shadow
Diocese de Dili > NOTÍCIAS > REFLEXÃO

SAGRADA FAMÍLIA: JOSÉ, JESUS E MARIA

Maun alin sarani doben sira, celebração ida ohin nebé ita hanaran festa Sagrada família nian uluk knanain foti ita ninia neon ba hanoin no refelte kedas família Nazare nian, nebé família oan ne’e composto housi Sao Josè, Jesus no Inan Santa Maria. Sira ninia família kiik ida nebé hatudu nu’udar família ema nian, maibé família ema nian ida nebé Maromak horik iha nebá, la’os família ema nian baibain hanesan família bara-barak iha mundo ne’e nebé moris nu’udar família naturalmente de’it no la fo bibian ba Maromak atu moris iha sira ninia família tamba sira la conhece Maromak no tamba sira ninia família laran toos atu reconhece no simu Maromak nu’udar wé matan moris no força ba família ida ninia moris. Realidade mistèrio ida ne’e automaticamente lori ita nu’udar ema fiar nain ba refelete mos ita ninia família ninia moris. Ita ninia família moris ho Maromak ka ita nia família la hatene Maromak ou hatene hela Maromak maibé haluha no la fo biban ba Maromak atu horik iha ita ninia família hanesan sagrada família nazare nian. Ita ninia reflexão nebé klean ho tulun Maromak ninia futar Liafuan nian halo ita bele hatene ita ninia família ninia moris be oras ne’e lao dadaun sai klean liu tan hodi mos descobre buat di’ak no buat fraco ou salan ou dificuldade ou obstaculo sira moris família nian nebé oras ne’e ita hasoru hela dadaun.

 

Primeira leitura domingo ohin nian hatudu kedas ona exemplo família nebé iha ninia moris la’o iha mundo ne’e lao ho fiar metin ba Maromak, família Abraão nian. Família ida nebé comunica bebeik ho Maromak iha ninia moris tomak, la housi Maromak ses housi buat nebé nia halo ba. Nune’e mak Abraão tau ninia fiar metin iha Maromak no Maromak halo justiça ho buat kmanek oioin ba nia ho benção wa’in hetan família ida ksolok no iha oan ho beioan barak hanesan fitun sira iha lalehan. Família be tau fiar metin iha Maromak, obediente ba Maromak no lao hamutuk ho Maromak, Maromak haraik graça no bênção wa’in no Maromak rasik mak sei sai sira ninia Escudo ou Luto hodi satan hasoru buat aat sira. Nune’e maun alin doben sira ita compreende katak família nebé moris iha mundo ne’e la fiar iha Maromak no la’o dook housi Maromak família ne’e la hetan graça no bênção wain housi Maromak iha; paz, ksolok, domin, laran luak no laran maus nia laran.

 

Continua família Abraão ninia moris ne’e iha segunda leitura hatudu katak FIAR ba MAROMAK mak sai força no we matan moris ksolok, dame no domin nian iha família ida. Ho FIAR iha metin ba MAROMAK mak Abraão bele hasoru no ultrapassa problemas no dificuldade sira moris nu’udar família nian. To’o prova ida dificil liu iha moris mos nia ultrapassa hotu, oferece ninia oan mane Isac nu’udar sacríficio ba Maromak. Maibé ne’e mós nia hakat liu tamba nia perseverante iha ninia fiar no hari ninia família iha FIAR ba Maromak.

 

Ohin loron iha moris família nian problemas, dificuldades no provas hasoru família ninia moris mai uluk knanain housi família nia laran rasik hanesan: família be lao dook housi Maromak hodi sai indifrente kona ba Maromak no la hanourin oan sira kona ba Maromak no kona ba Creda ninia hanourin sira; família nebé la hatene rona malu, oan sira barak la rona inan aman be koalia ba sira no mos inan aman sira balun la haraik-an atu rona mos oan sira; família lakon iha moris família nian virtude sira sarani nian, oan sira la hatene respeita inan ho aman, inan aman sira desiste atu hanourin ou moraliza oan sira tamba oan sira ninia nakar no ulun toos; Laran luak ou Misericordia no lia mamar lakon iha ambiente moris família nian hodi domina fali mak Lia makas no hirus sira nune’e taka dalan ba domin, dame no ksolok iha família laran.

 

Doben maun alin sira, inan-aman no oan sira nebé ha’u hadomi iha ita nain Jesus Cristo. Evangelho hanourin mai ita katak problemas, dificuldades no provas sira hasoru família hanesan ita reflete hetan hamutuk dadaun iha leten atu bele ultrapassa ita percisa iha hakarak atu luta hasoru ho dalan fiar metin nafatin ba Maromak no purifica ita ninia família ho hahalok moris sira ema sarani nian nebé hetan iha Jesus Cristo ninia evangelho; tan mós ba fiar ne’e hasa’e ou oferece ba Maromak família ne’e ninia moris iha buat hotu-hotu, iha di’ak no mos iha aat hanesan sagrada família lori Jesus kosok oan mai oferece ba Maromak nu’udar lei Moises nian haruka; hanai hahí no agradece nafatin Maromak iha EUCARISTIA be sai wé matan moris ba ita ema no ba ita ninia família hanesan Simeão hahí hanoin Maromak loron kalan iha Maromak ninia uma hodi ikus mai agradece Maromak tamba Maksoin nebé Maromak haraik ba mundo. Ita tem que lori ita ninia família hakbesik los ba missa ou Eucaristia; halo ORAÇÃO mak sai instrument di’ak liu hotu atu hasoru buat tomak iha família ninia moris no atu kesi metin família ninia moris ba Maromak hanesan profeta Ana be servi Maromak liu housi oração ou harohan iha Maromak ninia uma. Ita mos percisa halo oração sai toman di’ak ka tradição ida iha ita ninia família nia moris, reza hamutuk no reza mesak mesak mos. Ita buka halo ida ne’e atu ita ninia uma mós sai uma oração nian hodi hadok buat aat hotu housi ita ninia família.

 

Evangelho fo hanoin tan mai ita katak wainhira ita ninia família la moris nune’e tuir Maromak ninia  hakarak, moris família nian sei moris nakonu ho contradição tamba ita la tidin ita ninia família nia moris iha fiar ba Maromak no la moris tuir Maromak ninia hakarak. Ita la tau Cristo ho ninia evangelho mak sai dalan moris ba ita ninia família. Nune’e surik mos sei sona borus ita membro família sira ninia moris nu’udar Simeão hateten ba Nain Feto “Surik ida sei sona borus o nia fuan hodi hafanu ema wa’in ninia hanoin no sira ninia fuan”. Ohin loron de maneira geral wainhira ita hare ba ita ninia família sira ninia moris lós duni wainhira ita la moris tuir Maromak ninia hakarak be hatur hela iha ninia ukun fuan 10 no iha Evangelho Cristo nian ita ninia moris nakonu ho contradição comum ida no surik sei sona duni ita hotu iha membro família ninia moris. Ida ne’e hatudu iha situação família ninia moris nebé:

 

Dificil iha atu rona malu, oan sira lakohi rona inan ho aman sai hanesan ai ida nebé moris abut laiha, sente abandonado, no lakon direão moris nian, lakon força moris nian basá família la tau matan. Housi sorin seluk dala balun inan ho aman sira mos la hatudu hahalok haraik an hodi rona oan sira nune’e dificulta liu tan oan sira nia moris; Ohin loron oan sira barak los ona mak la hamtauk inan ho aman hodi la respeita inan ho aman, la respeita autoridade sira, la respeita ema seluk to’o la respeita mos sira ninia an rasik; situação comum ne’e halo membro família nian sira hotu: aman, inan no oan sira, hotu hotu bele sente surik nebé sona borus ida idak ninia laran, lakon laran metin ba malu, lakon fiar ba malu no hanesan ne’e’e ikus mai lakon moris ksolok, domin no paz família nian.

 

Mas que nune’e iha loron ida ohin ita percisa agradece mós ba Maromak basa iha mos família barak tebes mak lao nafatin iha dalan perseverança de uma educação tradição no bom costumes sira ba iha família: hanourin ou koalia kona ba Maromak ba sira ninia oan sira; hanourin kona ba fiar no kona ba hadomi no tau laran metin lolos iha de’it Maromak; hanourin kona ba importancia housi oração iha ema sarani sira ninia moris hodi tau iha pràtica reza hamutuk kalan kalan iha oras determinada; hadomi Maromak ninia futar Liafuan be sai kbiit no wé matan moris nian ba família hodi reflete hamutuk Maromak ninia futar liafuan sira loro-loron. Hirak ne’e ita bele dehan tradição di’ak no bom costume ema sarani sira nian nebé nu’udar família Timorense e cristã percisa kuda no hamoris nafatin iha ita ninia família housi geração ba geração. Mai ita hotu hari ita ninia família iha Maromak oras ne’e no ba nafatin iha FIAR, DOMIN, NO LARAN METIN LOLOS DE’IT BA MAROMAK. Amen,

Bidau, DOMINGO SAGRADA FAMÍLIA, ANO B, 27.12. 2020,

POR: Pb.

HORI ULUK KEDAS LIAFUAN IHA NANIS, LIAFUAN MAROMAK NANIS, MAROMAK HALO SASAN HOTU HODI NIA, LA HODI NIA BUAT IDA LA MORIS. NIA MAK MORIS NAIN, MORIS NEE MAK EMA NIA NAROMAN, NAROMAN NABILAN HELA IHA NAKUKUN LARAN, NAKUKUN LA SIMU NIA (Cf. JO 1, 1-4).

Maun alin sarani doben sira nebé hau hadomi iha ita na’in Jesus Cristo, Naroman to’o ona mai, Ksolok be ita hein to’o ona mai, dame nain too ona mai, ukun nain lolos to’o ona mai. Nia mak Jesus Kosok oan be moris iha Belem, David ninia cidade, Nia, Na’i Maromak ninia oan, Maksoin ema nian, rai klaran nian no kriatura hotu-hotu nia maksoin. Rai hotu lakan nabilan tamba kosok oan ne’e mak Maromak-Maksoin be tun mai rai, mai moris hamutuk ho ema, atu soi ema sira no atu soi rai klaran tomak. Iha kosok oan ida ne’e Maromak hatudu ninia domin rohan laek ba ita ema sira hanesan uluk no fo hatene sai nanis ona ba ita ninia beiala sira housi geração ba geração, katak loron sei to’o mai, feto virgem ida sei kous no tur ahi oan Mane ida, oan ne’e sei sai boot no nia mak sei tur iha ninia aman David nia trono hodi ukun. Ida ne’e mak oras ne’e acontece, mosu no hahu dadaun ona iha ita le’et. Maromak halo tuir lolos kedas ninia promessa hodi hahu soi ona ita ema sira iha kosok oan ida ne’e nebé foin moris, hodi nearas hafalun no hatoba hela iha balada han fatin kiik ida.

Maun alin sarani doben sira,

Primeira leitura halo fo tada mai ita katak buat boot nebé oras ne’e acontece no mosu dadaun iha ita le’et halo ita haksolok tebtebes basa ita hare no hatene ona katak Kosok Oan ida be foin moris ne’e maksoin ida ita nian, criatura tomak nian. Nia mai atu ukun ita tuir dalan justiça nian, ukun ita iha paz, domin, perdão, ksolok no laran luak nian. Ne mak halo ita haksolok, mundo no rai klaran tomak haksolok, hamutuk ho anjo lubun boot iha lalehan ita hananu haksolok hahí hanai Maromak ba ninia domin no ba acontecemento boot liu hotu iha ita ema sira ninia história ne’e, Maromak tun mai rai hodi moris hamutuk ho ema no soi ema sira, lori dame, domin, ksolok no laran metin ba ema hotu.

Segunda leitura halo ita compreende lolos katak maksoin be foin moris ne’e laos ema baibain ida, laos ukun nain baibain ida, maibé nia MAROMAK rasik mak tun mai rai. Kosok oan ne’e Naí Maromak ninia oan mane mesak nebé haruka mai mundo, hola isin ida hodi moris hanesan ita ema atu soi ema no rai klaran tomak. Uluk liu ba Maromak koalia hoi ta beiala sira liu housi profeta sira, maibé ba ita ohin loron Maromak koalia mai ita hodi ninia oan mane rasik, Jesus Cristo. Nia mai moris iha rai klaran hodi koalia diretamente ho ita no realiza hahalok maksoin nian diretamente mai ita nudar ita ema sira testemunha no hatene iha tinan rihun rua resin nia laran ona; ema delek bele hare, ema diuk bele rona, ema monok bele koalia, ema ain kodeik bele lao, ema hamlaha Nia fo han, ema moras nia fo isin di’ak no ema mate nia halo moris hias fila fali. Ba ema hotu nebé fiar hodi lao tuir nafatin kosok oan ida be moris ona mai ita ne’e maksoin nee sei sai rohan laek ba sira, basa Maromak ita ninia maksoin horik ona iha ita leet.

Iha evangelho São João fo tada mai ita katak Jesus Maromak nebé mai halo-An ba ema hodi moris hamutuk ho ita ne’e, Nia rasik Maromak, Nia mak Maromak ninia Futar liafuan, hodi Nia mak Maromak halo buat hotu, Nia mak buat hotu hotu ninia nain no moris nia hun. Nia mosu mai nudar NAROMAN IDA be nabilan iha nakukun laran atu ema hotu nebé hare hodi fiar iha Nia sei hetan moris lolos, moris nudar roman ninia oan sira. Ema hotu nebé simu Nia no fiar iha Nia, Nia haraik kbiit atu sai Maromak oan.

Doben maun alin sira, evangelho tulun ita atu reflete iha Natal tinan ida nee nian katak liu tiha tinan 2000 ona mak Maromak halo-an ba mane hodi hola isin ida no mai moris hamutuk ho ema sira iha rai klaran, ita barak mak simu no fiar duni iha ita nain Maromak ne’e, maibé mos iha maun alin barak mos mak sei lao dook hela Naromak be mosu mai rai klaran ne’e, seidauk simu no fiar iha ita nain Jesus Cristo. Wainhira reflete ba ita ida idak ninia relação moris fiar nian ho ita nain Jesus Cristo karik ita buka hatene took, iha testemunho moris nian ita sai lolos ona naroman nia oan ka ao contrario ita sai fali nakukun ninia oan, katak ita moris tuir lolos Cristo ninia hanorin sira ka ita moris tuir fali de’it mak ita ninia hakarak rasik; iha buat hotu be ita hanoin, ita hakarak, ita koalia no ita halo moris lolos duni iha fiar no laran metin ba Jesus Maromak, ka ita sedauk tau fiar no laran metin lolos ba nia be buat hotu ninia nain, moris nia hun no Maksoin lolos ne’e; ita lao hamutuk ho Cristo be buat hotu hotu no moris ninia nain no hun nee ka iha halao ita ninia moris iha rai klaran nee ita hakas-an mesmesak hela no lao dook los hela housi Nia?

Ita ninia celebração Natal ne’e convida ita atu hamoris fila fali ita ninia moris sarani nian be; simu no fiar Maromak maksoin be mai moris iha mundo hodi soi ema no rai klaran tomak no halo ema hotu sai Naroman ninia oan, katak sai Maromak ninia oan sira nune’e ksolok, dame, no domin lolos nian sai nudar roman rohan laek nebé hakonu ita ninia moris no dura ba to’o rohan laek.  Nune’e maun alin doben sira, mai ita lori ba malu, dame, domin no ksolok nebé oras nee ita simu ona housi Jesus Kosok maksoin ba ita ninia familia, ba ita nia maun alin sira no ba ema ho criatura hotu hotu. Amen.

 

Mutudare-Dili, 25.12.20, Ano B, Por:Pb.

