shadow
Diocese de Dili > NOTÍCIAS

Domingo XXXI Tempo Comum (ANO A)

Todos os Santos – Solenidade Missa Próprio

 

Primeira Leitura    Ap. 7. 2-4, 9-14

Lia housi Livro Apocalipse:

Hafoin, ha’u haré Anjo ida tan sa’e housi lorosa’e, hodi lori sinal Maromak moris nian; nia bolu lia maka’as ba Anjo na’in háat nebé simu tiha knaar atu halo áat ba rai no tasi: “Keta halo áat lai ba rai ka ba tasi ka ba ai-hun sira, molok ami tau sinal iha Maromak nia atan sira nia rentós”.

Ne’e hotu tiha, ha’u haré ema lubun boot ida, sura la bele, housi nação, rasa, uma-kain no lia hot-hotu; sira hamriik iha kadunan no Bibi Oan nia oin, hatais ho unuk mutin hodi káer ai-tahan iha sira nia liman. Sira hakilar maka’as: “Maksoyn mai housi ita nia Maromak nebé tur iha kadunan, no mós housi Bibi Oan!” No Anjo sira hotu nebé hamriik hale’u kadunan ne’e, hale’u katuas sira no balada háat sira, no sira ne’e tuku tur ba rai iha kadunan nia oin, hodi kona rai ho sira nia rentos, no adora Maromak ho liafuan sira ne’e: “Amen, lia hahí nian, glória, matenek, agradece, naran boot, ukun no kbiit ba ita nia Maromak nafatin ba nafatin. Amen.”

Tuir mai, katuas sira ida ko’alia hodi husu ha’u: “Ita hatene sira nebé hatais mutin ne’e sé, no sira mai housi lós nebé?” Ha’u hatan ba nia: “Na’i, Itaboot mak hatene.” Hafoin nia dehan: “Sira mak sira nebé terus maka’as, no fase mutin fali ona sira nia hatais iha Bibi Oan nia ran.”

Maromak Futar Lia.

 

Salmo Responsorial                                                                                                                     Sal. 23(24). 1-2, 3-4ab, 5-6 (R. cf. 6)

Refrão : Ema otas ne’e mak buka Na’i!!! Repete-se

Rai no buat nebé iha nia, Na’i Nian,

Mundo no buat tomak hôrik iha nia.

Na’i hatur rai iha tasi leten,

Hari nia wé fohon. Refrão

 

Sé mak sei bele sa’e ba Na’i Nia foho?

Sé mak sei hôrik iha Na’i Nia kadunan?

Ida nebé liman mós, laran mós,

Ida nebé la bolu leet Nia naran. Refrão

 

Ema ne’e sei simu Na’i Nia bensa,

Nia sei hetan kolen housi Maromak, nia Maksoyn.

Ema otas ne’e mak buka Na’i,

Be buka Jacob nia Maromak Nia futar oin. Refrão

 

Segunda Leitura                                                                                                                                                                              1Jo. 3. 1-3

Lia housi São João nia Primeira Surat:

Maun alin sira: Haré ba oinsá Aman hadomi ita; tan ne’e mak ita hanaran-an Maromak nia oan-tebes duni, ita Maromak Nia oan. Mundu la hatene ita tanba nia la hatene Maromak. Ha’u nia doben sira, ohin kedas, ita Maromak Nia oan, maibé ita seidauk hatene lolós ita sei sai oinsá. Maibé ita hatene katak wainhira Cristo mosu mai, ita sei sai hanesan Nia, basá ita sei haré Nia nu’udar Nia-an rasik. Ema hot-hotu nebé iha esperança ne’e haka’as-an atu sai mós hanesan Cristo.

Maromak Futar Lia.

 

Aclamação                                                                                                                                                                                          Mt. 11, 28

Refrão : Aleluia, Aleluia!! Repete-se

Na’i dehan, “Imi hotu nebé kole no terus, mai buka Ha’u ba.

Ha’u sei kasu imi todan”. Refrão

 

Envangelho                                                                                                                                                                                     Mt. 5. 1-12ª

Na’i Jesus Cristo nia Evangelho nu’udar São Mateus haktuir:

Iha tempo nebá, Jesus haré ema lubun boot, Nia sa’e ba foho. Hafoin, Nia tur tiha, escolante sira besik ba Nia. Nia hahu hanourin sira hodi dehan nune’e: “Ksolok ba ema kiak sira nebé kiak iha laran, basá, reino Lalehan sira nian. Ksolok ba sira nebé tanis, basá, sira sei hetan kmaan. Ksolok ba sira nebé haraik-an, basá, sira sei simu rai hanesan liman-rohan. Ksolok ba sira nebé hamlaha no hamrook ba justiça, basá, sira sei bosu. Ksolok ba sira nebé laran-luak, basá, sira sei hetan di’ak. Ksolok ba sira nebé laran mós, basá, sira sei haré Maromak. Ksolok ba sira nebé buka dame, basá, ema sei boli sira Maromak oan. Ksolok ba sira nebé ema duni, fó terus tan buka justiça, basá, reino Lalehan sira nian. Ksolok ba imi, wainhira, tan Ha’u, ema hateten áat imi, duni imi, hodi foti lia bosok oi-oin hasouru imi. Imi haksolok ba, hahí ba, basá, imi nia kólen iha Lalehan wa’in liu.”

Lia Maksoyn

WALK THE TALK

(HALO TUIR SAIDA MAK KOALIA SAI)

 

Reflexão &Leituras Domingo Comum XXXI (31), Ano A, 2020

Mal. 1, 14b-2, 2b. 8-10Sal. 130(131), 1-31Tes. 2, 7b-9. 13 Mt. 23, 1-12

 

Kmanek ba Ita, Aman Maromak lalehan no rai nia Na’in, Tan Ita fo tada reino lalehan ba ema ki’ak sira!

Iha conteudo tomak Evangelho São Mateus nian, ita sempre hare indicação conflito entre doutrina no lalaok fariseu, escriba sira ho Jesu nian hanorin.

Semana ne’e, Evangelho mos apresenta knaar, responsabilidade no lalaok grupo fariseu, nebé hanorin assunto religioso ba judeu sira nebé contradiz ho Jesus nia hanorin no lalaok nu’udar verdadeiro mestre.

Jesus afirma ba Ninia seguidor (escolante) sira, (inclui ita nobun nu’udar sarani), li-liu hirak nebé assume knaar religioso hanesan amu lulik no religioso sira atu la bele sai hanesan fariseu; katak ibun hanorin lai fuan di’ak, hahalok la tuir saida mak hanorin.

