shadow
Diocese de Dili > NOTÍCIAS > Notícias

TUTULURO CELEBRA TINAN 100 EXISTÊNCIA FIAR SARANI NIAN

DCDD- Iha Quarta, loron 14 fulan Agosto tinan 2019, Estação Missionária Nossa Senhora do Rosário de Fátima Tutuluro celebra tinan 100 existência fiar sarani nian. Dom. Virgílio do Carmo da Silva,SDB hateten, “Ohin ita halibur hamutuk iha ne’e ho sentimento ida atu fó obrigado ba Maromak, agradece ba Maromak tanba tinan 100 fiar sarani kuda iha rai Tutuluro. Certamente ita mai ho sentimento ida atu hare fila fali ba kotuk diak hotu ne’ebe ita hetan liu housi ita nia Missionário sira ne’ebe durante tinan 100 nia laran tau fini no fini ne’e la mate continua hatutan, cuida to’o fiar sarani ohin loron buras nafatin particularmente iha rai Tutuluro ninian. Hare fila fali ba kotuk, buat ne’ebe liu ona bele sai hanesan lição ida atu ita bele aprende hodi bele hadiak liu tan, hametin liu tan, haklean no haforça liu tan ita nia fiar sarani iha rai ida ne’e liu-liu iha rai Tutuluro ne’ebe ohin celebra tinan 100 existência fiar sarani ninian. Hare ba kotuk ita mos hanoin atu mehi ba oin, oinsa mak ita bele halo atu nune’e bele hadia liu tan ita nia rai no Uma Creda.”

Liu tan ne’e, Prelado ne’e hateten; “Missão Antigo hanesan Alas mai to’o iha Tutuluro ne’e desde uluk quando kalan ita lao ba iha família sira ita hare sira reza terço. Apa-ama no avo sira halibur oan sira reza terço. Maibe agora ne’e tanba iha ona buat barak, ohin loron ema troca terço ho; foinsae no katuas ferik sira troca terço ho facebook no Whatsapp. Tanba ne’e uluk terço maibe agora troca ho GMN, ita troca ho TVTL no buat seluk tan. Uluk iha loron ida nia laran ita fácil atu fo netik 10-15 minutos atu reza terço, família halibur hamutuk atu bele reza terço, maibe agora tempo ba terço nian laiha ona tanba hanoin fali katak terço ne’e halo ema matan dukur. Tanba ne’e sarani barak fó prioridade liu tiha ba nonton TV, conta história, hemu tua, Joga carta, kuru-kuru no buat seluk. Maibe quando ita ida-idak hare ba ita nia an wainira ita hasai terço housi ita nia família ita hare katak família mos crise ba daudaun, valor família hahu mihis ba daudaun. Ita hasai Maromak housi ita nia família ita hahu hakiak diabo iha ita nia família laran. Dala barak ita rona fidelidade kabenain nian ita hare começa mihis ba daudaun, respeita ba malu entre inan-aman ho oan sira começa mihis ba dau-daun tanba ita tau ses Maromak housi ita nia família. Uluk domingo ema ba missa, maibe agora ema dehan domingo ne’e tempo laiha ba missa diak liu ba fila liman. ita dala barak ita preucupa liu ba buat ne’ebe isin ninian, preucupa liu ba buat ne’ebe rai ne’e ninian, maibe haluha tiha katak ita nia moris ne’e temporário. Tan ne’e, Espírito Santo ne’ebe ohin ita husu iha missa ida ne’e sai momento ida atu renova ita. Renovação ne’e tem que hahu housi ita ida-idak hodi husu ba Na’i Maromak atu ita moris hanesan ema matenek, hodi hatene katak Maromak mak Na’i ba buat hotu-hotu. Ita nia moris ne’e temporário. hun ba buat hotu mak Maromak. tan ne’e ita precisa comfia iha Maromak. renovação ne’e mos tem que hahu housi ita nia família laran tanba família mak Uma Creda Domêstica. Tanba ne’e família forte Uma Creda no nação forte basá; iha família laran mak ema hadomi malu, respeita malu. Tan ne’e iha loron ida ne’e ita celebra tinan 100 ba sarani iha Tutuluro ha’u hakarak husik hela mensagem rua ne’e; primeiro nudar convite ida atu bele halo renovação. Ita hare ba kotuk ita nia beiala sira husik hela rikusoyn (tesouro) lubuk ida ona. Tanba ne’e ita hirak ne’ebe iha ne’e tem que hanoin ba oin hodi housi tutan ba geração sira ne’ebe tuir mai. Compara ita nia an hanesan ponte. Ita hakarak atu Manufahi ne’e sai makas no forte liu tan depende ba ita sira agora ne’e. Se ita agora mak lakohi fila fali hodi hanoin ita nia hun no abut mak ne’ebe, ita koko atu simu buat hotu housi liur halo ita nia cultura ne’e sai mistisso hotu ikus mai ita nia identidade sei lakon. Segundo nian ita husu Maromak nia graça tanba ita halo buat ne’ebe ita bele. Maibe ida ne’ebe bele garante continuidade ne’e mak Na’i Maromak. maibe precisa de’it buat ida housi ita ‘vontade’; aprende atu terus, aprende atu halo sacrifício, aprende atu lori ita nia cruz iha moris lor-loron nian.” (Cheko)