“LIA-FUAN MAK NAROMAN LOLOS ”

Iha tinan 1914, acontece funu entre Alemanha (Alemanha), Inglaterra ho França. Iha fulan Dezembro, li-liu iha kalan Natal, soldado sira housi força armada nação hirak ne’e, ida-idak abrigo metin iha sira nia subar fatin tan udan tun makas iha kalan nakukun ne’e. Soldado sira sente saudades ka rindu tebes hodi halibur hamutuk sira nia família iha kalan Natal ne’e. Sira hanoin fali katak se la acontece funu karik, então kalan ida ne’e, sira sei halibur hamutuk ho família sira iha uma hodi celebra hamutuk Natal, ba missa hamutuk, festa hamutuk no haksolok hamutuk. Iha sorin seluk, soldado Inglaterra nian lobuk be hetan tiru no kanek todan, toba hakilar-halerik hela iha abrigu fatin ne’e. Comandante  mos tuur tanis no triste hela tan iha kalan Natal ne’e, nia la bele hamutuk ho família no oan sira tan agora nia halo hela funu.

Iha kalan boot ne’e,Teki-tekil, housi parte soldado Inglaterra nian haré Naroman kiik ida mosu sae neneik iha parte soldado Alemanha nian. Tan saudades tebes ba família no ba festa Natal, soldado Alemanha nian ida halo tiha presépio kiik oan ida no sunu lakan lilin ida iha presépio ne’e nia laran hodi foti sae ba leten. Foti dau-daun presépio kiik ne’e, soldado ne’e mos hamrik neneik housi nia subar fatin hodi hatudu-an ba soldado Inglaterra nian. Soldado ne’e la tauk mate no nia hamrik lao ba oin hodi hananu música; kalan Natal. Música Natal ne’e doko tebes soldado Inglaterra sira nia fuan no sira nia saudades.

Tuir mai, soldado Inglaterra nian ida mos foti nia trombeta hodi hu acompanha música kalan Natal nebé soldado Alemanha ne’e hananu dau-daun. Rona tiha música ne’e, soldado sira hotu hamrik no lao sai housi sira nia subar fatin hodi hananu hamutuk, hakuak malu, tanis tan sira la bele ba Missa no la consegue celebra Natal iha sira ida-idak nia uma maibé, celebra de’it iha funu laran. Lalaok ne’e mos, soldado inimigo sira imita tuir hodi hananu música hanesan tuir sira nia língua. Sira celebra Natal simples de’it iha situação funu ne’e, hodi haluha lai sira nia odio malu, sira nia vingansa ba malu entre força Alemanha ho Inglaterra.***

 

Maromak nia futar Lia Fuan iha Festa Natal tinan ne’e, sani ita hotu nudar Cristão Católico atu oinsa ita bele simu Naroman nebé lakan nabilan iha Nakukun laran. Too ponto ida ne’e, ita rasik mak bele decide ita hakarak simu Naroman ko continua mout ha nakukun rohan laek?

São João Evangelista bolu hikas ita hotu atu ba conhece clean liu tan Jesus Cristo nudar Naroman be haroman nakukun mundo nian. Leitura sira  Natal 24 no 25 nian mos sei ajuda ita loke ita neon, ita fuan ba Nai Jesus Cristo nudar NAROMAN no maksoin ita sarani nian.

 Istória badak ne’e, motiva ita hodi reflecte hamutuk katak sentido Natal la hela de’it iha situação di’ak nia laran maibé, iha situação funu mos ema bele celebra loron Natal naran katak fiar iha Cristo nudar Naroman na moris ema nian. Iha funu laran, ema sente moris ne’e iha nakukun laran. Nune’e’e,  ema mehi hodi hetan naroman iha nakukun laran. Mehi hetan naroman ne’e mak; wainhira ema hotu moris iha paz hodi hasees-an husu funu. Moris iha unidade wainhira interece política la hanesan. Natal bolu ita nobun ba saudades ka kerinduan hodi hanoin Jesus Cristo nia Natal. Natal bolu ema ba moris iha dame laran, housik funu, housik odio malu ba kotuk hodi foti Naroman dame nian tau ba oin. Foti Jesus Cristo tau iha fuan nudar centro dame no fiar nian. Haré Jesus Cristo nudar lalenok hodi haroman ita nia-an hanesan ema fiar nain.

Ita tama dadaun ona iha ambiente celebração festa Natal Nai nian. Nune’e’e, iha leitura sira, Maromak nia lia-fuan sai hanesan naroman hodi leno ema tomak nebé belit no hamout–an iha nakukun sala nian. Provérbio Português ida dehan; O ERRO É HUMANO ou Manusia tidak pernal terlepas dari kesalahan. Erro ka defeito técnico ne’e normal; Por exemplo; kaer motor la cuidado soke tun sae, motor aat lalais, maibé, erro ka falhanço ida lori ema ba pecado ne’e mak la normal tanba hasees-an housi Maromak nia graça; por exemplo ema kaben nain sira selingkuh tun sae, governantes balu comete actos corrupção, oportunista sira sai paracita ba estado, diferença política, hamihis respeita malu, nst, ne’e mak pecado lolos.

Mensagem murak ba Natal tinan ne’e mak; Haré Kosok oan Jesus hanesan Naroman dame ba mundo.  

La iha dame, ksolok na rahun di’ak karik iha tempo ohin loron, ne’e tan ema barak seidauk aprende haraik-an hodi hatene lolos maksoin Jesus Cristo. Iha Bíblia Antigo Testamento nian, Maromak la housik povo Israel lao mesak iha dificuldade laran, li-liu iha deserto laran nebé maran dekor; be atu hemu de’it mos araska, rai uut semo ba mai, ai-horis hun ida mos la iha, Wainhira Povo Israel sira sai housi Egipto hodi mai too rai Cana/Palestina, Maromak acompanha povo ida ne’e iha loron no mos kalan.

Iha kalan wainhira povo lao, Maromak haroman sira nia dalan atu sira la bele monu ba nakukun nia ukun, li-liu housi povo gentio sira be la tau fiar no confiança iha Maromak Israel nian.

Nudar sarani ba otas ohin loron nian, ita hatene katak; konta ho Nai Maksoin kosok oan, ita moris ona iha Naroman laran. Nune’e’e, sarani nebé moris iha naroman laran mak ema sira nebé hatene cria situação damen ba nia-an, ba nia família, ba nia sociedade, hodi moris iha hakmatek, damen no ksolok.

Lia fuan Dame facil tebes ema temi maibé, dificil tebes atu ita aplica iha moris. Iha discurso público sira, ita nia governantes sira mos sempre convida ema hot-hotu atu moris iha dame laran.  Wainhira hatto mensagem Natal, ema hotu sempre deseja Natal nakonu ho dame.

Maromak nia Nailulik sira mos sempre hatete bebeik atu sarani hotu moris iha dame no tolerância. Maibé, lia fuan mak lia fuan; ema ida rua de’it mak halo tuir. Situação nune’e’e mos acontece ona iha tempo João Baptista nian: wainhira João Baptista fo hatene povo tomak katak; Hadia Nai nia dalan, Haloos Nai nia dalan terik”.

Ohin loron são João Baptista nia saseluk mak amu lulik sira; amu sira mos hakilar bebeik maluk sarani sira maibé, housi número maioria católico ne’e, oitoan de’it mak housik tempo atu rona. Barak liu, preocupa ho isin nia hakarak. Loos duni katak ita hotu mehi ba moris iha dame laran hodi fihir Jesus Cristo kosok-oan hanesan espelho naroman no dame nia hun hodi nune’e’e, ita bele moris iha ambiente dame nia laran. Maibé, realidade contrário ida mak ema barak nunca haraik-an hodi hasees tiha hahalok nakukun nian hanesan; corrupção, adultério, violência domêstica, hadau malu poder, kan ten poder, loko-an, cria situação desordem no ambiente la hakmamtek ba maluk seluk nebé mehi ba moris dame nian. Tuir lolos, Lia-fuan dame kosok-oan Jesus Cristo nian mak Naroman  lolos ba ita ema nia lalaok sira.

Ba mentalidade corrupção, adultério, violência, odio malu no oho malu sira ne’e hotu, livro ben Sirac bolu atenção dehan;”keta ulun toos resik hodi hamtauk Maromak no keta hakbesik-an ba Maromak wainhira o nia fuan la fo ba Maromak”(sir 1,28).

Sarani barak dehan fiar Maromak maibé, nunca hatudu fiar ne’e iha hahalok testemunha nian. Iha família ida, dala ruma fen ho oan sira mak ba missa maibé, laen antar fen ho oan sira too odamatan boot Igreja de’it hafoin fila fali. Sai sasin katak halo tuir de’it Maromak nia hakarak no banati tuir Jesus Cristo nia doutrina sira. São Tiago dala ida tan bolu teni mai ita;”Fiar nebé la hatudu iha hahalok/ testemunha, fiar ne’e laek”.

Profeta Isaias mos la kole hodi koalia bebeik kona ba Cristo nudar Naroman hodi dehan;”povo be tur iha nakukun laran, Naroman boot ida mosu ba sira.(Is 9,1).  Nudar Cristão Católico, ita nia laran metin ba loron ikus mak Jesus Cristo nudar Naroman be halo-an ba ema hodi sente mos susar no moruk, malirin no manas ema otas horas ne’e nian.

Nune’e’e, Cristo moris nudar kosok-an ida hodi sai los nudar ema. Maromak, liu housi Jesus Cristo, hakarak nakfila mundo nia fuan no muda mos ema nia mentalidade hodi sai hanesan naroman oan basá Cristo rasik mak Naroman nia we-matan. Ba realização plano salvação ne’e, liu housi kosok-oan nia Natal, Maromak bolu tenik ita hot-hotu atu colabora no participa mos iha plano oinsa lori Naroman ba mundo iha ita nia vida hodi transforma mundo nia fuan sai Naroman nia horik fatin.

Ohin loron ita brani no esperto tebes hodi fo sasin kona ba nakukun do que  fo sasin naroman nian. Ita fasil liu tolok malu, ita fasil liu jura falsu temi Maromak naran, ita halo presépio laos hodi hanoin Jesus Cristo maibé, ita halo presépio hodi sai fatin hemu tua no sai fatin toca música festa nian.

Presépio muda nia função sai centro halibur malu hemu tua nian. Ita nia governante balu mos brani tebes halo corrupção hodi naok ita nia maluk sira nia direito maske iha tempo campanha garganta los combate corrupção, cria campo de trabalho, ita seluk buka hasees-an wainhira rona Maromak nia manu-ain ou amu lulik sira koalia kona ba Naroman.

Hahalok laek hirak ne’e la seluk la leet dada ita ba sai mensageiro ou manu ain diabo nian  do que sai manu-ain Maromak nian. Ba mentalidade sira ne’e hotu, livro ben sirac bolu atenção ba sarani ohin loron nian dehan;”keta ulun toos resik hodi hamtauk Maromak no keta hakbesik-an ba Maromak wainhira o nia fuan la fo ba Maromak”(sir 1,28). Sarani barak dehan fiar Maromak maibé nunca hatudu fiar ne’e iha hahalok testemunha nian. Sai sasin katak halo tuir de’it Maromak nia hakarak no banati tuir Jesus Cristo nia doutrina sira. São Tiago dala ida tan bolu teni mai ita;”Fiar nebé la hatudu iha hahalok/ testemunha, fiar ne’e buat mamuk ida”.

Durante fulan Dezembro nia laran, iha fatin barak, ema hotu, hahu housi kiik too boot  koalia no temi bebeik lia fuan Natal. Natal tinan ida ne’e mos sai kmanek liu tan tanba ema wain hafutar presépio ho música Natal termasuk musika nebé laos Natal nian. Presépio sira mos mesak rebo-rebo ho lampu pisca-pisca inclui tan atributo Natal sira seluk. Nune’e’e, ambiente Natal sente animado tebes. Situação hanesan ne’e fo kesan ka impressão ida katak iha Natal tinan ne’e, ema hotu sente Naroman Jesus Cristo nian leno tebes ema nia moris. Tanba ne’e mak são Paulo iha nia carta ba Tito hakerek dehan:”Maromak nia rahun di’ak mosu mai ona, lori maksoin ba ema hothotu (Tit 2,11). 

Iha fulan Dezembro ne’e nia laran mos, Cristão iha fatin hot-hotu iha lalehan okos ne’e, sente Naroman boot ida hafalun sira nia moris be kmanek. Maromak kosok-oan ninia solidariedade ho ita ema, hanorin atu brani moris hamutuk iha damen no domin nia laran. São Paulo dala ida tan hahisik lia murak iha nia carta ba Tito dehan;”basá, Maromak nia graça mosu ona, hodi lori maksoin ba ema tomak, no hanorin ita  buat hotu nebé ita sei halo atu housik buat hotu nebé la lori ba Maromak no housik tiha hakarak aat mundo ne’e nian hotu. Ita sei ukun an hodi moris di’ak no hamtauk Maromak iha mundo ne’e.// Karena kasih karunia Allah yang menyelamatkan semua manusia sudah nyata.Ia mendidik kita supaya kita meninggalkan kefasikan dan keinginan-keinginan duniawi dan supaya kita hidup bijaksana, adil dan beribadah di dalam dunia sekarang ini (Tit 2,11-12).

Maibé, durante fulan Dezembro  tinan ida ne’e, ita mos rona notícia ka berita triste bar-barak housi Televisão ho Rádio nomos housi jornais sira katak acontece corrupção, violação sexual, violência domêstica, funu, adultério ka selingkuh, aborto, oho malu, naok sasan, acidente tráfico no desastre wain tan iha sikun mundo nian inclui ita rain Timor Leste.

Maske ita hotu mehi ba situação dame no hakmatek laran, hodi konta ho Maromak nia tulun iha Naroman kosok-oan Jesus nian, maibé, factos lobuk ida iha realidade hatudu katak ita nia maluk sarani balun sei hadulur-an metin hela iha domínio nakukun nian, governantes balu hola feto rua too tolu, seluk tan ba passa fim de semana iha Bali-Indonésia ho osan estado nian.

Ffoin sae barak seidauk hetan campo de serviço, feto aat sira lalin-an housi nação barbarak mai buka osan dollar iha Timor liu housi actividade prostituição, Droga tama mai Timor hamesan sasan mercado sira. Estudante feto barak isin rua cedo de’it. Mane kabe nain sira barak liu contamina virus HIV/AIDS tanba ba toba arbiru ho feto aat sira nebé hetan moras AIDS. Buat pior liu nebé ita Timor halo ba ita nia nia maluk Timor oan seluk mak odiu malu too oho malu tan de’it ita nia grupo la hanesan, tan de’it ita nia partido ideologia diferente, tan de’it ita nia interece rasik hodi haluha katak ema seluk nebé ita hanoin aat ba ne’e mesak ita nia maluk sarani de’it, mesak ita nia Católico maluk de’it nebé precisa moris di’ak no hetan Naroman Maromak nian.

Dala ruma Ita sente bangga wainhira ita hakanek ka oho ema seluk maibé ita haluha katak ita nia moris ne’e sementara de’it. Reflecte ba realidade hirak ne’e hotu, Maromak liu housi kosok-oan Jesus, bolu ita hotu hodi hakribi nakukun sala mortal nian hodi loke fuan ba Naroman kosok-oan nian iha Natal ida ne’e.

Natal sei sai hanesan lia fuan mamuk ida enquanto iha prática; ita sei funu malu nafatin, político sira sei pormessa falssa nafatin, lider sira sei se kotuk ba malu nafatin. Ita haluha ita nia identidade katak neon ida laran ida fiar iha Maromak ida de’it no mos neon ida laran ida mesak Timor oan de’it.

Natal hanorin ita atu hatene taka liman husu tulun Maromak nian hodi fo netik Naroman maksoin nian, leno ita fuan, hodi muda hahalok odio no oho malu nian, violência nian, li-liu corrupção no adultério nian. Ba hahalok hirak ne’e, profeta Isaias husu ba Maromak hodi hateten;”Ita halakon sira nudar dadur, Ita silu tohar ema aat sira nia oe be hakanek povo nia kabas”(Is 9,3). Dala ida tan  livro ben sirac nian bolu tenik ita nobun  dehan;”keta ulun toos resik hodi hamtauk Maromak no keta hakbesik-an ba Maromak wainhira o nia fuan la fo ba Maromak”(sir 1,28).  Se ita nia ulun mamar hodi cria siutação dame-hakmatek maka ita mos colabora ona ho Maromak hodi sai Naroman nia oan no fihir Jesus kosok-oan hanesan Naroman nia hun lolos.