Fila ba âmbito político, ukun nain sira koalia povo nia interece, povo nia moris di’ak, povo nia direito maibé, resultado ikus mak família moris di’ak, partidário hetan projecto, pemilik partai sai sumber kekuasaan, oportunista aproveita, lao rai sai nain,…nst. Povo sai espectador (penonton) no bom ouvintes ba promessa falso sira no ikus liu hetan de’it mak sesta básica hodi recupera economia?

Iha soru mutuk entre fariseu ho Jesus nebé evangelista Mateus relata, descobre Jesus nia crítica ba fariseu sira relaciona ho hahalok no regulamento sira nebé sira obdece ba iha âmbito judaico.

Iha ne’e, Jesus expressa ponto importante 4:

Primeiro: fariseu sira la moris tuir saida mak sira hanorin. Crítica ne’e válido mos ba ema hotu nebé professa religião diferente. Ne’e significa katak; ita moris tuir doutrina nebé ita adere ba. Ba sarani sira, automaticamente iha dever atu cumpri mandamento housi Maromak, ba religioso no político sira tenke moris tuir saida mak Jesus hanorin.

Segundo: Jesus hatete duni katak:”… Imi buka halo tuir buat nebé sira hateten, maibé keta tuir sira nia hahalok, tan sira hateten, maibé la halo”. Basá, fariseu sira hare liu ba lei sira ne’e literalmente. Significa sira haré liu ba sira mak letra hakerek maibé, evita tiha objectivo lolos housi lei hirak ne’e. Jesus la haré sentido literário maibé, refere liu ba objectivo. Por exemplo Jesus cura ema moras iha loron sábado maske lei judaica bandu. Iha ne’e, Jesus la haré ba saida mak lei hakerek maibé, haré liu ba ema nia di’ak (salvação). Tulun ema iha situação susar nia laran mak kmanek liu do que cumpri regra maibé, ema nafatin moris susar. Simplesmente, ita bele define nune’e: lei ne’e laos objectivo maibé, meio ida.

Terceiro: Jesus nia crítica refere ba hipocrisia (kemunafikan). Ba ida ne’e, Jesus hatete:”… Sira halo buat hotu atu ema haré sira: Sira buka de’it fatin boot atu tur iha mesa, buka de’it fatin boot no di’ak iha sinagoga; buka de’it ema hotu atu haksolok sira iha fatin hotu-hotu; hakarak ema halia sira ‘Mestre”. Iha Evangelho Mateus 6, 1-18, Jesus afirma katak fo esmola ruma karik, halo oração ruma karik, halo jejum karik, buka atu oinsa Maromak Maromak de’it mak hatene laos atu ema hahí ita.

Quarto: Jesus mos temi assunto título (gelar) eh posição nu’udar mestre. Jesus nia escolante sira proibido atu uza termo ne’e, atu evita ema sente-an aas nodi hanehan ema seluk. So iha de’it figura ida mak merece sai mestre. Sira seluk ne’e mesak maun-alin nebé precisa hadomi malu. Nune’e mos termo Aman; Jesus dehan:”…imi nia Aman ida de’it, mak ida be iha Lalehan”

Termo Aman laos refere baa man tuir perspectiva bilógico maibé, refere liu ba autoridade espiritual. Los duni katak iha prática, sarani sira bolu lider religioso, lider político, lider partido nu’udar aman. Maibé, ne’e expressão ida hodi hametin liu tan laço amizade entre figura hirak ne’e ho povo.

Atu taka, Jesus fo kedas chamda de atenção hodi tenik: “Ema nebé foti an, sei hatun nia, ema nebé haraik an, sei hahí nia”. Jesus hakarak hanorin katak ema nebé valor boot iha sociedade mak hirak nebé hatene servi. Ema ida sia ministro significa nia sai servidor basá, termo miistro significa “servir/atan”. Papa rasik considera hanesan ‘servus servorum; atan housi atan sira’. Ema nebé halo tuir saida mak nia hatete, nia mak ema boot.

Se religioso ida la moris tuir ninia espiritualidade, nia laos ema boot maibé atan ba sala. Se ministro ida mak la serviço tuir ninia mandato, nia cavalo mandado. Tanba ne’e, halo tuir saida mak koalia sai (Walk the Talk).Tan ne’e, Ha’u sei halo, ema hakribit mos imi, halo imi hanesan buat aat ida iha povu nia oin, wainhira imi la tuir Ha’u dalan, hodi hakarak liu imi nia hanourin”. Se lae jovem sira otas ne’e dehan garganta paralon ou kaben banjir demais. Assim seja e bem Haja (ignas2020).

XXXI DOMINGO TEMPO COMUM (ANO A)

Primeira Leitura    Mal. 1, 14b-2, 2b. 8-10

Lia housi Livro Profeta Malaquias:

Na’in buat hotu nian, hateten: “Ha’u, Liurai boot ida, rai tomak hamta’uk Ha’u naran. Oras ne’e, Ha’u fo hatene ba imi sacerdote sira! Imi lakohi rona Ha’u karik, imi la buka hahi Ha’u naran karik – Na’in buat hotu nian, hateten: Ha’u sei haruka malisan ba imi. Imi housik ona dalan di’ak, ho imi nia hanourin, imi halo ema wa’in sidi, imi halakon ona moruk ho Levi – Na’in buat hotu nian, hateten. Tan ne’e, Ha’u sei halo, ema hakribit mós imi, halo imi hanesan buat aat ida iha povo nia oin, wainhira imi la tuir Ha’u dalan, hodi hakarak liu imi nia hanourin.”  Ita hotu la iha Aman ida de’it? Tan sá, imi bosok malu, hodi sala hasouru ita ben sira nia moruk?

Maromak Futar Lia.

 

Salmo Responsorial                                                                                                                                                         Sal. 130(131), 1-3

Refrão : Na’i, tau ha’u besik Ita, tan iha hakmatek!!! Repete-se

Na’i, ha’u laran la buka riku,

ha’u matan la loko-an;

ha’u la buka dalan atu sai boot,

la buka buat nebé boot liu ha’u. Refrão

 

Ha’u buka ha’u klamar moris nafatin

iha hakmatek no ksolok.

