptismo nebe ita simu desde infância. Jeus Cristo rasik fo Nia-An atu São João Baptista fo sarani nunee,Nia loke odamatan lalehan ba ema fiar nain hotu.

Domingo semana ida nee, Evangelista São Mateusrelata cronologia oinsa São João Baptista  ho Jesus halo diálogo kona ba se mak merece simu no fo Batismo. Jesus maske Maromak, nia hili dalan haraik-An no expressa sentido solidariedade ho humanidade atu simu we baptismo husi João Baptista.

 

Haktuir katak; iha ai laran fuik ida, lekirauk inan ida tuur iha fatuk boot leten halo meditação besik semana rua ona. Tama ba loron 14, teki-tekil lian ida haksee nia dehan; belun lekirauk, hau acompanha ona o nia meditação durante semana rua nee. Horas nee o bele koalia sai o nia hakarak atu hau halo ba o. Hanoin tuun sae tiha, lekirauk hatan ba lian nee:”hau hakarak ita boot muda hau sai feto bonita ida”. Tuir mai lian nee hatan dehan: então o haksoit luku tama be lehun nee dala 7! Rona tiha ida nee, lekirauk nee haksoit tama kedas ba be laran. Luku tama sai too dala hitu, teki-tekil deit, lekirauk nee nakfilak-an sai tiha feto bonita ida. Feto nee fihir nia oin iha be lehun, hafoin hanoin iha nia laran dehan; “se hau lukutan dala 7 tan pasti hau sei sai bonita liu tan”. Tuir mai, feto nee haksoit tama tan be laran hodi luku dala hitu tan. Luku dala 7 hotu tiha, feto nee nakfila-an fila hikas ba lekirauk. Nia hakfodak hodi luku fali dala 7 maibé, nia la nakfilak-an ona. Nia arrepende maibé, liu tiha ona.

 

Ilustração iha leten, lori ita ba contempla diak liu tan caracter sacramento Baptismo nebe Igreja Católica adopta. Desde Igreja estabele desde tinan rihun rua resin liuba too agora. Nee significa katak ema ida simu Baptismo dala ida deit too mate. Baptismo nee la bele repete (irrepetível). Nee tradição ida nebe Igreja Católica kaer metin too horas nee.  Costume Baptismo nee hakarak loke sarani sira nia hanoin liliu maluk sira nebe sarani ona iha lidun Igreja Católica hafoin, ba sarani tan iha Igreja seluk tanba ema fo osan ho supermi. Ita haree iha ilustração nebe apresenta iha leten; lekirauk nee hetan oportunidade atu luku dala ida deit maibé, tan nia ambição ka nia kaan ten hodi luku fila fila; ikus mai nia lakon oportunidade tomak. Iha nee sacramento Baptismo nebe Igreja Católica hakuak metin too horas nee, baseia nafatin ba caracter irepetível nee. Iha Evangelho Domingo semana nee nian Jesus rasik simu Baptismo dala ida deit molok halao nia misSão durante tinan 3. Evangelho mos la haktuir tan kona ba Jesus simu Baptismo iha fatin seluk.

Wainhira amu lulik ida fui we baptismo mai ita nia ulun, Nai Maromak hasanto no hili ita ida-idak sai nia emar (Membro Kreda Católica). Tan nee mak Maromak halian ba Jesus hodi dehan:”Ida nee, Hau nia Oan doben: buat tomak Hau hadomi, Hau tau iha Nia”. Maromak kuta ita liu husi we no mina santo nebe amu lulik kose. Certamente ita la hatene saida mak acontece iha momento ita simu we baptismo maibé, espiritualmente Maromak hasanto eh consagra ona ita. Uma Kreda Católica coloca sacramento Baptimo nudar odamatan boot ba Sacramento sira seluk.

Afirmação nee hatuur iha argumento ida katak Baptismo nee sai hanesan fundamento ba sacramento sira seluk iha Igreja laran. Ema ida molok sai Uma Kreda nia emar iha obrigação natural simu uluk Sacramento baptismo nee. Sacramento baptismo loke odamatan atu ema hotu hola parte nudar Maromak nia povo. Ema adulto eh Bebe nebe foin moris por natureza sei contamina hela ho pecado original nebe beiala Adão ho Eva comete.  Tanba nee, ema ida tende simu uluk lai Sacramento Baptismo molok simu tan sacramento sira seluk. Sacramento ida nee mos halo ita hetan misSão hodi haklaken Maromak nia Reino ba mundo tomak.

