shadow
Diocese de Dili > NOTÍCIAS > LETURA DIÁRIA

Terça – Feira, XXIII Semana do Tempo Comum (Ano C)

Primeira Leitura                         Col. 2. 6-15

Lia housi livro São Paulo nia Surat ba sarani sira iha Colossos:

Maun alin sira: tanba imi simu ona Cristo Jesus nu’udar Na’i, haka’as an atu moris iha Nia. Halo imi nia abut naruk iha Nia; hari imi nia moris imi nia moris iha Nia, no sai maka’as liu tan iha imi nia fiar, nu’udar eam hanourin imi. Fó agradece nafatin ba.

Haré ba katak ema ida la halo imi sai atan hodi lohi imi ho liafuan nebé mai housi matenek ema nian, no housi neon sira nebé ukun mundo ne’e, la’os housi Cristo. Basá Maromak nia An tomak hela iha Cristo, nu’udar ema, no imi simu ona moris lolós tomak hamutuk ho Nia nebé liu kbiit na’in no ukun na’in sira hotu.

Iha Cristo mak imi simu circuncisão, la’os circuncisão nebé ema mak halo, maibé circuncisão nebé Cristo rasik mak halo, katak Cristo hasai imi housi ema maksalak nia ukun. Basá wainhira imi simu baptismo , imi hakoi tiha ona hamutuk ho Cristo, no iha baptismo mak imi moris hi’as tanba imi nia fiar iha Maromak nia kbiit nebé maka’as, nebé halo Nia moris hi’as housi mate. Uluk, imi mate iha imi nia klamar tanba imi nia sala, no tanba imi gentio nebé ukunfuan la iha. Maibé Maromak lori ona imi ba moris hamutuk ho Cristo. Maromak kasu tiha ita nia sala tomak. Nia kasu tiha naran fo’er ita nia lisan nian housi ukunfuan nebé kesi ita, hodi halakon nia tomak wainhira Nia hedi nia iha cruz. Iha cruz ne’e, Cristo hasai nia housi kbiit na’in no na’i ulun sira nia ukun; Nia hamoe sira hodi halo sira sai dadur na’in wainhira Nia manan sira.

Maromak Futar Lia.

 

Salmo Responsorial                                                                                                               Sal. 144(145). 1-2, 8-9, 10-11 (R. cf. 9ª)

Refrão : Na’i di’ak ba criatura tomak!!! Repete-se

Ha’u hahí Na’i, ha’u nia Maromak, ha’u nia Liurai,

Ha’u hahí nafatin Ita naran.

Kalan loron ha’u hana’i Ita,

Hahí nafatin Ita naran. Refrão

 

Na’i laran maus no laran di’ak,

La rai hirus, perdua nafatin.

Na’i hatudu laran di’ak ba ema tomak,

Hadomi nafatin Nia criatura tomak. Refrão

 

Na’i, criatura hotu hana’i Ita;

Ema sarani sira hahí Ita.

Sira haklaken Ita reino Nia glória,

Haklaken kmanek sira be Ita halo. Refrão

 

Aclamação                                                                                                                                                                                     cf. Jo. 15. 16

Refrão : Aleluia, Aleluia! Repete-se

Ha’u mak hili imi hodi haruka imi ba atu bele fó fuan no

imi nia fuan bele hela ba nafatin, Na’i dehan. Refrão

 

Evangelho                                                                                                                                                                                        Lc. 6. 12-19

Na’i Jesus Cristo nia Evangelho tuir São Lucas:

Iha loron hirak nebá, Jesus sae ba foho ida atu harohan; kalan tomak Nia harohan ba Maromak. Iha dader, Nia bolu ba nia An escolante sira, hodi fihir housi sira leet na’in sanulu resin rua nebé Nia hanaran ‘Apostolo’ Simão, nebé nia hanaran Pedro, ho nia alin Andrée; Tiago, João, Filipe ho Bartolomeu; Mateus, Tomé; Tiago, Alfeu nia oan; Simão nebé hanaran Zeloso; Judas, Tiago nia oan, no Judas Iscariotes nebé sei saran Nia.

Tun tiha hamutuk ho sira, Jesus tur iha rai tetuk ida. Iha nebá escolante barak ho tan ema lubun boot housi rai Judeia tomak, housi Jerusalém no housi tasi ibun Tiro no Sidónia nian, mai atu rona Nia no mós atu hetan isin di’ak housi sira nia moras no sira nebé espírito fo’er sira book, no sira hotu hetan di’ak. Sira hotu buka atu kona Nia, basá biit sai housi Nia hodi fó isin di’ak ba sira hotu.

Lia Maksoyn.

Segunda – Feira, XXIII Semana do Tempo Comum (Ano C)

Primeira Leitura                  Col. 1. 24-2. 3

Lia housi livro São Paulo nia Surat ba sarani sira iha Colossos:

Maun alin sira: Ohin ha’u haksolok wainhira ha’u terus tanba imi; ha’u halo lós iha ha’u nia isin lolon buat nebé sei kuran hela ba Cristo nia terus tan nia isin, katak Kreda. Basá ha’u serbi Kreda, basá Maromak saran tiha mai ha’u knaar ida atu hala’o Nia hakarak kona ba Kreda. Ha’u ko’alia kona ba plano nebé ema nia hanoin la bele to’o, nebé housi otas ba otas, rai subar hela, no nebé ohin Maromak fó sai tiha ona ba Nia Santo sira.

