shadow
Diocese de Dili > NOTÍCIAS > LETURA DIÁRIA

XXX DOMINGO TEMPO COMUM (ANO A)

Primeira Leitura                        Ex, 22, 21-27

Lia housi Livro Êxodo:

Na’i lia tun nune’e: “Keta fo susar ba ema la’o rai, keta fo terus ba nia. Uluk imi rasik la’o rai iha rai Egipto. Keta fo terus ba ema feto faluk, ba ema ki’ak. Ó halo terus sira ne’e ida karik, nia husu tulun mak Ha’u, Ha’u sei rona nia lian susar. Ha’u sei halo Ha’u laran nakali, hodi halo imi hotu mate housi surik. Imi fen sei sai faluk, imi oan sira sei sai oan ki’ak. Ó fo karik osan hodi tulun Ha’u nia povo ida, fo ba ki’ak nebé moris besik ó, keta hare nia hanesan ema nebé iha tusan ho ó. Keta sisi nia funan. Ó maluk ruma fo karik nia tais hanesan penhor, molok lokraik ó sei fo fila, tan nia iha hena mesak ne’e atu taka;  hena nebé falun nia isin. Oin seluk, nia bele toba oin sa?  Nia husu tulun karik mai Ha’u, Ha’u sei rona nia, tan Ha’u laran luak”. 

Maromak Futar Lia.

 

Salmo Responsorial                                                                                                                            Sal. 17(18), 2-3ª. 3bc-4. 37.  51ab

Refrão : Na’i, ha’u hadomi Ita; Ita ha’u nia kbiit!!! Repete-se

Na’i, ha’u hadomi Ita, Ita ha’u nia kbiit!

Na’i tahan ha’u, ha’u nia beran, ha’u nia Maksoyn. Refrão

 

Maromak ha’u nia tato’o nebé tahan ha’u,

ha’u nia kaklili, ha’u Maksoyn, ha’u nia loho.

Sei harohan ba Na’i nebé di’ak atu hahi,

Nia sei soy ha’u housi ema aat. Refrão

 

Na’i sei moris, kmanek ba ha’u nia tato’o,

kbiit ba Maromak, ha’u nia Maksoyn.

Nia halo nia liurai manan funu,

hamutuk nafatin ho nia santo. Refrão

 

Segunda Leitura                                                                                                                                                                         1 Tes. 1, 5-10

Lia housi São Paulo nia surat ba sarani sira iha Filipo:

Maun-alin sira:  Imi hatene ami nia hahalok iha imi leet, atu halo di’ak ba imi. Imi buka tuir duni ami nia hahalok no Maromak nian. Imi simu Maromak nia lia-fuan, iha terus ua’in nia laran, ho ksolok nebé Espirito Santo haraik ba imi. Nune’e, imi fo exemplo di’ak ba sarani sira hotu iha Macedónia ho Acaia. Tebes, iha imi leet mosu duni Maromak futar lian:  La’os iha Macedónia no Acaia de’it, maibé, iha fatin hotu-hotu nebé haklaken ona fiar ba Maromak; ne’e duni, ami lalikan ko’alia tan kona ba fiar. Sira rasik haktuir oin sá imi simu di’ak ami; oin sá imi husik lulik hodi mai Maromak. Nune’e, imi bele serbi Maromak nebé moris, Maromak lós, hodi hein Nia Oan Jesus tun housi Lalehan mai, nebé Nia halo moris hias housi mate. Jesus ne’e soy ita ho justiça lós nebé sei mai.

Maromak Futar Lia.

 

Aclamação                                                                                                                                                                                  Mt. 22, 37. 38

Refrão : Aleluia, Aleluia!! Repete-se

Sei hadomi Na’i, ó nia Maromak, ho laran tomak.

Hadomi ó maluk nu’udar ó an rasik. Refrão

 

Evangelho                                                                                                                                                                                   Mt. 22, 34-40

Na’i Jesus Cristo nia Evangelho nu’udar São Mateus haktuir:

Iha tempo nebá, ema fariseu sira, rona dehan katak Jesus halo ema saduceu sira nonok tiha. Sira halibur hamutuk, hafoin, sira ida matenek ukun nian, husu hodi koko nune’e: “Mestre, Ukun-fuan ida nebé mak boot liu?” Jesus hatan ba nia: “Ó sei hadomi Na’i, ó nia Maromak, ho laran ho neon tomak, ho hanoin hotu! Ukun-fuan ida seluk hanesan mos ida ne’e: Ó sei hadomi ó maluk nu’udar ó an rasik! Ukun-fuan hotu ho Profeta sira la’o hamutuk ho ukun-fuan rua ne’e”.

Lia Maksoyn.