Irmã FMA nain 3 Simu Profissão Perpétua

 DCDD Iha Segunda loron 12 Fulan Agosto 2019, Família boot Congregação Filhas de Maria Auxiliadora FMA iha Timor-Leste, haksolok hamutuk ho Irmã Aida Belita Moises FMA, Irmã Domingas Santos de Deus FMA no Irmã Ermelinda Almeida FMA ne’ebe hakat tan passo ida ba Profissão Perpétua iha Igreja Paroquial Paróquia Maria Auxiliadora Comoro Dili. Dom. Virgílio do Carmo da Silva bispo de Dili be preside celebração ne’e iha ninia reflexão sira hateten; “Ohin tempo ida ne’ebe especial ba sira atu saran sira nia an. Livremente sira rasik hakarak tama klean no descobre liu tan hanesan iha sira nia motto dehan; “Maromak de’it Ha’u nia maksoyn”, Atu nune’e tama liu tan ba sira nia proximidade, intimidade, comunhão ida ho ida ne’ebe bolu. Ida ne’e mak ohin ita sasin iha Irmã nain 3; Ir. Aida Belita Moises, Ir. Domingas Santos de Deus no Ermelinda Almeida sira nia testamunho ne’ebe sira halo iha ita hotu nia oin. Maske ohin loron ho mundo ne’ebe ita moris, buat ne’ebe haleu ita dalabarak hare liu ba buat ne’ebe bele kaer, bele koko, hare liu ba forma família, hare liu ba serviço ne’ebe diak, hare liu ba osan, hare liu ba lia mate no lia moris ninian, maske buat hotu ne’e liu, Irmã nain 3 ohin hakarak atu dehan mai ita laos de’it poder, laos de’it osan, laos de’it forma família, maibe iha mos buat ne’ebe as liu iha moris mak CRISTO. Ida ne’e mak sira descobre iha sira nia vida ohin marca ho Profissão Religiosa sai hanesan sinal de encontro domin ninian entre ida ne’ebe bolu no ida ne’ebe hatan.

Liu tan ne’e Dom Virgílio hateten; “Hanesan Profissão Religiosa sai sinal ida ita bele dehan katak Tangível e sinal ida mos Credível kona ba Maromak nia domin iha ita nia vida. Tangível katak ema hotu hare, maibe lato’o de’it iha sinal tangível ninian, sinal ne’ebe visível, maibe ohin loron mundo precisa sinal credível. Amo Papa quando ko’alia ba religioso no religiosa sira nia repete nafatin liafuan ida ne’e atu oinsa religiosa sira buka no sai sinal credível liu housi ita nia moris iha comunidade, iha sociedade, ita nia vida bele transmite, ita nia vida bele fo ba comunidade mensagem ida ne’e; mensagem domin ninian.

Remata tiha missa Profissão Perpétua nian, iha entrevista Madre Aida Belita Moises FMA ho sentimento contente hateten, “Nu’udar religiosa ida ha’u sente haksolok ou contente liu tanba dala ida tan mak Maromak bolu ha’u no ha’u kesi hau nia an nafatin ba Maromak. Então buat ne’ebe ba oin nu’udar religiosa ida ne’ebe hau sei halo mak ida ne’e, ha’u sei saran an tomak hodi serbi liu-liu tuir ami nia carisma Dom. Bosco no Madre Mazerelo nian katak, atu serbi foinsa’e sira, tau matan ba foin sa’e feto no mane liu-liu sira ne’ebe kiak no kiik liu. (Alin/cko)

DIOCESE DILI HALAO ABERTURA JUBILEU EXTRAORDINÁRIO DA MISSÃO

DCDD, Domingo loron 11 fulan Agosto tinan 2019, Mahein Diocese Dili nia Dom. Virgílio do Carmo da Silva hamutuk ho ho Nailulik sira liburan hamutuk iha SE Catedral Dili hodi halao missa abertura ba evento Jubileu Extraordinário da missão nian ao mesmo tempo visita Papa João Paulo II nian iha Timor. Diocese rua seluk hanesan Baucau hahu tiha ona abertura iha loron loron 4 fulan Agosto 2019 iha Paróquia Sagrado Coração de Jesus Villa Nova no Diocese Maliana ne’ebe fahe ba parte rua hanesan parte Tasi Mane nian hahu ona iha loron 4 fulan Agosto 2019 iha Igreja Suai no parte Tasi Feto nian hahu hanesan mos ho diocese Dili nian nebe halao mos iha loron 11 fulan Agosto 2019.

Dom. Virgílio do Carmo da Silva ne’ebe preside celebração abertura Jubileu Extraordinário da missão nian iha SE Catedral ne’e iha ninia homilia hateten; “Ohin Diocese Dili fihir loron ida ne’e atu loke Jubileu Extraordinário Missão ninian. Hanesan ohin ita rona tiha ona Nota Pastoral Conferência Episcopal Timorense ninian, dala ida tan Santo Padre convida sarani atu aproveita momento especial ida ne’e atu mana graça especial ne’e liu housi Indulgência Plenária iha ne’ebe Diocese Dili foti ona fatin 3 hanesan; Catedral, Santuário Fatubessi no Santuário Ramelau hodi manan Indulgência plenária. Ne’e duni, momento diak ida mos convida sarani hotu-hotu hakasan atu descobre fila fali beleza kna’ar missionário ninian ne’ebe sarani ida-idak simu ona iha loron Baptismo ninian. No se ita nia moris la consegue consiente ho moris missionário ida ne’e, momento ida ne’e convida ita atu cuida vocação missionário ida ne’e.

Prelado ne’e reforça tan; “Santa Creda iha opurtunidade Jubileu Missionário nian ne’e convida ita ida-idak atu hola conciência, fo mos inportância ba vocação Missionária sarani ida-idak ninian. Ida ne’e laos opção maibe vocação ida ita sarani nian duni. Hanesan liafuan furak Santa Teresa nian dehan; “Maromak la exige ita atu sucesso kedas, maibe Nia hakarak ita atu koko, Nia hakarak ita atu hakasan nafatin nunca para”. Ita dalaruma sura tan ita la persevera iha buat ida ita desanima.  Maibe Santa boot ida ne’e dehan laos ó konta mak ó nia sucesso, maibe konta mak wainhira ó hakasan nafatin. Mai ita aproveita basá buat ne’ebe horseik ne’e liu tiha ona, buat ne’ebe aban ninian mos sidauk to’o. Ita iha de’it buat ne’ebe ohin ninian. Ne’e duni mai ita missão sarani ida nian mak ohin ita rona Baptizados e Enviados, katak sarani ida simu kna’ar atu ba no haklaken kona ba Jesus ne’ebe terus, mate no Moris Hias. Ida ne’e mak sasin fiar sarani ninian”.

