shadow
Diocese de Dili > NOTÍCIAS > Notícias

Laiha Buat Nebe Ema Halo Desconhecido Iha Maromak Nia Oin

(ITE) Dominggo (22/05/2016), Bispo de Dili Dom Virgilio da Silva halao visita Pastoral nian ba iha Paróquia Maria Auxiliadora Comoro, sarani Paróquia Comoro simu ho tradição Timor nian hodi hakfolik tais, acompanha ho tebe hahu husi Rotunda Nicolau Lobato too iha Igreja Paróquia Comoro. Iha Solenidade Santíssima Trindade, Bispo fo tomada de Posse ba Fosca Paróquia Comoro nian no mos labarik nain 495 simu Primeiro Cominhão. Dom Virgilio explica katak: Nuudar sarani buka atu haklaken no sai benificiais ba Maromak nia domin nebe rohan laek, domin nebe incriedível, ita sai hanesan tranporte ida nebe lori Maromak nia domin. Maromak hatene ita idaidak, laiha buat ida nebe ita halo ita nia moris nebe Maromak la hatene, ita bele halai husi ema maibe Maromak labele. Dalabarak ita rona iha fatin hotu katak ema desconhecido. Inan ida nebe mak soe hela nia oan iha valeta kuak ida, ita dehan ema desconhecido ida soe bebe, iha ema nebe mak ba estraga ema ruma nia uma hodi halai lakon ita dehan ema desconhecido ida. Ita ema dalabrak uja liafuan desconhecido, maibe Maromak nee omnipotente, omnipresence. Laiha buat ida nebe ita ema halo desconhecido iha Maromak nia oin. Desconhecido nee tamba ita tauk halai tamba Justiça, ita halo buat nebe lalos ita hakarak halai atu subar no hakarak ses husi justiça nebe nação nian, maibe ita haluha tiha katak Justiça nebe rai nian ita bele ses, maibe Maromak nia Justiça ita sei la ses. Nuudar ema hakarak ka lakohi iha ita nia último dia nee, ita hotu hotu sei ba simu justiça iha Maromak Nia oin. Ita gosta halo buat nebe desconhecido hodi halo buat nebe iha nakukun nia laran, dalaruma iha kalan ema gas motor hodi halo barulho halo ema la hatene se mak halo nee, maibe keta beik ema mak lahatene, Maromak hatene. Justiça nee iha loron ikus mai sei halo ba ema idaidak. Dalabarak ita halai husi buat at nebe ita halo maibe ita nia concência sei la  hakmatek. Ita precisa hare ba ita nia família, ita nia sociadade, ita nia rain temque ser sai reparo ida Maromak Santíssima Trindade nian. Masque ita iha diferença, maibe ita nia relacionamento ita bele manifesta comunhão no união ida. Santíssima Trindade katak ita koalia kona ba relacionamento entre Aman, Oan no Espírto Santo. Relacionamento nebe Aman Oan no Espírito Santo nee absoluto (Mutlak). Relacionamento entre aman no Oan nee klean no rohan laek no relacionamento nebe labele kore. ita koalia kona ba relacionamento iha família, nee buat ida nebe importante tebes. Se iha família laran, iha fen ho laen, wainhira existe domin ida nebe diak, saudável no klean entre inan ho aman saida mak acontece? Automáticamente oan sira experência ba domin ida nee. Ho ida nee sei sai força ida ba família tomak nia cressimento. Iha uma laran temque iha domin nebe diak, domin nebe saudável, domin nebe mútua no domin nebe recíproca, atu oan sira bele sente domin ida nee. Além iha família domin ida nee mos precisa existe iha aldeia sira, Intituição sira, naiulun Nação nian nomos Creda nian. Ao contrário se responsável sira mak iha uluk ambiente inimizade nian, hafuhu malu nian, ódio malu nian, oho malu nian, saida mak acontece! Família sei laiha domin. Tan nee, precisa garante comunhão ka unidade nebe existe relacionamento ida nebe recíproca. Wainhira koalia kona ba família, Instituição no Nação, domin nee laos hakiak husi kraik mak sae, maibe husi leten mos tun ba, tamba ita temi  domin nebe recíproca katak domin husi leten wainhira iha entre responsável sira uluk nanain iha domin, domin nee sei daet ba ema hotu. Nunee mos domin nebe mak iha baze iha situação nebe diak, certamente domin nee sei buras ba leten.(C)