Durante tempo Advento ita hananu tane liman ba Maromak dehan: MAI….!  MAI……! NAI JESUS! LALAIS HIIT-AN MAI, RAI NE’E MATE MALIRIN, AMI KLAMAR LAKON NIA MANAS…….MAUN ALIN LA HADOMI, RAI NE’E LA IHA DOMIN. Durante Advento ne’e, Ita mos rona ona são João Baptista nia lia fuan be dehan: HADIA NAI NIA DALAN-HALOOS NIA DALAN TERIK. Horas ne’e, mai ita festeja Kosok Oan Jesus nia aniversário ne’e.

Lia murak ba ita nudar bukae Natal ba ita sarani nia moris mak;

  • Haburas unidae no Nacionalismo iha ita sarani nia leet atu ita mos sente festa Natal ne’e hanesan Naroman be haroman ita nia moris tomak.
  • Mai hafoun fila fali ita nia espérito dame nian nudar lia murak be kosok-oan Jesus lori mai ita ida-idak nia fuan.
  • Hadomi Maromak liu sasan hot-hotu, nomos hadomi ita nia maluk sira hanesan ita hadomi ita nia-an rasik iha Naroman maksoin nian.
  • Governantes sira hasees-an housi mentalidade corrupção no hadau malu poder hodi hamoe nia-an ho família sira nomos hafoer Igreja Católica nia naran.
  • Tan ne’e, Natal nia sentido klean la bolu ita ba hasae gloria ba Maromak iha lalehan as ba maibé, kosok oan nia moris lori mos paz mai ema mundu rai klaran. Basa hahalok aat sira nebé horas ne’e buras iha Timor no problema seluk tan nebé mosu iha ita rai, sai hanesan sinal ida katak ita laos naroman oan maibé nakukun nia oan.

Ba ida ne’e, salmo Domingo uluk nian mos hahisik aten brani mai ita nobun ho lia fuan murak ne’e: ”Nai, ami Maromak, halo ami fila, hatudu ita futar oin mai ami, ami hetan maksoyn”. Salmo ida ne’e hetan liu tan ninia rohan iha Salmo seluk nebé dehan: RAI ULUN-RAI IKUN HARÉ ONA MAKSOIN, MAROMAK NIA MAKSOIN. Feliz Natal ba ita hotu…………!  (Ignasoliveira)

 

 

Evangelho:

“Nai Jesus Cristo nia Evangelho nudar são João haktuir” (JO 1, 1-18)

Hori uluk kedas,  Lia Fuan iha nanis; Lia-Fuan horik nais hamutuk ho Maromak; Lia Fuan Maromak nanis. Houri uluk kedas Nia horik hamutuk ho Maromak; Maromak halo sasan hotu hodi Nia! La hodi Nia, buat ida la Moris: Nia mak moris nia nain! Moris ne’e mak ema nia naroman! Naroman nabilan hela iha nakukun laran, maibé, nakukun la hatene Nia! Mane ida mosu mai, Maromak mak haruka: nia naran João, nia mai nudar sasin ida atu fo sasin kona ba naroman. Lia Fuan mak naroman loloos, naroman ida be mosu iha rai klaran; leno ema hothotu. Nia horik duni iha rai klaran; rai klaran Nia mak hakiak, maibé, rai klaran la hatene Nia! Nia mak buka Ninian rasik, maibé, Ninian sira la simu Nia! Maibé, ema sira be simu Nia no fiar nia naran, Nia haraik kbiit atu sai Maromak oan! Ema sira ne’e laos moris housi ema nia raan, laos moris tuir ema nia isin nia hakarak, maibeé, sira moris housi Maromak. Lia Fuan ne’e halo-An tiha ba mane, Nia moris duni hamutuk ho ita!  Ami haré tebs nia naroman, naroman ida be oan Mane mesak, simu housi nia Aman. Nudar oan Mane mesak ida kmanek  no loos tebes! João fo sasain kona ba Nia, dehan: “ema ida ne’e ninian mak hau hateten nanis ona: Ema ida nebé sei mai tuir hau, Nia uluk liu tihahau, basá, Nia moris uluk liu hau!” Los duni, housi Ninia di’ak barak tebes, mak ita simu di’ak oioin tutuir malu. Basá, maske ukun fuan mai housi Moises, graça no lia loss mai housi Jesus Cristo. Ema ida la dauk haré Maromak: Oan Mane mesak horik ho Maromak Aman, Nia de’it mak haklaken Maromak mai ita!

Lia Maksoin.

OHIN IHA DAVID NINIA CIDADE MORIS ONA BA IMI MAKSOIN IDA, NIA MAK MESSIAS, KATAK NA’I (LC 2, 11)

Maun alin sarani doben sira nebé hau hadomi iha ita nain Jesus Cristo, Naroman to’o ona mai, Ksolok be ita hein to’o ona mai, dame nain too ona mai, ukun nain lolos to’o ona mai. Nia mak Jesus Kosok oan be moris iha Belem, David ninia cidade, Nia, Na’i Maromak ninia oan, Maksoin ema nian, rai klaran nian no kriatura hotu-hotu nia maksoin. Rai hotu lakan nabilan tamba kosok oan ne’e mak Maromak-Maksoin be tun mai rai, mai moris hamutuk ho ema, atu soi ema sira no atu soi rai klaran tomak. Iha kosok oan ida ne’e Maromak hatudu ninia domin rohan laek ba ita ema sira hanesan uluk no fo hatene sai nanis ona ba ita ninia beiala sira housi geração ba geração, katak loron sei to’o mai, feto virgem ida sei kous no tur ahi oan Mane ida, oan ne’e sei sai boot no nia mak sei tur iha ninia aman David nia trono hodi ukun. Ida ne’e mak oras ne’e acontece, mosu no hahu dadaun ona iha ita le’et. Maromak halo tuir lolos kedas ninia promessa hodi hahu soi ona ita ema sira iha kosok oan ida ne’e nebé foin moris, hodi nearas hafalun no hatoba hela iha balada han fatin kiik ida.

Maun alin sarani doben sira,

Buat boot nebé oras ne’e acontece no mosu dadaun iha ita le’et halo ita haksolok tebtebes basá ita hatene katak Kosok Oan ida be foin moris ne’e maksoin ida ita nian, criatura tomak nian. Nia mai atu ukun ita tuir dalan justiça nian, ukun ita iha paz, domin, perdão, ksolok no laran luak nian. Ne mak halo ita haksolok, mundo no rai klaran tomak haksolok, hamutuk ho anjo lubun boot iha lalehan ita hananu haksolok hahí hanai Maromak ba ninia domin no ba acontecemento boot liu hotu iha ita ema sira ninia história ne’e, Maromak tun mai rai hodi moris hamutuk ho ema no soi ema sira, lori dame, domin, ksolok no laran metin bae ma hotu. Ida ne’e kata mos Nia tun mai hodi ukun ema sira no soi ema sira nafatin. Primeira leitura haktuir mai ita katak “Nia mak kaer Oe ukun nian, ema hanaran nia Lia-Nain boot! Maromak kbiit wain! Aman tinan ba tinan! Dame Nain! Nia ukun sei boot, Nia dame sei la lakon. Nia sei ukun ho hahalok los nian/ho justiça, nune’e ninia ukun sei metin nafatin ba nafatin”. Leitura ne’e fo hatene mai ita momos katak kosok oan ne’e laos ema baibain ida, laos ukun nain baibain ida, maibé nia LIA NAIN BOOT, NIA MAROMAK, NIA AMAN. Katak kosok oan ne’e revelação Aman Maromak nian, Nia Maromak nebé tun mai rai. Ninia hahalok sira mesak hahalok Maromak nian nebé soi ema no halo ema sira be fiar iha Nia bele realiza mos hahalok maksoin nian nebé nia halo, hodi ikus mai halo ema hotu hotu sai los iha sira ninia hahalok nune’e bele hetan moris dame, moris ksolok no nakonu ho domin lolos nian, moris ida nune’e sei too ba rohan laek tamba Nia.

Segunda leitura fo hanoin mai ita katak atu ema sira hotu bele moris los, bele sai badinas iha hahalok di’ak no los, hodi moris nakonu ho dame, domin, ksolok, perdão, laran luak no laran maus ba malu, laran metin no fiar metin nia laran hodi ba to’o moris rohan laek, ita Nai Jesus Cristo fo ninia-An atu terus fodik ba ita, to’ó mate iha Cruz no liu loron tolu moris hias fila fali. Cristo ninia terus, Cristo ninia mate no Cristo ninia moris hias mak soi ita basá housi nebá nia halo ita hetan duni fali moris foun ida, moris ida nebé sai los iha hanoin, iha liafuan no iha hahalok, moris ida nebé nakonu ho domin, paz, justiça, laran luak no perdão, laran metin no fiar metin ba Maromak nafatin hodi hatene no bele fahe moris graça ida ne’e nian ba ema hotu hotu.

Doben maun alin sira, mistério Na’I Maromak halo-An ba mane hodi mai hola isin ida hanesan ita no moris hamutuk ho ita mak sai início moris ida nune’e nian, katak início ba moris graça, moris maksoin no moris rohan laek nian.

Tan ne’e maun alin doben sira, oras ne’e ita hatene momos ona katak Maromak ukun nain kbiit tomak nain, dame nain, justiça nain iha ona ita leet, moris lolos ida nebé ita hotu hakarak ninia nain no we matan iha ona ita le’et. Buat sira nebé durante ne’e ita buka iha ita ninia moris mak iha ona ita leet basá ninia nain mak tun mai horik ona iha ita leet nudar maksoin ne’e. Ita buka dame, hakbesik ba Nia ita sei hetan dame, buka iha fatin seluk ita sei la hetan; ita buka justiça hakbesik ba Nia, iha Nia justiça sei naresin mai ita, iha fatin seluk ita sei la hetan justiça lolos; ita buka ksolok, hakbesik ba nia basá nia mak ksolok hun lolos, ita sei labele hetan ksolok iha sasan sira nebé ita iha naresin, hirak ne’e sei fo ksolok loron balun de’it, ksolok lolos sei hetan de’it iha Jesus be mai moris ho ita ne’e; ita buka perdão, ita buka laran maus, laran luak, buka sucesso, buka inteligência, buka sabedoria, buka paciência, buka fiar, buka laran metin, buka buat di’ak sira hotu, hakbesik ba nia ita sei hetan basá nia mak buat hirak ne’e hotu ninia nain no nia we matan; ikus liu ita bele compreende katak ita buka maksoin iha buat hotu hotu no iha moris ne’e, so ba nia de’it mak ita hakbesik hodi hetan, basá nia mak maksoin lalehan no rai nian, iha fatin seluk ita nunca sei hetan.

Ita ninia hakbesik-An Maksoin moris nian hahu kedas ona ohin kalan ne’e iha ita ninia tuku tur hodi hahí, hanai no adora nia iha presépio be nia haktoba-an ba ne’e, hodi mos simu graça no bênção tomak nebé nia lori mai ita no ba mundo tomak. Amen.

 

Taibessi, 24.12.20, Ano B, Por:Pb.

LOKE FUAN BA MAROMAK

Reflexão & Leituras Domingo Advento IV, Ano b, 2020

 

Ita nobun mak KREDA (Católica), KREDA (Católica) mak ita; união be libur mutuk tan Maromak Futar Lia. “..“halo buat nebé ó fuan husu ba ó basá, Nai Maromak ho ó”…basá, ba Maromak buat ida la susar” (Lc 1,38).

Senhor ida naran Harianto ema indonésio, haktuir nia esperiência fiar nian nune’e: Nu’udar Cristão Católico, nia mós serviço iha ofício estado nian ida no nia hetan successo boot iha nia serviço fatin ne’e. Liu tiha tinan balu nia laran, nia casamento ho nia fen-kaben naran Lestari. Senhora Lestari ne’e ema protestante ida nebé serviço iha loja boot ida. Sira na’in rua ikus mai decide atu simu sacramento Matrimónio tuir ritual Igreja Católica nian. Simu tiha sacramento matrimónio, sira hahu moris foun nu’udar ema kaben na’in.

 Iha sira nia uma kain mós economicamente buat ida la kuran. Sira ba serviço loro-loron hanesan bai-bain no sira mós la haluha cumpri sira nia fiar hanesan ema Católico. Senhora Lestari mos começa aprende no hatoman-an ho cerimónia ritual Igreja Católica nian basá, uluk nia ema protestante ida nebé la toman ho cerimónia Igreja Católica nian. Nune’e, sira la kuran buat ida iha sira nia família laran. Tanto materialmente tanto espiritualmente.

Liu tiha tinan tolu sira hahu enfrenta problema ida. Problema ne’e nia hun mak maske sira casamento ona maibé, too momento ne’e mos sira seidauk hetan oan. Sira na’in rua ikus mai decide atu ba konsulta iha hospital. Rezultado ikus hatudu katak senhora Lestari nia saúde la dun favorável atu sira bele hetan oan. Precisa tempo naruk no senhora Lestari tenke tuir terapia hodi bele iha possibilidade hetan fali oan. Dignosa doutor nian ne’e halo sira sente desespero ka putus asa tan sira kal la  hetan duni oan ona.

Hasoru problema hanesan ne’e, sira entrega buat hotu ba Maromak. Sira continua moris hanesan família Católica ida no sira hahu halo novena ba na’in feto, além de ne’e, sira mos ba vizita santuário na’in feto nian iha fatin balu hodi comunica sira nia laran taridu ne’e.

Tan Maromak rona sira nia harohan hodi hatan sira nia orasaun; liu tiha tinan haat depois de diagnosa ne’e, senhora Lestari isin rua no ikus mai kous duni oan feto ida. Família senhor Hariyanto nian sente katak sira nia fiar no mos sira nia orasaun durante ne’e la saugate ida. Maske diagnose katak sira sei la bele hetan oan maibé liu husi orasaun no esforço oioin, sira bele hetan duni oan feto ida. Ida ne’e hanesan milagre ida nebé ita ema la espera no ita mos la bele esplica ho ita nia razaun maibé, ba Maromak buat hotu bele.***

Semana ikus tempo Advento, Uma Creda Católica besik dau-daun ona ba celebração Natal Nai nian.  Maromak nia futar Lia Fuan Domingo semana ne’e convida ita nobun nu’udar Cristão Católico, atu tau fiar metin liu tan ba Maromak tanba, iha Maromak nia futar oin, buat ida la susar.

Evangelista São Lucas bolu hikas ita nobun atu saran-an tomak ba Maromak nia liman hodi colabora mos ho Maromak iha realização mistério salvação ba ema mundo tomak. Leitura sira  Domingo semana ne’e mos sei ajuda ita loke ita neon, ita fuan ba Nai Jesus Cristo nia lia fuan ksolok Evangelho nian.

Istória ilustrada hanesan ne’e laos buat bosok ida maibé , ne’e istória kiik ida husi realidade bara-barak nebé acontece iha hela iha ita nia leet. Experiência ne’e, além de acontece ba família senhor Hariyanto ho senhora Lestari, bele mos acontece ba ita lobuk ida iha ita nia vida hanesan Crsitão Católico.

Los duni, família balu too horas ne’e la hahoris oan maibé, barak mos liu husi sira nia oração no esforço, sira hetan oan. Lição murak nebé ita bele aprende hosi istoria badak ne’e mak; entrega ita nia susar no terus tomak ba Maromak basá, ba Maromak buat ida la susar wainhira ita tau ita nia confiança iha de’it Maromak. Naran katak ita mos halo netik esforço ruma konta ho Maromak nia tulun. Tanba ne’e mak iha evangelho São Lucas Domingo Advento dla 4 nian, ita sei rona Anjo nia lian be dehan; ba Maromak buat ida la susar.