Atu taka Dom. Virgílio do Carmo da Silva haktuir fali katak; “Catedral horseik (10/8/2019) ita boot sira simu iha ne’e São João Paulo II nia Ilas. Ita tama mai iha Uma Creda oin ne’e ita hare katak iha Placa wainhira Inaugura Uma Creda ida ne’e Papa João Paulo II rasik mak inaugura no nia sama iha fatin ida ne’e. ne’e duni ita sente orgulho duni tanba nia mak haraik benção no inaugura fatin santo ida ne’e. hanesan relíquia moris ninian ne’ebe husik hela mai ita iha diocese Dili liu-liu iha Catedral tanba nia mak inaugura no fo benção. Tan ne’e nia fila fali mai iha ne’e laos de’it ita atu hare ba nia estátua, maibe atu lori ita ba hanoin fila fali nia nu’udar missionário boot. Ita hotu hatene katak Papa João Paulo II nia visita ita Timor ne’e iha ne’ebe ita nia esperança kiik hanesan lilin ida karik atu mate sal-sala, maibe mosu saseluk Nain Jesus Cristo ninian, Ulun boot Uma Creda ninian iha ita nia rain hodi foti fila fali, fo fila fali esperança mai ita. wainhira Papa João Paulo II reza missa iha Tasi Tolu hodi lian tetum. Tempo nebá ema hanoin katak missa ho Latim, maibe Santo Padre to’o mai ema tau tiha texto Latim no Indonesia ninian, maibe Santo Padre foti texto lian Tetum atu hatu’ur. Ho ida ne’e timoroan sira sente katak ninia dignidade hahu boot. Karik hanesan rai ida ne’ebe ema haluha maibe, Papa João Paulo II mosu mai hodi fo fila fali esperança ba povo no rai ida ne’e.

Tan ne’e ninia presença iha Catedral nune’e mos Tinan ida ne’e ita sei termina Ano Jubileu Missionário ninian iha Tasi Tolu iha 30 de Outubro ne’ebe mai tem que fanun fila fali ita timoroan sira maske desafios no dificuldades hotu ne’ebe ita hasoru, maibe Papa João Paulo II mai atu fanun fila fali ita. Nia liafuan ne’ebe nia dehan; “Imi mak Masin no Naroman mundo ne’e nian”. Nune’e mos ohin nia convida ita atu sai missionário. Ita reza atu nia estadia durante semana ida iha Catedral ne’e atu fanun sarani sira, hamoris fila fali desejo missionário ida ne’e. ita reza mos atu iha fulan 3 ne’e nia laran (Agosto, Setembro no Outubro) ne’ebe Conferência Episcopal Timorense tau ona mai iha Igreja Timor atu prepara ba momento extraordinário Jubileu nian ne’e ita aporveita laos atu manan graça Espiritual ninian, maibe tem sai mos momento ida de renovação, momento de conversão iha ita nia fuan, iha ita nia hahalok no iha ita nia mentalidade. (Ceko)

JORNADA NACIONAL JUVENTUDE (JNJ) 2019 SEI HALAO IHA PARÓQUIA ILIOMAR

DCDD, Iha loron 5 fulan Agosto tinan 2019, iha Salão DEJUCDDIL Vila Verde Dili, Departamento De Comunicação Da Diocese De Dili (DCDD) hamutuk ho Departamento Juventude Católica da Diocese de Dili (DEJUCDDIL) cria Tolk Show ida kona ba JORNADA NACIONAL JUVENTUDE (JNJ) 2019 SEI HALAO IHA PARÓQUIA ILIOMAR. Iha Tolk Show ne’e modera housi Pe. João Soares ne’ebe hanesan Presidente Executivo Comissão Nacional Juventude Timor-Leste CNJTL no nia Orador sira hanesan; Pe. João Hornai, Pároco Paróquia Iliomar, Pe. Augusto Campus, Pároco Paróquia Lolotoe, Evangelina de Araujo Carlos nu’udar membro CNJTL, Natalino da Costa nu’udar mos Membro CNJTL no Noventino nu’udar representante jovem Iliomar.

Pe. João Hornai iha biban ne’e hateten, “Iha Paróquia Iliomar antes Cruz jovem nia presença, jovem barak mak la participa ou la besik ba Igreja, maibe ho atividade sira ne’ebe preenche durante tinan ida nia laran hanesan Formação sira liu-liu kona ba Aprofundamento da Fé no sacramento sira ho tan presença Cruz Jovem nian ne’e, ita hare katak mudança boot ida ne’ebe acontece ba foinsae sira katak depois de foinsae lubuk ida mai tuir tiha Congresso jovem nia iha Dare, hafoin sira fila ba começa halo buat barak ba Paróquia. Tan ne’e, depois de Cruz ba fali fatin seluk, maibe ami sei iha nafatin formação ba foinsae sira katak formação Espiritual ba foinsae sira. ida ne’e condiz ho ami nia tema ne’ebe dehan; Cruz sinal da Salvação e transformação.