Dom Virgilio Triste Ho Indiferência Fiar Iha Creda Timor

(ITE) Loron Quinta (26/05/2016) nuudar loron importante tebes ba sarani Católica sira iha mundo. Loron ida nee nuudar loron celebração Corpo e Sangue do Senhor. Governo tau loron ida nee nuudar loron feriado Nacional ba sarani Católico sira. Tuir mensagem Bispo de Dili nian ba sarani sira katak tuku 3 lorokraik sei iha Proceição Corpo e Sangue hahu husi Paróquia Balide ba iha Lecidere. Iha Proceição hirak nee hetan participação máximo tebes husi sarani tomak hahu husi labarik too ferik katuas sira hodi lao ain husi Balide ba too iha Lecidere. Proceição hirak nee pregide rasik husi Bispo de Dili Dom Virgilio da Silva. Bispo de Dili agredece mos ba Governo Timor Leste nebe reconhece loron importante ida nee hodi concidera nuudar loron feriado Nacional. Iha intervista Dom Virgilio da Silva sente triste ho indiferência fiar nebe mosu iha Creda Timor. Tan nee Bispo hateten: Hau rona is katak sarani barak fila fali ba iha religão seluk tamba razão oin oin. Ba hau hanesan Bispo, sarani nebe fila ba religão seluk nee laos tamba sira nia sala mos, maibe tamba dala ruma sira ladun prepara an atu sai sarani. Wainhira sira hakarak sai sarani lalais, Primeiro Cominhão, Crisma no kaben lalais, maibe ladun iha preparação nebe máximo. Cataquese nuudar dalan ida atu prepara ema ida idak molok atu sai sarani. Nia temque hatene uluk lai nia fiar. Ema quando abandona nia fiar, nia sai sarani saugate deit, tamba la comprende kona ba sarani. Tamba nia laconhece didiak nia fiar, ikus mai nia la hadomi nia fiar. Ida nee preucupação boot ida. Dom Virgilio hatutan tan katak: Hanesan Igreja ita laran susar tamba buat nee acontece. Maibe papel ida nuudar Bispo buka atu serviço makas liu tan oinsa atu hametin sarani nia fiar liu husi Catequese. Hau apela katak wainhira iha catequese ba labarik sira temque participa máximo duni, nunee mos ba sira nebe sarani tiha ona. Tan nee, hanesan iha Igreja, Paróquia sira organiza formação ruma, nee importante tamba liu husi formação sira mak halo sarani sira bele conhece diak liu tan nia fiar. Se laiha formação ita hanesan ai ida kuda hela tiha deit la rega ita sai maran. Tan nee buat ruma mosu mai, ita taran tuir deit ona. Bispo haktuir tan katak: Problema fiar nian hanesan desafio boot ida ba Nailulik sira liuliu ba Igreja nia parte oinsa atu bele hametin diak liu tan formação sira iha baze, atu nunee ita nia fiar labele sai fraco. Oras nee dadaun, ami hanoin ona atu hahu uluk formação husi família sira, atu nunee bele fo atenção ba iha família sira. Uluk iha programa ida naran Comunidade Baze. Nee katak Amululik sira tun ba iha família sira hodi forma grupo iha família sira sai comunidade ida hodi habelar liu tan formação liu husi grupo família comunidade ida nee, haklaken tutan ba iha família sira seluk. oras nee ami hanoin atu halao Pastoral ida ba Jovem sira nebe hanaran Pastoral Universitário. Ida nee precisa uluk atu koalia ho Diretor sira hotu, se iha posibilidade atu nunee Amululik sira mos bele ba halo actividade religiosa nian Universidade sira iha Dili laran tomak.  Dom Virgilio mos apela ba sarani sira atu la precisa cria buat nebe extraordinário maibe halo buat nebe baibain katak fiel ba ita nia obrigação baibain. (C/A)