Nu’udar Cristão Católico, Anjo Gabriel nia lia murak ne’e hafanun  ita hodi neon na’in, reza no se tilun ba Nai Maromak Nia lian de’it mak ita bele hetan tulun hosi  Maromak ba plano salvação Maromak nian.

Semana ne’e, ita tama ona ba Domingo ikus  tempo Advento nian. Creda Católica iha mundo rai klaran tama  dadaun ona tempo forte iha semana ikus atu celebra festa boot Natal Nai nian. Nu’udar Cristão Católico seguidor Jesus, Maromak bolu tenik ita atu loke neon no fuan ba Maromak nia Espérito Santo basá, Maromak hili ita sai sarani no hamahan nafatin ita ho nia Espírito Santo. Ba ida ne’e, São Efrém iha nia comentário ida, hateten;  “Nai Maromak hakarak hamahan atu nune’e ita metin nafatin iha matan moris. nune’e, ita ida-idak bele hanoin katak acontecimento hotu hafunan ba ita nia moris durante ita nia vida tomak”.

Loron ida-rua4 tuir mai iha semana ne’e, ita ba celebra ona solenidade Natal; Nai maksoin Jesus Cristo mai moris iha mundo hodi sente mos ita nia situação ema nian iha ita ida-idak nia fatin li-liu ita ida-idak nia fuan.

Roupa obralan Natal nian ema fan reb-rebo los iha Timor Plaza, loja colmera nia oin sira. Colmera, Timor Plaza, OB Ai-Mutin, Ponte Comoro 2, ema vizita loron tomak hodi boron roupa Natal nian. Iha lorokraik  rai nakaras, se Ita bibi ain ba mai oitoan iha Dili laran, ita matan halai tan de’it iha cidade nia sikun too leet sira, presépio modelo oioin de’it.

Jovem sira liliu mane no feto balun rame-rame hafutar sira nia presépio ho lampu Natal, ai funan, letra, duut, coluna bo-boot hodi toca música Natal ho música bajakan too kalan boot, imagem menino Jesus ho Nossa Senhor ho São José, inclui mos bibi atan ho Liurai na’in tolu. Ornamento hirak ne’e halo ita fuan hakmatek basá, ambiente festa Natal nian forte tebe-tebes iha Rai Timor. Iha foho, sarani barak mos prepara-an ho presépio modelo oioin.

Maibé, infelizmente hanesan iha Dili no iha município sira, ema barak liu mak nadodon ba halo compras roupa do que nadodon ba confessa, nadodon ba hakonu netik Kreda hodi halo mos preparação ruma ba klamar nian.

Nune’e, iha biban kmanek ne’e, mai ita hanoin fali ba kotuk, ita nia istória moris nian tinan hirak nia laran nebé liu ona. Saida mak ita halo ona no buat saida mak ita seidauk halo iha Maromak nia futar oin hodi hatudu provas katak hau ne’e ema sarani ida. Hau mos ema criatura nebé hatene taka liman hodi reza no loke fuan ba Maromak nia Espírito Santo.

Iha hakmatek laran, mai ita reflecte fali oinsá Maromak envolve-an iha ita nia moris li-liu iha ita nia istória hanesan ema sarani. Presépio ne’e símbolo ida. Maromak mai hela iha ita nia fuan laos mai hela iha presépio nebé halo para hatudu ita nia creatividade external (liur) de’it.

 

Wainhira ita hanoin kona ba Natal, baibain ita nia imaginação halai liu ba iha presépio sira,  missa solene, ema barak hatais hena mesak foun, sarani sira nadodon rame-rame ba missa, ema visita malu husi uma ida ba uma seluk, música Natal sira lian iha fatin hotu,……………no buat seluk tan. Ba lalaok hirak ne’e, ita la bele dehan ne’e la di’ak maibé, ita bele dehan katak ne’e seidauk too atu ita compreende sentido lolos Natal nian. Dala ida tan Jesus Cristo Maksoin laos mai hoorik iha nebá. Nia hakarak mai horik iha ema nia fuan nebé moos.

Reflexão nebé los liu mak; ho Natal ita hanoin no reflecte momento salvação nebé Maromak haraik mai ita iha Nai Jesus Cristo nia-an tomak. Liu husi Jesus Cristo nia Natal, Jesus Menino nia encarnação (hola isin hanesan ema), Maromak hakarak hanorin ita atu hatene taka liman nodi loke neon ba Maromak basá, ba Maromak buat ida la susar (Lc 1,38).

Iha leitura sira Domingo semana ne’e nian, Maromak nia lia fuan hatutan mai ita tomak atu ita colabora hamutuk ho Maromak nia Espírito Santo atu bele realiza salvação ba mundo ida ne’e. Nune’e, enquanto ita fiar metin ba Maromak então Espírito Santo sei hamahan ita no hametin ita fiar tan ita mos hetan confiança iha Maromak nia futar oin.

Iha Evangelho São Lucas, ita sei rona figura feto na’in rua nebé sei sai hanesan exemplo ba ita nia moris tomak. Figura ida uluk mak Na’in Feto virgem Maria nebé atu hakous Jesus Cristo. Tuir fali, figura ida seluk mak santa Izabel, João Baptista nia inan.  Virgem Maria hetan kbiit husi Espírito Santo hodi hakous Jesus Cristo maske nia saran-an tomak ba Maromak hodi la moris hamutuk ho ninia laen São José.

Tuir fali, Santa Izabel, maske ferik ona maibé, tan de’it nia fiar, Maromak hatan nia oração hodi haraik kbiit Espírito Santo ba nia hodi hakous João Baptista nebé sei sai Maromak nia manu-ain,  be bolu ema hotu hakribita salan. Lia fuan murak hirak ne’e tomak sai hanesan referência atu ita colabora nafatin ho Maromak nomos hodi justifica ka hatudu provas katak ba Maromak buat ida la susar.( Lc 1,38).

São Paulo iha nebé nia carta ba sarani sira  iha Roma hakerek hodi hateten: Maun alin sira: Maromak mak fo kbiit, atu ita nia fiar metin nafatin.(Cf Rm 16,25).

Iha Bíblia Antigo Testamento nian, li-liu iha livro siracide nian descreve momos  viSão negativa ida katak “liu husi feto ida (EVA) mak pecado tama iha mundo no tanba nia duni mak ita hotu tenke mate”(Sir 25,24).

Ita mos keta haluha katak liu fali husi feto ran ida be Maromak fihir nanis mak Maromak oan encarna-an hodi  hola isin hanesan ita ema ao mesmo tempo hatudu Maromak nia mistério boot, mistério salvação nian. Maromak nia vontade ne’e hakarak justifica fila fali katak Maromak la husik ema mout klean iha sala laran no Maromak mos hakarak renova fali dignidade EVA nian liu husi ita NA’IN FETO nia hatan ba Maromak nia plano salvação.

Acontecimento milagroso hirak ne’e dala ida tan hakarak comprova duni katak ba Maromak buat ida la susar. Basta ita fiar de’it hodi colabora ho Maroamk nia plano tomak maka ita mos sei hola parte iha Reino Lalehan wainhira ita husik mundo ida ne’e.

Na’in feto nia vida exemplar hanorin mos ita atu keta tauk hodi rona Maromak lian. Nu’udar Anjo São Gabriel hateten ba Maria iha Evangelho katak; “keta tauk’.  Wainhira ita halakon ita nia tauk hodi colabora ho Maromak então, automaticamente ita mos sei saran-an tomak ba Maromak nia providência ka Maromak nia plano tomak ba mundo nia salvação. Exemplo concreto nu’udar virgem Maria hateten rasik ba Anjo São Gabriel dehan; “ne’e sa Nai..!  atan oan mak ne’e, halo tuir de’it ita hakarak ba”, ba Maromak buat ida la susar.

Acontecimentos milagroso sira nu’udar haktuir iha Antigo Testamento nomos Novo Testamento prepara hela ita nobun ba impossibilidade sira seluk nebé sei acontece. Natal nebé ita celebra hamutuk tinan ne’e, la seluk mos ho Natal nebé ita celebra ona iha tinan hirak liu ba kotuk.

Natal hanesan mos ita sei celebra iha tinan hirak oin mai. Se nune’e, Natal ne’e acontecimento bai-bain ida basá, husi ita nia parte ita seidauk fo valor ba Natal ne’e nia sentido rasik. Ita toman liu halo presépio hodi hafutar murak oi-oin maibé ita nia presépio fuan nia nian seidauk halo tuir Maromak nia hakarak hanesan Nian feto nia lian hatan Anjo.

Figura Bíblica sira tuir mai, sai hanesan exemplo kona lia fuan BA MAROMAK BUAT IDA LA SUSAR; Sara, Abrão nia fen-kaben ho kbiit Maromak nia Espírito Santo nian bele kous nia oan sira iha idade nebé ferik ona.

Manoah nebé taka liman harohan ba Maormak loron-kalan too ferik tiha ona mak Maromak foin hatan nia oração hodi haraik oan mane ida naran Samson (Cf Juizes 13, 2-3). Samson ne’e tuir mai sai defensor ba ema Israel sira nebé ema filisteu sira halo terus. Nune’e, ba Maromak buat ida la susar.

Santa Izabel São João Baptista nia inan iha Novo Testamento mos hakous João Baptista iha idade nebé ferik ona. Dala ida tan; ba Maromak buat ida la susar. Evento milagroso hirak ne’e tomak esclarece mos katak ita nia vida ida ne’e la lao nune’e de’it maibé Espirito Santo mak fo kbiit.

Lição kmanek nebé sai hanesan bukae ba ita nia preparação espiritual iha Domingo ikus Advento nian ne’e mak:

  • Ita hadia dadaun presépio iha ita ida-idak nia uma maibé ita mos precisa hadia ita nia presépio iha ita nia fuan (klamar).
  • Presépio sira sai hanesan sinal exterior/ sinal liur maibé presépio ne’e sei sa kmanek wainhira ita hafutar ita nia klamar liu husi sacramento confessa no halo morin ita klamar liu husi missa santa. Ba ida ne’e profeta Natã iha primeria leitura hateten ba liurai David dehan;”halo buat nebé o fuan husu ba o, basá Nai Maromak hamutuk ho o”.
  • Nu’udar sarani nebé kaer metin iha virtude Uma Kreda nian iha Fé, Esperança no Caridade. Lalaok NA’IN FETO nian nebé saran-an, tau confiança tomak iha Maromak no hatan ba Maromak nia convite hodi hateten lian ne’e; ne’e sa Nai atan oan mak ne’e, halo tuir de’it ita hakarak”. Basá, ba Maromak buat ida la susar. Ho lia fuan seluk dehan BAGI TUHAN SEGALANYA MUNGKIN.
  • Ikus liu, mai ita enfeita ita nia presépio klamar nian laos ho tua sabu, laos ho lia fuan tolok, baruk ten, odio malu, no kan ten ba poder maibé, mai ita hafutar ita klamar ho de’it Maromak nia Espírito Santo. Iha Maromak nia futar oin buat ida la susar. Nu’udar Cristão Católico, ita tau fiar iha de’it Jesus Cristo.

 

Loke laran ba Maromak iha tempo Advento ida ne’e hanesan música missa nebé bai-bain ita hananu dehan: MAI MAI NAI JESUS! LALAIS HIIT-AN MAI, RAI NE’E MATE MALIRIN, AMI KLAMAR LAKON NIA MANAS. Pergunta ida tan mk ne’e; se Jesus hiit-An lalais tiha mai, ita prepara ona ka lae. Keta halo ita seidauk prepara karik? Keta halo ita prepara presépio, sapato foun kalsa foun oioin maibé keta klamar seidauk foun karik? Ba ida ne’e, salmo hahísik aten brani mai ita nobun ho lia fuan murak ne’e: ”Nai, ami Maromak, halo ami fila, hatudu ita futar oin mai ami, ami hetan maksoyn”. Assim Seja e Bem Haja (ignasoliveira2020)

 

Note:

Reflexão ne’e publica ona iha Programa HAFUNAN FIAR

Radio Timor Kmanek (RTK) iha Dezembro 2014.

HAU NE’E LAIN IDA NEBE HAKILAR IHA RAI FUIK MARAN: “IMI SEI HADIA NA’I NIA DALAN” JO 1, 23.

Maun alin sarani doben sira nebé ha’u hadomi iha ita nain Jesus Cristo. Ita ema sarani sira ninia vocação comum nebé sai vocação boot no aas liu mak moris santidade nian. Ema so bele tama iha Maromak ninia reino wainhira iha pratica moris loro-loron nian nia hatudu duni moris ida lao iha dalan santidade nian. Ho duni dalan moris santidade nian mak ita iha condição hodi bele hasoru no moris hamutuk ho Naí Maromak santo.

 

Na’i Maromak ninia futar liafuan iha domingo ba dala III ida ne’e nian bolu duni ita atu halao nafatin ita ninia moris iha dalan santidade nian hodi bele ba hasoru Maksoin nebé atu mai hodi soi ema tomak. Nune’e mak iha primeira leitura ita rona haktuir mai ita iha primeira leitura dehan katak “Naí Maromak ninia Espirito iha ha’u leten, basá Naí tau mina mai ha’u. Nia haruka ha’u ba haklaken Liafoun di’ak bae ma sira be terus, halo di’ak ba ema sira be laran susar,  fo hatene katak sei liberta tiha sira nebé ema kaer no dadur hodi fo hatene tinan graça nian. Ha’u haksolok tamba Ha’u nia Maromak nebé fo hatais ha’u ho Maksoin.” Naí Maromak rasik mak atua iha ita ida idak ho hahalok maksoin nian, ita precisa loke mak ita ninia neon no laran ba Maromak hodi mos moris tuir ninia hakarak sira. Buat nebé imposivel mai ita halo, ho Maromak possivel tebes. Ho Maromak de serteza ita bele realiza hahalok sira maksoin nian hanesan Nai rasik dehan “Nia sei haksolok ema hotu ho justiça lolos nian,” justiça iha hanoin, iha hahalok no iha liafuan. Nune’e tuir Maromak ninia futar liafuan ita buka atu iha tempo advento ne’e ita hakas-an no hanorin an fila fali hahu oras ne’e ba oin “koalia los liu tan, la bosok no la temi leet Nai Maromak ninia naran, la bobar lia no la lori lia, la tarata no la tolok. Hanoin no halo los ka justo liu tan hodi; la hanoin at no la halo aat hasoru ema seluk, maibé buka de’it atu hanoin no hakarak di’ak de’it, halo di’ak de’it ba ema hotu ninia moris ksolok no paz.

 

Segunda leitura lori ita ba hatene katak ita buka halo di’ak nafatin nune’e hodi uluk nanain agradece ba Maromak tamba ita halo tuir Maromak ninia hakarak no tuir mai lori ksolok bae ma seluk liu husi ita ninia moris nebé nakonu ho ksolok. Atu bele to’o iha ida ne’e oração mak sai força indispensável ida nebé hakarak ka lakohi nudar ema sarani precisa haklean liu tan iha tempo quaresma ne’e hodi bele garante moris ksolok ida ba ita hotu hotu. Advento convida ita atu harohan liu tan baibain ita harohan ka halo oração hdoi halo ita besik liu tan ba Maromak no ba maun alin sira, liu liu harohan ba sira nebé percisa tebes ita ninia tulun. Ne’e hotu mak Maromak ninia hakarak. Ita bele hahu ida ne’e los no concreto liu tan husi ita ida-idak ninia-an, ita la toman reza karik hanorin an reza, ita la toman harohan espontâneamente karik ita buka harohan nune’e iha buat saida de’it mak ita hakarak no ita halo. Ita fo tempo barak liu ba televisão no buat seluk karik, oras ne’e buka fo tempo barak itoan mos ba halo oração ka reza. Hodi moris halo nune’e ksolok lolos ita sei hetan duni no sei halo ema seluk mos moris contente.