 

Tradição Baptismo rasik mai husi processo naruk ida iha tempo Testamento Tuan nian. Ritual Baptismo mosu ona iha ema Judeu sira nia tradição. Judeu sira nia baptismo orienta liu ba sentido purificação eh hamoos-an. Ao passo que São João Baptista nia batismo fali ikus mai adopta nafatin tradição judaica nee hodi bolu nafatin ema hotu ba sentido hamoos-an nee liliu hodi simu Jesus Cristo nudar maksoin. Too iha tempo Jesus Cristo nian, baptismo Cristão nian nia objectivo mak hamos pecado original no mos incorpora ita nia-an iha moris santo nian.                                                       

 

Jesus por Natureza, la iha pecado original nem pecado actual. Tan nee mak durante tempo naruk, ema barak sempre questiona katak; se Jesus nee Maromak tansa nia tende simu tan Baptismo husi São João Baptista?

Uluk nanain, João Baptista fo Testemunha kona ba Cristo nia Kmanek. Tan nee mak São João Baptista dehan katak nia la soi atu kore Jesus nia sandálias talin. João Baptista mos dehan liu tan katak:”Hau sarani imi ho We maibé, ida nebe tuir hau sei sarani imi ho Espírito Santo”. Afirmação ida nee hakarak loke ita neon kona ba Jesus nia Natureza nudar Maromak Oan.

São João Baptista nia haraik-an nee fo hanorin sarani ohin loron kona ba oinsa coloca lalaok Maromak nian tuir nia fatin no lalaok ema nian tuir nia dalan. Ho ida nee, ita bele hatan ona ema balu nia lamentação katak: se Jesus nee Maromak tansa nia simu fali baptismo husi São João Baptista?Nunee mos loke ita nia conviecção katak Jesus mak Messias laos hanesan doutrina bosok nebé testemunha jeova sira halekar husi uma ba uma katak Jesus laos Messias.

 

Jesus tuir lolos la precisa simu baptismo maibé, Jesus hakarak simu Baptismo husi João Baptista hodi hatudo nia Glória no loke odamatan lalehan nian ba ema hotu nebe fiar iha Nia. Tan nee mak wainhira simu tiha Baptismo Lian ia tun husi Lalehan dehan: ”O Hau oan doben tebes. Hau domin tomak Hau tau iha o”. 

Ho Jesus nia Baptismo, Nia halulik ona we hotu iha rai nee. Husi we lulik nee, ema hotu nebe simu we baptismo nee sei hetan liman rohan hodi sai Maromak oan loloos. Nunee, ema nebe simu ona Baptismo, odamatan lalehan mos nakloke luan ba nia. Odamatan lalehan nee sei taka fali wainhira ema nee rasik mak hakarak taka liu husi comete pecado ou muda fali fiar ba religião seluk. Maibé, Maromak sei fo oportunidade dala ida tan ba ema sira nebe taka rasik odamatan lalehan nee wainhira nia arrepende fali nia sala.

We baptismo nee graça ida; tanba nee mak São gregório de Nazianze hateten dehan: we baptismo nudar graça Maromak nian nebe kmanek liu. Ita hanaran graça, unção/kuta, haroman, roupa moris nian, moris foun, sinal no grça boot liu.

Liu tan São Gregório Nazianze dehan: we Baptismo hanaran we graça tanba; Maromak haraik ba ema nebe la iha buat ida, haraik ba ema nebe sala nain, haraik tan pecado nebe hamoos ona iha we sarani nee. Nudar graça unção tanba Maromak kuta ita ba moris santo nian, hanaran roman tanba fo roman ba ema seluk.

 

São Paulo iha nia carta ba sarani sira iha Roma, fortifica liu tan sentido we baptismo hodi dehan; ema fiar nain nebe simu we baptismo hamutuk ona ho Cristo nia mate no moris hias (Rm 6,34). Ema nebe simu we baptismo, nia hatais nia-an ho Cristo. Liu husi Espírito Santo, we baptismo nudar we nebe hamos, haloos no halulik (Cf 1Cor 6,11). Nunee, ikus liu we baptismo, halo ema cristão Católico ida mate ba pecado maibé, nia hetan moris foun iha Cristo. Tan nia hamutuk ona ho Cristo então, nia sai Maromak oan. São Pedro iha Segunda Leitura Domingo semana nee afirma:” :”Tebes, hau hatene katak Maromak bolu ema hotu, la fihir nia diak eh aat. Iha rai hot-hotu, se hamtauk Nia no moris tuir justiça, nia monu duni ba Maromak nia laran”

 

São João Crisóstomo afirma ninia convicção kona ba Sacramento Baptismo dehan; o pagão conhece o baptismo, mas pensa que é só uma questão de àgua; eu pelo contrário, não fico considerando só o que vejo, mas contemplo a purificação de alma obrado pelo Espírito Santo. O pagão considera o baptismo como simples lavagem do corpo; eu, pelo contrário, acredito que faz a alma pura e santa.