Hanesan kosok oan iha inan hitin,

nune’e mos ha’u klamar hakmatek iha ha’u-an. Refrão

 

Segunda Leitura                                                                                                                                                                  1 Tes. 2, 7b-9. 13

Lia housi São Paulo nia surat ba sarani sira iha Filipo:

Maun-alin sira: Ami haraik-an iha imi leet, hanesan inan hamaus oan nebé ko’us. Nune’e mos, tan hadomi imi teb-tebes, ami hakarak imi hamutuk ho ami, laos Maromak nia Evangelho de’it, maibé, moris rasik, tan imi hadomi tebes ami. Tebes, maun alin sira, imi hatene hela ami nia knar no kolen. Ami serbisu kalan loron atu keta fo todan ba imi ida-idak, maibé, ami haklaken Maromak Nia Evangelho. Tan ne’e, ami agradese nafatin Maromak: simu liu tiha Maromak futar lia nebé ami haklaken, imi hakarak simu, laos hanesan ema nia lia-fuan, maibé, nu’udar Maromak futar lia nebé los duni;  lia nebé oras ne’e daudaun, fo kbiit ba imi nebé fiar.

Maromak Futar Lia.

 

Aclamação                                                                                                                                                                                           Mt. 11, 25

Refrão : Aleluia, Aleluia!! Repete-se

Kmanek ba Ita, Aman Maromak, lalehan no rai nia Na’in,

tan Ita fo tada Reino Lalehan ba ema kiik sira! Refrão

 

Evangelho                                                                                                                                                                                       Mt. 23, 1-12

Na’i Jesus Cristo nia Evangelho nu’udar São Mateus haktuir:

Iha tempo nebá, Jesus hateten ba ema lubun boot ida no ba Nia Escolante sira, nune’e: “Ema fariseu no escriba sira tur ona iha Moisés nia fatin. Imi buka halo tuir buat nebé sira hateten, maibé keta tuir sira nia hahalok, tan sira hateten, maibé la halo. Sira kesi naha halo todan, hodi tau ba ema kabaas, maibé sira rasik la book naha ne’e ho sira liman fuan. Sira halo baut hotu atu ema hare sira: Sira buka de’it fatin boot atu tur iha mesa, buka de’it fatin boot no di’ak iha Sinagoga; buka de’it ema hotu atu haksolok sira iha fatin hotu-hotu; hakarak ema halia sira ‘Mestre.’ Maibé, imi keta housik ema halia imi Mestre, tan imi nia Mestre ida de’it, imi hotu mesa maun alin. Iha rai, keta husik ema bolu imi ‘Aman’, tan imi Aman ida de’it, Aman lalehan. Keta husik ema bolu imi ‘Doutor’, tan imi nia Doutor ida de’it, mak Messias. Imi nebé mak boot liu, sei sai atan. Ema nebé foti an, sei hatun nia; ema nebé haraik an, sei hahí nia.”

Lia Maksoyn.

IMACULADA CONCEIÇÃO : KOUS HO DOMIN

(Perspetiva Jornalistica ba Existência 80 anos Arquidiocese Dili)

Housi : Marta do Rosário Afoan, Lcs.

 

Haktuir iha Biblia Sagrada iha livru Genésis (1:1-26) katak wainhira Maromak hahu halo lalehan ho rai, Maromak cria mos buat kmanek oi-oin iha mundo nia laran nune’e Maromak cria ema mane ida tuir Nia ilhas atu tau matan ba  buat hirak nebé cria uluk ona no Maromak hare katak cria de’it ema mane ida ne’e la naton nune’e mak  Maromak hasai ruin knosen ida housi mane nian hodi halo ema feto ida atu bele hamaluk nia. Mane no feto ne’e mak naran Adão ho Eva nebé sai ema primeiro, nu’udar criatura Maromak nian iha mundo nebé ikus mai geração tutan ba tutan sai barak liu tan iha mundo ida ne’e  to’o ohin loron.

Housi ne’e ita bele comprende katak hahu housi Adão ho Eva nia presença iha mundo mak tutan mai to’o ohin loron ita  bele moris hodi goja buat kmanek sira be Maromak tau uluk ona iha mundo ida ne’e tuir ita nia hakarak nebé masque dala ruma la tuir mos Na’i nia hakarak.  Dehan nune’e tanba dala wa’in ita ema criatura nebé moris housi íis Na’i Maromak nian rasik haluha Maromak no nunca cumpri kna’ar hanesan criatura ida be simu  kna’ar atu tau matan ba criatura seluk no criatura be lori ilhas Maromak nian, atu  banati tuir Maromak nia moris. Los duni katak ita ema sempre halo sala contra Na’i  Maromak  nia ukun fuan sira iha iha ita nia moris lor-loron, ida ne’e acontece tanba ita lao hakat tuir criatura primeiro nia ain fatin nebé halo sala contra Na’i Maromak nia mandamento hodi han fali aifuan bando nian. Nu’udar concequênçia housi sala ne’e mak ita ema la perfeito hanesan criatura dahuluk, só Maromak de’it mak perfeito.  Maibe masque ita halo sala contra bebeik  Maromak nia mandamento sira, Maromak sempre hadomi nafatin ita hodi ikus mai haruka Nia Oan mane mesak mai  mundo hodi soy ita housi nakukun laran.

Liu tiha séclo barak nia laran depois de ema moris ba  sala ne’e, Maromak hakarak hatudu nafatin ninia domin rohan laek ba povo be Nia hili, ba criatura hotu-hotu be mesak ninian de’it hodi continua ninia obra salvação, hodi soy ninia povo housi terus fatin Egipto mai to’o ohin loron. Atu ninia Oan Mane Jesus Cristo mai iha mundo Maromak hahu ho hamoris feto ida naran Maria, moris iha cidade Nazare housi família simples ida nebé hadomi Maromak. Moris housi aman St. Joaquim no inan St. Ana nebé ho fuan boot hala’o kna’ar ho domin hodi servi Maromak no maluk sira. Tan ne’e ita venera St. Joaquim no St. Ana basá sira na’in rua hanorin no cuidado sira nia Oan (Na’in Feto Maria) hodi hasa’e ba Maromak. Maria hafoin sai feto ida nebé hadomi lolos Maromak hodi halo tuir Maromak ninia hakaran tomak.  Halo tuir hodi mos sai Jesus Cristo maksoyn nia inan no ema hotu nia inan. Tanba kedas ne’e mak santa creda housi moris hahu mai fiar iha Maria nu’udar inan ida, inan ida be hadomi santa igreja nu’udar Maromak hadomi,  inan ida nebé tanba kous mundo nia maksoyn nia concerteza moris la ho sala original. Nune’e igreja hanaran Maria Inan Sala Laek ka Inan ba kous la ho salan, Imaculada Conceição.