Sábado, XXIX Tempo Comum (ANO A)

Primeira Leitura                           Ef. 4. 7-16

Lia housi São Paulo nia Surat ba sarani sira iha Éfeso:

Maun alin sira: Ita ida-idak simu graça nia kmanek oi-oin nu’udar Cristo hakarak fó. Ema dehan: “Uainhira Nia sa’e ba leten aas, nia lori ema dadur  barak; Nia fahe kmanek oi-oin ba ema sira.” “Sa’e ba leten aas” ne’e katak sá? La’os uluk knanain Nia tun ba rai okos? Ida nebé tun mak Nia mós nebé sa’e aas liu fali lalehan tomak atu halo nia nakonu. Nia foti balun nu’udar apóstolo, balun profeta, balun tan evangelista no seluk tan bibi atn no mestre, ba santo sira hotu no di’ak lolós, ba serbisu ministério nian no atu harii Cristo nia isin lolon, to’o tempo nebé ita hotu hetan laran ida de’it iha fiar no iha matenek kona ba Maromak nia Oan Mane, nu’udar ema boot lolós ona, hanesan ho Cristo rasik nia kmanek hotu.

Maromak Futar Lia.

 

Salmo  Responsorial                                                                                                                       Sal. 121(122). 1-2, 3-4ª, 4b-5 (R. 1)

Refrão : Ho ksolok, ita sei la’o ba Na’i Nia Uma!!! Repete-se

Ha’u haksolok uainhira ema dehan mai ha’u:

“Ita la’o ba Na’i Nia Uma”.

Ami tau ona ain iha ó odamatan, Jerusalém. Refrão

 

Jerusalém, cidade be hari metin,

Hari metin no kmanek tebes!

Atu uma kain sira hotu sa’e ba,

Uma kain Na’i Nian. Refrão

 

Tuir lisan  Israel nian,

Atu haliban Na’i Nia naran,

Iha nebá iha tribunal justiça nian

Tribunal housi uma kain David nian. Refrão

 

Aclamação                                                                                                                                                                                           Ez. 33. 11

Refrão : Aleluia, Aleluia!! Repete-se

Na’i dehan, Ha’u lakohi ema sala-na’in nia mate, maibé

Atu fila fali mai Ha’u no bele moris. Refrão 

 

Evangelho                                                                                                                                                                                           Lc. 13. 1-9

Na’i Jesus Cristo nia Evangelho Nu’udar São Lucas haktuir:

Iha tempo nebá, ema mai fó hatene ba Jesus kona ba ema Galileia sira nebé Pilatos haruka kahur sira ran ho balada sira nia ran, nebé sira hasa’e ba lulik. Jesus hatan ba sira: “Imi hanoin katak ema Galileia sira ne’e áat liu fali ema Galileia sira seluk tanba sira terus nune’e? La’e, Ha’u dehan ba imi; maibé imi la hakribi karik imi nia sala, imi mós sei mate hanesan sira. Hanesan mós sira sanulu resin  ualu nebé uma andar Siloé nian hanehan mate uainhira uma ne’e monu: imi hanoin katak  sira áat liu fali sira seluk iha Jerusalém? La’e, Ha’u dehan ba imi; maibé imi la hakribi karik imi nia sala, imi hotu sei mate hanesan sira”.

Nia dehan tan aiknanoik ida ne’e ne’e.”Ema ida kuda tiha ai figuera ida iha nia to’os loron ida nia ba buka nia aifuan, maibé la hetan. Tan ne’e nia hateten ba to’os atan: ‘Tinan tolu ona ha’u mai buka aifuan iha aihun ne’e, maibé la hetan ida. Tesi tiha nia tansá nia susu leet rai bokur?’ Maibé to’os atan hatan: ‘Nai, husik nia tinan ida ne’e tan, atu ha’u sei ke’e hadulas nia hun hodi tau mós rai metan. Tinan oin mai nia sei fó fuan karik, di’ak; lae karik, mak ha’u sei tesi tiha nia’’’.

Lia Maksoyn.

Sexta-Feira, XXIX Tempo Comum (ANO A)

Primeira Leitura                             Ef. 4. 1-6

Lia housi São Paulo nia Surat ba sarani sira iha Éfeso:

Maun alin sira: Ha’u, ema dadur  ida iha Na’i, husu imi atu moris lolós tuir imi nia vocação. Tulun malu ho domin, la hodi hanoin imi an rasik, maibé ho laran maus no paciência. Halo buat hot-hotu atu imi bele sai laran ida de’it iha Espírito, housi dame nebé halibur imi hamutuk. Iha isin ida de’it, espírito ida de’it, nu’udar Maromak bolu imi hotu nia esperança ida de’it, uainhira Nia bolu  imi. Iha Na’i ida de’it, fiar ida de’it, baptismo ida de’it no Maromak ida de’it. Nia mak ema hot-htou nia Aman; Nia ukun ida hot-hotu, Nia book an housi ita  hot-hotu no Nia iha ita hot-hotu.

Maromak Futar Lia.

 

Salmo  Responsorial                                                                                                                    Sal. 23(24). 1-2, 3-4ab, 5-6 (R. cf. 6)

Refrão : Ema otas ne’e mak buka Na’i!!! Repete-se

Rai no buat hotu nebé iha nia, Na’i Nian;

Mundo no buat tomak hôrik iha nia.

Maromak hatur rai iha  tasi leten,

Hametin rai iha laloran leten. Refrão

 

Sé mak bele sa’e ba Maromak Nia foho,

Eh hôrik iha Nia kadunan santo?