Too ponto ida nee, ita bele reflecte São João Crisóstomo nia resultado contemplação nebe haree sacramento Baptismo nudar processo santificação klamar nian. Processo nee realiza tanba Espírito Santo nia graça. São Pedro rasik justifica Espírito Santo nia graça ida nee hodi dehan;”Liu baptismo nebe João fo, imi hatene ona buat sa mak mosu iha Judeia tomak, hahu husi Galileia; Katak Maromak haraik Espírito Santo no kbiit ba Jesus Nazaré, nebe lao lemo lemo hodi halo diak no fo kmaan ba sira nebe terus iha diabo nia liman, basá, Maromak horik ho nia”. São Pedro nia afirmação nee hakarak justifica fali Evangelho São Marcos nia sasin nebe dehan: ”O Hau oan doben tebes. Hau domin tomak Hau tau iha o”.

 

Ita bele compreende sentido Sacramento Baptismo liu husi São Pedro nia lia-fuan iha Segunda Leitura Domingo nee. Husi São Pedro nia declaração iha Segunda Leitura ita entende no fiar katak; sacrameno Baptismo nee rasik protege ita husi diabo nia babeur.

Iha história Igreja nian, mosu ideia oi-oin kona ba baptismo nebe São João Baptista fo no Baptismo nebe Jesus ho nia apóstolo fo. Iha Uma Kreda Católica nia convicção, São João Baptista nia baptismo nee hanaran Baptismo penitencial basá baptismo nee sinal exterior ida. Hanaran sinal exterior tanba implica ema nia vontade ka laran kmaan hodi muda nia moris.

Ao passo que baptismo nebe horas nee lao iha rito Igreja Católica nian mak Baptismo nebe naturalmente halo ema sai Igreja nia membro lolos. Tanba nee mak iha Evangelho, São João Baptista hateten ba ema barak dehan:” Hau sarani imi hodi we, maibé, Nia sei sarani imi iha Espírito Santo”. Iha ponto ida nee, São João Baptista mos reconhece katak Nai Jesus Cristo mak boot liu nia. Nia (João Baptista) mai loke dalan deit hodi dehan tenik; “Tuir hau, sei too mai ida nebe makas liu hau; hau la soi atu hakruuk hodi kore nia sandálias talin”.

 

Iha costume Igreja Católica nian, bebe nebe foin moris, inan aman iha responsabilidade moral hodi lori ba simu we baptismo.Costume ida nee maske hetan reacção argumentada husi denominação protestante sira maibé, Igreja Católica manten nafatin posição hodi fo sarani labarik sira desde Bebe. Igreja iha hanoin ida katak;Lori moris foun ba mundo ida nee nudar privilégio boot ida. Lalaok ida nee lori ksolok, bensão no responsabilidade inan aman nian. Responsabilidade tanba inan aman hadomi sira nia oan. Inan-aman nia domin fo imagem lolos kona ba Maromak nia domin ba ema hot-hotu. Liu husi we baptismo, oan sira hola parte ona ba família Maroamk nian; mak Igreja.

 

Atu taka reflexão nee, ita iha esperança boot tebes katak Maromak nia Lia Fuan bele loke ita nobun nia neon hodi compreende sentido husi Sacramento Baptismo nebe ita hotu simu.

Liga we baptismo, inan-aman iha papel nudar responsável hodi hanorin oan sira desde kiik, treina no hametin sira nia fiar. Ho ida nee inan aman nia papel fundamental ba oan sira nia moris sarani nian mak hanesan:

  1. Hanorin oração ba oan sira.
  2. Hanorin vlaor moral Cristão nian.
  3. Hanorin oan sira atu oinsa moris nudar sarani diak.
  4. Lori oan sira ba Igreja iha momento missa, liliu iha loron Domingo no loron boot sira.
  5. Hanorin oan sira fo esmola.
  6. Tau matan tuir katak; oan sira moris ho educação nebe diak.

 

Igreja católica mos  permite inan-aman sira hili labarik nia inan-aman sarani atu sira:

  1. Tulun inan-aman tau matan lesuk ba labarik nia educação fiar nian.
  2. Representa Uma Kreda hamatan labarik nee.

 

Inan-aman sarani nebe diak sempre sai exemplo ba oan sarani nee liliu aspecto moral no fiar sarani nian.

