shadow
Diocese de Dili > NOTÍCIAS

Terça-Feira, VI Semana iha Tempo Comum (ANO A)

Primeira Leitura                        Tg. 1. 12-18

Lia housi São Tiago nia Surat:

Maun alin sira: Rahun di’ak ba ema nebé tahan babeur, basá wainhira nia manan tiha, nia sei simu kolen moris nian nebé Maromak hakotu ona ba sira nebé hadomi nia.

Ema ida la bele hateten wainhira nia hetan tentação, “Maromak koko ha’u”; basá ema ida la bele babeur Maromak no Nia mós la koko ema; ema hetan tentação, wainhira nia hakarak áat rasik mak koko nia. Hakarak áat ne’e fó fuan, no lori ba sala; wainhira sala sai boot ona, sala lori mate mai.

Keta bosok-an, maun alin doben sira! Presente di’ak ida-idak no kmanek lolós ida-idak mai housi Lalehan, housi Maromak nebé hakiak naroman Lalehan nian. Nia la muda ka halo nakukun mosu mai. Hodi Nia rasik nia hakarak, Nia hakiak ita housi liafuan lialós nian atu ita bele sai criatura hot-hotu nia ulun.

Maromak Futar Lia.

 

Salmo Responsorial                                                                                                            Sal. 93(94),12-13a, 14-15, 18-19, (R. 12a)

Refrão : Na’i, ksolok ba ema nebé Ita hanourin!!! Repete-se

Na’i, ksolok ba ema nebé Ita hanourin,

Ba ida nebé Ita hanourin Ita ukunfuan,

Hodi haraik ba nia dame iha loron terus nian. Refrão

 

Na’i sei la hakribi Nia povo,

Sei la husik Nia liman-rohan.

Na’i tesi lia ho justiça,

No ema laran mós sei moris tuir nia. Refrão

 

Wainhira ha’u dehan, “Ha’u ain nakdedar”,

Ita laran luak tahan ha’u;

Wainhira susar sira sai barak ba dadaun,

Ita lia-ksolok haksolok ha’u klamar. Refrão

 

Aclamação                                                                                                                                                                                           Jo. 14. 23

Refrão : Aleluia, Aleluia!! Repete-se

Ema sé hadomi Ha’u, nia halo tuir Ha’u nia liafuan; Ha’u

Aman sei hadomi nia, Ami sei mai hôrik iha nia. Refrão

 

Evangelho                                                                                                                                                                                       Mc. 8. 14-21

Na’i Jesus Cristo nia Evangelho nu’udar São Marcos haktuir:

Iha tempo neba, escolante sira haluha tiha lori pão. Sira iha pão fuan ida de’it iha ró laran. Jesus hateten ba sira: “Matan moris neon na’in ba kona ba Fariseu no Herodes sira nia fermento”. Sira haksesuk malu dehan: “Nia dehan nune’e, tanba ita laiha pão. Maibé Jesus, hatene  tiha sira nia hanoin. Dehan; “Tan sá imi hanoin katak Ha’u hateten ne’e tanba pão la iha? Imi la dauk haré no comprende? Imi fuan la haré? Imi matan iha, maibé la haré; tilun iha, maibé la rona. Imi la hanoin hetan, wainhira Ha’u fahe pão fuan lima ba ema rihun lima, imi halibur pão rahun ta’an hira nakonu?” Sira hatan: “Sanulu resin rua”. “Wainhira Ha’u fahe pão fuan hitu ba ema rihun háat, imi halibur pão rahun ta’an hira?” Sira hatan: “Hitu!” Nune’e, Jesus dehan ba sira: “Imi seidauk hatene nafatin?”

Lia Maksoyn

Segunda-Feira, VI Semana iha Tempo Comum (ANO A)

Primeira Leitura                            Tg. 1. 1-11

Lia housi São Tiago nia Surat:

Housi Tiago, Maromak no Na’i Jesus Cristo nia atan, ba suku sanulu resin rua namkari iha raiklaran:

Cumprimentos!