Ema nebé laran mós no liman la sala,

Ema nebé la jura lia bosok. Refrão

 

Ema ne’e sei simu Na’i Nia bensa,

Nia sei hetan kolen housi Maromak, nia Maksoi.

Ema otas ne’e mak buka Na’i,

Be buka Jacob nia Maromak Nia futar oin. Refrão

 

Aclamação                                                                                                                                                                                     cf. Mt. 11. 25

Refrão : Aleluia, Aleluia!! Repete-se

Rahun di’ak ba Ita, Aman, Na’i lalehan no rai nian, tan

Ita hatudu mistério reino lalehan nian ba kiik sira.  Refrão

 

Evangelho                                                                                                                                                                                     Lc. 12. 54-59

Na’i Jesus Cristo nia Evangelho nu’udar São Lucas haktuir:

Iha tempo nebá, Jesus dehan tan ba ema lubun boot: “Uainhira imi haré kalohan ida iha loromonu, imi dehan katak udan sei tau, no mosu duni nune’e. Uainhira anin huu housi tasimane, imi dehan katak loron sei manas, no mosu duni nune’e. Imi ema laran makerek sira! Imi hatene si’ik buat nebé mosu iha lalehan no iha rai, nusa mak imi la hatene si’ik otas ne’e?  Tan sá imi rasik la haré buat nebé lós? Ne’e duni, uainhira  ó ba tribunal hamutuk ho ó nia funu baluk, buka hadame malu ho nia iha dalan; keta halo be nia lori ó ba juiz, hafoin juiz saran ó ba guarda, no guarda hatama o iha dadur laran. Ha’u dehan ba o katak ó sei la sai housi nebá to’o ó selu hotu”.

Lia Maksoyn.

Quinta-Feira, XXIX Tempo Comum (ANO A)

Primeira Leitura                         Ef. 3. 14-21

Lia housi São Paulo nia Surat ba sarani sira iha Éfeso:

Maun alin sira: Ne’e duni, ha’u hakneak iha Aman nia oin. Housi Nia, família ida-idak iha lalehan eh iha rai simu nia naran. Housi nia glória kmanek liu, Nia haraik ba imi nia biit housi nia espírito, atu imi nia laran bele sai maka’as liu tan, atu Cristo bele moris iha imi nia fuan housi fiar, no nune’e, ho imi nia abut no hun ida domin, imi bele hetan biit hamutuk ho santo  sira hotu atu hatene luan no naruk, aas no kle’an, to’o uainhira imi hatene ona Cristo nia domin, nebé aas liu matenek hotu, imi sei sai nakonu ho Maromak nia kmanek tomak.

Glória ba Nia! Nia biit nebé book an iha ita nia laran, halo barak liu fali buat nebé ita husu ka hanoin, glória ba Nia houri otas ba otas iha Kreda no iha Cristo Jesus tinan ba tinan. Amen.

Maromak Futar Lia.

 

Salmo  Responsorial                                                                                                         Sal. 32(33). 1 e 3, 4-5, 11-12, 18-19 (R. 5b)

Refrão : Na’i Nia laran di’ak nakonu iha rai!!! Repete-se

Hahí Na’i ba, imi sira be laran mós,

Ema fuan sira be lós hahí Nia.

Hananu ba Nia knananuk foun ida,

Hananu ba Nia ho lian midar no ho fuan. Refrão

 

Na’i nia liafuan lós tebes,

Bele laran metin iha Nia liman nia hahalok sira,

Na’i hadomi justiça no lialós,

Nia domin nakonu iha rai tomak. Refrão

 

Na’i Nia plano hela ba nafatin,

No Nia fuan ni desenho ba derasaan hotu.

Ksolok ba povo be fiar iha Na’i, nu’udar nia Maromak,

Povo be Nia hili ba Nia lima-rohan. Refrão

 

Na’i tau matan ba sira be hamta’uk Nia,

Ba sira be hein iha Nia laran di’ak,

Atu hasai sira klamar housi mate,

No fó han uainhira sira hamlaha. Refrão

 

Aclamação                                                                                                                                                                                      Filip. 3. 8-9

Refrão : Aleluia, Aleluia!!! Repete-se

Ha’u hakribi sasan hotu nu’udar buat folin laek atu bele

Fó fatin ba Cristo no hasouru malu ho Nia.  Refrão

 

Evangelho                                                                                                                                                                                     Lc. 12. 49-53

Na’i Jesus Cristo nia Evangelho nu’udar São Lucas haktuir:

Iha tempo nebá, Jesus lia tun ba escolante sira, “Ha’u mai atu lori ahi ba raiklaran, no Ha’u hakarak teb-tebes ahi ne’e lakan duni. Ha’u sei simu baptismo ida, no Ha’u sei  la hakmatek to’o buat ne’e mosu. Imi hanoin katak Ha’u mai atu lori dame  ba raiklaran? Ha’u dehan ba imi  katak lae; maibé atu halo ema haketak malu. Basá houri ohin ba oin, ema na’in lima iha uma laran, sira lia sei la tuir malu: na’in tolu hasouru na’in rua, na’in rua hasouru na’in tolu; aman hasouru oan mane, oan mane hasouru aman; inan hasouru oan feto, oan feto hasouru inan; banin feto hasouru feto foun, feto foun hasouru banin feto”.