Imaculada katak laiha sala, Sala Laek, moos ou Pura. Conceição katak kous, nune’e inan Imaculada Conceição katak inan kous la ho sala. Naran Imaculada ne’e oferece ba Na’in Feto hanesan sentido omenagem no consagração Maria Jesus nia inan, Imaculada Conceição iha sentido hanesan mos Concepção Jesus, nebé ho  lian Latina dehan Conceptus significa “Aifuan” ou “Concepção”. Na’in Feto mak kous Jesus Maromak oan iha ninia knotak, nune’e Imaculada Conceição katak ko’us Jesus Cristo ho sala laek. Tan ne’e iha século XIX liu, Amo Papa Pio IX  formula titulo ida ne’e nu’udar dogma ka doutrina formal igreja catolica  nian. Iha tinan 1854 iha Lourdes, França bainhira Virgem Maria mosu ba labarik ida naran Bernadette Soubirous ho idade 14 Na’in Feto Virgem Maria hatudu an nu’udar Imaculada Conceição. Quando Bernadette husu ba Nia (Na’in Feto) katak Ita se? Nia hatan dehan “Ha’u mak Imaculada Conceição”.

Matenek na’in Direito Canõnica no Teologia Edson  Luiz Sampel mos hateten dehan tudo ser humano nasce com o pecado original, mas Maria gozou do privilégio da concepção pura, porque Ela estava predestinada a ser a mãe de Deus, isto é a mãe de Jesus. Ne’e katak  nu’udar  humano ema hotu sempre moris ho sala original nian maibe Maria goza previlégio ida housi Concepção pura nian tanba hili Nia sai hanesan inan Maromak nian, ne’e mak Jesus nia Inan.

Loron comemoração Na’in Feto Imaculada Conceição nian sempre comemora iha dia 8 de Dezembro nebé hakerek iha calendário liturgia  housi Papa Sisto IV iha  dia 28 de Fevereiro 1477. Atualmente sai hanesan festa ba mahein igreja católica hot-hotu nian, nune’e mos hahu iha tinan 1940 wainhira Arquidiocese Dili moris ona nu’udar Diocese, nia fo an kedas ba Maria Imaculada Conceição mak sai ninia mahein. Nu’udar creda Arquidiocese Dili fiar katak Inan Santa be Maromak ninia Inan rasik nia harohan sai rohan laek nakonu ho graça oi-oin. Nune’e mak oras ne’e Arquidiocese Dili halo ona tinan 80 iha loron 4 fulan Setembro 2020 liu ba no ita sei celebra hamutuk ninia festa iha loron 8 fulan Dezembro ne’e, nebé mahein ninia loron rasik.

Imaculada Conceição: “Kous ho domin” sai hanesan tema especial ba Arquidiocese Dili nebé celebra ninia  existência 80 anos nu’udar mahein uma creda arquidiocese Dili nian nomos mahein nação Timor Leste nian.  Tan ne’e hateten Imaculada Conceição “kous ho domin” tanba Na’in Feto kous ho sala laek ou kous ho moos, liu housi Espírito santo nia kbiit nebé haraik ba Na’in Feto no Na’in Feto halo tuir duni Na’I nia hakarak hodi simu graça nebé haraik ba Nia. Masque Na’in Feto la moris hamutuk ho mane (São José) maibe Na’in Feto laiha hanoin ida, laiha intenção ida atu estraga bebe ou Kosok-Oan nebé iha ona ninia knotak hanesan ema wa’in estraga iha cidade Dili laran ne’e, Na’in Feto kous halo tuir nafatin de’it mak Maromak nia hakaran. Na’in Feto sempre cuidado nafatin Kosok-Oan Jesus masque iha desafio oi-oin nebé Nia hasoru iha comunidade nia leet, Na’in Feto ho pacencia ho domin boot ba Maromak  simu  ou  halo tuir buat nebé mak Anjo hateten ba Nia, ikus mai Na’in Feto tur ahi iha balada han fatin de’it no sente katak fatin ne’e mak seguru duni ba sira atu hamahan an ba.  

Hakerek na’in hakarak haklean uitoan kona ba liafuan “Kous ho domin”. Ne’e katak simu realidade moris nebé iha ita nia an ho laran haksolok hodi tau matan, cuidado hodi la hanoin a’at ba ita ran rasik, tanba nia mos ema hanesan ho ita, nia mos criatura Maromak nian nebé precisa domin housi inan aman hodi tau matan no cuida didi’ak nia nune’e nia mos bele presente iha mundo tuir Maromak hakarak. Ita labele contra Maromak nia hakarak. Só domin mak bele motiva ema atu protégé, atu hamoris, atu acompanha no atu tulun ema iha moris ne’e.

 Na’in Feto ninia obidiencia ba Maromak no ninia sasin moris halo ita  bele descobre katak Na’in Feto iha fuan no domin nebé boot ba Maromak hodi halo tuir Maromak nia hakarak tanba Nia sente katak Nia ne’e íis moris Maromak nian nune’e temque simu buat nebé mak Maromak fo. Dala barak iha situação sira hanesan soe bebe be aumenta barak ne’e fo hanoin teb-tebes mai ita ida-idak tanto feto ou mane atu reflete ita nia hahalok sira nebé dala barak laiha conçiencia, dala barak laiha sentimento hanesan ema humana, dala barak hakarak riku soin mundo nian de’it, dala barak hakarak iha buat hot-hotu nune’e ikus mai halo buat hot-hotu tuir ema ida-idak nia hakarak, tuir ema ida-idak nia interese, tuir ema ida-idak nia gosto de’it hodi soe bebe mos arbiru de’it  hanesan buat folin laek ida.

KOUS HO DOMIN, ne’e liafuan simples tebes maibe ninia significado klean ba ita atu hatene no reconhece ita nia an didi’ak katak ha’u ne’e humana ida nebé íis moris Maromak nian hanesan mos ho bebe ou kosok oan nebé soe iha fatin-fatin. Tan ne’e Na’in Feto sai modelo ba inan hot-hotu iha mundo tomak nebé sai hanesan inan igreja nian, Na’in Feto sai inspirador ba ema hot-hotu (feto mane)  atu banati tuir Nia ain fatin nebé hatene hadomi, hatene fo atenção no  hatene cuida ema no  buat hotu nebé mak Maromak haraik ba Nia.