Basá, Graça Baptismo nian nee sai hanesan uda wen nebe suli tun mai rai no sei la fila wainhira seidauk haburas rai. Nunee, buat nebe mai husi Maromak sei manan mundo basá, husi Baptismo ema hotu sai Maromak oan. Maromak mos sei hamatan ema hotu hodi dehan: ”O Hau oan doben tebes. Hau domin tomak Hau tau iha o”. Assim Seja e Bem Haja (Ignas Lopes)

Festa Baptismo do Senhor

Primeira Leitura                  Is 42, 1-4, 6-7

Lia husi Livro profeta Isaías:

Hau nia atan mak nee, atan nebé Hau tahan, Hau fihir, Hau hadomi. Hau tau laran ba nia, atu nia bele tesi lia-los ba povo tomak. Nia sei la hakilar, la foti lian resin; Nia lian sei la rona iha  luron. Fafulu nakfera ona, nia sei la kona; ahi-oan kibu-kibu, nia sei la hu mate. Nia sei haklaken lolós justiça, nia sei brani nafatin, sei aten-boot bei-beik, too ema hotu iha rai klaran hetan justiça, basá, ema sira iha tasi balu mós titu nia doutrina. Hau, o nia Nain mak bolu o atu tuir justiça; Hau lolo Hau liman bao, fo matenek ba o, fo matenek ba o, atu o bele halibur no fo naroman ba ema tomak. Hau fihir o, atu halo matan delek sira bele haré, atu hasai dadur sira husi cadeia no fo naroman ba sira be moris iha nakukun.

Maromak Futar Lia.

 

Salmo Responsorial                                                                                                                          Sal. 28(29) 1a, 2; 3ac-4; 3b. 9b-10

Refrão : Nai haraik bensa ba nia povo iha dame!!! Repete-se

Maromak oan sira, hahí imi Nai,

Hawelok nia naran;

Hanai Nia iha kadunan laran. Refrão

 

Nai lian rona husi leten aas ba,

Nai lian makas liu laloran;

Nai lian bele buat hotu,

Nai lian kmanek liu tomak! Refrão

 

Maromak kbiit wain, lian makas liu rai tarutu;

Lian nee tarutu, namolik alas-alas!

Nai hatur nia kadunan iha we-leten:

Nia mak liurai tinan ba tinan. Refrão

 

Segunda Leitura                                                                                                                                                                        Act 10, 34-38

Lia husi livro hahalok Apóstolo sira nian:

Iha loron hirak nebá, Pedro hahú koalia, dehan:”Tebes, hau hatene katak Maromak bolu ema hotu, la fihir nia diak eh aat. Iha rai hot-hotu, se hamtauk Nia no moris tuir justiça, nia monu duni ba Maromak nia laran. Nee mak lia tatoli ba Israel oan sira, wainhira hodi Jesus Cristo, ema tomak nia Nain, Nia haklaken Lia Foun diak, lia hakmatek. Liu baptismo nebé João fo, imi hatene ona, buat sa mosu iha Judeia tomak, hahú husi Galileia: katak Maromak haraik Espírito Santo no kbiit ba Jesus Nazaré, nebé lao lem-lemo hodi halo diak no fo kman ba sira nebé terus iha diabo nia liman, basá, Maromak horik ho Nia ”.

Maromak Futar Lia.

 

Aclamação                                                                                                                                                                                     Cfr. Mc. 9, 6

Refrão : Aleluia, Aleluia!! Repete-se

Lalehan nakloke; Aman Maromak lia tun mai:

“Nee Hau Oan doben! Imi rona Nia ba”. Refrão

 

Evangelho                                                                                                                                                                                         Mt 3, 13-17

Nai Jesus Cristo nia Evangelho nu’udar São Mateus haktuir:

Iha tempo nebá, Jesus too husi Galileia mai, buka João Baptista iha Jordão, atu simu Baptismo hus nia. Maibé, João la hatan, hodi dehan nunee: ”Hau hakrak dau-daun O atu sarani hau, O mai buka fali hau?” Jesus hatan, hodi dehan: “Husik lai ba. Diak liu ita buka halo tuir lolos buat hot-hotu”. Ho ida nee, João mos hatan ona. Simu tiha Baptismo, Jesus sai husi we, lalehan nakloke, Jesus har’e Maromak nia Espírito hanesan manu falur ida, tun mai iha Nia leten. Husi lalehan, lia ida dehan nunee: “Ida nee, Hau nia Oan doben: buat tomak Hau hadomi, Hau tau iha Nia”.

Lia Maksoyn.