 

Iha evangelho Maromak convida ita atu ita la moris halo nune’e iha de’it tempo advent ne’e maibé moris halo di’ak nune’e iha ita ninia moris tomak. Ne’e hanesan ema sala nain nebé hadia-an nafatin, curige-an nafatin husi sala ba los, hodi hakas-an halo tuir nafatin Maromak ninia hakarak sira hotu. São João Batista hanaran ida ne’e hanesan HADIA NAI NIA DALAN. Ita compreende nudar hadia ita ninia moris hodi prepara-an ba hasoru Maksoin nebé sei mai. Maksoin ida nebé mas que ita la soi ba ninia domin no ninia laran luak, nia hatudu no realiza nafatin hahalok maksoin nian iha ita leet. Maksoin ida ne’e hakonu no hafoun ita ema sira-an ho we no ho Espirito Santo, espírito nebé hamoris ita ninia moris, espírito nebé bele tahan ita husi buat aat sira tomak no haraik kbiit mai ita atu bele mos realiza hahalok maksoin nian iha ita ninia-an no ba maun alin sira seluk. Iha ne’e mak ita dehan katak ita hetan duni Maksoin no ita lori duni maksoin ba ema seluk no ba mundo tomak.

Doben maun alin sira, relação ida oinsa mak ita ida-idak iha ho ita Nain Jesus Cristo no ho Espirito Santo, Maromak ninia Espirito rasik? Iha relação? Laiha? Iha itoan de’it? iha klean? Haluhan lakon? Fiar no laran metin lolos iha Espirito Santo, iha Aman no iha Oan?

Tempo advento halo ita atu hadia buka hatene fila fali ita ninia moris fiar nian ida hanesan ne’e hodi lori liu tan ita ninia-an besik fila fali ba Maromak, hametin no haklean fila fali ita ninia relação fiar nian ho Maromak no ho Maun alin doben sira. Amen.

 

IIID ADVENTO, ANO B

13.12.20, Por: Pb.

NIA LAOS ROMAN, MAIBÉ, FO TESTEMUNHA KONA BA ROMAN

(Jo 1,6-8,19-28).

Reflexão no Leituras Domingo Advento 3, Ano B, 2020

 

Ita haksolok tan ita sai Cristão Católico. ”keta ulun toos resik hodi hamtauk Maromak no keta hakbesik-an ba Maromak wainhira o nia fuan la fo ba Maromak/ Não sejas rebelde ao temor do Senhor, nem te aproximes dele com um coração fingido/(sir 1,28).

Semana ida ne’e, Uma Creda Católica hahu ona tama ona ba Domingo ba dala tolu tempo Advento nian. Nune’e, ita la sente katak celebração Natal Nai nian besik dadaun ona mai. Oinsa ita nia preparação ba festa Santa ne’e? São Paulo hahisik lia iha nia surat ba sarani sira iha Corinto tenik “ba ema balu Maromak haraik Dom da ciência atu sai matenek, balu Dom da profecia atu haklaken, balu Dom da cura atu bele bali moras sira, tan ne’e mak sira fahe matenek ida ne’e mai ita, atu ita matan moris neon nain ba sasán mundo nian” (1Cor 12, 8-10).

Semana ne’e, Nai convida ita hotu nu’udar sarani oinsa ita bele sai sasin nain ka sai ema nebé brani fo testemunha kona ba ita nia fiar. basá, ne’e mak Maromak hakarak imi halo iha Cristo Jesus.

Evangelista são João bolu hikas ita nobun atu coragem eh aten brani fo testemunha ita nia fiar iha qualquer fatin. Leitura sira  mos sei ajuda ita loke ita neon no fuan ba Nai Jesus Cristo nu’udar NAROMAN no Maksoin ita Cristão Católico nian. Iha Evangelho Domingo uluk Advento nian, Jesus rasik sei temi lia fuan Matan moris neon nain. Enquanto Evangelho Domingo Advento semana ne’e, figura João Baptista mosu nu’udar manu-ain be fo sasain Maksoin nebé sei mosu mai iha loron ikus. Tanba ne’e mak são João Baptista rasik confessa ba fariseu no levita sira katak; nia laos Messias maibé, Messias sei tuir mai: ”Ida nebé mai tuir hau, nebé hau la soin atu kore nia sandálias talin”. Ida ne’e mak testemunha loloos ou confissão pública nebé João Baptista halo hodi hatudu duni katak Messias sei hiit-An mai.

Família kiik ida composto husi aman, inan no oan feto kiik oan ida ho idade cinco (5) anos. Labarik feto kiik ne’e foin escola iha jardim infantil ou TK católica ida. Iha loron ida, família ne’e decide hodi ba almoço hamutuk iha Restaurante ida. Tuur tiha iha meza ida, hafoin sira hameno hahan. Wainhira hahan too ona mai, sira atu hahu han dadaun ona. Tan de’it hamlaha ona, labarik ne’e nia aman suru dadaun etu hodi tau ba ibu laran, teki-tekil labaraik feto ne’e husu ba nia inan ho aman. Papa ho Mama…! Tansa ita la Reza lai molok ita han?  Iha ami nia escola, madre sira hanorin katak molok han ita tenke reza lai.

Rona tiha labarik feto ne’e nia lian ne’e, Labarik kiik nia inan-aman oin mean, sira sente moe teb-tebes. Ema hotu nebé tuur han iha restaurante laran ne’e mos sente hakfodak no admira ho lia fuan labarik feto kiik ne’e nian. Sira mos sente moe tanba ohin sira mos la reza wainhira sira atu han.

 Atu labarik ne’e la halo sira moe liu tan, ikus mai, família ne’e reza hamutuk halo oração badak ruma molok atu almoço.

Istória ilustração badak ne’e haksumik hela lição murak no pergunta lobuk ida ba ita nu’udar Cristão Católico. Murak nebé haksumik hela ne’e mak; nu’udar sarani, ita halao ona testemunha fiar hanesan labarik kiik ne’e ka lae?

Se labarik kiik de’it brani fo hanoin nia inan ho aman hodi prática fiar ka hatudu fiar liu husi oração, tansa ita la bele?

Istória ne’e mos convida ita hotu hodi reflecte no aten brani hanesan João Baptista nebé maske laos naroman maibé, nia fo sasain duni kona nia fiar, no mos kona ba NAROMAN nebé la seluk la leet mak Jesus Cristo maksoin rasik. João Baptista considera-an hanesan Lian ida nebé hakilar lerek iha rai fuik maran.

Semana ne’e, ita hakat ona ba terceiro Domingo tempo Advento nian. Uma Creda Católica iha mundo rai klaran besik dau-daun ona ba festa boot Natal Nai nian. Iha fatin barak, Ita rona ema toca ona música Natal nian. Iha sikun sira cidade Dili nian, presépio halo naba-naban de’it. cinés Jing Jang sira mos começa faan presépio rebo-rebo iha loja sira.

Iha parte foho sira mos la kohi lakon basá, jovem sira bolu malu hodi harii presépio ram-rame. Nune’e, Tema importante iha terceiro Domingo Adevento ne’e mak; Testemunha ka sai sain.  Tema ida ne’e bolu hikas fali ita hotu ba halo reflexão hodi oinsá ita bele sai Sasin Cristo nian iha mundo ohin loron, hahú husi ita-an rasik no mos husi família hodi ba too iha Soceidade.

São João Baptista husik hela exemplo ida mai ita, husi ne’e, ita mos bele sai sasin hanesan nia halo nu’udar Evangelho Domingo semana ne’e relata. Nu’udar Maromak nia manu-ain, João Baptista la helik lia hodi proclama nia-an hanesan Maromak nia manu ain wainhira ema judeu sira liliu, nailulik no levita sira husu nia identidade no ninia missão lolos.

São Paulo iha nia carta ba sarani Tessalónica encoraja mos ita hodi dehan; imi keta halakon espírito/semangat, keta haluha tulun sira profeta nian; maibé buat hotu imi sukat, hodi rai nafatin buat nebé di’ak. Imi buka dook husi buat hotu nebé aat/ Jauhkanlah dirimu dari segala jenis kejahatan ( 1Tes 5, 22).  

São Paulo nia lia fuan murak ne’e fo justificação katak hanesan João Baptista bolu ita nobun sai Testemunha Maromak nian, ita mos sei cumpri ita nia knaar sarani hodi sai mos testemunha nebé nakonu ho semangat (espírito), iha ita nia sociedade. Nune’e, wainhira ita sai sasin duni karik, automaticamente ita mos sei hadook-an duni husi hahalok aat nebé são Paulo bandu iha leten. Justificação ne’e mos hanesan provas ka bukti ida katak ita sarani ho qualidade saida.

Serviço no missão nebé Cristo husik hela  ba Apóstolo sira no husik ba ita nobun mak; atu continua fo sasin kona ba Nai Maromak Nia Reino. Tan ne’e, precisa esforço-an, aten brani hasoru dezafio no tentação sira wainhira halao knaar ida ne’e. Ita mos sei recorda fil-fali katak Jesus entrega hela serviço boot ida ba ita nobun, molok NIA sae ba lalehan. 

Uluk liu, Jesus hanorin nia escolante sira, forma sira, no halo sira sai matenek no iha capacidade naton atu sira bele hasoru problema, dificuldade no conflito sira nebé sei mosu. Nu’udar São Paulo haktuir iha segunda leitura, carta ba sarani sira iha Corinto hateten: “Iha Nia, imi sei riku iha buat  hotu, ho lia fuan no matenek, wainhira fó sasin ba Cristo sai metin iha imi. Nune’e imi la kuran graça espiritual ida wainhira imi hein daudaun ita Nai Jesus Cristo mosu mai. Nia sei halo imi laran metin too rohan no sala laek iha Nai Jesus Cristo Nia loron” (1Cor 1, 5-8).

Maromak, molok fihir ema idaidak hodi sai testemunha, haraik ona graça eh DOM único atu ema bele sai duni testemunha nebé nakonu ho espírito asuwain/kepahlawanan. São Paulo hahisik lia iha nia surat ba sarani sira iha Corinto tenik “ba ema balu Maromak haraik Dom da ciência atu sai matenek, balu Dom da profecia atu haklaken, balu Dom da cura atu bele bali moras sira, tan ne’e mak sira fahe matenek ida ne’e mai ita, atu ita matan moris neon nain ba sasán mundo nian” (1Cor 12, 8-10). Ne’e duni, ema hotu la moris saugate de’it iha mundo ida ne’e, nu’udar sarani, Maromak lolo liman mai ita nobun hodi husu ita nia colaboração wainhira ita simu ona Baptismo. Colaboração nebé Maromak precisa husi ita hanesan Cristão Católico mak aten brani hodi fo sasin kona ba Maromak nebé ita tau fiar ba nune’e, Brani mos sai testemunha iha qualquer situação iha fatin nebé ita hotu horik ba.

Ita sei hanoin leitura sira semana uluk nian kona ba oinsa João Baptista bolu ita hotu ba hakribit salan hodi hadia Nai nia dalan no haloos Nai nia dalan terik liu husi la hatais roupa reb-rebo eh fura-furak no haluha tiha preparação KLAMAR nian. João Baptista indica hela exemplo wainhira nia fo testemunha kona ba Maksoin nebé sei hiit-An mai. Nia hatais husi animal kulit no han husi balada fuik sira. Ida ne’e mos, hanesan símbolo ida oinsa nia fo sasin katak nia laos NAROMAN nebé ema judeu sira hein maibé, nia mai hodi bolu ema nobun nia atenção hodi expressa sasin fiar nian iha sira nia tempo maibé, nia (João Baptista) rasik laos naroman ne’e. Ninia unik husi animal kulit ne’e mos fo tada conversão hodi hein Maksoin.

Iha Antigo Testamento, Maromak bolu no fihir ninia profeta sira hodi sai Maromak nia Testemunha, hodi fo sasin kona dalan salvação iha Maromak ida de’it. Profeta sira mos hatudu duni exemplo barbarak no mos crítica ema barak inclui mos liurai ukun nain sira nebé adora Maromak falsu no foti lia hasoru Maromak, hadau malu poder, inventa história luta, aproveita estado nia interece hodi assegura grupo, família no partido nia naran em nome do povo.

  • Ita sei hanoin mos Moises nebé fo sasin hodi haksesuk malu ho Farao, liurai egipto nian, enquanto nia cumpri Maromak nia ordem hodi liberta povo Maromak husi escravidão.
  • Profeta Elias mos fo sasin nia fiar kona ba Maromak ida de’it, hodi harohan ba Maromak hatun ahi husi lalehan hodi sunu motuk profeta falsu sira nebé adora Maromak gentio sira nian.
  • Profeta Isaías iha nia livro nebé babain ita rona bebeik, fo testemunha forte hodi halo profecia ka ramalan kona Jesus Cristo Nai maksoin nebé sei moris husi Nain feto.
  • Nune’e mos Samuel nebé sai Maromak nia makaer fukun ou hakim/juiz ba povo Israel tan nia brani rona Maromak nia lian iha kalan boot.
  • Noe, tan de’it nia fidelidade hodi fo sasin, moris tuir Maromak nia hakarak iha ema barak nebé hahu moris aat contra Maromak no ikus mai nia ho nia família hetan rahun di’ak iha Maromak oin hodi sira liberta-an husi Maromak nia laran hirus.
  • Hahalok nakonu ho terus no susar hanesan JOB hasoru, la doko nia fiar hodi dehan katak hau ne’e se lerek hodi descobre Maromak nia hakarak.

Figura sira iha leten representa ema atus ba atus iha Bíblia Sagrada nebé brani tebtebes hodi  sasin sira nia fiar no fo testemunha ba ema barak tuir Maromak nia ordem/perintah.

Iha Novo Testamento, figura testemunhador Maromak nian mos sei mosu nafatin. Uluk liu iha João Baptista rasik, no mos tuir kedas Jesus Cristo nia apóstolo sira no mos escolante sira ho tan santo sira nebé sai martir tan brani sasin sira fiar iha situação difícil laran. Ita sei hanoin fali oinsa Jesus Cristo bolu Saulo nebé ikus mai sai São Paulo iha dalan klaran hodi fo sasin fali kona ba Jesus Cristo nebé nia halo funu hasoru dadaun ba maibé, figura ida sobre sai liu hanesan são João Baptista, sai modelu principal iha tempo advento ida ne’e. João Baptista fo sasin kona Naroman maibé, nia laos Naroman.

Naroman be ita hotu mehi iha ita nia fiar mak JESUS CRISTO nia-An tomak nebé mai moris iha ita nia fuan. Jesus Cristo rasik fo sasin ba NINIA-AN prefigurado iha livro profeta Isaías primeira leitura nian hateten:”Nai Maromak nia Espírito iha Hau leten, basá, Nai tau mina mai Hau”. Jesus mos fo ona ordem ba ita hotu be simu we sarani hodi ba sai Testemunha no tatoli Evangelho ba mundo tomak.  Jesus dehan; “Imi ba mundo tomak, ba sarani ema hotu; HODI AMAN, HODI OAN no HODI ESPÍRITO SANTO (Mat 28,19), hanoin ba katak; HAU SEI HORIK HO IMI TOO MUNDU NIA ROHAN (Mat 28,20). Tuir mai, Jesus Cristo rasik mos fo aten brani ba ita nobun ho lia murak ne’e;”EU VIM PARA QUE TENHAM VIDA” ou HAU MAI ATU IMI HETAN MORIS (Jo 10,10b)”.

Mundo ohin loron oin seluk ona. Progresso desenvolvimento área tecnologia nian liliu iha parte comunicação halo ita sente mundo ne’e kloot tan de’it iha telemóvel ho internet nia circunstância sira. Desenvolvimento ida ne’e mos hakloot ita nia ruang gerak hanesan ema sarani hodi sai testemunha nebé di’ak iha maluk seluk nia leet.