Maun alin sira: haksolok ba wainhira imi hetan susar oi-oin, basá imi hatene katak wainhira imi nia fiar manan babeur, imi laran metin liu tan. Haré ba katak imi laran metin to’o rohan, atu imi sai lolós, hodi la kuran buat ida. Imi ida kuran matenek karik, nia sei husu Maromak ba. Nia sei fó ba ema hot-hotu ho laran luak hodi la si’ak, no ema ne’e sei hetan matenek. Maibé nia sei husu hodi fiar, la bele laran rua-rua, basá ema nebé laran rua-rua henesan laloran tasi nian nebé anin huu no lori mai lori ba. Ema hanesan ne’e, nebé laran la metin no laran rua-rua iha buat nebé nia halo, keta hanoin katak nia sei simu buat ruma housi Maromak.

Ema kiak sei haksolok ba wainhira Maromak foti nia; no ema riku sei haksolok ba wainhira Na’i hatun nia; basá nia, hanesan du’ut fuik nia ai-funan be sei liu. Loron sa’e no sai manas maka’as hodi halo du’ut maran; nia ai-funan monu, no nia furak lakon ona. Nune’e mós mak ema riku nebé buka moris dadaun, sei lakon.

Maromak Futar Lia.

 

Salmo Responsorial                                                                                                       Sal. 118(119), 67, 68, 71, 72, 75, 76, (R. 77a)

Refrão : Na’i, haraik Ita laran-luak mai ha’u, ha’u sei moris!!! Repete-se

Molok ha’u hetan terus, ha’u sala la’o dalan,

Maibé oras ne’e ha’u tuir Ita liafuan.

Ita mak laran-luak no laran di’ak,

Hanourin ha’u iha Ita lei. Refrão

 

Di’ak mai ha’u tan ha’u hetan terus,

Atu ha’u hatene Ita ukunfuan.

Mai ha’u, folin tebes Ita ukunfuan,

Liu fali osan mean no esan mutin tokon ba tokon. Refrão

 

Na’i, ha’u hatene Ita Nia lia hakotu lós tebes,

Ita Nia laran metin koko ha’u.

Hatudu mai ha’u Ita laran luak,

Tuir lia meno be Ita halo tiha ho Ita atan. Refrão

 

Aclamação                                                                                                                                                                                             Jo. 14. 6

Refrão : Aleluia, Aleluia!!! Repete-se

Ha’u mak dalan, lialós no moris, Na’i lia tun : Ema ida la liu karik housi

Ha’u, nia la bele to’o Aman Maromak. Refrão

 

Evangelho                                                                                                                                                                                       Mc. 8. 11-13

Na’i Jesus Cristo nia Evangelho nu’udar São Marcos haktuir:

Iha tempo neba, Fariseu sira hakbesik ba Jesus hodi hahu haksesuk malu ho Nia. Sira husu ba Nia sinal ida housi Lalehan, atu koko Nia. Jesus ho neon sala teb-tebes hatan ba sira: “Tan sá ema sira otas ne’e nian, husu sinal ida? Tebes, Ha’u dehan ba imi: sei la fó sinal ba ema sira otas ne’e nian”. Hafoin, Nia husik sira, sa’e fali ba ró atu hakur tasi nia sorin balu ba.

Lia Maksoyn

VI Domingo Tempo Comum (ANO A)

Primeira Leitura          Sir. 15, 16-21 (16-20)

Lia husi Livro Ben-Sirá:  

O hakarak, o bele halo tuir lolos Ukun-Fuan – nee nudar o hakarak. Maromak tau iha o nia oin, ahi no we: o bele hili ida nebé o hakarak. Mate ho moris iha ema sira nia oin: ida-idak simu nebé nia hili. Maromakniamatenek boot liuduni; Nia kbiitmakaas, Nia harébuat hot-hotu. Nia tau matan ba ema sira nebé hamtauk Nia; Nia hatene ema nia hahalok. Nia la haruka ema halo buat aat; Nia la fo licença ba ema atu halo pecado.

Maromak Futar Lia.