Sábado, Depois da Epifania

Primeira Leitura                       1Jo. 5. 14-21

Lia housi São João  nia primeira Surat:

Doben sira: Hanesan ne’e mak ita laran metin ba Maromak: ita husu buat ruma tuir Nia hakarak karik, Nia sei rona ita. Ita hatene katak Nia rona ita nia buat hotu nebé ita husu. Ita hatene mós katak Ita iha ona rahun di’ak nebé ita husu ba Nia. Ema ruma haré karik nia maun-alin halo sala nebé la lori ba mate, nia sei harohan no Maromak sei fó moris ba nia. Ha’u dehan kona ba ema sira nebé halo salan be la lori ba mate. Basá, iha sala nebé lori ba mate, housi ida ne’e ha’u la bele dehan atu ema ida harohan. Moris áat tomak mesak sala, maibé iha sala nebé la lori ba mate. Ita hatene katak ema hotu nebé moris housi Maromak la halo sala, maibé ida nebé Maromak halo moris, hein Nia. Nune’e ema laran áat la bele kona nia. Ita hatene katak ita Maromak Nian, no rai-klaran tomak iha ema laran áat nia ukun. Ita hatene mós katak Maromak Nia Oan mai ona, hanourin tiha ona ita atu hatene didi’ak lialós. Ita iha ona lialós, ita nebé hôrik iha Nia Oan, Jesus Cristo. Ida ne’e mak Maromak lós no moris rohan laek. Ha’u oan sira, imi buka hadook-an housi hahalok áat.

Maromak Futar Lia.

 

Salmo Responsorial                                                                                                                         Sal. 149. 1-2, 3-4, 5, 6ª, 9b (R. 4ª)

Refrão : Na’i, hadomi Nia povo!!! Repete-se

Hananu ba Na’i knananuk foun;

Ema lubun santo nian hahi Nia.

Israel haksolok iha Maromak,

Sião nia oan sira iha nia Liurai. Refrão

 

Hahi hana’i Nia naran,

Hananu knananuk ida ba ita Maromak!

Na’i hadomi Nia Povo,

Nia sei fó glória manan nian

Ba ema haraik-an sira. Refrão

 

Hahi ema sira be fuan mós!

Maromak Nia santo sira haksolok!

Atu sira ibun hahi nafatin;

Ida ne’e mak Nia sarani sira nia glória. Refrão

 

Aclamação                                                                                                                                                                                            Mt. 4. 16

Refrão : Aleluia, Aleluia!! Repete-se       

Povo nebé moris iha nakukun laran, haré naroman boot ida;

Naroman ida mosu ba sira nebé hela iha mahan mate nian. Refrão

 

Evangelho                                                                                                                                                                                       Jo. 3. 22-30

Na’i Jesus Cristo nia Evangelho nu’udar São João haktuir:

Iha tempo neba, Jesus ho Nia escolante sira ba rai Judeia. Nia hela kleur iha neba ho escolante sira hodi hahu sarani ema. João mós sarani hela ema iha Enon, besik rai Salim, basá iha neba iha ué barak. Ema barak mai atu simu sarani. Tebes duni, João ema seidauk hatan nia iha cadeia.

João nia escolante sira haksesuk malu maka’as ho judeu ida dehan kona ba purificação. Sira ba hasouru João hodi dehan ba nia: “Mestre, Ida be hamutuk ho ó iha Jordão nia sorin balu ba, kona ba Ida nebé ó fó sasin, Nia sarani hela ema, ema hotu ba hasouru Nia”. João hatan: “Ema ida la bele simu buat ida ba nia-an rasik, la haraik karik housi Lalehan mai. Imi rasik sai sasin kona ba buat nebé ha’u dehan: ‘Ha’u la’os Messias’, maibé ha’u hanesan mata-dalan de’it mai uluk iha Nia oin; sé mak iha féen mak iha la’en, no la’en nia belun, nebé la’o ho nia, rona nia, hetan ksolok teb-tebes tan rona nia lian. Ida ne’e mak ha’u ksolok, nebé oras ne’e to’o ona rohan. Nia sei sai boot no ha’u sei sai kiik!”

Lia Maksoyn.

Sexta-Feira, Depois da Epifania

Primeira Leitura                         1Jo. 5. 5-13

Lia housi São João  nia primeira Surat:

Doben sira: Ema nebé mak manan mundo? La’os ema nebé fiar katak Jesus mak Maromak Oan? Jesus Cristo be mai housi ué no ran; la’os de’it ho ué, maibé ho ué no ran. Espírito mak fó sasin, basá Cristo mak lialós. Tebes duni, na’in tolu mak fó sasin: Espírito, ué no ran; sira na’in tolu lia tuir malu. Ita sira karik sasin ema nian, Maromak Nia sasin mak boot liu, basá Maromak Nia sasin mak fó sai kona ba Nia Oan. Ema nebé fiar iha Maromak Oan, sasin ne’e hôrik iha nia. Ema nebé la fiar iha Maromk, nia dehan Maromak hanesan bosok-ten, tan nia la fiar iha sasin nebé fó housi Maromak kona ba Nia Oan. Sasin ida ne’e duni mak Maromak haraik mai ita moris rohan laek no moris ne’e hôrik iha Nia Oan. Ema sé iha Oan, nia iha moris; ema sé la iha Maromak Oan, nia la iha moris. Ha’u hakerek buat hirak ne’e hotu ba imi, atu imi hatene katak imi iha moris rohan laek, imi nebé fiar iha Maromak Oan Nia naran.