Pe. Augusto Campus mos hateten,“Presença Cruz Jovem ida ne’e lori ita atu hakbesik an fila fali ba Na’i Maromak nu’udar domin nain no ita koko lori tok iha ita nia moris lor-loron nian. Hanesan iha ami nia tema ne’ebe dehan “Mai Hare no Haklaken” hodi simu Cruz Jovem ida ne’e katak Cristo nia Cruz mak símbolo domin no moris nian. Tan ne’e, wainhira diocese anuncia ba ami katak Paróquia Lolotoe mak sei sai uma nain iha diocese Maliana, uluk nanain ami lao hodi buka tuir jovem sira tanba actividade ida ne’e atividade jovem nian. Tanba ne’e, housi experiência ne’ebe ami hare katak durante tinan barak nia laran jovem sira ne’e começa dada an neneik housi Igreja, sente moe atu hakbesik an mai ou sente tauk. Então ami buka dalan oinsa atu bele lori fila fali jovem ida ne’e mai iha Igreja atu evento ida ne’e to’o mai sira mos pronto atu celebra katak ida ne’e ami nia festa e ami nia evento”.

Pe. Augusto Campus reforça tan katak, “durante Cruz Jovem hela iha Lolotoe, ami traça ona plano pastoral ida ho naran; “Mai hodi hare no Haklaken”. Ida ne’e ami koko atu lori juventude sira sente orgulho katak, ha’u ne’e pertence ba Igreja e ha’u ne’e parte ida housi Igreja. Tanba ne’e, programa pastoral ne’ebe ami sei halao iha Cruz jovem ida ne’e primeiro mak atu lori Jovem sira mai hodi hare. Mai lai no lalika hare dook demais, maibe hare ba buat hirak ne’ebe concreto housi sira nia moris. Tanba ne’e, ami hakarak lori juventude balun ne’ebe sente ona katak sira iha transformação iha moris wainhira hasouru malu ho Nain Jesus. No ami sei lori sira mai hodi sira fahe sira nia experiência hodi bele toca no provoca jovem sira atu sira mos bele sente katak ha’u mos bele. Depois nia sente tiha ona Maromak iha nia moris, nia to’o ona ba transformação ida iha vida espiritual nian no mos vocação nu’udar jovem católica ida atu nune’e nia bele ba hodi Haklaken, hodi dada fila fali jovem seluk mai”.

Sorin seluk, Noventino da Costa  nu’udar jovem ida housi Paróquia Iliomar hateten,“Nudar jovem ida ami orgulho teb-tebes ho presença Cruz Jovem ne’ebe la’o haleu iha Iliomar laran tomak tanba liu housi Cruz Jovem ida ne’e, ami jovem sira ne’ebe la hakbesik an ba Uma Creda bele motiva ami fila fali hodi hakbesik an ba Uma Creda. Tanba ne’e, ami buka atu orienta malu nafatin maske Cruz hitan ba Paróquia seluk, maibe ami confiança boot katak ami sei sai nafatin Igreja no Igreja mak Jovem.

Natalino da Costa nu’udar membro CNJTL mos hateten, “Ha’u hanoin buat ne’ebe fácil liu atu jovem sira sente katak ha’u mak Igreja, ida ne’e fila fali ba cada jovem ida-idak atu identifica nia an lolos ne’e se! Tanba ne’e se ha’u jovem católico karik ha’u tem que orgulho ho ha’u nia an ida jovem católico ne’e. tanba ne’e buat ida ne’ebe jovem sira tem que halo mak ne’e, ita labele sente katak Igreja ne’e mak Padre, Madre, diácono sira, maibe jovem ne’e rasik mak Igreja. Iha mundo ohin loron jovem lao mesak nia sei monu, maibe ho Cristo nia bele hasouru tentação oinsa nia sei la monu tanba Cruz ida Cristo nian ne’e Cruz Amor e Sacrifício”.

Ikus liu, Evangelina de Araujo Carlos nu’udar mos membro CNJTL nian ida hateten, “Ita hatene katak evento Jornada Nacional Juventude sei halao iha Iliomar. Então oinsa atu lori jovem sira atu sente katak Igreja ne’e mak ha’u. Ida ne’e mak objetivo final ne’ebe acontece iha Iliomar. Tanba ne’e sei iha conferência ho nia orador housi Bispo nain 3, representante housi Governo nian no mos encarregado Papal nian iha Timor. Ha’u hanoin evento JNJ tinan ida ne’e sei diferente uituan ho evento sira ne’e liu ona katak, tinan ida ne’e sei fo prioridade boot ba jovem sira atu expressa saida mak sira sente ba Uma Creda. Tanba ne’e, Keta haluha atu participa tanba Igreja precisa foinsae sira nia presença atu bele sai Jovem Apóstolo ba jovem”. (Alin & Ceko)

“BAPTIZADOS E ENVIADOS”

DCDD, Iha loron 2 fulan Agosto tinan 2019, Obras Pontifícias da Infância e Adolescência Missionária (OPIAM) housi Diocese Baucau nian liburan hamutuk iha Paróquia Sagrado Coração de Jesus Vila-Nova durante loron tolu nia laran hodi prepara ba cerimónia abertura Ano Jubileu Extraordinário da Missão no mos 30 anos Visita  Papa São João Paulo II nian iha Timor-Leste. Durante loron tolu nia laran iha Paróquia Vila Nova Baucau ne’e, atividades ne’e OPIAM sira realiza mak hanesan; visita Bairros, Reza Terço Missionária, Animação, Laudes no ikus missa Abertura nebe halao iha loron 4 fulan Agosto tinan 2019.

Diretor OPIAM Diocese Baucau nian Pe. José Gonzaga hateten, “BAPTIZADOS E ENVIADOS” sai hanesan tema central ne’ebe Papa Francisco foti hahu iha 2018 mai to’o iha 2019. Tan ne’e, OPIAM sira hotu ne’ebe pertence ba iha Diocese Baucau ne’e nia laran hanesan mai housi Viagararia Manatuto, Vigararia Lospalos, Vigararia Viqueque no Vigararia Baucau, loron hirak ne’e halibur iha Paróquia Sagrado Coração de Jesus Vila-Nova hodi halo abertura ba Ano Jubileu Extraordinário da Missão tuir revisão ne’ebe iha dia 10 de Julho liu ba, Conferência Episcopal Timorense (CET) nian husu atu cada diocese halo missa abertura ano Jubileu nian.