 

Salmo Responsorial                                                                                                                        Sal. 118 (119)1-2, 4-5, 17-18, 33-34

Refrão : Rahun diak ba ema nebé moris tuir Maromak Ukun-Fuan!!! Repete-se

Rahun diak ba ema sira nebé liman los,

Halo tuir Maromak nia hakarak.

Rahun diak ba ema sira nebé moris tuir,

Nai nia haruka, hodi buka tuir los ita boot nia Ukun-Fuan. Refrão

 

Nai, Ita Boot haklakenItaniaUkun-Fuan,

Atu ema sira moris tuir lolos.

Haraik kbiit,

Atu hau lao tuir los Ita Boot Ukun-Fuan. Refrão

 

Segunda Leitura                                                                                                                                                                          1Cor 2, 6-10

Lia husi São Paulo nia surat ba sarani sira iha Corinto:

Maun alin sira: Ba sira nebé hatene liu ona oitoan kona ba hahalok diak, ami hanorin buat matenek; maibé, matenek nebé ami hanorin, laos matenek mundo nian, eh matenek ukun-nain sira mundo nian nebé sei lakon kbiit. Ami hanorin matenek nebé mai husi Maromak. Matenek nee hori uluk liu subar hela nudar mistério, Maromak rai hela mai ita nia diak. Ukun-nain sira mundo nian la hatene matenek nee; sira hatene karik, sira la hedi mate glória nia nain. Maibé, nudar hakerek nanis ona, nee, lialos sira nebé matan la haré, tilun la rona, ema ida la hanoin kona; Maromak rai hela ba ema sira nebé hadomi Nia. Maromak hatudu  lialoos hirak nee mai ita, hodi Espírito Santo nia tulun; basá, Espírito Santo hatene buat hot-hotu, Nia hatene didiak Maromak.

Maromak Futar Lia.

 

Aclamação                                                                                                                                                                                  Jo 6, 64b, 69b

Refrão : Aleluia, Aleluia!! Repete-se

Nai, Ita Boot futar Lia-Fuan Espíruti no moris.

Ita Boot futar Lia-Fuanfomorisrohanlaek. Refrão

 

Evangelho                                                                                                                                                                                       Mt. 5, 17-37

Nai Jesus Cristo nia Evangelho nu’udar São Mateus haktuir:

Iha tempo nebá, Jesus lia tun ba escolante sira: “imi keta hanoin katak Hau hasai tiha Lei ka profeta sira; Hau mai laos atu hasai; Hau mai atu halo ema cumpri lolos. Hau dehan lolos ba imi: maski Lalehan ho rai lakon; lei baluk ida mos sei la lakon; sei cumpri hotu. Ema nebé la halo tuir Ukun-Fuan hirak nee ida, maske Ukun-Fuan kiik-oan, hodi hanorin aat ba ema, nia sei sai kiik liu iha Reino Lalehan. Maibé, ema nebé moris tuir didiak Ukun-Fuan, hodi hanorin mos maluk seluk, ema nee sei sai boot iha Reino Lalehan. Nee duni, Hau dehan ba imi: imi nia justiça la los lis karik escriba ho fariseu sira nian, imi sei la tama iha Reino Lalehan. Imi rona dehan ba bei-ala sira nee:’o keta oho; ema nebé oho, sei hatan justiça’. Maibé, Hau dehan ba imi: ema nebé laran nakali hasoru nia maun alin,  sei hatan lia justiça. Ema nebé bolu nia maun-alin beik-ten, sei tama iha tribunal sinédrio nian. Se bolu nia maun-alin ema aat, sei hetan terus ahi. Nee duni, o atu hasae dadaun karik, o nia buat karan iha altar fohon, o hanoin katak, o aat malu ho maun-alin ruma, husik hela o nia buat karan, ba uluk dame malu ho nia, hafoin, mai hasae o nia buat karan. O dame lalais tiha ho ema nebé, imi nain rua haksesuk malu, molok imi tama iha tribunal; keta halo be, nia fo o ba juiz, juiz fo o ba guarda, guarda hatama o ba cadeia. Hau dehan ba o: o la sai husi nebá,  too selu doit ikus. Imi rona ema dehan: ’keta halo adultério’. Maibé, Hau dehan ba imi: ema nebé kan hateke ba feto ida, nia halo pecado ho feto nee iha laran. O nia matan los dada karik o ba salan, fokit sai tiha nia, soe ba dook; diak liu o lakon o nia matan ida; keta halo be; ho o nia isin lolon tomak, monu ba inferno. O nia liman los mak dada karik o ba salan, tesi tiha nia soe ba dook; diak liu lakon o nia liman ida, keta halo be, ho o nia , ho o nia isin lolon tomak, monu ba inferno. Mos ema dehan: ‘fo certidão divórcio ba ema nebé soe nia fen’. Maibé, Hau dehan ba imi: laos tamba moris aat, mak ema ruma soe karik nia fen, nia halo sala adultério. Ema nebé kaben ho feto ema soe, halo adultério. Imi rona mos ema dehan ba bei-ala sira: ‘keta haluha halo tuir buat nebé o jura; o sei cumpri buat nebé o jura ba Maromak. Maibé, Hau dehan ba imi: imi keta jura: keta jura ba Lalehan, nudar Maromak horik fatin; keta jura ba rai, nudar Nai nia sama fatin; keta jura ba Jerusalém, nudar Liurai boot nia cidade; o keta jura ba o nia ulun, basá, o labele halo o nia fuuk ida mutin ka metan. Imi nia liafuan, lolos hanesan nee: Nunee, nunee, la nunee la nunee. Liu fali ida nee, mai ona husi buat aat”.