Maromak Futar Lia.

 

Salmo Responsorial                                                                                                                       Sal. 147. 12-13, 14-15, 19-25 (R. 12)

Refrão : Jerusalém, hahi ba ó Na’i!!! Repete-se

Fó glória ba Na’i, Jerusalém!

Sião, hahi ó Maromak!

Nia hametin tan ó odamatan,

No fó bensa ba ó oan sira. Refrão

 

Nia hari damen iha ó nia rain-ketan sira,

Habosu ó ho trigo di’ak liu.

Halo monu maha-uen hanesan bibi-mala’e fulun,

Halekar tiha maha-uen hanesan ahi –kdesan. Refrão

 

Haklaken Nia liafuan ba Jacob,

Nia lei no ordem ba Israel.

Nia la halo povo seluk nune’e;

Ba povo seluk, Nia la hatudu Nia justiça. Refrão

 

Aclamação                                                                                                                                                                                            Mt. 4. 23

Refrão : Aleluia, Aleluia!! Repete-se       

Na’i Jesus haklaken Lia-foun-di’ak reino nian

No fó isin di’ak ba moras sira iha  povo nia leet. Refrão

 

Evangelho                                                                                                                                                                                        Lc. 5. 12-16

Na’i Jesus Cristo nia Evangelho nu’udar São Lucas haktuir:

Iha tempo neba, Jesus iha hela cidade ida, uainhira ema moras lepra ida mosu mai. Uainhira nia haré Jesus, nia hamonu-an hodi taka oin ba rai no harohan nune’e ba Jesus: “Na’i, Ita hakarak karik, bele sadi’am ha’u”. Jesus halolo liman, kona nia, hodi dehan: “Ha’u hakarak, hetan isin di’ak ba”. Iha oras ne’e duni, moras lepra ne’e husik nia. Jesus hateten ba nia atu keta fó hatene ba ema ida no dehan teni: “Maibé, ó ba hatudu-an ba na’ilulik hodi hasa’e sacrificio tan ó hetan isin di’ak, tuir buat nebé Moisés dehan nanis, atu hela sasin kona ba nia”.

Jesus nia naran sai boot ba daudaun, ema lubun ua’in halibur-an, atu rona Nia no atu bele hetan isin di’ak housi sira moras. Maibé Jesus hadook-An tiha hodi la’o mesa-mesak atu harohan.

Lia Maksoyn.

Quinta-Feira, Depois da Epifania

Primeira Leitura                  1Jo. 4. 19-5. 4

Lia housi São João nia primeira Surat:

Doben sira: Ita sei hadomi Maromak, tan Maromak hadomi uluk ita. Ema ruma dehan karik: ‘Ha’u hadomi Maromak’, maibe rai kunan ba nia maun-alin nebe nia haré, nia la bele hadomi Maromak nebe la haré. Ida ne’e mak ukunfuan nebe ami simu housi Nia: Ema nebe hadomi Maromak, hanesan ne’e mós nia hadomi nia maun-alin. Ema nebe fiar katak Jesus mak Cristo, moris housi Maromak, no ema nebe hadomi Maromak ida be hahoris Nia, hadomi mós  ida be moris housi Nia. Ita hatene katak ita hadomi nafatin Maromak Nia oan sira, uainhira ita hadomi Maromak no moris tuir lolós Nia ukunfuan sira; basá Maromak Nia domin mak buka rai didi’ak Nia ukunfuan sira. Buat hotu nebe moris housi Maromak manan mundo. Ida ne’e mak manan mundo, ita nia fiar.

Maromak Futar Lia.

 

Salmo Responsorial                                                                                                                    Sal. 71(72).  2, 14, 15bc, 17 (R. Cf. 11)

Refrão : Na’i, povo tomak rai-klaran sei hahi Ita!!! Repete-se

Maromak, haraik ba liurai kbiit atu tesi lia,

Ita justiça ba liurai oan.

Ita sei ukun Ita povo ho justiça,

Ita kiak sira ho lialós. Refrão

 

Nia sei soi sira moris housi ema áat sira,

Basá kiak sira ran kmanek tebes iha Nia matan.

Tan ne’e, sira sei hanoin nafatin iha nia harohan;

Sei hanoin nafatin ba nafatin. Refrão

 

Nia naran rahun di’ak ba nafatin,

Sei hanoin nafatin hanesan loron nia roman.