Maromak hakarak fó hatene ba sira ne’e Nia plano rikusoin no glória nian, nebé ema nia hanoin la bele to’o, nebé rai hela ba gentio sira: katak Cristo rasik nebé hela iha imi leet mak esperança Maromak Nia glória nian.

Ne’e mak buat nebé ami haklaken. Ami fó sai no hanourin ba ema hotu matenek lolós, hodi hakarak katak ema hotu bele sai ema lolós iha Cristo. Tan ne’e mak ha’u seivisu haka’as an ho Cristo nia kbiit nebé moris maka’as iha ha’u laran.

Husik ha’u dehan ba imi oinsá ha’u servisu maka’as ba imi no ba sira iha rai Laodiceia no ba sira seluk nebé la hatene ha’u. Ha’u halo ne’e atu sira bele hetan aten barani no bele halibur hamutuk iha domin; nune’e sira bele laran metin teb-tebes tan matenek no hatene lolós Maromak nia mistério, katak Cristo; iha Nia mak subar hela matenek nia rikusoin tomak.

Maromak Futar Lia.

 

Salmo Responsorial                                                                                                                                         Sal. 61(62). 6-7, 9 (R. 8ª)

Refrão : Maromak ha’u maksoyn no ha’u glória!!! Repete-se

Ha’u klamar hetan matenek iha Maromak,

Basá, ha’u laran metin ba Nia,

Nia ha’u heli an fatin no maksoyn;

Ha’u nia kota; ha’u sei la ta’uk buat ida. Refrão

 

Na’i Nia povo,

Iha tempo hotu, tau laran metin iha Nia,

Hasai imi fuan nia todan iha Nia futar oin,

Na’i mak ita nia subar fatin. Refrão

 

Aclamação                                                                                                                                                                                           Jo. 10. 27

Refrão : Aleluia, Aleluia!! Repete-se

Ha’u Nia bibi sira rona Ha’u lian, Na’i lia tun;

Ha’u hatene sira, sira mai tuir Ha’u. Refrão

 

Evangelho                                                                                                                                                                                          Lc. 6. 6-11

Na’i Jesus Cristo nia Evangelho nu’udar São Lucas haktuir:

Iha tempo nebá, iha loron sábado ida Jesus tama iha sinagoga hodi hanourin. Iha nebá iha ema ida ho liman lós mate. Escriba no fariseu sira hateke hela ba Nia atu haré Nia sei fó isin dia’k iha loron sábado ka lae, atu nune’e sira bele hetan lia ruma hasouru Nia. Maibé, tan hatene ona sira nia hanoin, Nia dehan ba ema liman lós mate ne’e: “Hamriik ba, mai iha klaran!” Nia mai hamriik duni. Tuir mai Jesus dehan ba sira: “Ha’u husu imi: iha loron sábado, bele halo halo di’ak eh halo áat, soi ema nia moris ka halo áat nia?” Hafoin, hateke hale’u ba sira hotu, Nia dehan ba ema ne’e: “Lolo ó nia liman ba!” Nia lolo duni, nia liman sai di’ak fali. Sira laran nakali, hodi ko’alia ba malu atu halo oin sá lós ho Jesus.

Lia Maksoyn.

XXIII Domingo Tempo Comum (ANO C)

Primeira Leitura        Sab. 9, 13-19 (13-18b)

Lia housi livro Sabedoria:

Ema sé mak bele hatene Maromak nia hanoin? Ema sé mak bele hanoin kona Na’i nia hakaran? Ita ema nia hanoin namlele; ita nia matenek ábut laek. Isin lolon dodok ida ne’e halo todan klamar; horik fatin rai ne’e nian hanesan klamar be hanoin buat oin-oin. Susar atu hatene buat hira-hirak iha rai leten; ho haka’as-an mak ita hetan buat nebe iha ita nia liman. Se mak bele hetan buat nebe iha lalehan? Na’i, ita boot la haraik karik neon naroman, ita la haraik karik ita Espiríto Santo, ema sé mak bele hatene ita nia hanoin? Nuné mak ita haloos ema horik rai sira dalan, hodi hanorin ema sira tuir ita hakarak.

Maromak Futar Lia.

 

Salmo Responsorial                                                            Sal. 89(90), 3-4. 5-6. 12-13.  14-17

Refrão : Na’i houri uluk kedas Ita boot ami mahan!!! Repete-se

Na’i, Ita Boot bele fila ema sira ba rai rahun,

Hodi dehan: “ Ema oan sira, imi fila”

Na’i, iha Ita Boot futar oin

Tinan rihun ida, nu’udar loron horik-seik be liu ona. Refrão

 

Na’i, Ita lori sira,

Sira la’o liu, lais hanesan  mehi rai-hun mutin;

Hanesan du’ut matak dader’

Namlaik loraik. Refrão

 

Na’i, hanorin ami sura ami loron,

Atu hetan fuan matenek.

Na’i, fila hi’as mai bainhira los?

Bainhira Ita sei hanoin ita atan sira? Refrão

 

Tulun ami lalais ho Ita laran luak,

Atu ami moris ho ksolok!