Lia Maksoyn.

Quarta-Feira, XXIX Tempo Comum (ANO A)

Primeira Leitura                             Ef. 3. 2-12

Lia housi São Paulo nia Surat ba sarani sira iha Éfeso:

Maun alin sira: Imi rona tiha ona karik kona ba knaar graça nian nebé Maromak saran mai ha’u ba imi nia di’ak; Nia rasik fó hatene mai ha’u mistério nebé ha’u foin haktuir ne’e. Imi lê  tiha ona karik ha’u nia liafuan, imi sei hatene katak ha’u haré naruk liu iha Cristo nia mistério. Mistério ne’e nebé ohin Espírito fó sai ba apóstolo no profeta sira, mistério ne’e ema iha otas uluk  nian la hatene liu. Ne’e katak ohin, gentio sira halo parte ona iha liman rohan ida de’it;  gentio sira isin lolon ida de’it nia liman-ain; sira simu promessa ida d’eit,iha Cristo Jesus, housi Evangelho. Maromak foti ha’u atu sai Evangelho ne’e nia atan, housi presente graça nian housi Nia, nebé fó ida ne’e mai ha’u ho nia rasik nia biit. Maromak saran graça  kmanek ne’e mai ha’u, nebé kiik liu santo sira hotu, la’os de’it atu haklaken ba gentio sira Cristo nia rikusoi ua’in, maibé mós atu fó sai oin sá bele fahe ba ema mistério ida ne’e. Hori otas ua’in, mistério ne’e subar hela iha Maromak, nebé hakiak buat hot-hotu. Tan sá? Atu biit na’in  no ukun na’in sira iha lalehan bele hatene ohin housi Kreda, Maromak nia matenek ua’in teb-tebes, lolós tanba hakarak nebé iha ona Nia houri otas  iha Cristo Jesus, ita Na’i. Tan ne’e  mak ami barani atu hakbesik ba Maromak ho laran metin, housi ami nia fiar iha Nia.

Maromak Futar Lia.

 

Salmo  Responsorial                                                                                                                                      Is. 12. 2, 3, 4bde, 5-6 (R. 3)

Refrão : Imi ba ho ksolol oha wé matan maksoyn!!! Repete-se

Maromak mak ha’u Maksoyn,

Ha’u laran metin, ha’u la ta’uk.

Na’i mak ha’u biit, ha’u ksolok.

Na’i ha’u maksoyn. Refrão

 

Ho ksolok imi kuru ué ih ué matan maksoyn.

Fó agradece ba Na’i, bolu ba Nia naran.

Tatoli ba povo sira, Nia hahalok kmanek,

Haklaken ba hotu katak Nia naran santo. Refrão

 

Hananu ba Na’i, basá Nia halo kmanek  ua’in,

Haklaken housi rai ikun to’o rai ulun.

Hananu  no haksolok ba, sira be hôrik iha Sião,

Tan iha ona iha imi leet Israel nia Santo. Refrão

 

Aclamação                                                                                                                                                                                Mt. 24. 42ª, 44

Refrão : Aleluia, Aleluia!! Repete-se

Imi matan moris neon na’in ba basá iha oras nebé imi

la hanoin hetan mak Mane Maksoi sei mai.  Refrão

 

Evangelho                                                                                                                                                                                     Lc. 12. 39-48

Na’i Jesus Cristo nia Evangelho nu’udar São Lucas haktuir:

iha tempo nebá, Jesus lia tun ba escolante sira nune’e: Imi rona didi’ak ba: uma na’in hatene  karik tuku hira mak na’ok ten atu mai, nia sei la husik nia tama iha nia uma. Imi hein hela ba, basá iha oras nebé imi la hanoin kona, Oan Mane sei hi’it an mai.”

Pedro dehan ba Nia: “Na’i, Ita haktuir aiknanoik ida ne’e mai ami de’it, ka ba ema hot-hotu mós?” Na’i simu: “Se mak atan di’ak no matenek nebé uma na’in haruka atu haré nia familia hodi fahe aihan ba sira tuir oras lolós? Ksolok ba atan nebé nia na’in hetan halo nune’e uainhira nia to’o mai. Tebes, Ha’u dehan ba imi katak  nia sei fó knaar ba atan ne’e atu haré nia rikusoi tomak. Maibé atan ne’e dehan karik  ba nia an: ‘Ha’u nia na’i kleur atu to’o mai, hafoin hahu  baku atan mane no feto sira, hodi han no hemu to’o lanu, nia na’i sei to’o mai iha loron nebé nia la hein no iha oras nebé nia la hanoin, na’i sei fó todan ba nia, hodi tau nia hamutuk ho ema áat sira. Atan nebé hatene nia na’i nia hakarak, maibé la hadi’a an hodi halo tuir buat nebé nia husu, sei hetan kastigu barak. Maibé atan nebé la hatene, no halo buat nebé soi kastigu, sei hetan kastigu kmaan de’it. Ba ema nebé simu barak, sei husu mós barak; no ema nebé simu knaar boot, barak liu mak ema sei husu ba nia”.

Lia Maksoyn.