Ohin loron ita brani no experto tebes hodi fo sasin kona ba nakukun do que  fo sasin naroman nian. Exemplo testemunha nakukun nian mak hanesan; Ita fácil liu tolok malu, ita fácil liu halo jura falsa temi Maromak naran hodi defende-an dehan tolok ne’e kata bantu de’it, ita mos brani tebes halo corrupção hodi naok ita nia maluk sira nia direito, ita buka hasees-an wainhira rona Maromak nia manu-ain sira koalia kona ba Maromak. Hahalok laek hirak ne’e la seluk la leet dada ita ba sai mensageiro demónio nian do que sai manu-ain Maromak nian.

Ba mentalidade sira ne’e hotu, livro Ben Sirác bolu atenção ba sarani ohin loron nian dehan;”keta ulun toos resik hodi hamtauk Maromak no keta hakbesik-an ba Maromak wainhira o nia fuan la fo ba Maromak/ Não sejas rebelde ao temor do Senhor, nem te aproximes dele com um coração fingido/(sir 1,28).

Ohin loron, sarani barak dehan fiar Maromak maibé nunca hatudu fiar ne’e iha hahalok testemunha nian. Sai sasin katak halo tuir Maromak nia hakarak no banati tuir Jesus Cristo nia doutrina sira. São Tiago dala ida tan bolu teni mai ita iha nia carta dehan;Fiar nebé la hatudu iha hahalok, fiar ne’e buat laek ida”.

Afirmação ida ne’e mos fo hanoin katak família mak sai hanesan fatin uluk liu atu ita sai hanesan Testemunha Jesus Cristo nian. Exemplo concreta mak wainhira inan-aman hanorin oração ba oan sira, hanorin mos costume respeita malu tuir lisan timor nian, no ikus liu, inan aman sai alicerce ba Testemunha Maromak nian, iha hahalok di’ak nu’udar Cristão Católico.

Bukai ba ita nia reflexão semana ida ne’e mak; sai Maromak nia manu-ain nebé nakonu ho espírito ka semangat sarani nian. Hanesan istória badak ohin haktuir ona katak labarik kiik oan ida brani fo sasin fiar iha restaurante laran, tansa ita sira seluk la bele? Pergunta seluk mak ne’e:

  • Família sira reza terço hamutuk ka lae?
  • Molok toba no wainhira hadeer husi kama laran ita reza ka book uluk telemóvel
  • Antes atu han ita reza oração nebé?
  • Oinsá, ita fo testemunha fiar ba ita nia família?
  • Ita halo presépio reb-rebo tanba ita fiar Maromak ka tanba rame rame de’it?
  • Oinsa ita hanorin oração ba ita nia oan sira?
  • Iha presépio laran ita toca música Natal ka toca mak música bajakan festa nian?
  • Wainhira sinu igreja lain, ita sente saida?
  • Ita toca música Natal iha uma tanba ita fiar ka tanba hakarak hatudu gengsi?
  • Wainhira telephone lian, labarik too ferik-katuas sira ba hadau malu hodi hare no koalia maibé quando sinu uma Creda lian, ita sente baibain de’it?

Nu’udar  sarani, iha tempo advento ba dala tolu ne’e, molok ita haksolok ba Nai nia Festa Natal nian, mai ita ida-idak hakiak dadaun espírito aten brani fo testemunha fiar nian no haabut ita nia fé, haburas ita esperança no haboot liutan ita caridade iha Cristo nia liafuan  nebé hateten; “Matan moris neon nain iha oração atu imi keta monu ba tentação” ho lian seluk ita mos haburas ita nia espírito fiar nian hodi banati tuir nu’udar são Paulo nia carta ba tessalónica hodi dehan: “Maromak damen nian halo imi sai santo loloos: imi-an rasik-Espírito, klamar, isin mos nafatin too ita Nai Jesus Cristo mai”. Ita cumpri karik lia menon hirak ne’e, ita nia moris sei sai loloos hanesan salmo Domingo ne’e dehan: hau klamar haksolok iha Nai. Assim Seja e Bem Haja (ignasoliveira 2020)

Note:

Reflexão ne’e publica ona iha programa Hafunan Fiar (HF) Radio Timor Kmanek (RTK) iha 2014,

HALOOS NAI NIA DALAN TERIK

Reflexão & Leituras Segundo  Domingo ADVENTO, Ano B, 2020

Is. 40. 1-5, 9-10  Sal. 84(85), 9ab-10,11-12, 13-14  2. Ped. 3, 8-14  Mc 1,3

 

 

Ilustração: Houri tempo uluk, iha liurai ida nebe Ukun nia povo ho matenek no justo. Povo hotu hadomi los liurai nee. Liurai nee horik iha nia palácio boot tebtebes. Iha palácio nee nia oin, iha mos luron boot ida nebe povo barak liu ba-mai hodi halao sira nia actividade moris. Husi palácio nee duni mak liurai nee bele observa nia povo sira liu ba-mai nodi conhece sira ida-idak.

Iha kalan boot ida, liurai haruka nia guarda sira dudu fatuk boot ida ba hatuur los iha luron boot nee nia klaran. Iha loron tuir mai, hanesan bai-bain, liurai tuur iha nia trono hodi observa oinsa nia povo sira nia reacção wainhira sira haré fatuk boot nebe latan dau-daun iha Estrada klaran nee. Observa tiha durante semana ida ho balun, liurai foti conclusão katak maioria hosi nia povo la importa eh la interece ba fatuk nebe satan hela Estrada nee. Sira hasees-an ba ninin buka dalan seluk hodi lao liu deit wainhira lao liu hosi luron nee.

Entre povo hirak nee hotu, liurai só interessado deit ninia povo nain ida, nebe sente preocupado wainhira lao liu ba-mai husi neba. Ema nee haré fatuk nee hanesan impedimento boot ida ba nia-an wainhira passa husi neba. Iha lorokraik ida, ema nee mai, hulan ho besi tomak boot ida iha nia kbaas hodi muda sees tiha fatuk boot husu luron nee. maske fatuk nee boot liu maibé, nia esforsu-an duni hodi consegue hasees tiha dalan husi dalan boot nee.

Hatene katak ema nee iha esforço duni no sacrifica-an maske mesmesak, ikus mai liurai bolu nia hodi fo condecoração ba nia no convida nia ba jantar hamutuk iha liurai nia palácio basá, maske nia ema fraco maibé, nia hakas-an duni hodi hasees tiha fatuk boot nee husi luron nee atu nia no mos ema barak bele liu ba-mai ho livre. ***

“Ha’u haruka Ha’u manu-ain ba uluk ó oin, hadi’a dalan ba ó. Lian ida haklaken: “imi hadi’a Na’i nia dalan iha rai fuik maran. Imi loke dalan terik ida ba Na’i iha rai fuik. Rai klean sei nakonu, foho no kaletek sai tetuk; rai tarak sei kawer, rai lulun sei tetuk. Semana ida nee Uma Creda Católica hakat tan passo ida ba segundo Domingo Advento nian. Nunee, ita la sente katak tempo Advento liu ona loron 7 ba kotuk. Progresso espiritual saida mak ita hakat liu ona iha semana ida liu ba nia laran? Nai Maromak nia futar Lia Fuan segundo Domingo semana nee nian bolu ita nia atenção ba lia fuan Hadia Nai nia dala, haloos Nai nia dalan terik (Is 40,3; Mc 1,3).

Maromak hadomi liu ema hodi fo capacidade intelectual, moral, emocional inclui mos capacidade física. Maromak hadomi ema liu sasan hot-hotu. Hanesan contempla iha Maromak nia UKUN FUAN SANULU nebe resumo dehan; HADOMI MAROMAK LIU SASAN HOT-HOTU no HADOMI EMA SELUK HANESAN ITA-AN RASIK. Baseia ba domin ida nee duni mak; wainhira ita ema hasoru tentação hodi monu ba sala, Maromak preocupado teb-tebes hodi haruka Maromak Oan mai mundo atu liberta ita husi domínio tentação sira.

Tentação reb-rebo mak mai ataca ita nia moris maibé, dala ruma mos ita rasik mak hamosu tentação ka sai fali tentador ba ita nia moris rasik. Tanba nee mak Iha Evangelho Domingo Advento semana kotuk nian, Jesus rasik sei temi lia fuan Matan moris neon nain (Vigiai). Lia fuan ida nee hanesan chamada de atenção ida husi Maromak. Iha Evangelho Domingo Advento ba dala rua nee, Nai Maromak bolu fali ita nian concentração ba nia Lia Fuan; “Hadia Nai nia dalan, Haloos nia dalan terik”(Mc 1,3). Passagem evangélica nee endereça ita nia fuan ba hahalok hamos isin no klamar nian molok celebra Nai nia Natal.

Experiência husi ai-knanoik nee, hakarak fo hanoin mai ita kona ba sensibilidade ita ema nian nudar sarani hodi hasees tiha impedimento sira nebe ita rasik hamosu iha ita nia moris atu ita bele lao livre  iha ita nia dalan ba hasoru malu ho Maromak.

Husi sorin seluk, ai-knanoik nee mos hakarak provoca ita nudar sarani Católico nodi haré fila fali ba ita nia lalaok moris nian hodi descobre liu tan ita nia problema sira nebe impede hela ita nia moris hodi ba hetan salvação iha Jesus Cristo.

Fatuk boot iha Estrada klaran, nudar ai-knanoik haktuir mak ita nia nia attitude ka hahalok sira nebe lori  ita fuan ba nakukun, hakotu ita nia relação ho Maromak, halo fraco ita nia comunicação ho maun alin sira, no pior liu tan  hamout ita nia moris iha tahu klean sala foer nian. Tanba nee mak iha Evangelho ita rona ona são João Baptista nia lian hakilar iha rai fuik maran dehan:”Hadia Nai nia dalan, Haloos nia dalan terik” (Mc 1,3). Lia fuan ida nee, laos bolu ita ba sentido concreta hanesan wainhira chefe aldeia sira bolu nia povu ba hatetuk Estrada rural sira, hafoin selu ho 3 dolar ho fos saka oan ruma maibé,  lia fuan be temi iha leten, bolu ita nobun nia atenção tomak ba sentido conversão ka hakribit salan nian. Ita nia salan mak dalan terik nebe precisa ita haloos tiha nudar João Baptista hateten iha Evangelho são Marcos nian. Ita nia hahalok aat sira mos sai hanesan fatuk nebe além de impede ita nia contacto ho Maromak, impede mos ita nia relação ho família, kolegas,  parentes, vizinhos, no mos maun alin sira iha ita nia moris lorloron hanesan sarani Católico.

Iha Sagrada Escritura, liliu iha livro Gênesis nia conteudo; haktuir momos katak causa ka penyebab husi pecado laos mai husi Maromak maibé mai husi ita ema rasik. Basá, uluk nanain, Maromak Halo mundo no buat hotu mesak diak, hafoin tuir mai, cria mos ema tuir Maromak nia imagem rasik atu ema mos bele moris tuir Maromak nia vontade no bele sai santo mos hanesan Maromak.

Maibé, iha realidade saida mak acontece tuir mai? Ita nia beila sira hanesan Adão ho Eva ho liberdade tomak halo hahalok aat hodi kontra Maromak nia bandu sira, hafoin mane duun fali nia sala ba feto, feto tau todan liu ba samea inocente. Husi nee mak pecado hahu tama mai iha mundu. Infelizmente, sala ka pecado hafoer tiha ita ema nudar imagem Maromak nian.

Ita tama ona iha Domingo ba dala rua tempo Advento nian. Uma Creda bolu hikas ita nobun nodi ba hanoin no reflecte leitura sira Domingo semana nee nian. Oinsa Maromak nia lia fuan sira bolu ita nia atenção, no fanun ita nia fuan nebe sei toba dukur hela; Ita la sente katak falta deit semana oan rua ita tama ona iha festa Natal.

Iha reflexão semana uluk nian, ita hamutuk reflecte ona tema kona ba VIGILÂNCIA ka matan moris neon nain. Iha Domingo semana nee, Jesus Cristo liu husi leitura sira, bolu hikas ita tomak, atu haré fila fali ita nia lalaok sira durante nee atu nunee, bele sai hanesan Estrada loos nebe la iha fatuk boot ruma teri netik. Buat nebe teri netik ita nia dalan mak ita nia hahalok sala sira. Impossível Maromak bele mai hela iha ita nia fuan nebe seidauk mos. Basá, Marmak nee Lulik. Ita lee rasik iha Evangelho, são João Baptista dehan: atu hakruuk hodi kore nia sandálias talin mos hau la soi.

Molok Jesus Cristo mai moris iha mundo, Nai Maromak Haruka uluk são João Baptista nudar Maromak nia manu-ain atu hodi bolu no prepara ema nobun nia fuan ba Nai Jesus Cristo nebe atu moris mai iha mundo. Nao Maromak nia manu-ain sira ohin loron mak ema hotu nebe simu ona we baptismo hodi sai sarani Católico. Manu ain laos mak Catequista ho Amu lulik no madre sira. Ema hotu tende sai manu ain ba nia vida no mos sai manu ain ba ema seluk.

Iha Evangelho ita mos sei rona são João Baptista hakilar ba povo Israelita hateten;”HADIA NAI NIA DALAN, HALOOS NIA DALAN TERIK”. Lian ida nee ikus mai halibur duni ema atus ba atus, mai husi fatin oioin, dook no besik, sacrifica-an hodi mai too João Baptista nia fatin hodi simu baptismo. Ema hirak nee, maske mai husi fatin dook eh besik maibé, sira mai ho intenção no objectivo ida deit mak: mai hodi hamos sira nia klamar  liu hosi baptismo João Baptista nian. João Baptista laos haklaken deit Reino Lalehan hodi fo baptismo ba ema lobuk nee maibé, liu hosi lian be hakilar; ”HADIA NAI NIA DALAN, HALOOS NIA DALAN TERIK”, João Baptista hakarak fanun fali ita nia fuan sarani nian hodi prepara-an didiak, hamos klamar molok tam ba festa Natal.

Dalan terik nebe João Baptista refere iha Evangelho Domingo semana nee nian mak rona Maromak nia lian hodi leno ita nia fuan, forma ita nia consciência, comportamento, attitude, lalaok, iha moris lorloron nian hanesan sarani Católico. Tanba nee mak iha livro Job nian dehan:”Simu ba saida mak Nai hanorin liu hosi nia ibun, no tau lia fuan nee iha o nia laran” (Job 22,22).

Ema barak nebe rona Maromak nia lian iha João Baptista, sira hamos klamar, simu baptismo hodi hetan salvação.  Dalan salvação laos mai hosi João Baptista maibé, salvação lolos sei mai husi Maromak nebe concretiza iha Jesus Cristo nia Pessoa tomak.

Saida mak conversão ka hamoos klamar? Conversão loloos la hela deit iha ita nia cofessa ba Natal ka pascoa deit maibé,  conversão lolos tuir Maromak nia hakarak mak hamos bebeik ita nia klamar durante ita nia vida tomak.  Maibé, maluk sarani doben sira………..! moras aat ita sarani Católico ohin loron nian mak ba confessa iha deit tempo advento enquanto Natal besik dadaun ona ou iha tempo quaresma bainhira pascoa too dadaun ona. Tanba nee mak ema husi religião seluk considera ita hanesan sarani NAPAS katak sai sarani iha tempo Natal ho Pascoa deit; ou lia fuan seluk mos ema dehan Sarani KTP katak liur Católico maibé, laran mesak sabraut tantanan deit. Iha Certidão sarani maibé, hahalok gentio hela deit.

Se ita gira nafatin deit ho mentalidade hanesan nee, oinsa ita bele hatudu qualidade fiar nudar sarani Católico husi liur too laran?  Dala ida tan João Baptista hakilar ba ita nobum:”hadia Nai nia dalan, haloos nia dalan terik”. Oinsa  Maromak bele mai horik iha ita fuan se ita rasik la prepara fatin diak no fuan nebe merece ba Maromak? Maromak nee santo no Lulik tanba nee mak são João Baptista dehan: Tuir hau, sei too mai Ida nebe makaas liu hau, hau la soin atu kore Nia sandálias talin.