Hatudu ita boot laran di’ak

Atu ami kosar-wen hetan folin. Refrão

 

Segunda Leitura                                                                                                                                                                 Flm. 9b-10, 12-17

Lia husi São Paulo nia surat ba Filemon:

Doben: ha’u, Paulo, katuas ona, oras ne’e, dadur hela tan Cristo Jesus, ha’u husu ba ó  atu tulun Onésimo, ha’u nia oan nebé haki’ak iha terus laran. Ha’u haruka nia ba ó; nia nu’udar ha’u fuan rasik. Ha’u hakarak duni nia hela hamutuk ho ha’u, iha ó nia fatin atu tulun ha’u terus, tan Evangelho. Maibé, la hodi ó nia hakarak ha’u la bele halo buat ida: atu buat di’ak nebé ó halo, tan ó nain rasik hakarak halo ho laran di’ak ema ida la obriga.  Nia kala dook tiha oituan housi ó; maibé ó simu fali nia hela nafatin ho ó, la’os hanesan atan oan, maibé liu fali atan, nu’udar alin doben ida. Nia mai ha’u nune’e duni: oinsa tan fali ba ó la’os de’it tuir ema moris, iha mos Maromak futar oin. Ne’e duni, ó haré duni katak ita Na’in rua hamutuk tebes, ne’e sá, ó simu nia ba, nu’udar ó simu ha’u-an rasik.

Maromak Futar Lia.

 

Aclamaҫão                                                                                                                                                                                          1 Jo. 4, 12

Refrão : Aleluia, Aleluia!! Repete-se

Ita hadomi malu, Maromak horik ho ita,

Nia domin boot duni iha ita, Refrão

 

Evangelho                                                                                                                                                                                     Lc. 14, 25-34

Na’i Jesus Cristo nia Evangelho Nu’udar São Lucas haktuir:

Iha tempo nebá, ema lubun boot tuir Jesus. Nia fila ba sira, hodi dehan:“Ema sé  mai buka Ha’u, maibé la husik hadomi aman-inan, kaben, oan, alin maun no moris, la bele sai ha’u nia escolante. Ema sé la lori nia Cruz la’o tuir ha’u, la bele sai ha’u nia escolante. Imi nebe ida mak, atu halo uma aas ida, la tur uluk hodi hare osan iha eh lae atu halo to’o rohan? Keta halo be, foin hahu hari, kbiit la iha atu halo to’o rohan; hafoin; ema sira be hare, hahu hamoe nia, hodi dehan: ema ne’e hahu hari, maibé la bele halo to’o rohan! Liurai ida nebé mak ba funu hasoru liurai seluk, la tur uluk lai hodi hanoin, nia bele eh lae, ho de’it soldadu rihun sanulu funu hasuru ida nebé mai hasoru ho soldadu rihun rua-nulu? Haré ba la bele, ida seluk sei dook hela, haruka ona manu ain ba husu dame. Nune’e mos imi nebe la husik nia riku soi, la bele sai ha’u nia Escolante”.

Lia Maksoyn.

Sábado, XXII Semana do Tempo Comum (Ano C)

Primeira Leitura                     Col. 1. 21-23

Lia housi São Paulo nia Surat ba sarani sira iha Colossos:

Maun alin sira: Uluk imi rasik dook housi Maromak no moris hasouru Nia tanba imi nia hahalok áat sira, maibé ohin imi hadame malu ona ho Nia. Maromak hadame imi ho ho Nia An hodi saran Cristo nia isin lolon ba mate, atu imi bele sai ema sala laek, santo, no mos iha Nia futar oin, naran imi laran metin iha imi nia fiar, laran metin mos iha esperança iha Evangelho nebé imi rona ona, nebé haklaken ona ba sasan hotu iha Lalehan okos, nebé ha’u, Paulo, sai tiha Nia emar.

Maromak Futar Lia.

 

Salmo Responsorial                                                                                                                                   Sal. 53(54). 3-4, 6-8, (R. 6ª)

Refrão : Na’i mak ha’u nia tulun!!! Repete-se

Na’i, hodi Ita naran, soi ha’u,

Mai tulun ha’u ho Ita kbiit.

Maromak, rona ha’u nia harohan,

Simu lian ha’u harohan nian. Refrão

 

Na’i mak ha’u nia tulun,

Nia tahan ha’u moris.

Ha’u sei hasa’e sacrifício ho laran tomak,

Sei hananu Ita naran nia gloria. Refrão

 

Aclamação                                                                                                                                                                                             Jo. 14. 6

Refrão : Aleluia, Aleluia!! Repete-se

Ha’u ne’e dalan, lialos no moris hun, Na’i lia tun dehan;

ema ida la liu karik housi Ha’u, nia la bele ba Aman Maromak. Refrão

 

Evangelho                                                                                                                                                                                             Lc. 6. 1-5

Na’i Jesus Cristo nia Evangelho nu’udar São Lucas haktuir:

Iha tempo nebá, iha Sábado ida, wanhira Jesus la’o housi to’os batar nian, nia escolante sira hahu silu no dulas batar iha sira nia liman hodi han. Fariseu sira dehan: “Tansa imi halo buat nebé bandu iha loron sábado?” Jesus hatan ba sira: “Imi la lê buat nebé David halo uanhira nia ho nia maluk sira hamlaha, katak nia tama iha Maromak nia Uma, hola pão sacrifício nian hodi han no fahe ba sira, pão nebé na’ilulik sira de’it mak bele han?” Nia dehan tan ba sira: “Oan Mane mak sábado nia Na’i.”