Lia Maksoyn.

IDENTIDADE HANESAN SARANI – FUAN HANESAN RATE

DCAD – Arcebispo Arquidiocese Metropolita de Dili Dom Virgílio do Carmo da Silva, SDB. iha ninia homilia ba sarani sira iha Capela Estação Missionária Nossa Senhora de Fátima Estado, iha loron 15 fulan Fevereiro 2020. Acentua liu ba Ukunfuan 5 Maromak nian ne’ebe hateten “KETA OHO”

“Se ita mak bele hare borus ita nia fuan karik ita dehan; ha’u nia fuan ne’e mos hanesan algudão. Maibe balu fali hare nia fuan hanesan rate ida ne’ebe dala barak hakoi ema barak iha nia fuan tanba ódio, vingança, la gosta malu, buka atu sadik malu, estraga malu, oho malu”, dehan Arcebispo Arquidiocese Metropolita de Dili Dom Virgílio do Carmo da Silva,SDB (15/02)

Kaer ba mensagem VI Domingo Tempo Comum nian ne’e, Dom Virgílio do Carmo da Silva,SDB hateten “Ukunfuan 5 Maromak nian dehan nune’e; ‘KETA OHO’. Ne’e significa laiha ema ida iha poder atu hasai ema seluk nia vida, basá ema nia vida ne’e sagrado. Hosi kedas ona iha Inan nia Knotak, to’o katuas-ferik so Na’i Maromak mak bele hasai moris ne’e. Maibe buat ne’ebe ohin ha’u hakarak dehan mak ida ne’e; Ema ne’ebe oho sei hatan justiça, ema ne’ebe laran nakali hasoru nia maun-alin sei hatan iha justiça; ema ne’ebe bolu nia maun-alin beikten sei tama iha tribunal; se bolu nia maun-alin at sei tama iha terus ahi nian. Ida ne’e atu dehan katak oho ema nee laos hodi tudik ka katana deit, maibe wainhira ó nia laran nakali deit hasoru ema ida, wainhira ó hanoin at hasoru ema ida – ó oho tiha ona nia. Wainhira ó rai ódio ba nia – ó oho ona nia. Wainhira ó plano at maibe ikus mai ó la realiza, maibe ó hanoin aat ona nia katak – ó oho ona nia iha ó nia fuan no laran.