Terça-Feira, XXIX Tempo Comum (ANO A)

Primeira Leitura                          Ef. 2. 12-22

Lia housi São Paulo nia Surat ba sarani sira iha Éfeso:

Maun alin sira: Ne’e duni, imi la iha Cristo no la tama iha uma-kain Israel nian, nu’udar malae nebé la halo parte iha moruk Maromak nia promessa nian, la iha esperança no la iha Maromak iha mundo ne’e; maibé ohin iha Cristo, imi nebé uluk dook teb-tebes, Cristo nia ran lori imi besik mai. Nia mak ita nia dame; Nia halo povo rua ne’e sai ida de’it; Nia hatun tiha muru nebé haketak ita, hodi  sobu iha Nia an rasik laran hirus malu nian; Nia halo folin laek iha nia isin rasik ukunfuan nia haruka sira, atu  halo iha nia an ema foun ida de’it housi uma-kain rua ne’e, hodi nune’e harii dame iha sira leet. Ho nia cruz,  Nia halo uma-kain rua ne’e hadame malu iha isin ida de’it iha Maromak. Iha Nia an rasik, Nia oho tiha laran hirus malu nian. Nia mai atu lori liafuan di’ak dame nian; dame ba imi nebé hela dook no dame ba sira nebé hela besik. Housi Nia, ita rua hetan espírito ida de’it atu barani hakbesik ba Aman.

Ne’e duni, imi la’os tan malae eh ema la’o rai; imi rai na’in hanesan santo sira hotu, no imi emar iha Maromak nia uma laran . Imi halo parte uma boot ida: apóstolo no profeta sira mak uma ne’e nia hun, no Cristo Jesus mak nia fatuk inan. Fatuk ai ida-idak tuir Nia. Imi mós iha Nia sa’e ba daudaun ba uma ida nebé Maromak hôrik ba, iha nia Espírito.

Maromak Futar Lia.

 

Salmo  Responsorial                                                                                                         Sal. 84(85). 9ab-10, 11-12, 13-14 (R. cf. 9)

Refrão : Na’i, haklaken dame ba Nia povo!!! Repete-se

Ha’u rona bua Na’i dehan:

Maromak fó hatene dame ba Nia povo no Nia emar,

Nia maksoyn besik ba ema be hamta’uk Nia,

Nia glória hôrik iha ita rain. Refrão

 

Laran di’ak no domin sei hetan malu,

Dame no justiça sei hako’ak malu.

Neon lós sei tubun  housi rai,

Justiça sei tun mai housi lalehan. Refrão

 

Na’i sei haraik buat nebé di’ak,

Ita rain sei fó fuan.

Justiça sei la’o iha Nia oin,

Dame sama tuir Nia ain fatin. Refrão

 

 Aclamação                                                                                                                                                                                          Lc. 21. 36

Refrão : Aleluia, Aleluia!! Repete-se

Imi neon moris hodi hamulak nafatin atu imi bele hamriik

ho laran metin iha Mane Maksoyn Nia futar oin.  Refrão

 

Evangelho                                                                                                                                                                                     Lc. 12. 35-38

Na’i Jesus Cristo nia Evangelho nu’udar São Lucas haktuir:

Iha tempo nebá, Jesus lia tun ba escolante sira, dehan: “Kesi metin imi nia futukabun no halo imi nia ahi oan lakan nafatin. Halo imi an hanesan ema sira nebé hein sira nia na’in uainhira nia mai housi festa kaben nian, atu loke kedas odamatan iha oras nebé nia to’o mai hodi tuku odamatan. Ksolok ba atan sira nebé Na’i hetan hader hela uainhira Nia to’o. Tebes, Ha’u dehan ba imi katak, nia sei kesi hena  ba nia knotak, sei halo sira tur iha mesa, hafoin Nia sei liu housi sira leet hodi serbi sira. Nia to’o mai karik iha ronda rua ka tolu, hodi hetan sira nune’e, ksolok duni ba sira.

Lia Maksoyn.

Segunda-Feira, XXIX Tempo Comum (ANO A)

Primeira Leitura                            Ef. 2. 1-10

Lia housi São Paulo nia Surat ba sarani sira iha Éfeso:

Maun alin sira: Imi mate tiha ona tanba hahalok áat no sala, nebé imi halo uainhira imi moris hela tuir mundo ne’e, hodi halo tuir ida nebé ukun nia, espírito nebé book an iha ema ulun tós sira nia laran. Uluk, ita hotu tama mós iha sira leet, hodi moris nu’udar ema laran fo’er, nebé ita nia hakarak áat no ita rasik nia hanoin áat mak ukun; nnune’e, tan ita an rasik mak ita mós, hanesan mundo tomak, soi Maromak nia laran nakali. Maibé Maromak hadomi ita teb-tebes. Nia haua’in nia laran luak mai ita. Maske ita mate tanba ita nia sala, Nia halo ita moris hi’as ho Cristo; housi graça mak imi hetan maksoyn; hodi foti ita hamutuk ho Nia no fó fatin mai ita hamutuk ho Nia iha lalehan, iha Cristo Jesus.