Dala wain ita cuek deit ho buat hotu nebe ita halo hodi budu sala foer sira iha ita laran, no iha liur ita dehan:”Hau nia fiar Maromak mak hatene deit ba”. Ba hahalok hanesan nee são Tiago iha nia carta koalia dehan:”Fiar nebe la hatudu iha hahalok, fiar nee buat mamuk boot ida// a fé sem obras é estéril/ iman tanpa perbuatan adalah iman yang kosong(Tg 2,20). Hasoru são Tiago nia crítica nee, só liu hosi hahalok hakribit salan, hahalok hadomi malu, respeita malu, ajuda malu no seluk tan mak bele justifica katak ita sarani Católico lolos ka lae?

Dala ida tan virtude teologal iha uma Creda Católica nian tolu hanesan; fé, esperança no Caridade, bolu hikas ita tomak atu reflecte fila fali ita nia vida hanesan Povo Maromak nian, liliu oinsa sai sarani Católico iha mundo ohin loron. Nudar sarani, ita iha mehi boot rua; mehi isin nian no mos mehi ba klamar nian. Mehi isin nian mak atu hetan condição moris nebe natoon katak lori liman fuan sanulu halo serviço hodi sustenta moris ba loron ida nian. Iha sorin seluk, mehi klamar nian principal liu mak salvação klamar wainhira ita husik mundo ida nee.

Ba salvação klamar nian, mai ita  fila ba reflecte fila fali João Baptista nia lian hakilar be dehan;”HADIA NAI NIA DALAN, HALOOS NIA DALAN TERIK”. Nunee, ita nia fuan mos, klamar moos mak sai condição principal ka persyaratan utama atu Maromak horik ba wainhira  Nai mai iha loron ikus, basá iha são Pedro nia carta hateten;”Nai nia loron sei too mai hanesan ahu nain ida” (2Ped 3,10).

Dom NORBERTO DO AMARAL dala ida hateten lia fuan nee: “ita nia sala/pecado compara hanesan kanek ida; wainhira ita confessa tiha kanek nee sei sai diak maibé, kanek nee sei husik hela fitar ruma nebe precisa ita halakon liu husi ita nia caridade ba maluk sira be lolo liman husu tulun mai ita”.

Profeta Isaias hakerek:”Nai nia lia tun dehan’ tan povu ida nee mai hakbesik ho nia ibun no hahi hau ho ibun deit maibé, sira laran dook tebes husi hau. Sira nia oração la ho fuan no laran loloos”.(Is 29,13)

Saida mak ita foti nudar lição murak hodi habosu ita klamar ba seman ida nee, liu husi Evangelho no leitura sira domingo aban nian?

Loos duni katak João Baptista cumpri duni nia missão nudar manu-ain Maromak nian hodi prepara ita nobun ba dalan salvação ita nian iha loron ikus. Ita fali, saida mak ita halo ona hodi sai mos Maromak nia manu ain?

 “HADIA NAI NIA DALAN, HALOOS NIA DALAN TERIK” Ita nia lalaok sira nebe la monu ba Maromak nia laran, liu husi João Baptista nia lian tatoli iha leten, bolu teni ita nobun hodi haré fila fali ba idadiak nia-an hanesan ema sarani, hodi hasees tiha fatuk boot nebe satan hela dalan terik Maromak nian iha tempo Advento ida nee.

  • Tan deit cesta básica, keta ita rai ódio hela ba ita nia maun alin sira karik?
  • Tan deit ambição política, ita hasoru malu la cumprementa malu karik?
  • Osan deve ruma nebe seidauk selu, halo ita hakilar malu ho ita nia vizinho uma sorsorin karik?
  • Tan deit organizaçao diferente mak keta maun alin uma laran cria fali problema karik?
  • Partido la hanesan keta halo família uma laran fahe malu karik?
  • Iha Advento ida nee, ita ajuda ona ita nia maluk sira be lolo liman mai ita dala hira ona ?
  • Ita la ba Missa dala hira ona?
  • Ita halo presépio tanba rame-rame ka hodi respeita festa Natal?
  • Ita ba confessa ona molok tama ba tempo Natal ka lae?

Nunee, fiar precisa hatudu iha hahalok no hahalok exige attitude caridade ba ita nia maluk sira be precisa ita nia tulun, nee mak dalan terik nebe precisa hadia iha tempo Advento nee.

Salmo aban nian fo teni aten brani mai ita dehan;”Hatudu Ita Domin mai ami, harik Ita mak soin mai ami”’*** Assim Seja e Bem Haja (Ignas oliveira).

Note:

Reflexão nee publica ona iha Programa Hafunan Fiar; Radio Timor Kmanek 2014.

VIGILÂNCIA

Reflexão & Leituras Domingo ADVENTO 1, Ano B, 2020

 

Facebooker ida iha início fulan Novembro ne’e, halo quote cómico dehan nune’e: “Hei…! agora foin Novembro, imi ne’e seidauk tama Dezembro (Natal), imi toca ona música Natal. Imi ne’e la jaga liu Novembro nia perasaan (sentimento)”. Quota ne’e hanesan piadas ida ba ita Católico nebé influenciado housi ema comerciante sira basá, foin mak Novembro klaran de’it, música natal toka lem-lemo iha loja sira, presépio Natal (christmass Tree/pohon Natal) hahu monta iha cidade nia canto sira.

Anónimo ida dehan: “Melihatlah ke atas untuk urusan akhiratmu dan melihatlah ke bawah untuk urusan duniamu maka hidup akan tenteram

Nu’udar sarani, ita precisa coloca tempo bai-bain ho tempo Advento-Natal tuir nia fatin ou círculo litúrgico atu valor Natal ne’e fo ksolok ba ita. Se lae, foin mak atu Advento de’it, ema hot-hotu rame-rame celebra ona Natal.

Igreja católica tinan- tinan fo tempo semana 4 tu-tuir malu ba sarani sira hodi halo preparação molok simu Jesus Maksoin  iha tempo Natal.

Durante tempo Advento hirak ne’e, nudar tempo oportuno atu sarani ida-idak prepara moris tuir dalan sarani nian.

Normalmente, durante tinan ida tomak, Igreja Católica hafahe ciclo litúrgico ba parte sira hanesan: Advento, Natal, Comum (bai-bain), Qauresma, Páscoa, fila ba Advento tuir rotação ano litúrgico A, B, C.

Nune’e, Tempo Advento nudar oportunidade di’ak atu sarani sira prepara moris tuir dalan los hodi hasoru kbiit demónio, kbiit nakukun, ema bosok ten sira, hadau malu poder sira, probelemas quinto-canto, iha ne’e inclui seita sira hanesan jeova ho adventista sabatikal ho tan denominação bar-barak nebé oras ne’e lao housi uma ba uma no halo promoção iha facebook. Tanba ne’e mak São Marcos Evangelista hatete:“Ne’e duni, imi Matan moris neon nain ba, basá, imi la hatene wainhira Nai  too mai” (Mc 13, 35).

História murak ida hakerek iha jornal diário STL edição quarta feira loron 22 fulan  setembro tinan 2010 hanesan tuir mai: Infermeira ida naran BETTY  residência iha Boston América.  Nia forma família durante tinan 30 ona, tek-tekil iha loron 3 fulan Maio tinan 2010, nia foin hakfodak katak ninia kadeli casamento nebé halo housi osan mean no hafutar tan ho diamante (berlian) monu lakon no pior liutan,  nia mos la hatene katak kadeli ne’e lakon  iha serviço fatin ka iha uma. Nia hakas-an hodi buka tiha ona ba mai iha fatin serviço, iha uma no iha fatin balu nebé nia deskonfia katak kadeli casamento ne’e lakon iha nebá maibé,  infelizmente la consegue hetan.

Iha hospItal, fatin nebé infermeira BETTY  serviço ba, nia fo hatene ba ninia kolega infermeiro sira seluk atu ajuda buka netik kadeli nebé lakon ne’e maibé la iha ema ida interece hodi ajuda nia buka hetan fila fali kadeli casamento ne’e. Nuudar ema neon nain, infermeira ne’e la desesperado no fiar-an hodi buka nafatin nia kadeli ne’e, basá nia fiar katak loron ida nia sei hetan fila fali duni kadeli ne’e, maske la hatene bainhira. Iha loron ida, ninia maluk ida naran Bonie Filicicha hakbesik-an ba nia hodi fo hatene katak se BETTY hakarak hetan fali kadeli ne’e, di’ak liu  nia tur hakmatek, hanoin didi’ak momento ikus nia hatene cadeli sei iha nia liman harohan hodi sura ho Maromak nia  tulun no nia hetan fila fali ninia kadeli casamento nebé lakon.

Loos duni, infermeira BETTY ne’e reza badinas no harohan ba Maromak atu nia bele hetan fali kadeli casamento ne’e. Nune’e, liu tiha fulan tolu, teki-tekil iha dadersan ida, iha loron 28 fulan agosto tinan 2010, infermeira ne’e hetan fali kadeli casamento ne’e iha nia karreta laran wainhira nia atu ba serviço. Afinal ho oração, buat nebé impossível no hamate Ita nia vontade bele sai possível wainhira Maromak hakarak.

História ilustrda hanesan ne’e laos inventa maibé, ne’e realidade ida nebé além de acontece ba infermeira hanesan BETTY, bele mos acontece ba Ita lobuk ida iha Ita nia vida hanesan Cristão Católica. Lição murak nebé Ita bele aprende housi história badak ne’e mak; neon nain no confiança iha Maromak liu housi Ita nia oração loro-loron nian. Basá, Maromak fo confiança no Domin mai Ita hodi halao moris iha mundo ne’e. Oração nudar meio ida hodi facilIta ema nia comunicação gratuita ho Maromak. Comunicação entre ema ho ema liu housi telemóvel talvés tende precisa osan hodi carrega pulsa maibé comunicação entre ema ho Maromak liu housi oração ne’e gratis só precisa de’it mak Fiar no laran kmaan hodi comunica ho Maromak.

Ema balun dehan: Doa memberikan kekuatan pada orang yang lemah, membuat orang tidak percaya menjadi percaya dan memberikan keberanian pada orang yang ketakutan.Liu housi oração mak bele expressa Ita nia-an hanesan sarani nebé matan moris neon nain iha esperança hodi hein Nai Maksoin nebé sei mai iha loron ikus. Tan ba ne’e mak iha Evangelho são Marcos nian, Nai Jesus dehan: “Ne’e duni, imi Matan moris neon nain ba, basá, imi la hatene wainhira Nai  too mai” (Mc 13, 35).

Nu’udar craitura nebé fraco no limItado, Jesus nia lia murak ne’e hafanun Ita hodi matan moris neon nain, reza no se tilun ba Nai Maromak Nia futar lia fuan de’it mak Ita bele hetan tulun housi  Maromak ba knaar nebé nia fó hela mai Ita ida-idak no Ita mos bele alcança buat nebéIta mehi iha moris ne’e por exemplo hanesan acontece ba infermeira BETTY nebé neon nain no la desesperado hodi ikus mai consegue hetan fila fali ninia cadeli casamentu nebé lakon durante fulan tolu.

Ita hahu hakat tama ona ba Domingo uluk tempo Advento nian. Uma Creda Católica iha mundo rai klaran tama ona iha Ano Litúrgico foun ida, iha ciclo nebé celebra evento principal liu hot-hotu hodi  hanoin no halo preparação espiritual-físico ou preparação isin no klamar sarani nian ba Nai Jesus Cristo nia hiit-an mai ba dala rua iha loron ikus.

Tema importante iha tempo Advento mak vigilância ka matan moris neon nain. Evangelho nebé Ita rona iha Domingo semana ne’e, São Marcos Evangelista hakarak convida Ita atu matan moris neon nain. Hodi matan moris neon nain, reza no se tilun ba Nai Maromak Nia futar Lia Fuan de’it mak Ita bele hetan graça la nahas housi Nai Maromak ba knaar nebé NIA fó hela mai Ita ida-idak.

Laos halo vigilância de’it maibé, hodi hamulak ou halo oração, basá nudar sarani, Ita hetan obrigação hodi cumpri eh halo tuir Maromak nia hakarak tomak. Obrigação ida mak halo oração (reza) husu Maromak nia bensãobasá, Ita la hatene wainhira tempo ne’e sei too mai atu Nai maksoin sei hiit-an hikas mai iha mundo (Cf. Mc 13, 33)  ou ita nia fim do mundo mosu mai wainhira ita mate iha qualquer tempo. Vigilância ka matan moris neon nain iha Ita nia contexto fiar sarani nian, exige Ita nia fé, esperança, no caridade. Ne’e mak virtude fundamental Ita sarani Católica nian.

Iha tempo Advento ida ne’e,  precisa haforte Ita nia esperança eh hein. Ita nia realidade hatudu momos katak dala barak Ita baruk lalais enquanto Ita hein demais buat ruma nebé atu mosu mai maibé seidauk mosu hela de’it mai. Ema indoneásia sira baibain dehan: pekerjaan yang paling membosankan adalah MENUNGGU. Mentalidade ida ne’e mak iha tempu ohin loron sai hanesan veneno ba moris sarani nian.

Wainhira Ita lakon ona esperança ba Maromak maka Ita hahu hases-an neneik neneik housi dalan salvação nian. Ba ida ne’e,  Profeta isaias iha primeira leitura hakilar ba Maromak dehan” Nai tansa Ita housik ami lao dook housi Ita dalan, no la hamtauk Ita boot? Tan Ita atan no tanba povo Ita liman rohan, Ita hiit An fila hikas mai” (Is 63, 17).

Tama ona iha  tempo Advento, iha loja sira, kios sira, iha Timor Plaza, iha radio-Televisão sira, no iha uma sira  no iha fatin barak, ema hahu loke múzika natal nian. Revista no jornal sira mos apresenta imagen ka iklan oioin de’it relaciona ho Natal. Roupa obralan alias cuci gudang mos nabnaban de’it iha trotoar sira no loja oin sira. Ida ne’e fo tada mai Ita katak Natal besik dadun ona. Tinan-tinan enquanto tama ona iha Advento, Ita hatene katak tuir mai Ita sei celebra festa boot Natal Nai nia katak Nai Maksoin Jesus Cristo moris mai iha mundu hodi hola isin ida hanesan Ita ema.

Maibé, festa Natal nebéIta celebra tina-tinan, nudar evento ida nebéIta celebra fila fila hodi hanoin hikas Nai Maksoin Jesus Cristo nebé mai moris iha mundo iha tinan rihun rua resin liu ba. Maibé Ita mos keta haluha katak Ita nia esperança principal liu hotu iha tempo Advento mak hadia didi’ak Ita nia-an isin-kalamar tomak hodi hein Nai Jesus nebé atu hiit-an ba dala rua mai mundo hodi tesi lia ba ema di’ak no ema aat sira nomos ba ema moris no ema mate sira. Ida ne’e mak Ita nia esperança lolos nudar Cristão Católico atu nune’e Ita horik nafatin iha situação eh keadaan matan moris neon nain ou vigilância. Keta halo ba be wainhira loron ho tempo ne’e too de repente mai, Ita sibuk fali mak roupa foun, sapato foun, telemóvel foun mtor foun, kareta prado foun hodi haluha tiha Ita nia klamar.

Evangelho são Marcos nian iha Domingo semana ne’e, Ita rona ona Jesus Cristo nia lian nebé dehan:”Ne’e duni imi matan moris neon nain ba, basá, imi la hatene wainhira Nai too mai: lorokraik, kalan fahe rua, manu kokorek, dadersan nakukun. Nia teki-tekil mai keta hetan imi toba hela karik. Tan ne’e, matan moris neon nain ba”

Jesus tau atenção ba lia fuan hirak ne’e, basá Nia rasik housik hela mundo ne’e molok sae ba lalehan, no Nia  entrega hela  serviço ne’e ba Nia Apóstolo sira no mos ba Ita hotu nebé simu ona we baptismo nudar sarani Católico. Serviço no missão nebé Cristo housik hela  ba Apóstolo sira no Ita hotu mak atu continua haklaken Nai Maromak Nia Reino. Reino nebé sei haklaken ne’e laós serviço kamán maibé  serviço todan ida.