Lia Maksoyn.

Sexta – Feira, XXII Semana do Tempo Comum (Ano C)

Primeira Leitura                     Col. 1. 15-20

Lia housi São Paulo nia Surat ba sarani sira iha Colossos:

Maun alin sira: Jesus Cristo mak ilas Maromak nian nebé matan la haré; Nia mak Oan boot liu sasan hot-hotu nian; basá iha Nia mak Maromak hakiak buat hot-hotu; buat nebé matan haré no buat nebé matan la haré: Liurai nia kadunan, ukun Na’in, Na’i ulun, kbiit, buat hotu ne’e mosu housi Nia no tanba Nia. Nia mak uluk liu sasan hot-hotu, no buat hotu bele hela de’it iha Nia. Nia mak ulun isin lolon tomak nian, katak Kreda. Nia mak hun, no Nia mak Ida nebé moris hi’as uluk housi mate, atu sai uluk liu iha buat hot-hotu.

Basá Maromak hakarak duni atu halo Nia nakonu lolos ho di’ak, no housi Nia, Maromak hakarak hadame buat hot-hotu ho Nia An; no housi Nia, anba ran nebé Nia fakar iha Cruz, Maromak hametin dame iha rai nu’udar iha Lalehan.

Maromak Futar Lia.

 

Salmo Responsorial                                                                                                                                Sal. 99(100). 2, 3, 4, 5, (R. 2c)

Refrão : Mai iha Na’i futar oin ho knananuk ksolok nian!!! Repete-se

Rai tomak hahí Na’i!

Serbi Na’I ho ksolok,

Mai iha Na’i ho knananuk ksolok nian. Refrão

 

Hatene ba katak Na’i mak Maromak!

Nia hakiak ita, ita Ninian,

Ita mak Nia povo,

Bibi sira housi Nia bibi luhan. Refrão

 

Tanba Na’i mak di’ak,

Nia laran luak rohan laek;

Nia neon los habelar housi otas ba otas. Refrão

 

Aclamação                                                                                                                                                                                             Jo. 8. 12

Refrão : Aleluia, Aleluia!! Repete-se

Nai dehan: Ha’u mundo nia roman; ema sé tuir Ha’u,

la la’o iha nakukun, maibé, sei  hetan roman moris nian. Refrão

 

Evangelho                                                                                                                                                                                       Lc. 5. 33-35

Na’i Jesus Cristo nia Evangelho nu’udar São Lucas haktuir:

Iha tempo nebá, escriba no fariseu sira hateten ba Jesus: “João nia escolante sira hadera an dala barak hodi hamulak. Fariseu  sira nia escolante sira halo mos nune’e. Maibé, O nian fali han hemu.” Jesus hatan ba sira: “Imi bele halo noivo nia bainaka sira hadera an uanhira noivo sei hela ho sira. Loron sei to’o mai, uanhira ema sei hasai noivu husi sira; foin mak sira sei hadera an iha loron hirak nebá.”

Nia haktuir tan aiknonoik  ida ne’e ba sira: “Ema ida la tesi hatais foun ida atu taka hatais tuan nia kuak; halo nune’e karik, ida foun sei les ida tuan, hena nebé hasai housi ida foun la los ho hatais tuan. Ema ida la rai hela tua foun iha tua fatin kulit tuan; nia halo nune’e karik, tua foun sei halo fera tua fatin kulit tuan hodi halo tua nakfakar de’it,  no tua fatin kulit sei sai áat. Maibé tua foun sei tau iha tua  fatin kulit foun, no sira rua sei la lakon. La iha ema ida nebé, hemu tiha tua tuan, hakarak hemu tan tua foun, basá nia dehan: ‘Tua tuan mak di’ak.’”

Lia Maksoyn.

Quinta – Feira, XXII Semana do Tempo Comum (Ano C)

Primeira Leitura                        Col. 1. 9b-14

Lia housi São Paulo nia Surat ba sarani sira iha Colossos:

Maun alin sira: Housi loron nebé ami simu liafuan kona ba imi, ami harohan nafatin ba Maromak tan imi, atu imi bele hatene lolos buat nebé Nia hakarak housi presente matenek nian hotu no housi neon hatene nian, atu imi nia moris iha Maromak futar oin monu lolos ba nia laran, hodi fo fuan iha hahalok di’ak hotu no sai boot ba iha matenek kona ba Maromak. Hetan kbiit ba ho Maromak nia kbiit tomak nebé Maromak haraik ba imi iha Nia gloria; metin to’o rohan iha ksolok. Fo agradece nafatin ba Aman nebé hadi’a ita atu simu ita nia parte iha liman rohan santo sira nian iha reino naroman.

Nia hasai ita housi nakukun nia kbiit no lori ita ba Nia Oan doben nia reino. Iha Nia mak ita hetan maksoyn no perdua ba ita nia sala.