Ne’e atu hatudu ba ema hotu iha otas nebé atu mai, housi nia laran di’ak mai ita iha Cristo Jesus, katak nia graça ua’in teb-tebes. Basá housi graça mak ita hetan maksoyn, housi fiar, la’os housi buat ruma nebé mai housi imi, maibé housi presente ida housi Maromak; la’os housi imi nia hahalok ruma, atu nune’e ema ida la bele gaba an. Ita mak Maromak nia hahalok kmanek, nebé Nia hakiak iha Cristo Jesus, atu ita bele moris nu’udar ema di’ak nu’udar Nia hakarak nanis houri uluk kedas.

Maromak Futar Lia.

 

Salmo  Responsorial                                                                                                                                Sal. 99(100), 2, 3, 4, 5 (R. 3b)

Refrão : Na’i, halo ita moris, Ita Ninian!!! Repete-se

Rai klaran tomak hahí Na’i!

Serbi Na’i ho ksolok;

La’o to’o Nia ho knananuk ksolok nian. Refrão

 

Imi hatene ba, Na’i mak Maromak!

Nia mak halo ita moris, ita Ninian.

Ita Ninia povo, bibi sira housi Nia bibi luhan. Refrão

 

Imi tama housi odamatan mai, fó graça,

Tama liu housi Nia uma klabis ho hino hahí nian,

Agradece ba Nia, hahí Nia naran. Refrão

 

Basá, Na’i di’ak!

Nia laran-luak rohan laek.

Ninia neon lós hada’et housi otas ba otas. Refrão

 

Aclamação                                                                                                                                                                                              Mt. 5. 3

Refrão : Aleluia, Aleluia!! Repete-se

Ksolok ba sira be kiak iha espírito basá reino

Lalehan sira nian.  Refrão

 

Evangelho                                                                                                                                                                                      Lc. 12. 13-21

Na’i Jesus Cristo nia Evangelho nu’udar São Lucas haktuir:

Iha tempo nebá, housi ema lubun boot, ema ida dehan ba Nia: “Mestre, hateten ba ha’u nia maun atu fahe ami nia liman rohan.” Nia hatan: “Belun, sé mak foti Ha’u atu tesi lia kona ba imi?” Hafoin Nia dehan ba sira: “Imi haré ba, keta kaan rikusoi, basá, la’os ema nia rikusoi mak halo ema moris liu.”

Tuir mai, Nia haktuir ba sira aiknanoik ida ne’e: “Ema riku ida hetan aihan barak housi nia to’os. Nia hanoin hodi dehan ba nia an: ‘Ha’u sei halo sá lós? Basá ha’u fatin la iha atu rai ha’u nia aihan sira.’ Hafoin nia dehan: ‘Ha’u sei halo nune’e: ha’u sei sobu ha’u nia aihan fatin hodi harii ida seluk boot liu fali ida ne’e; iha nebá ha’u sei rai trigo hotu ho ha’u nia rikusoi tomak. No ha’u sei dehan ba ha’u nia klamar: ‘Ha’u klamar, ó iha sasan barak nebé rai hela ba tinan ua’in; hakmatek ba, han hemu hodi haksolok ba.’ Maibé Maromak dehan ba nia: ‘Beikten! Iha kalan ne’e kedas Ha’u sei husu ó atu saran ó nia klamar; sasan sira nebé ó rai hela sei sai se nian?’ Nune’e mós sei mosu ba ema nebé rai hela rikusoi ba nia an, maibé la sai riku ba Maromak futar matan”.

Lia Maksoyn.

XXIX DOMINGO TEMPO COMUM (ANO A)

Primeira Leitura                       Is. 45, 1. 4-6

Lia housi Livro Profeta Isaías:

Na’i lia tun ba nia Ungido Ciro, nebé tahan ho liman kwanan, atu hanehan nasaun sira iha Nia oin; nebé hamonu kilat housi liurai sira knotak, atu loke odamatan iha nia oin, atu odamatan keta taka netik. Na’i ko’alia nune’e:  “Tan Ha’u atan Jacob no Israel, Ha’u doben, Ha’u bolu ó naran, Ha’u halo ó naran boot, maski ó la hatene Ha’u. Ha’u mak Na’i, la iha tan seluk; Ha’u mesak de’it Maromak. Maski ó la hatene Ha’u, Ha’u tau kilat ba ó liman, atu ema bele hatene, housi loron-sa’e to’o loron-monu, katak la ho Ha’u, buat ida la moris. Ha’u mak Na’i, la iha tan seluk.”

Maromak Futar Lia.

 

Salmo Responsorial                                                                                                                            Sal. 95(96), 1. 3. 4-5. 7-8. 9-10ac

Refrão : Haklaken Na’i nia beran no kbiit!!! Repete-se

Hananu ba Na’i knananuk foun,

rai klaran tomak hananu ba Na’i.

Haklaken Nia gloria ba reino tomak,

haklaken Nia kmanek ba povo hotu-hotu. Refrão

 

Na’i boot liu, di’ak liu atu hahi;

Nia beran boot liu lulik hotu.

Povo sira nia lulik la dun folin,

maibé, Na’i halo lalehan. Refrão

 

Povo sira haklaken hawelok Maromak,

haklaken Nia beran no kbiit.