Simplesmente ita  bele dehan obedece ba Maromak mak valoriza moris. São João Paulo II dehan “A questão sobre o valor da vida, sobre o significado da vida, faz parte do singular tesouro da juventude. Mais ainda, quando a juventude é testada pelo sofrimento pessoal, ou é profundamente consciente do sofrimento dos outros; quando se encontra face a face com o mistério do pecado e a iniquidade humana (mysterium iniquitatis). Ne’e katak  questão kona ba valor moris, kona ba significado moris ne’e hola parte unica ba rikusoyn moris juventude nian. Liu tan ida ne’e quando juventude ne’e  hamosu  nu’udar obstaclo sofrimento iha ninia moris pessoal ou profunda liu tan wainhira nia conçiencia mos ho ema seluk nia  sofrimento; bainhira nia hasoru direitamente ho mistério pecado nian no mistério ema nia hahalok a’at sira (mysterium iniquitatis). Jesus Cristo nia hanorin be dehan katak “ somente Maromak de’it mak di’ak, só Maromak de’it mak domin”. Halo ita consiente mos ho mistério moris ita ema nian sira iha leten. Halo ita descobre no comprende mos katak los duni masque dala barak ita sala bebeik hasoru Maromak ninia hakarak hodi la tuir maibe Maromak sempre di’ak nafatin ba ita, Maromak sempre iha domin nafatin ba ita liu housi nia Oan Mane mesak Jesus Cristo. Tan ne’e atu bele hadomi nafatin hanesan Maromak hodi hadomi Maromak no hadomi ema seluk hahu kedas housi concepção ema nian to’o mate ita precisa kesi ita-an  no tau fiar ho laran metin nafatin iha Maromak Aman, Oan no Espírito Santo, no lao hamutuk nafatin ho Na’in Feto nebé sai modelo hamtauk ba Maromak nian no mahein ba Maromak oan sira hotu de modo geral, no especificamente  ba creda Arquidiocese Dili be iha ona tinan 80 ne’e ba nafatin hodi nune’e ita htou bele moris nafatin iha domin lolos ida Inan nia, Aman nian no oan sira nian nu’udar família ida de’it, família Maromak nian.

REFERÊNCIA:

  1. BIBLIA SAGRADA ESCRITURA TESTAMENTO TUAN
  2. BIBLIA SAGRADA ESCRITURA TESTAMENTO FOUN
  3. https://www.mirifica.net/2019/07/25/santa-Ana-dan-santo-yoakim-orangtua-santa-perawan-maria-26-juli/ asesu iha loron 22 fulan Setembro tinan 2020
  4. http://g1.globo.com/jornada-mundial juventude/traduzindo/platb/2013/07/22/entenda-o-que-e-a-imaculada-conceicao-de-maria/ asesu iha loron 22 fulan Setembro tinan 2020
  5. https://www.dicionariodenomesproprios.com.br/imaculada/ asesu iha loron 22 fulan Setembro tinan 2020
  6. Union of Catholic Asian News 9 de Novembro de 1988
  7. São João Paulo II “Frases inspiradoras de São João Paulo II sobre o amor e o sacrifício” asesu iha loron 23 fulan Setembro 2020.

 

Guverno Aprova Projeto Leí kona ba Organização no Funcionamento Tribunál Sira

 DILI 28 Outubro 2020 (DCAD)- Conselho Ministro aprova projeto ba proposta Leí ida kona ba Organização no Funcionamento Tribunál sira, Leí ne’e apresenta housi Ministro Justica Manuel Cárceres da Costa iha sorumutu Conselho Ministros iha Palacio Governo Dili iha loron Quarta (28/10).

Ho projeto Proposta Leí ne’e kona ba organização no Funcionamento Supremo Tribunál Justica nian no cria condição wainhira iha juis sira ho carreira ho esperiéncia no número suficiente, hodi avança ba instalação ida-idak. To’o oras ne’e, sira nia função continua sei asegura housi Tribunál Recurco. Haktuir Ministro Presidencial Conselho Ministros, Fidelis Manuel Leite Magalhães liu housi Comunicado da Imprenca.

Fidelis Manuel Leite Magalhães hatutan, Propoin hodi aprova kona ba enquadramento Juridico nebé sei permite futura instalação jurisdição administrativa no fiscál nebé entrega hodi julga recurço sira housi decisão órgão sira estado nian, litígio administrativo no fiscál sira seluk.   

Natureza housi Tribunál distritál atuál, sira hanesan tribunál jurudição comum nebé reitera no preve possibilidade desdobramento housi tribunál refere sira kona ba jurisdição comum ba juis sira nebé iha competéncia especializada; iha materia siveél no criminál nomós nafatin ho volume no complecidade housi processo nebé comete ba tribunál judiciál determinado ida kona ba instáncia dahuluk nebé justifica, Juis ho competéncia especializada iha materia família ho menor sira. Tenik Ministro Presidencial Conselho Ministros, Fidelis Manuel Leite Magalhães iha Palacio Governo. (Leo S’mauS)

Sábadu, XXX Semana Tempo Comum (ANO A)

Primeira Leitura                      Flp. 1. 18b-26

Lia housi São Paulo nia Surat ba sarani sira iha Filipos:

Maun alin sira: Sira haklaken  Cristo, no tan ne’e ha’u haksolok; ha’u laran la susar ida.

Ha’u hatene katak buat sira ne’e hotu sei sai graça mai ha’u, tanba imi nia hamulak no tanba ulun nebé Cristo nia espírito fó. Ha’u hein, hodi hatene lolós katak ha’u sei la mo’e. Ha’u hatene nafatin hanesan iha tempo uluk nian katak, ha’u moris ka ha’u mate, Cristo sei hetan naran boot housi ha’u.

Mai ha’u, moris katak Cristo; mate mós folin boot mai ha’u. Maibé ha’u moris nafatin karik, ha’u sei bele serbisu ho fuan barak liu tan Ne’e duni, ha’u hanoin rua: ha’u hakarak man’manas atu husik ona moris ne’e hodi ba ona hamutuk ho Cristo; ida ne’e di’ak liu tan; maibé di’ak liu ba imi katak ha’u hela lai iha moris ne’e. Tanba ha’u hatene mós katak ha’u sei hela hamutuk ho imi, atu imi bele ba oin hodi hetan ksolok iha fiar. Ha’u sei fila fali duni ba imi dala ida tan; ha’u sei halo imi gaba an tanba imi Cristo nian.