Iha nia, povo tomak sei simu bensa;

Ksolok wa’in sei halekar iha nação hotu. Refrão

 

Aclamação                                                                                                                                                                                             Lc. 4. 18

Refrão : Aleluia, Aleluia!! Repete-se       

Na’i haruka ha’u haklaken Lia-foun ba kiak sira

no fó hatene libertação ba dadur sira. Refrão

 

Evangelho                                                                                                                                                                                     Lc. 4. 14-22a

Na’i Jesus Cristo nia Evangelho nu’udar São Lucas haktuir:

Iha tempo neba, hodi Espírito Santo Nia kbiit, Jesus fila hikas ba Galileia; Nia naran boot iha fatin hot-hotu; Nia hanourin iha Sinagoga. Ema tomak hahi Nia. Nia mai to’o iha Nia rain Nazaré. Tuir Nia lisan, iha sábado ida, Nia tama iha Sinagoga, hamriik atu lê. Sira fó ba Nia, livro profeta Isaías nian. Nia loke, haré kona fatin nebe hakerek, dehan: “Na’i Nia Espírito hela ho ha’u, tan Nia foti Ha’u. Nia haruka Ha’u atu haklaken Lia-foun di’ak ba kiak sira, atu fó hatene loron libertação ba dadur sira. Fó hikas matak di’ak ba matan delek sira, liberdade ba ema sira be iha kloot laran. Nia haruka Ha’u atu fó hatene sai tinan ida rahun di’ak mai housi Maromak”. Taka hikas tiha livro, Jesus fó fali ba ema hein Sinagoga. Hafoin Nia tur tiha. Ema sira nebe iha Sinagoga laran  hateke hotu ba Nia. Nune’e, Jesus hahu hateten ba sira, “Liafuan Escritura, imi foin rona ohin, sai tuir lolós ona”. Sira hotu fó sasin di’ak kona ba  Nia no hakfodak tebes ho liafuan hirak be ksolok ua’in nebe sai housi Nia ibun.

Lia Maksoyn.

Quarta-Feira, Depois da Epifania

Primeira Leitura                      1Jo. 4. 11-18

Lia housi Primeira surat São João nian:

Doben sira: Tanba Na’i Maromak hadomi duni ita, ita mós sei hadomi malu. Ema ida sei da’uk haré Maromak. Wainhira ita hadomi malu, Maromak sei hôrik duni ho ita; Maromak Nia domin sei sai kmanek tebes iha ita laran. Ami haré duni, ami sasin tebes ba imi katak Maromak Padre haruka tebes Maromak Oan mai nu’udar mundo rai-klaran nian Maksoyn. Ema nebé sasin katak Jesus Cristo Maromak Oan tebes, Na’i Maromak sei hôrik hamutuk ho nia, nia hôrik hamutuk ho Maromak. Ami hatene, ami fiar tebes oinsá Na’i Maromak hadomi ita. Maromak katak domin! Ema nebé hadomi nafatin, Na’i Maromak sei hôrik duni ho nia, nia sei hôrik duni ho Na’i Maromak. Domin moris lolós ona  iha ita tan ita laran metin lós ona iha loron juízo, basá, oinsá Jesus hela ba, nune’e mós iha mundo ne’e ita sei hela hanesan ne’e. Iha domin laiha ta’uk, domin lolós duni sai ta’uk, basá ta’uk hanesan todan ida. Sé mak ta’uk, nia la iha domin lolós

Maromak Futar Lia.

 

Salmo Responsorial                                                                                                                         Sal. 71(72). 2, 10, 12-13 (R. Cf. 11)

Refrão : Na’i, povo tomak rai-klaran sei hahi Ita!!! Repete-se

Maromak, haraik ba liurai kbiit atu tesi lia,

Ita justiça ba liurai oan.

Ita sei ukun Ita povo ho justiça,

Ita kiak sira ho lialós. Refrão

 

Liurai sira housi rai Társis no rai kiik; mai selu rai ten;

housi Sabá to’o Arábia hatama sira soin;

iha Nia futar oin, liurai hotu tukutur iha rai;

povo tomak sei serbi Nia. Refrão

 

Nia sei rona ema kiak sira lian;

Nia sei sadi’a ema neon susar.

Sei hanoin ema kbiit laek, haraik-an;

Nia sei soi ema kiak sira. Refrão

 

Aclamação                                                                                                                                                                                  cf. 1Tim. 3. 16

Refrão : Aleluia, Aleluia!! Repete-se       

Glória ba Ita, Jesus Cristo, be haklaken ona iha gentio sira leet;

Glória ba Ita, Jesus Cristo, be mundo tomak fiar. Refrão

 

Evangelho                                                                                                                                                                                      Mc. 6. 45-52

Na’i Jesus Cristo nia Evangelho nu’udar São João haktuir:

Wainhira fó han tiha ema rihun lima, Jesus husu kedas escolante sira sa’e ba ró hodi liu uluk ba sorin balu ba, ba lós Betsaida. Nia mesak hela hodi despede ema lubun boot. Despede hotu tiha, Nia sa’e ba foho atu harohan. To’o loraik, ró iha ona tasi klaran, no Jesus mesa-mesak iha rai. Haré katak escolante sira hean ró kole dadaun ona, tan anin hasouru sira, housi rai-klaran fahe ba dala háat, Nia ba hasouru sira, hodi la’o iha tasi leten. Escolante sira hanoin katak mate klamar ida. Sira hahu hakilar, basá sira hotu haré hetan Nia no laran ta’uk tebes. Maibé Jesus lia tun ba sira: “Aten barani! Ha’u duni, imi keta ta’uk”. Hafoin, Nia sa’e tiha ba ró, anin sai maus tiha kedas. Sira sai hakfodak teb-tebes duni, basá sira la hatene lós katak sá pão hirak be nakfila ba wa’in; sira laran nakukun hela.

Lia Maksoyn.

Terça-Feira, Depois da Epifania

Primeira Leitura                           1Jo. 4. 7-10

Lia housi Primeira surat São João  nian:

Doben sira: Ita sei hadomi malu, tanba domin mai housi Maromak, basá, ema nebé hadomi, ema ne’e mai housi Maromak, nia hatene duni Maromak. Ema nebé la hadomi, ema ne’e lada’uk hatene Maromak, basá Maromak katak domin Na’in. Na’i Maromak hatudu Nia domin mai ita nune’e: Nia haruka Nia Oan-Mesak mai mundo atu ita bele hetan moris housi Nia Oan. Domin Maromak nian mak ida ne’e: la’os ita mak hadomi uluk Maromak, maibé, Maromak mak hadomi uluk ita, hodi haruka Nia Oan rasik mai nu’udar Maksoyn atu kasu ita salan.

Maromak Futar Lia.

 

Salmo Responsorial                                                                                                                       Sal. 71(72). 2, 3-4ab, 7-8 (R. Cf. 11)

Refrão : Na’i, povo tomak rai-klaran sei hahi Ita!!! Repete-se

Maromak, haraik ba liurai kbiit atu tesi lia,

Ita justiça ba liurai oan.

Nia sei ukun Ita povo ho justiça,

Ita kiak sira ho loalós. Refrão

 

Ba Ita povo damen sei mai housi foho sira,

housi foho kiik sira, justiça.

Nia sei tahan ema haraik-an sira,

no soi ema kiak sira oan. Refrão

 

Justiça sei buras iha nia loron,

damen sei naruk to’o loron ikus.

Tasi-mane, tasi-feto, Nia sei ukun,

housi mota boot to’o rai-klaran rai-ulu. Refrão

 

Aclamação                                                                                                                                                                                             Lc. 4. 18

Refrão : Aleluia, Aleluia!!! Repete-se       

Na’i haruka ha’u haklaken Lia-foun ba kiak sir no fó

hatene libertação ba dadur sira. Refrão

 

Evangelho                                                                                                                                                                                     Mc. 6. 34-44

Na’i Jesus Cristo nia Evangelho nudar São Marcos haktuir:

Iha tempo neba, Jesus haré ema lubun boot ida; Nia hadomi teb-tebes sira, basá sira hanesan bibi sira nebé bibi-atan laek. Nia hahu hanourin sira kleur. Tan rai nakukun dadaun ona, escolanta sira hakbesik-an ba Jesus, hodi dehan ba Nia: “Fatin ne’e rai-fuik-maran, no rai nakukun ba dadaun ona. Ita haruka sira ba ona, atu ba uma sira hotu, no aldeia sira be hale’u atu bele sosa aihan ba sira rasik”. Maibé Jesus hatan ba sira: “Imi mak fó han ba sira”. Sira dehan ba Nia: “Ami atu sosa pão osan denário atus rua nian hodi fó han ba sira ne’e”? Jesus lia tun ba sira: “Imi iha pão fuan hira?  Imi ba hare to’ok!” Sira ba haré hodi hatan: “Iha pão fuan lima no ikan rua”. Nune’e Jesus lia tun ba sira atu haruka ema hotu tur tuir grupo, iha du’ut matak leten. Sira halo grupo atus ida nian no limanulu. Jesus kaer tiha pão fuan lima no ikan rua, foti matan ba lalehan hodi fó bensa. Hafoin, silu fahe tiha pão, saran ba escolante sira, atu sira bele fahe atu sira bele fahe ba ema tomak. Fahe mós ikan ba ema hotu. Sira hotu han to’o bosu. Sira lori baluk sira oan sira nebé tau iha luhu sanulu resin rua, nune’e mós ikan resin sira. Ema sira nebé iha hamutuk rihun lima.

Lia Maksoyn.