Hahi hawelok Na’i nia naran,

mai, hana’i Maromak iha Nia kadunan. Refrão

 

Mai tuku-tur iha Na’i nia oin.

Rai hotu nakdoko iha Nia oin.

Fo tada ba ema tomak: Na’i mak Liurai!

Nia ukun povo hotu, ukun ho justiça. Refrão

 

Segunda Leitura                                                                                                                                                                          1 Tes. 1, 1-5b

Lia housi São Paulo nia surat ba sarani sira iha Tessalónica:

Paulo ho Silvano no Timóteo, haruka ba Igreja iha Tessalónica, nebé hari iha Aman no iha Na’i Jesus Cristo: Kmanek no paz hela ho imi, wainhira ami hanoin imi iha ami nia hamulak. Ami hanoin imi nia hahalok tuir fiar, imi nia kolen atu tuir hadomi malu, imi nia neon metin iha ita Na’in Jesus Cristo, iha Maromak, ita Aman nia oin. Ami hatene, maun-alin sira be Maromak hadomi, nebé Nia hili nanis. Evangelho nebé ami haklaken, la haklaken, ba imi hanesan lia-fuan de’it, maibé, ho kbiit wa’in, ho Espirito Santo nia tulun, ho laran hotu atu tuir.

Maromak Futar Lia.

 

Aclamação                                                                                                                                                                                          Mt. 22, 21

Refrão : Aleluia, Aleluia!! Repete-se

Fo ba Cécar buat nebé Cécar nian,

fo ba Maromak buat nebé Maromak nian. Refrão

 

Evangelho                                                                                                                                                                                     Mt. 22, 15-21

Na’i Jesus Cristo nia Evangelho nu’udar São Mateus haktuir:

Iha tempo nebá, ema fariseu sira husu ba malu, atu oin sá sira bele toman Jesus iha Nia hanourin. Sira haruka sira nia escolante rasik, nebé ba hamutuk ho Herodes nia maluk sira, dehan ba Jesus:  “Mestre, ami hatene katak Ita dehan de’it lialós, Ita hanourin lolós Maromak nia dalan, Ita laran la monu ba ema ida, tan Ita la hare ba ema nia hahalok di’ak. Ne’e duni, dehan to’ok Ita nia hanoin mai ami: Bele eh la bele selu imposto ba César?” Maibé, Jesus hatene sira nia hanoin aat, simu hasouru sira:  “Tansa imi hakarak koko Ha’u?  Hatudu osan imposto nian mai Ha’u.”  Sira lori osan ida ba. Jesus husu ba sira:  “Ílas ho hakerek ne’e sê nian?”  Sira hatan ba Nia:  “César nian.” Jesus simu fali:  “Fo ba César buat nebé César nian, fo ba Maromak buat nebé Maromak nian” .

Lia Maksoyn.

Sábado, XXVIII Semana Tempo Comum (ANO A)

Primeira Leitura                          Ef. 1. 15-23

Lia housi São Paulo nia Surat ba Sarani sira iha Éfeso:

Maun alin sira: uainhira ha’u rona kona ba imi nia fiar iha Na’i Jesus, no kona ba imi nia domin ba santo sira hotu, ha’u hanoin imi nafatin iha ha’u nia oração hodi fó agradece ba Maromak tanba imi. Maromak, ita Na’i Jesus Cristo nian, Aman glória nian, haraik ba imi espírito matenek no hatene buat hotu nebé Nia fó sai ona nian, atu imi bele hatene Nia lolós. Maromak leno imi laran nia matan atu imi bele haré esperança nebé Maromak bolu imi ba, no mós rikusoi glória nian nebé Nia hakotu ona u’udar liman roha ba santo sira, no biit ua’in nebé iha ita, fiar na’in sira. Biit ida ne’e halo Cristo moris hi’as hosu mate, no halo Nia tur iha Nia kuana iha lalehan, aas liu liurai sira hotu, na’i ulun sira, biit na’in sira, ukun na’in sira hotu no naran seluk tan, la’os de’it iha otas ne’e, maibé mós iha otas sira nebé atu mai. Maromak tau buat hot-hotu iha nia ain okos, hodi halo Nia sai Kreda nia ulun nu’udar buat hot-hotu nia ulun. Kreda ne’e mak Cristo nia isin lolon. Housi Kreda ne’e mak Cristo hetan nia kmanek tomak, no Cristo halo buat hot-hotu hetan ida-idak nia kmanek.

Maromak Futar Lia.

 

Salmo Responsorial                                                                                                                                Sal. 8. 2-3ab, 4-5, 6-7 (R. cf. 7)

Refrão : Ita haraik biit ba Ita Oan hodi ukun buat hotu be Ita hakiak!!! Repete-se

Na’i, kmanek tebes

Ita naran iha rai tomak!

Ita biit liurai iha leten áas ba.