Maromak Futar Lia.

 

Salmo Responsorial                                                                                                                                         Sal. 41(42). 2-3, 5 (R. 3ª)

Refrão : Ha’u klamar hamrook ba Maromak moris!!! Repete-se

Hanesan rusa buka Wé lolon,

Nune’e mós ha’u klamar buka Maromak.

Ha’u klamar hamrook ba Maromak,

Hamrook ba Maromak moris,

Wainhira lós ha’u sei hare Maromak Futar Oin? Refrão

 

Ha’u klamar laran susar hanoin,

Wainhira mak ha’u la’o ba Na’i Nia templo,

Iha lian ksolok no hahí nia leet,

Iha festa ema lublubun nian. Refrão

 

Aclamação                                                                                                                                                                                      Mt. 11. 29ab

Refrão : Aleluia, Aleluia!! Repete-se      

Imi tau Ha’u Nia todan  iha imi nia kbás hodi halo tuir Ha’u,

Na’i dehan, tan ha’u laran maus, Ha’u haraik-An. Refrão

 

Evangelho                                                                                                                                                                                     Lc. 14. 1, 7-11

Na’i Jesus Cristo nia Evangelho nu’udar São Lucas haktuir:

Iha loron sábado ida, Jesus tama iha fariseu boot ida nia uma atu han. Sira hotu hateke ba Nia. Haré tiha oin sá bainaka balun fihir tur fatin di’ak, Jesus haktuir ba sira aiknanoik ida ne’e: “Ema ruma convida karik ó ba festa kaben ida, keta tur iha mesa ulun; keta uma na’in convida ema boot liu ó karik; hafoin, ema nebé convida imi na’in rua sei dehan ba ó: ‘Fó lai fatin ba ema ne’e.” Nune’e o sei moe boot, hodi ba tur iha fatin ikus liu. Maibé wainhira ema convida ó, ba tur iha fatin ikus liu; nune’e, wainhira ema nebé convida ó to’o mai, nia sei dehan ba ó: ‘Belun, mai tur liu leten’. Nune’e ema hotu nebé tur hamutuk iha mesa sei hahí ó. Basá ema nebé foti an, Na’i sei hatun nia; no ema nebé haraik an, Na’i sei foti nia”.

Lia Maksoyn.

Sexta-Feira, XXX Semana do Tempo Comum (ANO A)

Primeira Leitura                         Flp. 1. 1-11

Lia housi São Paulo nia Surat ba sarani sira iha Filipos:

Housi Paulo ho Timeteo, Cristo Jesus nia atan, ba sarani sira iha rai Filipos, hamutuk ho sira nia bispo no diácono sira: ba imi hot-hotu iha Cristo Jesus.

Graça no dame ba imi housi Maromak, ita Aman, no housi Cristo Jesus, ita Na’i.

Ha’u fó agradece ba ha’u nia Maromak wainhira ha’u hanoin imi; no wainhira reza tanba imi, ha’u reza ho ksolok; ha’u la bele haluha buat hotu nebé imi halo no fahe hamutuk ho ha’u wainhira ita serbisu atu haklaken Evangelho; houri loron uluk to’o ohin. Tanba Maromak mak hahu buat di’ak ida ne’e iha imi, ha’u hatene lolós katak Nia sei halo nia lolós to’o Cristo Jesus nia loron.

Ne’e mak ha’u nia esperança kona ba imi, basá ha’u lori imi iha ha’u nia fuan; wainhira ha’u iha dadur laran ka buka atu tahan no hametin Evangelho, imi hamutuk ho ha’u no halo parte iha graça nebé ha’u simu.

Maromak hatene katak ha’u hadomi imi teb-tebes ho Cristo Jesus rasik nia domin. Iha ha’u nia hamulak, ha’u husu atu imi nia domin lori imi loron-loron ba matenek boot liu, hodi hatene di’ak liu tan, atu nune’e, imi bele haré momós buat hot-hotu nebé di’ak liu. Nune’e, imi bele sai laran mós liu, hodi to’o ba Cristo nia loron, nu’udar ema sala laek, nakonu ho santidade imi fuan, nebé mosu mai housi Cristo Jesus, atu ema hahí no fó glória ba Maromak.

Maromak Futar Lia

 

Salmo Responsorial                                                                                                                          Sal. 110(111). 1-2, 3-4, 5-6 (R. 2ª)

Refrão : Na’i, Ita hahalok sira boot tebes!!! Repete-se

Ou         : Aleluia!

Ho laran tomak ha’u hahí Na’i,

Hamutuk ho ema di’ak sira hotu.

Nia hahalok kmanek tebes,

Di’ak tebes ba sira be hanoin

Nia iha neon laran. Refrão

 

Boot no kmanek tebes Nia hahalok sira,

Nia justiça hela ba nafatin.

Na’i Nia hahalok sira,

Ema sei la haluha;

Na’i laran di’ak no sadi’a. Refrão

 

Nia fó han sira be hamta’uk Nia,

Tan Nia hanoin hetan Nia moruk;

Hatudu ba Nia povo kbiit Nia hahalok nian,

Hodi saran ba nia liman-rohan nação sira nian. Refrão

 

Aclamação:                                                                                                                                                                                         Jo. 10. 27

Refrão: Aleluia, aleluia!! Repete-se

Ha’u nia bibi sira rona ha’u nia lian, na’i liatun;

Ha’u hatene sira, sira mai tuir Ha’u. Refrão

 

Evangelho                                                                                                                                                                                          Lc. 14. 1-6

Na’i Jesus Cristo nia Evangelho nu’udar São Lucas haktuir:

Iha tempo nebá, iha loron sábado ida, Jesus tama iha Fariseu bo’ot ida nia uma atu han. Sira hotu hateke na Nia. ema moras isin bubu ida mai hamriik iha Nia oin. Jesus hateten ba ukun na’in no fariseu sira: “iha loron Sábado bele f’o isin di’ak ba ema moras, kalae?” sira nonok de’it. Tuir mai, kaer tiha ema moras nia liman, Jesus fó isin di’ak na nia hodi haruka nia ba. Hafoin Nia dehan ba sira: “iha imi nia le’et se mak la dada sai nia kuda buro ka nia karau nebé monu iha be matan, maski iha loron sábado?” sira labele hatan bu’at ida kona ba ne’e.