Pe. José Gonzaga haklean tan katak, “Buat principal ne’ebe ita sei prepara iha fulan 3 nia laran mak ita halo ação missão ninian. Iha fulan tolu ne’e (Agosto, Setembro no Outubro) ita halo ação missão nian ne’e hodi manan Indulgência Missionária ninian. Tanba ne’e fatin ne’e ita hili atu halo procissão hodi manan Indulgência Missionária ninian mak hanesan; Procissão housi Vigararia Manatuto nian mak Nossa Senhora de Aitara. Ba iha Vigararia Lospalos, Vigararia Viqueque no Baucau fatin ne’ebe determina atu manan Indulgência mak Catedral Baucau, Foho Matebian ho Fatumaca. Fatin hirak ne’e sai hanesan fatin ne’ebe cada sarani sira ou grupo sira ne’ebe hakarak atu lao peregrinação, iha fulan tolu ne’e nia laran bele ba visita.

Liu tan ne’e Pe. José Gonzaga hateten, “Ita prepara fulan tolu ne’e hodi prepara ba Ano Jubileu Extraordinário da Missão, maibe ita mos sei comemora 30 anos visita Papa São João Paulo II nian iha Timor-Leste.  Maka festa rua ne’e Ano Jubileu Extraordinário da Missão no 30 anos visita Papa São João Paulo II nian iha Timor-Leste ita tau hamutuk de’it maka sei iha encerramento iha 30 de Outubro iha Tasi Tolu. Tanba ne’e, sarani sira hotu housi Diocese Baucau nian iha 20 de Outubro oras tuku 2 sei concentra iha Manatuto depois mak bele halo viagem hamutuk ba Tasi Tolu Dili. Ba labarik OPIAM, grupo Acólitos hahu housi idade 18 anos mai kraik sira sei ba uluk Dili iha loron 27. Durante loron 4 nia laran sira sei halao atividade ação Missão ninian, tenik Pe. José Gonzaga. (Equipa DCDD)

Diocese Baucau Halao Abertura Ano Jubileu Extraordinário da Missão

DCDD, Loron 4 fulan Agosto tinan 2019, liburan hamutuk OPIAM sira hotu ne’ebe mai housi Paróquia no Vigararia ne’e pertence ba Diocese Baucau concentra iha Paróquia Sagrado Coração de Jesus Vila-Nova hodi halao abertura ba Ano Jubileu Extraordinário da missão. Celebração ne’e hahu ho missa ne’e preside housi bispo de Baucau Dom. Basílio do Nascimento.

Dom. Basílio do Nascimento iha ninia homilia dehan; “Ohin ita diocese Baucau ita loke celebração de Ano Jubileu Extraordinário da missão. Jubileu ne’e dehan, tempo ida haksolok nian, tempo ida graça nian. Amu Papa sira iha tempo ida hare katak mundo precisa haklean nia fiar, atu hafoun fali nia fiar kona ba situação balu, Amu Papa sira hola iniciativa hodi dehan; tinan ida ne’e Uma Creda tomak tem que hanoin kona ba sira nia vida hodi koko Maromak nia perdão, hodi koko Maromak nia haksolok, hodi koko Maromak nia graça. Ne’e duni, Jubileu Exraordinário da Missão ne’e katak kna’ar ida, serviço ida ne’ebe ita sarani tem que halo hodi halo tuir Cristo nia liafuan ne’ebe molok Nia atu sae ba Lalehan Nia dehan; Imi ba Mundo tomak”.

Dom. Basílio do Nascimento esplica tan katak; “Iha Amu Papa nia liafuan ne’ebe hakerek ba Ano Jubileu Extraordinário ne’e; Baptizado e Enviados Uma Nova Missão de Igreja no Mundo. Baptizados e Enviados ne’e dehan; imi hirak ne’ebe simu ona Sacramento Baptismo, imi hirak ne’e tem que hatan atu Uma Creda haruka imi ba ne’ebe de’it. Tanba ne’e Baptizados ne’e dehan simu baptismo no Enviados ne’e dehan Haruka. Maibe ita Timor ita quando koalia Missão, Missionário ita hanoin liu ba tempo uluk. Miabe ohin loron ema sira mai housi liur atu hanourin ita nain Jesus Cristo nia liafuan ba ita ne’e menus. Maibe buat ne’ebe haksolok ne’e mak ne’e; missionário lubuk ida mak labarik oan hirak ne’ebe tur hela iha ha’u nia oin ne’e. ne’e duni ohin Aman-Inan sira, maun alin sira ohin hakarak hato’o ba ita boot sira mak ida ne’e; tempo ida ne’e ita lao ho labarik sira ne’e atu hanoin liu sira nia hahalok.

Liu tan ne’e, Dom Basílio do Nascimento hateten, Ohin iha labarik sira hanoin kona ba MISSÃO, sira hanoin kona ba MISSIONÁRIO ne’e, ita sira boot ne’e tem que hanoin katak buat sira ne’ebe labarik sira halo dadauk ne’e, ita boot sira mos tem que halo, biar ita la força ona hanesan sira, maibe ohin loron ita mai apreende buat ida ne’e; Ita hirak ne’e hotu ne’ebe simu Sacramento baptismo, ita hotu tem que sai MISSIONÁRIO.

Ne’e duni, ba inan-aman sira hau nia convite ba imi hodi dehan Sacramento Baptismo ne’e tau hela naha ida iha ita hotu nia kotuk. Atu serviço hanesan político, atu serviço hanesan hanourin nain, atu serviço hanesan agricultor ita hotu ne’ebe simu sacramento baptismo ne’e simu hotu kna’ar ida ne’e; Imi ba mundo tomak haklaken Ha’u nia liafuan, halo ema sai Ha’u nia escolante, sarani sira Hodi Padre Hodi Filho hodi Espírito sira naran.