Housi kosok oan no kiik oan sira ibun

Sai hahí be habeik Ita funu baluk sira. Refrão

 

Uainhira ha’u fihir lalehan be Ita liman halo,

Fulan no fitun be Ita hakiak;

Sá make ma atu Ita hanoin nia,

Ema nia oan, atu Ita tau matan ba? Refrão

 

Ita halo nia uitoan kiik liu fali anjo sira,

Ho glória no rahun di’ak Ita hafutar nia;

Ita fó biit ba nia atu ukun sasan hotu be Ita liman halo,

Ita tau buat hotu iha nia ain okos. Refrão

 

Aclamação                                                                                                                                                                               Jo. 15.  26b, 27a

Refrão : Aleluia, Aleluia!! Repete-se

Espírito lialós nian nebé mai housi Aman, Nia mak sei sasin ba Ha’u.

Na’i lia tun dehan; imi mós sei fó sasin. Refrão

 

Evangelho                                                                                                                                                                                        Lc. 12. 8-12

Na’in Jesus Cristo nia Evangelho nu’udar São Lucas haktuir:

Iha tempo nebá, Jesus lia tun ba Nia escolante sira: “Ha’u dehan lós ba imi katak ema nebé hatene Ha’u iha ema nia oin, Oan Mane mós sei hatene nia iha Maromak Nia anjo sira nia oin. Maibé ema nebé heli lia kona ba Ha’u iha ema nia oin, iha Maromak Nia anjo sira oin mós sei heli lia kona ba nia. Ema nebé ko’alia áat hasouru Oan Mane, sei hetan perdua; maibé ema nebé hateten áat Espírito Santo sei la hetan perdua. Uainhira sira lori imi ba sinagoga sira, ba juiz no ba na’i ulun sira, keta hanoin resin kona ba oin sá imi sei hatan eh ko’alia, basá iha orasw nebá Espírito Santo sei hanourin imi buat nebé imi sei dehan”.

Lia Maksoyn.

Sexta-Feira, XXVIII Semana Tempo Comum (ANO A)

Primeira Leitura                       Ef. 1. 11-14

Lia housi São Paulo nia Surat ba Sarani sira iha Éfeso:

Maun alin sira: Iha Cristo mak Maromak bolu mós ami nu’udar ema nebé Nia fihir tuir nia laran luak; Nia nebé hala’o buat hotu tuir Nia hakarak, atu ami bele hahí nia glória, ami nebé tau ona ami nia esperança iha Cristo. Iha Nia mós mak Maromak bolu imi uainhira imi rona liafuan lialos nian, katak Evangelho ita nia maksoin nian, hodi fiar Nia. Imi simu ona sinal Espírito Santo nian nebé Nia hakotu; Nia mak murak nebé hametin ona ita nia liman rohan atu ita bele manan ita nia maksoin, ba Nia glória.

Maromak Futar Lia.

 

Salmo Responsorial                                                                                                                    Sal. 32(33). 1 e 3, 4-5, 12-13 (R. 12b)

Refrão : Rahun di’ak ba povo nebé Na’i hili ba Nia lima rohan!!! Repete-se

Ema justo sira, haklaken Maromak,

Sira be fuan lós, sei hahí Nia.

Hananu ba Nia knananuk foun ida,

Hananu ho lian midar no ho fuan tomak. Refrão

 

Na’i Nia liafuan lós tebes,

Bele laran metin iha Nia liman nia hahalok sira,

Na’i hadomi justiça no dalan lós,

Rai nakonu ho Na’i Nia laran di’ak. Refrão

 

Rahun di’ak ba povo be hili Na’i ba nia Maromak,

Reino nebé Maromak hili ba Nia lima-rohan.

Housi áas lalehan Na’i hanoin ho neon,

Nia haré hela ema hot-hotu. Refrão

 

Aclamação                                                                                                                                                                                Sal. 32(33). 22

Refrão : Aleluia, Aleluia!! Repete-se

Haraik Ita kmanek mai ami;

Na’i, ami hein Ita tulun. Refrão

 

Evangelho                                                                                                                                                                                           Lc. 12. 1-7

Na’in Jesus Cristo nia Evangelho nu’udar São Lucas haktuir:

Iha tempo nebá, wainhira ema lubun boot teb-tebes halibur an hamutuk to’o sia hanehan malu, Jesus hahu ko’alia ba nia escolante sira dehan: “Imi matan moris ba kona ba fariseu nia fermento, katak sira nia laran makerek. Buat hotu nebé taka hela, sei nakloke; no buat hotu nebé subar hela, sei fó hatene sai. Tan ne’e, buat nebé imi dehan iha nakukun laran, ema sei rona iha loron nabilan; no buat hotu nebé imi hateten nei-neik ba ema nia tilun sub-subar, ema sei fó sai maka’as iha uma nia kakuluk.

Ha’u nia belun sira, Ha’u dehan ba imi: keta ta’uk sira nebé oho isin, hafoin la bele halo tan buat ida. Ha’u sei dehan ba imi se lós mak imi tenki ta’uk: imi sei ta’uk ida nebé, oho tiha isin, iha mós biit atu soe ema ba infernu. Tebes, Ha’u dehan ba imi, Nia mak imi tenki ta’uk. Ema la faan manulin lima ho osan rua? Maibé Maromak la haluha sira ne’e ida. Fu’uk lahan housi imi nia ulun sura tiha hotu; ne’e duni, keta ta’uk, basá imi folin liu manulin barak”.

Lia Maksoyn.