Maromak Futar Lia.

 

Salmo Responsorial                                                                                                                   Sal. 97(98). 2-3ab, 3cd-4, 5, 6 (R. 2ª)

Refrão : Na’i hatudu Nia maksoyn!!! Repete-se

Na’i fo hatene Nia maksoyn;

Nia hatudu justiça ba nação sira hotu.

Nia hanoin Nia domin no laran los,

Ba Israel uman. Refrão

 

Rai-ikun rai-ulun sasin

Maksoyn ita Maromak Nian.

Rai tomak haklaken Na’i,

Haklalak ho ksolok no hananu. Refrão

 

Hananu ba Na’i ino hodi harpa lian,

No harpa no lira nia lian;

Ho corneta no trombenta nia lian,

Hahí hawélok Na’i, ita Liurai. Refrão

 

Aclamação                                                                                                                                                                                             Lc. 4. 19

Refrão : Aleluia, Aleluia!! Repete-se

Imi tuir Ha’u mai; Na’i lia tun,

Ha’u sei halo imi sai hakail na’in ema nian. Refrão

 

Evangelho                                                                                                                                                                                            Lc. 1. 1-11

Na’i Jesus Cristo nia Evangelho nu’udar São Lucas haktuir:

Iha tempo nebá, ema lubun boot ida hale’u Jesus atu rona Maromak Nia liafuan. Nia hamriik iha tasi Genesaré nia ibun. Nia haré ro rua kesi hela iha tasi ibun. Husik tiha ro, pescador sira fase hela dai. Sa’e tiha ba Simão nia ro, Jesus husu ba nia atu hadook ro uitoan housi tasi ibun. Hafoin, Nia tur tiha iha ro laran, hodi hanourin ema sira.

Ko’alia hotu tiha, Nia dehan ba Simão: “Tama liu ba tasi laran no soe dai ba!” Simão hatan, “Mestre, ami serbisu tiha kalan tomak, la káer buat ida. Maibé, tan Ita mak dehan, ha’u sei soe duni dai.” Wanhira sira halo nune’e, sira káer ikan barak teb-tebes, dai besik atu nakles. Sira leok liman hodi bolu maluk sira iha ro seluk atu mai tulun sira. Sira mai duni, hodi halo ro rua nakonu didi’ak besik atu mouut.

Haré tiha ne’e, Simão Pedro monu ain ba Jesus, hodi dehan: “Na’i hadook An housi ha’u, tan ha’u ema maksalak ida!” Tebes duni, nia ho nia maluk sira seluk hakfodak tanba ikan barak nebé sira káer. Simão nia maluk sira, katak João no Tiago, Zebedeu nia oan sira, mos hakfodak. Jesus dehan ba Simão: “Keta ta’uk; houri ohin ba oin o sei káer ema.” Dada tiha ro ba tasi ibun, sira husik buat hotu hodi la’o tuir Jesus.

Lia Maksoyn.

Quarta – Feira, XXII Semana do Tempo Comum (Ano C)

Primeira Leitura                             Col. 1. 1-8

Lia housi São Paulo nia Surat ba sarani sira iha Colossos:

Housi Paulo, Jesus Cristo nia apostolo tan Maromak nia hakarak, no housi ami nia alin Timoteo: ba Maromak nia povo iha Colossos, ami nia belun di’ak sira iha moris hamutuk ho Cristo: Maromak, ita Aman, haraik ba imi graça no dame.

Ami fo agradece nafatin ba Maromak, Na’i Jesus Cristo nia Aman, wainhira ami reza hodi hanoin imi, basá ami rona kona ba imi nia domin ba Maromak nia povo tomak. Wainhira lia menon lolos, katak Evangelho to’o ba imi ba dala uluk, imi rona kona ba esperança nebé Evangelho ne’e lori mai. Ne’e duni, imi nia fiar no domin nia hun hamriik iha buat sira nebé imi hein nebé rai hela didi’ak ba imi iha lalehan. Evangelho ne’e lori nafatin mai bensa sira, no belar daudaun iha mundo tomak, nu’udar nia belar tiha ona iha imi leet wainhira, ba dala uluk, imi rona kona ba Maromak nia graça hodi hatene nia lolos nu’udar Nia duni.

Epafras, ha’u nia maluk doben iha servisu ba Cristo, no Cristo nia emar ida iha ha’u nia fatin, nebé hanoin imi, halo ha’u hanoin fali imi nia domin mai ha’u iha espírito.

Maromak Futar Lia.

 

Salmo Responsorial                                                                                                                        Sal. 51(52). 10, 11ab, 11cd, (R. 10b)

Refrão : Ha’u fiar metin ba nafatin iha Maromak Nia laran-luak!!! Repete-se

Ha’u hanesan ai oliveira ida matak

Iha ha’u Na’i Nia uma;

Laran metin ba nafatin iha

Na’i Nia laran luak. Refrão

 

Ha’u sei hahí Ita ba nafatin,

Tan buat nebé Ita halo mai ha’u. Refrão

 

Iha Ita emar sira oin,

Ha’u sei haklaken,

Ita naran be di’ak tebes. Refrão

 

Aclamação                                                                                                                                                                                             Lc. 4. 18

Refrão : Aleluia, Aleluia!! Repete-se

Na’i Nia Espírito hôrik iha Ha’u. Nia haruka Ha’u haklaken

Lia-foun ba kiak sira no fo liberdade ba dadur sira. Refrão

 

Evangelho                                                                                                                                                                                       Lc. 4. 38-44

Na’i Jesus Cristo nia Evangelho nu’udar São Lucas haktuir:

Iha tempo nebá, husik tiha sinagoga, Jesus ba Simão nia uma. Simão nia banin feto moras boot, isin manas. Sira husu Jesus atu tulun nia. Hakru’uk tiha ba nia, Jesus duni sai isin manas, nebé sai kedas housi nia. Hafoin nia hamriik hodi serbi sira.