Ikus liua Dom. Basílio do Nascimento hateten; “Partido político sira quando mai koalia ho ha’u e ha’u husu bebeik hanesan ne’e ba sira; imi forma imi nia quadros kalae? To’o agora laiha partido ida mak hatan ba ha’u dehan sira forma sira nia quadros. Tansa! Sira fiar de’it sira nia an no hanoin katak sira hirak ne’ebe fundador ne’e mate tiha, hirak seluk tuir mai ne’e lao los de’it. Iha Instituição hotu-hotu tem que iha formação Quadros atu geração ida mate tiha, geração tuir mai ne’e bele continua fila fali. Ne’e duni buat ne’ebe haksolok daudaun iha timor ne’e, timoroan sira ne’ebe pertence ba OPIAM, pertence ba Acólitos, pertence ba Cruzada Eucarística ita bele dehan Uma Creda nia Quadros mak ita hahu dau-daun. Ne’e duni hirak ne’e hatene saida mak sira ba halo iha Uma Creda, saida mak sira sei halao hanesan sarani ho Catequista sira, ho Amululik sira, ho Madre sira, inan-aman sira ita halo Quadros Uma Creda nian ne’e hahu desde kikoan maka começa hatama iha sira nia ulun, compreende saida mak Sacramento Baptismo no saida mak serviço sarani nian iha mundo. (Equipa DCDD)

Congregação OSF Celebra 25 Anos Existência Iha Timor-Leste

DCDD, 30, 7, 2019. Congregação Franciscanas OSF Convento Santa Elizabeth Taibesi, iha loron 30 fulan Julho tinan 2019 celebra Bodas de Prata (25 anos) sira nia existência iha Timor-Leste. Celebração ida ne’e hahu ho missa Agradecimento ne’ebe preside housi Amu Bispo de Dili Dom. Virgílio do Carmo da Silva, SDB hamutuk ho Padre Concelebrantes sira; Vigário Episcopal ba Assunto Religioso Pe. Leonardus B. Dibyawiyata,SJ, Vigário Episcopal ba Assunto Educação Pe. Guilhermino da Silva, Nailulik diocesano no mos religioso sira. Iha missa ne’e mos participa housi Embaixador Indonesia nian iha timor, religiosas no sarani sira.

Iha missa Dom. Virgílio do Carmo da Silva hateten, “Ohin comemora XXV aniversário ne’e opurtunidade ida atu agradece Maromak, opurtunidade ida atu hare fila ba kotuk ho haraikan atu reconhece Na’i Maromak nia liman fatin tuir Espírito Congregação nian ne’ebe dehan; DEUS PROVIDEBIT, Maromak descreve buat barak liu housi sira nia liman, buat barak ne’ebe sira la espera, maibe liu housi Maromak nia intervenção, providência Maromak ninian, obra Na’i Maromak nian bele lao diak iha ita nia rain.

Prelado ne’e acentua tan katak, “Momento sira hanesan ne’e, hakarak convida liu-liu ba ita sira hamutuk iha ne’e, hamutuk ho Irmã sira laos atu obrigado de’it, maibe atu halo discernimento katak ponto ida importante ba Congregação koko atu hare ho matan fiar nian ba buat ne’ebe liu ona no haraikan ho corágem hateke ba oin no hakasan oinsa atu halo missão OSF ninian iha rai Timor-Leste, buka duni atu hatudu sira nia Espírito, sira nia carisma, nune’e continua halo Uma Creda iha Timor, Uma Creda iha Diocese riku liu tan.

Remata tiha missa Superiora OSF Indonesia-Timor-Leste Me. Yofina, OSF iha nia mensagem hateten, “Iha loron ida ne’e ita halibur hamutuk iha fatin ida ne’e atu renova dala ida tan Bolu ida ne’e. Certamente iha bolu ida ne’e exige mos atu halo discernimento ida ne’ebe diak liu tan atu bele hatan ba missão iha rai Timor particularmente iha diocese Dili sai relevante liu tan tuir necessidade Uma Creda no sarani nian iha tempo ida ne’e.

Liu tan ne’e Superiora OSF recomenda mos katak, “Ita nia kna’ar no responsabilidade nu’udar Congregação OSF nian iha Timor laos remata ona ho festa 25 anos existência iha Creda Timor nian ne’e, maibe hakasan liu tan tan, haboot liu tan ita nia vida Espiritualidade no carisma OSF nian ho Maromak nia liafuan sira ne’ebe ita rona, atu transmite fila fali ba sarani sira liu housi ita nia kna’ar social sira, tulun sarani sira iha vida físico no espiritual nian.

Hau nia mensagem ba Irmã sira ne’ebe halao kna’ar iha comunidade ida ne’e katak, iha tinan oin mai Congregação OSF sei celebra ninia existência iha Creda ba dala 185. Se ita compara karik ho aihun ida katak, ai-hun ne’e hahu boot no tuan ba dadaun. Tan ne’e imi hirak ne’ebe halao kna’ar pastoral Congregação OSF nian iha Timor mos sai mos nu’udar ai-hun ida ne’ebe nia abut buras no metin ba daudaun. Tan ne’e hakasan nafatin atu hakonu ita nia idaidak nia an ho Maromak nia liafuan, fiel liu tan ba Maromak atu nune’e ita nia labele sai maran “Kekeringan”.