Atu taka Dom Virgílio do Carmo da Silva,SDB hateten; “Ohin loron problema ne’ebe ita enfrenta mak ida ne’e; ita lakon tiha ona sentido de pecado. Ita bele tolok ema karik ba, halo aat ba ema, maibe ita nia conciência la acusa ita. Ita la sente culpa ba hahalok ne’ebe ita halo. Ne’e duni sentido de pecado ne’e mihis tiha ona. Ita nia conciência ne’e quando nunca rona Maromak nia Liafuan, ita labele atu decide saida mak diak no aat.

Ne’e duni, espelho ba ita sarani hodi leno ita nia hahalok diak no hahlok aat mak Maromak nia Liafuan. Se ita rona nafatin Maromak nia Liafuan no Simu nafatin Jesus nia Futar Isin, purifica nafatin ita nia fuan atu lao ba dalan ne’ebe los. haktuir Dom Virgílio do Carmo da Silva,SDB.

Jornalista; Silvestre

Editor; Angelson Soares

CAPELA ESTAÇÃO MISSIONÁRIA ESTADO HETAN BENÇÃO HOSI ARCEBISPO DE DILI

DCAD – Capela Estação missionária Nossa Senhora de Fátima Estado, hetan benção hosi Arcebispo Arquediocese Metropolita de Dili Dom Virgílio do Carmo da Silva,SDB, iha Domingo loron 15 fulan Fevereiro 2020. Capela ne’e primeiro ho ninia medida 5×10 ne’ebe didin deit ho hadak, tuir fali mai mudafica ba medida 8×20. Ho quantidade sarani nian ne’ebe loron ba loron aumenta ba bebeik hodi hamosu iniciativa atu alarga tan medida ba Capela refere. Estação missionária Nossa Senhora de Fátima Estado ida ne’e composto hosi 20 Aldeias, 12 Sucos. Iha mos Capela 4 ne’ebe hoal parte ba Estação missionária Nossa Senhora de Fátima Estado.

Rona tiha relatório hotu ne’ebe apresenta hosi presidente construção no chefe Comissão Capela Estação Missionária Nossa Senhora de Fátima Estado nian, Arcebispo Arquediocese Metropolita de Dili Dom Virgílio do Carmo da Silva,SDB admira teb-tebes kona ba sarani Estação Estado ninia generosidade; processo tur hamutuk, tau osan hamutuk, serviço hamutuk iha unidade laran no maturidade iha fiar.

“Uma Creda laos bispo nian ou Padre sira nian, maibe Uma Creda ne’e sarani ninian. Hau nia admiração sai boot liu tan tanba hare katak laos hare deit uma ne’e pronto ona, maibe liu-liu ninia processo ne’e rasik; processo tur hamutuk, tau osan hamutuk, serviço hamutuk ne’e hatudu katak imi hatudu duni imi nia unidade. Tanba ne’e hau nia apreciação boot ba iniciativa ida ne’e, tanba ita la hetan iha fatin barak. Estado hatudu exemplo ne’ebe kapaz tanba sarani rasik mak hasai hosi ita boot sira nia kosar ben mak tau hamutuk hodi hari. Ida ne’e hatudu duni ona ita boot sira nia maturidade iha fiar”.

Arcebispo Arquediocese Metropolita de Dili Dom Virgílio do Carmo da Silva, SDB recomenda ba sarani Estação Estado atu buka continua nafatin unidade ida iha futuro. E nune’e nia husu mos atu sarani sira buka atu labele abandona Uma Creda, buka atu hari dame no unidade, constroe ita nia moris iha princípio sarani ninian no princípio timor nian.

Sorin seluk Pároco Paróquia Nossa Senhora de Lourdes Pe. Deonildo de Andrade ba sarani sira hateten; entusiasmo ita nian ne’e buka atu cuidado hodi hatutan nafatin ba oin. Ita celebra ona tinan 75 existência missão ninian iha ita nia Paróquia Ermera atu ita fo liman ba malu, hare katak Uma Creda ne’e ita hotu-hotu nian, ita mak tem que anima, ita mak tem que colabora, ita mak tem que participa liu-liu ho mos Plano Pastoral Diocese ninian ne’ebe tinan ida ne’e koalia kona ba Cristão Eucarístico; atu ita sira ne’e hare ba Eucaristia sai duni hanesan ita ninia identidade ema sarani ninian”.