Wainhira loron atu monu ona, sira hotu nebé iha ema ho moras oi-oin lori sira ba Jesus. Nia tula liman ba sira ida-idak, hodi fo isin di’ak ba sira. Diabu sira sai housi ema barak, hodi hakilar dehan: ”O Maromak nia Oan Mane!”  Maibé Nia haruka hodi la husik sira ko’alia, basá sira hatene katak Nia mak Cristo. Iha dadersan, Nia sai hodi la’o ba fatin fuik ida. Ema lubun boot buka Nia. Hetan tiha Nia, sira hakarak katak Nia la bele husik sira. Maibé Nia dehan ba sira: “Ha’u sei haklaken mos liafoun di’ak  Maromak nia reino nian ba rai selu-seluk; tan ne’e mak Ha’u mai.” Ne’e duni, Nia la’o ba oin hodi hanourin iha sinagoga sira rai Judeia nian.

Lia Maksoyn.

Terça – Feira, XXII Semana do Tempo Comum (Ano C)

Primeira Leitura              1Tes. 5, 1-6, 9-11

Lia housi livro São Paulo nia primeira Surat ba sarani sira iha Tessalonica:

Maun alin sira: Imi la hein atu ami hakerek ba imi kona ba “tempo no loron”, basá imi hatene lolos katak Na’i nia loron sei mosu mai hanesan na’okten iha kalan. Wainhira ema dehan “Loron sira ne’e hakmatek no iha dame” mak teki-tekir buat áat sira mosu, hanesan feto nebé atu tur ahi; no ema ida la bele halai housi nia.

Maibé imi la moris iha nakukun laran, maun-alin sira, atu loron ne’e toman imi hanesan na’okten ida. Lae, imi hotu naroman nia oan no loron nia oan; ita la’os kalan nian ka nakukun nian, tan ne’e, ita la bele toba dukur nu’udar ema seluk, maibé matan moris no oin moris.

Maromak lakohi katak ita simu castigo, maibé atu ita manan maksoyn housi ita Na’i Jesus Cristo, nebé mate tanba ita atu, ita moris ka mate, ita bele moris hamutuk ho Nia. Ne’e duni, fo aten barani ba malu, hametin malu nu’udar imi halo daudaun ona.

Maromak Futar Lia.

 

Salmo Responsorial                                                                                                                           Sal. 26(27). 1, 4, 13-14 (R. cf. 13)

Refrão : Ha’u hein atu haré Na’i Nia laran di’ak iha ema moris sira rain!!! Repete-se

Na’i, ha’u nia roman, ha’u nia maksoyn;

Ha’u ta’uk fali sé?

Na’i tahan ha’u moris;

Sé bele halo ha’u nakdedar? Refrão

 

Buat ida de’it ha’u buka, ha’u husu ba Na’i:

Iha ha’u nia moris tomak, hôrik iha Nia kadunan,

Hodi haksolok ho Na’i Nia tulun,

No fihir Nia templo. Refrão

 

Ha’u hein atu haré Na’i Nia laran di’ak

Iha ema moris sira rain.

Aten barani! Tau laran metin ba Na’i!

Laran metin! Hein iha Maromak. Refrão

 

Aclamação                                                                                                                                                                                             Lc. 7. 16

Refrão : Aleluia, Aleluia!! Repete-se

Profeta boot ida mosu tiha iha ita leet;

Maromak mai haré tiha nia povo. Refrão

 

Evangelho                                                                                                                                                                                        Lc. 4. 31-37

Na’i Jesus Cristo nia Evangelho nu’udar São Lucas haktuir:

Iha tempo nebá, Jesus tun ba Cafernaum, cidade ida Galileia nian. Nia hanourin sira iha loron sábado. Ema sira hakfodak ho nia doutrina, basá Nia ko’alia ho kbiit.

Iha sinagoga laran, ema ida ho espírito fo’er hakilar ho lia maka’as dehan: “Iha sáida iha ami no O, Jesus Nazaré? O mai atu halo áat ami? Ha’u hatene O se los: Maromak nia santo!” Nia si’ak ema ne’e dehan: “Nonok no sai tiha housi nia!” Soe tiha ema ne’e ba rai iha sira hotu nia oin, diabo sai housi nia, la halo áat ida ba nia. Sira hotu hakfodak no ta’uk, hodi hateten ba malu: “Liafuan ne’e sá los? Ho kkbiit no ukun, Nia haruka espírito fo’er sira sai, no sira sai duni!” Jesus nia naran boot habelar iha fatin hot-hotu iha rai nebá.