Biban ne’e mos Superiora OSF Indonesia-Timor-Leste Me. Yofina, OSF hato’o agadecimento ba bispo Dili ne’e fo ona fatin ba sira atu halao missão iha rai Timor particularmente iha diocese Dili tuir necessidade Uma Creda no sarani nian iha tempo ida ne’e. Nia agradece ba sarani Nailulik sira hotu  ne’ebe mai hodi celebra hamutuk existência Congregação OSF nian ba dala 25 iha Creda Timor. (Equipa DCDD)

USA FORÇA ATU RESOLVE PROBLEMA; NE’E LAOS COMPORTAMENTO SARANI NINIAN

DCDD – Iha loron 30 fulan Julho tinan 2019, Dom. Virgílio do Carmo da Silva hanesan Autoridade Igreja Local nian iha Diocese Dili lori paroquiano Paróquia Sagrado Coração de Jesus Becora husu desculpa ba Madre sira housi Congregação OSF Taibesi, ba hahalok ne’ebe foinsae balun ne’ebe hemu lanu hodi tenta atu ataca Madre nain 2. Dom Virgílio dehan lia hirak ne’e iha Festa Congregação Franciscanas OSF Convento Santa Elizabeth Taibesi Timor-Leste nian ba dala 25.

Dom. Virgílio do Carmo da Silva bispo de Dili ho haraikan hateten, “ohin hodi diocese sarani Becora nia naran hakarak husu desculpa ba Madre OSF sira, ba acontecimento ne’ebe acontece iha dia 27 de Junho 2019 wainhira Madre OSF na’in rua atu ba tuir Adoração ka Veneração iha Igreja Becora no atu fila fali mai Convento iha Taibesi, iha dalan klot jovem sira hemu lanu ataca Madre sira tan hakarak atu halo buat ruma ne’ebe ladun diak. Maibe sorte ho Maromak nia tulun, ikus mai sira na’in rua lahetan susar ida. Tan ne’e, nu’udar bispo iha momento ne’eba, iha loron 28 fulan Junho tinan 2019 koalia no husu tiha ona desculpa, maibe ohin oportunidade ida ne’e bele hato’o tan iha sarani sira liu-liu iha comunidade ida ne’e nia le’et, dala ida tan lori diocese nia naran husu desculpa ba Madre OSF sira ba buat ne’ebe acontece ne’e tanba ami nia oan sira nakar, ami nia oan sira dala ruma ami labele controla. Tan buat ne’e acontece ona, maibe ami hein katak ida ne’e sei la acontece bei-beik.

Liu tan ne’e Prelado ne’e hateten, “Hein katak buat ne’ebe liu ona sai hanesan lição ida ba ita, ita labele lor-loron iha ita nia rain continua sai nafatin rai ida ne’ebe muturabu, la usa liafuan, la usa razão hodi koalia resolve problema, maibe usa força, usa meios ne’ebe ladun diak atu resolve problema. Ida ne’e hatudu lolos katak, ne’e laos comportamento sarani ninian no mos laos comportamento Timor ninian. Tan ne’e iha oportunidade ida ne’e, la condena ema ida, maibe nu’udar aman ida hakarak atu ita hotu haka’as an atu buat ne’ebe liu ona ne’e hotu ona. Maibe ohin iha festa ida ne’e hanesan ita hahu história foun, loke página foun Madre sira nian, loke mos página foun Comunidade sarani Taibesi ninian. (Equipa DCDD)

DOM. VIRGÍLIO ORDENA DIÁCONO ROBERTO BA GRAU PRESBÍTERO

DCDD – Iha loron sábado, 27 Julho tinan 2019 tuku 09:00 otl, Dom. Virgílio do Carmo da Silva, Bispo de Dili preside missa ordenação nian ida iha Paróquia Nossa Senhora da Graça, Metinaro, hodi ordena Diácono Roberto Madeira Encarnação, SJ ba vida Sacerdócio nian. Amu Roberto Madeira Encarnação, SJ hanesan Metinaro oan ida ne’ebe loke dalan ba vocação emgeral no vocação Sacerdotal iha paróquia Metinaro. Iha missa ordenação Presbiteral ne’e ao mesmo tempo comemora mos loron especial ba Companhia de Jesus (SJ), Festa Santo Inácio de Loiola nian.

Dom. Virgílio do Carmo da Silva iha nia homilia hateten, “Na’i mak nebá !” ne’ebe diácono foti nu’udar nia moto ordenação nian hatudu mai ita katak, nia hakarak halo nia an sai instrumento ida Maromak nian atu hatudu Maromak ba ema seluk. Vocação ne’e laos iniciativa ita ema nian, maibe ida ne’e plano Na’i Maromak nian. Ema ida-idak especial iha Maromak nia futar oin, ida ne’ebe Maromak hadomi, Nia fihir, Nia bolu no Nia mos sei la abandona. 

Prelado ne’e hateten, “Amu-Lulik ida nia missão atu harí união iha sociedade liu housi nia moris. Dalabarak ita hare iha realidade katak, sei seminarista iha seminári moris hamutuk, reza hamutuk, estuda hamutuk, servisu hamutuk, maibe wainhira sai tiha Amu-Lulik sira dehan alergia boot ba serviço hamutuk. Tanba ne’e, sai Amu-Lulik  ne’e laos atu buka sucesso ida-idak nian, maibe sai Amu-Lulik ne’e ba vida comunhão.

Liu tan ne’e, Prelado ne’e hateten, “Diácono Roberto ita hare iha durante nia moris, nia estuda hela iha UNTL, karik nia rona lian bar-barak, maibe iha lian ida ne’ebe book liu nia atenção, bok liu nia fuan, ikus mai nia hatan, nia buka tuir hodi hatene lolos liu housi reflexão, discernamento ida ne’ebe iha tinan naruk nia laran. Hirak ne’e hotu ho objetivo ida de’it; hakbesik nafatin nia atu lao ba oin to’o momento ida ne’e; loron ordenação nian. No ida ne’e mak ita bele dehan tempo boot ne’ebe Compania de Jesus iha Timor-Leste ohin hasae ba Na’i Maromak iha loron ita celebra Santo Inácio ninian. Tanba ne’e ita fo parabens ba Compania de Jesus”.