Tan ne’e, precisa sarani hotu nia esforço-an, sacrifício makás hodi halao knaar ida ne’e. Molok entrega missão ida ne’e, Jesus hanorin apóstolo sira, forma sira, no halo sira sai matenek no iha capacidade atu sira bele hasoru problema, dificuldade no conflito sira nebé sei mosu. Nudar São Paulo haktuir iha segunda leitura, iha carta ba sarani sira iha Corinto hateten(1Cor 1, 5-8) “Iha Nia, imi sei riku iha buat  hotu, ho lia fuan no matenek, wainhira fó sasin ba Cristo sai metin iha imi. Nune’e imi la kuran graça espiritual ida wainhira imi hein daudaun Ita Nai Jesus Cristo mosu mai. Nia sei halo imi laran metin too rohan no sala laek iha Nai Jesus Cristo Nia loron”.

Tebes,  Apóstulo sira riku duni, laós riku motor ho kareta nem riku osan iha banco maibé  riku espiritualmente iha Maromak nia graça no matenek tebes iha Maromak Nia lia fuan sira tamba Maromak haraik Espírito Santo nia kmanek oioin atu sira fó sasin kona bá Nia. São Paulo iha nia surat ba sarani sira iha Korinto(1Cor 12, 8-10), hateten teni “ba ema balu Maromak haraik Dom da ciência atu sai matenek, balu Dom da profecia atu haklaken, balu Dom da cura atu bele bali moras sira, tan ne’e mak sira fahe matenek ida ne’e mai Ita, atu Ita matan moris neon nain ba sasán mundo nian”. Maromak hanesan ema lao rai nebé housik hela nia uma hodi haraik kbiit ba atan sira, Ita sei halao ho oração no sei matan moris no neon nain nafatin, hodi hein too loron ikus wainhira Jesus fila híkas mai, ba dala rua nian.

Nai Jesus tau ona confiança tomak iha Nia escolante sira hodi fó ba sira esperança eh laran metin. Ne’e la significa katak Apótolo sira hein de’it hodi kous liman ka moris patarata no goza vida hodi hein Nai Nia hiit an mai, maibé, sira moris tuir no halao missão nebé Jesus entrega hela ba sira ne’e, ho nune’e sira mós iha obrigação  atu concretiza missão nebé Jesus confia hela ba sira iha vida concreta no iha situação difícil. Iha estado esperado ne’e mós, laós atu hein passivamente, maibé, hein activamente. Activo iha hahalok di’ak sira hotu nebé garante ba moris loron ikus nian. Valor sira ne’e mak valor humano, Amizade, justiça, caridade no moris tuir klalaok  Evangelho nian, hodi halo vigilância nafatin. Knaar nebé Maromak tau iha sarani idaidak nia kbaas exige Ita nia responsabilidade no participação hanesan porteiro ka ema nebé hein odamatan.

Ema nebé hein odamatan, iha serviço ida nebé nia tem que halo mak “vigilância ka berjaga-jaga”. Tuir São Marcos “porteiro” ne’e representa ema nebé iha responsabilidade máxima ba comunidade cristã hodi halao nia knaar sira ho di’ak no tau matan, ajuda malu no tahan netik sira dook housi babeur mundo nian. Ba Ita sarani sira, knaar porteiro nebéIta hetan mak; tau matan eh bali Ita nia isin no klamar nudar sasan lulik iha Maromak nia fuar oin. Nudar São Pedro iha nia carta dehan: “matan moris neon nain, tan imi nia funu balun, katak  diabo lao haleu hela imi hanesan Leão ida hodi buka atu han ema ruma” (1 Pe 5, 8). Nune’e,  knaar nu’udar porteiro tem que matan moris neon nain nafatin ba buat hotu.

Iha celebração liturgia advento nian, Igreja hakarak hamoris fali espírito hein ka semangat penantian. Lia fuan hein iha sentido popular mak Ita hanaran ESPERANÇA (ESPERAR) ba Maksoin (Messias); Nune’e, ho Advento, sarani hotu hola parte iha processo preparação molok Maksoin ne’e hiit-an mai. Preparação nebé merece liu mak; laos roupa foun maibé mos klamar nebé foun. Atu fase hamoos klamar laos uza be maibé uza Sacramento Confessa. Tanba ne’e mak Jesus rasik koalia iha Evangelho dehan; Matan moris Neon nain. Keta halo Ita mate de repente ou maksoin ne’e mosu derepente mai mak Ita hakfodak no Maromak sei dehan: terlambat sudah kau datang padaku hanesan Meriam Belina bai-bain hananu.

Saida mak Ita foti nudar lição murak eh hahan hodi habosu Ita nia klamar liu housi reflexão nebé Ita rona iha Domingo Advento semana ne’e?

1). Jesus dehan matan-moris no neon-nain, ba necessidade isin no liliu ba klamar nian; tanba maski espírito forte maibé isin fraco. Ita barak housik Ita nia isin fraco atu Domina fali Ita nia klamar. Nune’e Ita nudar sarani liliu jovem dala barak housi lerek tempo ba haksolok-an de’it ho borboleta-kalan, Ita balun soe tempo ba festa, hodi dansa kalan tomak too dader hodi hewai Ita nia obrigação nudar sarani, hanesan la ba missa, tuur iha Estrada ibun, joga biliard, SDSB, kur-kuru, bingo, bola guling no futu-manu.  

2) Maromak nia Futar Liafuan Domingo semana ne’e mos, convida Ita atu tau teni iha Ita fuan  lição rua:

Primeira, vigilância; São Marcos refere liu ba vigilância isin lolon nian hodi expressa eh hatudo liu ba vigilâcia espiritual. Mai Ita Cristão sira, precisa tau vigilância ba klamarl nian katak Ita bersiap siaga atu Ita la bele hakfodak ba Nai Nia hiit an mai nebéIta la espera. Se ne’e acontece duni Ita sarani sira labele dukur maibé hakbesik-an ba Cristo, tan Nia mak Ita mahon no Ita nia salvador. Mundo ohin loron hasoru força boot rua.  Força boot rua ne’e mak isin no klamar. Isin exige nia direito maibé klamar mós exige nia direito. Sira nia direito principal mak moris. Moris iha presente no iha futuro.  Moris presente mak realidade nebé Ita hasoru iha mundo ohin loron.  Moris ba futuro nian mak agora daudaun Ita hotu-hotu prepara hela atu hasoru. Tamba ne’e hanesan ema Cristão Ita sei halo vigilância lor-loron hodi hein Nai Nia loron atu mai.

Segunda: atu concretiza vigilância espiritual eh klamar nian, Evangelho ohin nian hatuur mai Ita condição rua: 1) Conversão no 2) Oração.

Primeiro caso: Nudar sarani Ita precisa tau iha Ita neon hodi halo conversão. Conversão katak Ita hare ba Ita nia hahalok aat no salan sira iha tempo passado nian hodi hadia fali Ita moris liuhousi sacramento confissão no hametin liutan Ita nia fiar nudar Católico  iha sacramento Eucaristia ou Missa nian. Ita dalabarak la halo vigilância espitual nian hanesan wainhira Ita e Ita nia maluk protestante sira, geova sira kaer Bíblia iha liman hodi tama-uma sai uma iha Ita nia bairro, maibé Ita foti fatuk no duni sira. 

Segundo caso mak halo oração: atu hadia Ita nia moris iha tempo presente nian, nudar sarani liuliu iha tempo Advento nian além halo vigilância ao mesmo tempo haboot tan Ita fiar liuhousi oração(hamulak nafatin-comunica ho Maromak); Maibé, saida mak acontece? Dala wain mak Ita haree no koko katak sarani barak ba participa iha missa, confessa, procissão maibé hafoin remata tiha cerimónia ne’e, fila mai uma, tolok malu, corrupção selingkuh, uza força hodi baku-malu, tuda malu, tolok no sadik malu.

Nudar tempo vigilância: tempo Advento hodi haksolok Nai nia Festa Natal nian, mai Itaida-idak hakiak dadaun espírito forte iha vigilância no haabut Ita nia fé, haburas Ita nia esperança no haboot liutan Ita nia caridade iha Cristo nia liafuannebé hateten; “Matan moris neon nain iha oração atu imi keta monu ba tentação”.

Ita nia riku soin fo ksolok mai Ita loron baluk de’it maibé, Maromak nia Lia fuan sei lori Ita moris rohan laek. Salmo Domingo Advento semana ne’e mos hakerek dehan: Nai, ami Maromak, halo ami fila, hatudu Ita futar oin mai ami, ami hetan maksoin. Ema anónimo ida hakerek liu tan nune’e; Melihatlah ke atas untuk urusan akhiratmu dan melihatlah ke bawah untuk urusan duniamu maka hidup akan tenteram. Assim Seja e Bem Haja. Amen.

Note: Reflexão ne’e publica ona iha Radio Timor Kmanek (RTK) iha tinan 2014.

WAINHIRA OAN MANE MAI HO KBIIT , HAMUTUK HO ANJO SIRA HOTU, IHA LORON NE’E, NIA SEI HEIN AN IHA NIA FATIN NIA GLORIA. REINO HOTU HOTU SEI HALIBUR IHA NIA OIN (MT, 25, 31-46)

Maun alin sarani doben sira nebé hau hadomi iha ita nain Jesus Cristo.

Ohin ita hamutuk celebra loron boot Cristo Liurai. Liurai ida laos ema seluk nian, liurai ida laos iha ninia-an de’it maibé liurai ida ita nian, liurai ida ba ita, liurai ida ho ita nafatin ba nafatin tamba ita fiar iha Nia, ita hahi no hanai nia be laos de’it hanesan liurai maibé Liurai MAKSOIN.

Liurai maksoin ne’e katak sa? Liurai maksoin laos hanesan liurai mundo rai klaran ne’e nian nebé ukun de’it, manda de’it, no orienta de’it. Maibé Liurai maksoin ne’e katak liurai ida nebé SOI ninia ema sira iha buat hotu nebé hasusar ninia emar sira, lao hamutuk no moris hamutuk ho ninia emar sira nebé continua tau fiar no laran metin nafatin iha Nia.

Primeira leitura haktuir mai ita kona ba ita ninia liurai ne’e ninia hahalok sira maksoin nian dehan “hau rasik mak sei tau matan ba hau nia bibi sira, hau mak sei hare sira, … hau sei hasai sira housi fatin nakukun laran be halo sira lao lakon, hasu sei buka sira nebé lakon, sei halibur sira be lao sala dalan, hau sei cura sira nebé moras. hau sei tau matan ba sira ho justiça.” Ne hatudu katak ita ninia liurai ne’e liurai domin nain, liurai be la housik ninia povo sira iha terus no susar laran maibé soi nafatin ninia povo sira iha momento no iha fatin hotu hotu.

Maun alin doben sira, segunda leitura dehan katak liurai ne’e mak Cristo, “wainhira Cristo tau ninia kbiit liurai iha Aman Maromak nia liman; wainhira hamonu tiha nai ulun sira, ema boot no funu balun sira hotu iha Nia ain okos. Funu balun ida nebé sei halakon ikus liu mak mate. Wainhira buat hotu iha ona Cristo nia ukun Nia rasik nu’udar Oan Mane, sei hela iha Aman nia ukun, ukun nebé sei halo nia ukun sasan tomak”. Cristo liurai buat hotu nian basa ninia ukun mai housi Aman Maromak, Cristo liurai nebé manan mate ka nakukun. Nia mak ukun mate no moris, Nia mak ukun lalehan no rai, nia mak liurai lalehan no rai nian no ninia ukun liurai maksoin ne’e rohan laek. Realidade ida ne’e lori ita hateke fila fali ba ita ninia moris hodi husu mos ba ita ida idak ninia-an katak “iha moris ne’e ita housik ou fo ita ninia-an ba se mak ukun? Cristo be liurai buat hotu ne mak ukun ka? Sasan ou riku soin ruma, ka matan dook ou espirito at ruma?”

 

De facto ita ninia moris sei sai oinsa depende ba ita entrega ita-an ba se mak ukun. Wainhira ita entrega ita-an ba sasan ou rikusoin sira mak ukun ita sei la hetan paz, sei laiha serenidade, no ikus mai ita sei mate rohan laek basa sasan sira laiha kbiit atu haraik paz, pior liu tan atu haraik moris rohan laek, laiha liu kedas? Se ita entrega ba matan dook ou espirito at ruma mak ukun ita sei hela iha incerteza nia laran no ita rasik nia-an sei la moris livre basa matan dook laiha certeza ida no espirito at laiha Liberdade ida iha nia.

 

Nune maun alin sira ita hatene katak ida nebé los liu mak ita entrega ita-an ba Cristo mak ukun, Cristo be liurai buat hotu hotu nian ne’e, Cristo be ukun moris ho mate no bele haraik paz, domin, tranquilidade, Liberdade no certeza ida kona ba moris ida be sei la nahas ba ita hotu. Cristo liurai ninia-ukun ukun ida be fo moris, hakonu domin, haraik perdão, la rai ódio, hakarak di’ak de’it, hari paz, halo justiça, laran luak no laran maus, halo caridade no liberta ema ba moris ksolok no moris rohan laek.

 

Evangelho haktuir mai ita tempo ikus nian nebé Cristo liurai boot liu hotu, liurai, liura hotu hotu nian halo justiça ba ema hotu hotu tuir ita ema sira ninia moris iha rai klaran ne’e. Justiça atu haketak sira nebé iha moris ne’e moris tuir reino Cristo Liurai nian housi sira nebé la fiar iha Cristo hodi housik sira ninia-an ba sasan ho ema ka espirito at sira mak ukun. Tem que haketak nune basa naturalmente so ema sira nebé moris iha Cristo Liurai ninia ukun de’it mak iha condição nebé hakbiit sira hodi moris nu’udar Cristo ninia reino iha moris rohan laek iha Lalehan, sira nebé laiha condição atu moris iha Reino Cristo nian sei hetan castigo rohan laek iha ahi nebé sei la nahas. Moris ida rohan laek iha Cristo Liurai ninia ukun ne’e laos hein too ninia tempo mak sei haraik mai ita maibé moris rohan laek ida ne’e ita hahu kedas tiha ona iha mundo ne’e basa ita fiar no moris tiha ona ho Cristo ita ninia liurai. Moris rohan laek ne’e hahu iha moris ida be nakonu ho domin, perdão, laran luak, la rai odio, la bosok, hakarak di’ak de’it no koalia ho moris lolos de’it tuir Maromak ninia hakarak. Housi ne’e mak sei continua nafatin ba nafatin no sai completo liu iha Lalehan hamutuk ho Aman, Oan no Espirito Santo Liurai buat hotu nian no hamutuk ho santo no santa sira hotu.

 

Maun alin sira, mai nu’udar ema sarani fiar nain iha Jesus Cristo ita lao ba oin halao ita ninia moris ne’e tau ita ninia fiar no laran metin iha los liurai ida de’it, Jesus Cristo Liurai buat hotu nian; La housik ita ninia an ba sasan ou ema ka espirito at ida mak ukun basa sira ne’e la halo ita livre maibé halo ita moris sai atan no tauk. Mai entrega ita-an ba de’it Cristo Liurai be liurai ba buat hotu ne’e mak ukun hodi nune ita moris lolos iha Liberdade nia laran, dook housi tauk, housi atan no housi buat at sira hotu, hodi nune ita iha certeza lolos ida ba moris ksolok no moris rohan laek tamba Cristo Liurai mak moris ksolok no rohan laek ne’e ninia hun no we matan lolos. Amen.

                                                                                              Domingo CR-AA,  Bidau, 22 de Novembro 2020, Pb.