Lia Maksoyn.

Segunda – Feira, XXII Semana do Tempo Comum (Ano C)

Primeira Leitura                  1Tes. 4, 13-18

Lia housi livro São Paulo nia primeira Surat ba sarani sira iha Tessalonica:

Maun alin sira: Ami lakohi katak imi beik kona ba sira nebé mate ona, atu imi la bele laran susar hanesan ema seluk nebé esperança la iha. Ita fiar katak Jesus mate no moris hi’as, ne’e duni ita fiar mos katak, housi Jesus, Maromak sei lori hamutuk ho Nia sira nebé mate ona hodi fiar Nia.

Ohin ami hanourin imi housi Na’i nia liafuan katak ita sira nebé sei moris, nebé sei hela wainhira Na’i hi’it An mai, sei la la’o uluk liu sira nebé mate ona. Na’i rasik sei tun mai housi lalehan ho lia maka’as, no Arcanjo ida sei hakilar, Maromak nia trombeta sei lian, no sira nebé mate iha Cristo sei moris hi’as uluk. Tuir mai, ita nebé sei moris sei la’o hamutuk ho sira iha kalohan atu ba hasouru Na’i iha leten. Ne’e duni, ita sei hela nafatin ho Na’i. Tan ne’e, fo aten barani ba malu ho liafuan hirak ne’e.

Maromak Futar Lia.

 

Salmo Responsorial                                                                                                               Sal. 95(96). 1e 3, 4-5. 11-12, 13 (R. 13b)

Refrão : Na’i mai tesi lia ba mundo!!! Repete-se

Hananu ba Na’i Knananuk foun ida,

Hananu ba Na’i, rai-klaran tomak.

Haklaken Nia gloria ba reino tomak.

No ba povo hot-hotu, Nia kmanek. Refrão

 

Tanba Na’i mak boot liu tomak no so’i ema hahí,

Ema hamta’uk Nia liu fali maromak falso sira.

Maromak falso sira la liu ilas folin laek.

Na’i mak halo Lalehan. Refrão

 

Lalehan haksolok ba, rai hananu ho ksolok ba,

Tasi no buat hotu iha tasi laran,

Rai luan ho buat moris tomak iha nia, haksolok,

Bidu ho ksolok ai sira iha ailaran. Refrão

 

Iha Na’i be sei hi’it an mai Nia futar oin.

Nia mai atu tesi lia ba rai,

Nia sei tesi lia ba mundo ho justiça,

No Ninia povo ho fidelidade. Refrão

 

Aclamação                                                                                                                                                                                       cf. Lc. 4. 18

Refrão : Aleluia, Aleluia!! Repete-se

Na’i Nia Espírito hôrik iha Ha’u.

Nia haruka Ha’u haklaken Lia-foun ba kiak sira. Refrão

 

Evangelho                                                                                                                                                                                       Lc. 4. 16-30

Na’i Jesus Cristo nia Evangelho nu’udar São Lucas haktuir:

Iha tempo nebá, Jesus mai iha Nazaré, iha nebá Nia sai boot. Tuir Nia lisan, Nia tama iha sinagoga iha loron sábado. Nia hamriik atu lê. Sira fo ba Nia livro profeta Isaías nian. Loke tiha livro ne’e, Nia hetan fatin ida nebé hakerek nune’e:

“Na’i nia Espírito iha Ha’u, basá Nia foti tiha Ha’u atu haklaken liafoun di’ak ba kiak sira; Nia haruka Ha’u atu haklaken maksoyn ba dadur sira no halo matan delek sia haré; atu soi sira nebé ema hanehan, hodi haklaken Na’i nia tinan rahun kmanek nian.”

Hafoin, taka tiha livro, Jesus fo fali nia ba knaar na’in. Nia tur tiha. Ema hot-hotu iha sinagoga laran hateke ba Nia. Tuir mai, Nia hahu ko’alia ba sira dehan: “Ohin halo tuir los duni liafuan Escritura nian nebé imi foin rona.” Sira hotu ko’alia di’ak kona ba Nia; hodi hakfodak, tan liafuan kmook nebé sai housi nia ibun. Sira dehan: “Ida ne’e la’os Jose nia oan?” Nia hatan ba sira: “Tebes duni, imi sei hateten mai Ha’u aiknanoik ida ne’e: ‘Doutor, fo isin di’ak ba o nia isin rasik ba. Buat hotu nebé ami rona O halo iha Kafarnaum, halo mos iha ne’e,  iha O nia rai.’” Nia dehan teni ba sira: “Tebes, Ha’u dehan ba imi katak ema la simu profeta iha nia rai rasik. Ha’u dehan lolos ba imi: iha Elias nia loron, iha feto faluk barak iha Israel, uanhira lalehan taka metin ba tinan tolu no fulan neen nia laran; rai tomak hamlaha boot; maibé Maromak la haruka Elias ba feto faluk sira ne’e ida. Nia haruka de’it ba feto faluk iha Sarepta, iha rai Sidonia. Iha Eliseu nia loron mos, iha ema moras lepra barak iha Israel, maibé sira ida de’it mak hetan isin di’ak, katak Naaman housi rai Siria.” Rona tiha liafuan hirak ne’e, ema hotu iha sinagoga laran, laran nakali teb-tebes. Sira hamriik hodi duni sai Nia housi cidade; hodi lori Nia to’o rai tatinis iha foho leten, iha nebá sira nia cidade hamriik hela, atu soe tun Nia housi nebá. Maibé Jesus liu housi sira leet, la’o  tuir nia dalan.