Remata tiha missa, Padre Superior Companhia de Jesus nian iha Timor-Leste Pe. Joaquim F.da S. Sarmento,SJ hateten, Ita libur malu hodi celebra Festa Santo Inácio de Loiola nian, Santo ida ne’ebe hanesan ohin ita rona nia oan sira presente serviço ba iha rai Timor ne’e iha ona tinan 120 resin. Iha solenidade ida ne’e, ha’u hamrik hodi Comunidade Jesuita iha Timor hakarak hato’o Saudações, parabens, agardecimento ba Amu bispo no clero diocesano diocese tolu iha Timor tanba ho ordenação ne’e atu nia Amu-Lulik religioso ka diocesano, hotu-hotu tau an iha serviço ba Na’i Maromak nia bolu. Nune’e mos parabens ba amu foun ho nia família no mos Jesuita timoroan hot-hotu sira nia aman-inan, maun-alin no família boot tomak, katak imi mak doadores ne’ebe boot liu, la tulun companhia ho osan de’it ou material oi-oin, maibe uluk nanain ho imi nia oan.

Liu tan ne’e Pároco Paróquia Metinaro Pe. Dionisio hateten, Desde Metinaro sai paróquia iha 2017 no ohin pela primeira vez iha missa ordenação presbiteral iha paróquia Metinaro. Missa ordenação ida ne’e fo vantágem, inspiração no motivação ba sarani Metinaro hodi bele habelar, haburas vocação emgeral no especialmente vocação Nailulik nian iha paróquia Metinaro. (Ngl)

CREDA TIMOR SEI CELEBRA JUBILEU EXTRAORDINÁRIO MISSÃO

DCDD (19-07-2019) Conferência Episcopal Timorense CET decide ona atu halao celebração Jubileu Extraordinário Missão no Comemoração tinan 30 visita Amu Papa João Paulo II iha Timor-Leste ne’ebe sei realiza iha fulan Outubro tinan ida ne’e. Ho ida ne’e, Comissão Organizadora Celebração Jubileu Extraordinário Missão no Comemoração tinan 30 Visita Amu Papa João Paulo II nian iha Timor-Leste, iha loron Sexta-feira, 19 de Julho de 2019 convoca fali reunião ba dala rua nian iha Comissão Justiça e Paz nia serviço fatin hodi estabelece diak liu tan Comissão ida ne’e hodi hasoru evento boot ne’ebe atu mai iha fulan Outubro. Participa iha encontro ne’e hanesan, Padres, Madres no autoridades relevantes sira.

Presidente Comissão Organizadora Pe. Mouzinho Pereira Lopes iha entrevista hateten, Jubileu Extraordinário Missão nian (JEM) ne’ebe Amu Papa Lança tiha iha tinan uluk liu ba atu halo Igreja hanoin fali saida mak Na’i Jesus Cristo hakarak ba nia oan sira atu sai sasin iha mundo baseia ba Documento maximo Ilud Papa Bento nian. Evento boot ida ne’e acontece iha tinan ne’e, ne’ebe nia puncak ne’e iha 30 de Outubro 2019 sei celebra iha Tasi-Tolu, maibe ita iha Timor ne’e rasik além de evento boot ida universal  ne’e, ita iha Timor mos comemora hela Visita Santo Padre São João Paulo II nian. Hodi hanoin nia papel no hanoin saida mak ita halo ba ita nia nação, mak Amu Bispo sira hakarak atu encaixaa hamutuk celebração ida ne’e ho Jubileu Extraordinário ne’e. To’o ikus nia ideia sai katak saida mak ita timoroan halo hanesan sarani ne’ebe fo sasin iha ita nia moris ba ita nia rain. Ida ne’e mak razão fundamental ita halo celebração rua ne’e hamutuk tanba João Paulo II ne’e ema missionário boot ida, Santo Padre ne’ebe visita fatin hotu ne’e mak nia. Maka nia Espírito missionário ne’e boot iha ita nia rain. Tan ne’e, Amu Bispo sira hakarak atu ita integra ita  nia an iha vida missão hanesan São João Paulo II hatudu ona mai iha ita nia rain. Tanba ne’e mak ita hahu organiza labarik sira hahu housi escola hot-hotu participa, depois  housi camada no sociedade hot hotu laos de’it regilioso, maibe Governo, Instituições no Ministérios hirak ne’e mak ita halo comição boot ida atu organiza evento hot-hotu nebe sei iha.

Pe. Mouzinho Pereira Lopes reforsa tan katak, Evento sira ne’e hanesan sei iha Seminários Intenacionais, Nacionais no Locais, actividades regiliosa, animação labarik sira, jovem sira no formação no iha mos Peregrinação atu manan Indulgência. Ne’e hotu halao iha fulan tolu nia laran to’o iha 30 de Outubro no sei taka ho missa iha Tasi Tolu.

Esperança housi evento boot ne’ebe sei acontece tuir Pe. Mouzinho Pereira Lopes katak, esperança boot liu mak Missão (sasin). Tanba ita timoroan ba ami hare dadaun ne’e depois de Independência ita timororan ne’e la sasin ita nia Fé, maibe ita ba sasin fali buat seluk ne’ebe la’os ita nian, mai hosi liur ou buat liur mai ita simu de’it depois de ita nia identidade hanesan ema sarani fo sasin kona ba Maronmak nian iha nia moris ne’e menos. Tanba ne’e mak ho evento ne’e atu fanun fali sarani sira nia vida sasin ne’e. Ida seluk mak  Papel São João Paulo II nian iha ita nia rai ne’e Jovem sira ohin loron barak mak lahatene visita São Paulo II  iha tinan 30 liu tanba ne’e ita disperta fali sira katak iha ita latemi de’it katak Igreja la hola papel ba libertação, maibe ema ida rua iha sacrifício boot hanesan Amu Bispo Dom. Carlos no ida mos ita nia Santo Padre São João Paulo II ne’e. (Alin)