Lia Maksoyn

Quinta – Feira, XXX Semana do Tempo Comum (ANO A)

Primeira Leitura                         Ef. 6. 10-20

Lia housi São Paulo nia Surat ba sarani sira iha Éfeso:

Maun alin sira: Hari imi nia kbiit iha moris hamutuk no Na’i, housi nia kbiit nia tulun. Tau hatais funu nian nebé Maromak haraik tiha ba imi, atu imi bele ba hasouru diabo nia babeur áat hotu. Basá ita la halo funu hasouru ema de’it, maibé ho babeur diabo nian nebé ukun otas ne’e. Ne’e duni, tau Maromak nia hatais funu nian ohin kedas! Nune’e, wainhira loron áat sei mosu mai, imi bele ba hasouru funu baluk, no wainhira imi halo tiha funu to’o rohan, imi sei manan.

Matan moris ba, ho lialós nu’udar imi nia futu kabun, ho moris lós atu tahan imi nia hirus matan; ho imi nia laran maus atu haklaken liafuan di’ak dame nian nu’udar imi nia sapatu. Lori fiar nu’udar imi nia eskudu ba nafatin, basá ho nia, imi bele ba hasouru rama ho ahi nebé mai housi diabo. Simu maksoyn atu taka imi nia ulun no Maromak futar lia nu’udar surik nebé Espírito fó ba imi. Halo buat hotu ne’e hodi harohan, no husu Maromak nia tulun.

Hamulak nafatin ba, nu’udar Espírito lori ba imi. Tan ne’e, matan moris ba, hamulak ba Maromak nia povo tomak. Hamulak mós ba ha’u nia di’ak, atu Maromak haraik mai ha’u lia menon ida wainhira ha’u atu ko’alia ona, atu ha’u bele ko’alia ho aten barani hodi fó sai buat hotu nebé subar hela iha Evangelho. Tan Evangelho ne’e ha’u sai manu-ain ida ona, maski ohin ha’u iha dadur laran. Imi hamulak ba atu ha’u hetan aten barani wainhira ha’u ko’alia kona ba Evangelho, nu’udar ha’u nia knaar atu ko’alia.

Maromak Futar Lia.

 

Salmo Responsorial                                                                                                                               Sal. 143(144). 1, 2, 9-10 (R. 1ª)

Refrão : Rahun di’ak ba Na’i, fatuk inan ha’u-an fatin nian!!! Repete-se

Rahun di’ak ba Na’i,

Fatuk inan ha’u heli-an fatin nian,

Nia mak hanourin ha’u liman ba hafunu,

No halibur fuan ba funu. Refrão

 

Maromak mak ha’u tulun no ha’u kota,

Ha’u kbiit no ha’u maksoyn;

Nia mak ha’u kalili no heli-an fatin,

No halibur povo iha ha’u kbiit okos. Refrão

 

Ha’u sei hananu ba Ita,

knananuk foun ida,

Sei hadahur ba Ita ho lia harpa,

Ita mak halo liurai manan,

No soi David, Ita atan. Refrão

 

Aclamação                                                                                                                                                                         cf. Lc. 19. 38; 2. 14

Refrão : Aleluia, Aleluia!! Repete-se

Rahun di’ak ba ida be mai hodi Na’i Nia naran;

Damen iha lalehan, glória iha leten áas ba. Refrão

 

Evangelho                                                                                                                                                                                      Lc. 13. 31-35

Na’i Jesus Cristo nia Evangelho nu’udar São Lucas haktuir:

Iha loron nebá, fariseu balun mai hodi dehan ba Nia: “Sai tiha housi ne’e, basá Herodes hakarak oho Ita”. Nia hatan ba sira: “Imi la’o ba, hodi dehan ba asu fuik ne’e: ‘Ha’u duni sai diabo sira, hodi fó isin di’ak ba ema ohin no aban; no bainhira Ha’u nia knar hotu ona. Maibé ohin, aban no bainrua Ha’u sei tuir Ha’u nia dalan: basá profeta ida la bele mate iha liur Jerusalém.

Jerusalém, Jerusalém, nebé oho profeta sira no tuda sira nebé Na’i haruka ba ó! Dala hira ona Ha’u buka atu halibur ó nia oan sira, hanesan manu inan tau nia oan sira iha nia liras okos, maibé ó lakohi! Tebes, ema sei hamamuk imi nia uma. Maibé Ha’u dehan ba imi katak imi sei la haré tan Ha’u to’o loron nebé imi sei dehan: ‘Rahun di’ak ba Ida nebé mai hodi Na’i Nia naran!’”

Lia Maksoyn.

Quarta-Feira, XXX Tempo Comum (ANO A)

Primeira Leitura                          Ef. 6. 1-9

Lia housi São Paulo nia Surat ba sarani sira iha Éfeso:

Oan sira, halo tuir imi nia aman inan sira nia hakarak. Ne’e mak buat nebé lós. “Hamtauk o nia aman inan” mak ukunfuan uluk liu nebé iha promessa, katak “atu o bele haksolok, no o bele moris naruk  iha rai.”

Aman inan sira, keta halo imi nia oan sira laran susar. Maibé hanourinn sira disiplina no Na’i nia doutrina lolós. Atan sira, halo tuir imi nia na’i nia doutrina lolós.

Atan sira, halo tuir imi nia na’i nia hakarak, ho hamta’uk no laran tomak; halo hot-hotu ho laran lós, hanesan imi serbi Cristo rasik. Halo nune’e, la’os de’it wainhira sira haré imi, tanba imi hakarak monu lós ba sira laran, maibé ho laran tomak imi halo Maromak nia hakarak, nu’udar Cristo nia atan sira. Halo imi nia serbisu nu’udar atan ho laran haksolok, hanesan imi serbi Na’i, la’os ema de’it. Hanoin katak Maromak sei selu ema ida-idak nia kolen, nia atan ka la’os atan, tuir hahalok di’ak nebé nia halo.

Na’i sira, halo nune’e mós ho imi nia atan sira. Keta halo sira ta’uk. Hanoin ba katak imi no imi nia atan sira iha Na’i ida de’it iha lalehan, nebé sei tesi lia ba ema hot-hotu ho sukat ida de’it.

Maromak Futar Lia.