Lia Maksoyn.

XXII Domingo Tempo Comum (ANO C)

Primeira Leitura                   Sir (Ecle) 3, 19-21. 30-31. (17-18. 20. 28-29

Lia housi Livro Ben-Sirá:

Hau oan, kaer o knaar ho laran kman; nunee deit mak ema sei hadomi o, liu ema laran ida. Wainhira o naran boot liu, o sei haraik-an liu; nunee deit mak Nai Maromak sei hadomi o. Basá, Nai Maromak kbiit boot duni, ema kiik sira mak hahí Nia naran. Rahun aat ba ema nebé loko-an, ba sira la iha ai-moruk, basá, aat nia abut metin ona iha sira laran. Ema matenek hanoin ai-knanoik sira iha nia laran. Ema matenek sira hakarak atu ema ruma rona sira.

Maromak Futar Lia

                                                

Salmo Responsorial                                                                                                                                Sal. 67(68), 4-5ac. 6-7ab. 10-11

Refrão : Na’i, hodi Ita laran di’ak, Ita hadi’a fatin ida ba ema ki’ak!!! Repete-se

Ema ki’ak haksolok iha Maromak futar oin,

Hawhelok hananu ho ksolok.

Hananu ba Na’i, hananu ba nia naran,

Nia naran Maromak. Refrão

 

Ema ki’ak oan sira aman, feto faluk sira kbiit,

Maromak moris iha fatin santo.

Hadi’a fatin ida ba ki’ak,

Fo liberdde ba ema laran susar. Refrão

 

Maromak, ita haraik udan ho l;aran luak,

Haraik rai bokur ba ita rain.

Ita familia hetan kbiit,

Maromak laran luak tahan ema ki’ak. Refrão

 

Segunda Leitura                                                                                                                                                             Heb . 12. 18-19. 22-24ª

Lia housi Surat ba Herbeu sira:

Maun alin sira : imi la besik ba buat ida ema bele kaer, hanesan israelista sira iha foho Sinai: sira besik ba ahi lakan, ba kalohan nakukun, sira besik ba nakukun  boot, ba anin aat ida. Imi la rona korneta ida nia lian, imi la rona lian ida maka’as, to’o halo imi lakoi rona tan. Imi hakbesik ba foho santo sião, ba Maromak moris nia ciadade. Imi hakbesik ba jerusalem lalehan. Imi hakbesik ba anjo rihun ba ruhun  nebé halibur ba festa. Imi hakbesik ona ba oan mane boot sira nebé halibur hamutuk hela: sira naran hakerek  ona iha lalehan. Imi hakbesik ba mundo nia juiz, Na’i Maromak rasik. Imi hakbesik ba ema di ‘ak sira ne’e,  hetan ona kmanek nia rohan. Imi hakbesik ba Jesus, moruk foun nia karan.

Maromak Futar Lia.     

 

Alcamacão

Refrão : Aleluia, Aleluia!! Repete-se

Na’i ko’alia: Ema nebé foti –an, sei hetan susar,

Ema nebé haraik an, sei hetan di’ak.  Refrão

 

Evangelho                                                                                                                                                                                    Lc. 14 , 1.7-14

Na’i Jesus Cristo nia Evangelho Nuudar São Lucas haktuir:     

 Iha tempo nebá, iha loron sabado ida, Jesus tama ba fariseu boot ida nia uman, hola buat ruma atu han, iha nebá, fariseu fihir hela Nia. Hare tiha katak ema convidado sira buka de’it di’ak, Jesus dehan ai-knanoik ida ne’e: “ema ruma convida karik o, ba festa casamento ida, keta ba tur iha mesa ulun, uma Na’in keta convida karik ema seluk boot liu o, nune’e, maski nia convida o ho ida seluk ne’e, nia bele dehan ba o: fo fatin ba convidado ida ne’e’ nune’e, o sei moe boot hodi hamriik ba tur fali iha fatin ikus liu. Maibe, ema convida karik o, ba tur fatin ikus liu nian, nune’e, ema uma Na’in be convida o, sei hateten ba o: belun, tur liu mai leten’ nune’e, o sei haksolok boot iha convidado sira seluk oin.  Basa, ema hotu nebé foti-an, Na’i Maromak sei hatun nia, ema nebé haraik an, Na’i Maromak sei foti nia”. Jesus lia tun ba ema nebé convida nia: “wainhira o hakarak fo han ema ruma, keta bolu ba o nia belu sira ho o nia maun alin sira, keta convida o nia maluk riku sira, sira ne’e bele convida fali o. Nune’e, sira selu fali o. Maibe; wainhira o hakarak fo han ema ruma, convida ema ki’ak sira, ema ain aat sira, ema matan delek sira, nune’e o sei haksolok boot, basa, sira ne’e la bele selu fali o; nune’e de’it, Na’i Maromak sei sei selu fali o, iha loron nebé ema di’ak sira sei moris hias.

Lia Maksoyn.