 

Salmo Responsorial                                                                                             Sal. 144(145). 10-11, 12-13ab, 13cd-14 (R. cf. 13c)

Refrão : Na’i metin iha Nia Liafuan sira!!! Repete-se

Na’i, ema sira sei fó agradece ba Itaboot,

Ita emar sei hahí nafatin Itaboot.

Sira sei haklaken Ita reino nia glória,

Sira sei haktuir buat foun hirak Ita halo. Refrão

 

Atu fó hatene ba ema tomak Ita kbiit,

No Ita reino nia glória no nia kmanek.

Ita Nia reino, reino ida rohan laek,

Ukun ema hotu ba nafatin. Refrão

 

Na’i metin iha Nia futar liafuan,

Halo buat hotu ho laran-luak,

Nia tahan ema sira be atu monu,

Nia tulun ema sira be monu ba rai. Refrão

 

Aclamação                                                                                                                                                                                   cf. 2Tes. 2. 14

Refrão : Aleluia, Aleluia!! Repete-se

Hodi Evangelho Na’i Maromak bolu ita atu hola parte iha

Ita Na’i Jesus Cristo Nia Glória. Refrão

 

Evangelho                                                                                                                                                                                     Lc. 13. 22-30

Na’i Jesus Cristo Nia Evangelho nu’udar São Lucas haktuir:

Iha tempo nebá, Jesus liu housi cidade no knua sira atu ba Jerusalém hodi hanourin. Ema ida husu ba Nia: “Na’i, ema uituan de’it mak sei hetan maksoyn?” Nia hatan ba sira: “Haka’as an atu tama liu housi odamatan kloot, basá Ha’u dehan ba imi katak ema barak sei koko atu tama, maibé sei la iha kbiit.

Wainhira uma na’in hader hodi taka tiha ona odamatan, imi sei hamriik iha liur hodi tuku odamatan dehan: “Na’i, loke mai ami!’ Nia sei hatan: ‘Uluk ami han hemu hamutuk ho Itaboot, no Itaboot hanourin iha ami nia praça sira.’ Maibé Nia sei dehan ba imi: ‘Ha’u la hatene imi mai housi nebé. Dook tiha housi Ha’u nia oin, imi hotu nebé halo áat!’

Iha nebá, ema sei tu’un nehan hodi tanis; wainhira imi sei haré Abraão, Issac, Jacob no profeta sira hotu iha Maromak Nia reino, maibé ema sei duni sai imi ba liur.

Ema sei mai housi loromonu no lorosa’e, housi tasimane no tasifeto, no sira sei tur han iha Maromak Nia reino. Sira nebé ohin ikus, sei sai uluk; no sira nebé ohin uluk, sei sai ikus fali.”

Lia Maksoyn.

Terça-Feira, XXX Tempo Comum (ANO A)

Primeira leitura                         Ef. 5. 21-33

Lia housi São Paulo nia Surat ba sarani sira iha Éfeso:

Maun alin sira: Imi buka haraik-an ba malu ba tanba imi hamta’uk Cristo. Feto sira, halo tuir imi nia la’en nia hakarak, hanesan imi halo tuir NA’i., basá la’en ida uku nia feen hanesan Cristo ukun Kreda no Cristo mak Kreda mak kreda nia ukun no maksoyn ba nia isin lolon. Ne’e duni, feto sira sei husik Cristo ukun nia. Mane sira, hadomi imi nia kaben nu’udar Cristo hadomi Kreda no saran nia moris tanba nia. Nia halo ida ne’e atu, hamos tiha kreda iha be, Nia bele saran nia ba Maromak housi nia liafuan, nune’e Nia bele saran nia ba Maromak housi nia liafuan, nune’e Nia bele simu Kreda ho nia kmanek tomak momós no sala laek, la iha buat fo’er eh áat, eh buat seluk tan nebé halo ia la furak. Mane sira sei hadomi sira nia kaben hanesan sira hadomi sira rasik nia isin lolon. Mane nebé hadomi nia kaben hadomi nia na rasik. Ema ida la hirus nia isin lolon, maibé nia fó han no tau matan ba nia nu’udar Cristo tau matan ba Kreda. Ita hotu Cristo nia isin lolon nia liman ain. “Tan ne’e, mane husik nia aman no inan hodi moris hamutuk ho nia feen, no sira na’in rua sai isin ida de’it.” Ne’e mistério boot duni, maibé ha’u dehan ne’e kona ba Cristo ho nia Kreda. Kona bga sira seluk, mane ida-idak sei hadomi nia kaben; hadomi nia hanesan nia an rasik, no feto mós sei hamta’uk  nia la’en.

Maromak Futar Lia

 

Salmo Responsorial                                                                                                                       Sal. 127 (128). 1-2, 3, 4-5 (R. cf. 1ª)

Refrão : Ksolok ba sira be hein iha Na’i!!! Repete-se

Ksolok ba sira be hamta’uk Na’i,

Hodi la’o tuir Nia dalan.

Housi ó nia liman nia kole mak ó han,

Ó sei haksolok hodi moris di’ak. Refrão

 

Ó nia káben hanesan uvas buras nafatin

Iha ó nia uma laran.

Ó nia oan sira hanesan oliveira nia tubun

Hadulas ó nia mesa. Refrão

 

Nune’e, ema be hamta’uk Na’i simu bensa,

Na’i haraik bensa ba ó housi foho Sião.

Ó bele haré Jerusalém be buras

Iha ó nia moris tomak. Refrão 

 

Aclamação                                                                                                                                                                                     cf. Mt. 11. 25

Refrão : Aleluia, Aleluia!! Repete-se

Rahun di’ak ba Ita, Aman, Na’i lalehan no rai nian,

tan Ita hatudu mistério reino lalehan nian ba kiik sira. Refrão

 

Evangelho                                                                                                                                                                                      Lc. 13. 18-21

Na’i Jesus Cristo nia Evangelho nu’udar São Lucas haktuir:

Iha tempo nebá, Jesus lia tun, dehan: “Maromak nia reino hanesan saída lós, eh Ha’u sei tanesan nia ho saída? Nia hanesan mustarda musan nebé ema ida káer hodi kuda iha nia to’os. Musan ne’e moris hodi sai aihun boot ida, manu sira housi lalehan mai tur iha nia sanak sira.” Nia dehan tan: “Ha’u sei tanesan Maromak nia reino ho sáida lós? Nia hanesan fermento nebé feto ida tau iha farinha sasukat tolu, to’o masa tomak sa’e.”

Lia Maksoyn.