Arcebispo Arquediocese Metropolita de Dili Dom Virgílio do Carmo da Silva, SDB hamutuk ho Pároco Paróquia Nossa Senhora de Lourdes Pe. Deonildo de Andrade iha sira nia discurso hato’o sira nia apressiação no parabens ba sarani sira Estação missionária Nossa Senhora de Fátima Estado nian ne’ebe hatudu duni ona sira nia maturidade iha fiar hodi fo liman ba malu finaliza Capela Estação missionária Nossa Senhora de Fátima Estado.

Jornalista; Silvestre

Editor; Angelson Soares

Sabado, V Semana iha Tempo Comum (ANO A)

Primeira Leitura   1Rs. 12. 26-32; 13. 33-34

Lia husi primeiro livro Liurai sira nian:

Iha loron hirak nebá, Jeroboão ukun uma-kain sanulu Israel nian, nia dehan ba nia-an rasik: “Iha tempo ida ne’e, ukun liurai nian kala fila fali ba uma-kain David nian. Povo sa’e, nafatin ba Jerusalém karik atu hasa’e sacrifício iha Na’i nia uma kreda, sira laran sei nakfila ba liurai Roboão, be ukun Judá no sira sei oho ha’u. Hafoin, hanoin didiak tiha, Jeroboão haruka halo karau oan rua ho osan mean, hodi dehan ba povo: “Imi lalika ona sa’e ba Jerusalém! Israel, ó nia Maromak sira mak ne’e, nebé hasai “o housi rai Egipto”. Hari karau oan ida iha Betel, no ida seluk iha Dan. Nune’e mosu tempo sala nian, basá, povo ba to’o Dan atu hasa’e sacrifisio ba nu’udar sacerdote ema bain-bain, nebé la’os housi uma-kain Levi nian. Jeroboão haruka halo festa boot ida iha fulan ualu, loron sanulu resin lima, hanesan festa be sira hala’o tiha ona iha Judá; nia rasik sa’e ba altar. Nia halo mós hanesan ne’e iha Betel hodi hasa’e sacrificio ba karau oan sira nebé nia haruka halo. Tau mós iha Betel, sacerdote sira, iha tempo sira nebé nia haruka harí.

Jeroboão la husik nia hahlok áat sira, hodi hili nafatin ema bai-bain nu’udar sacerdote ba fatin áas sira. Fó consagração ba ema nebé hakarak atu sai sacerdote ba fatin sira bé áas. Ne’e mak sala nebé uma-kain Jeroboão nian halo, hodi hamonu no halakon tiha nia housi rai.

Maromak Futar Lia.

 

Salmo Responsorial                                                                                                              Sal. 105(106). 6-7ª, 19-20, 21-22(R. 4ª)

Refrão : Keta haluha ami, Na’i, tan Ita domin ba Ita povo!!! Repete-se

Ami sala tuir aman sira

ami halo buat áat no la tuir Ita hakaran

Houri uluk iha rai Egipto,

Ami aman sira la hatene tuir,

ita nia hahalok Kmanek sira. Refrão

 

Iha Horeb sira halo karau ona hodi simu osan mean,

no adora ilas nebé halo ho sira liman rasik;

sira troca glória Na’i nian,

ho ílas karau ida nian, nebé han du’ut. Refrão

 

Sira haluha tiha Maromak nebé soi sira;

halo buat kmanek oi-oin iha egipto,

halo hahlok kmanek ua’in iha Cam,

halo buat foun iha Tasi Mean. Refrão

 

Aclamação                                                                                                                                                                                            Mt. 4. 4b

Refrão : Aleluia, Aleluia!! Repete-se

Ema la moris de’it ho aihan, maibé ho liafuan sira nebé

Sai housi Maromak futar ibun. Refrão

 

Evangelho                                                                                                                                                                                         Mc. 8. 1-10

Na’i Jesus Cristo nia Evangelho nu’udar São Marcos haktuir:

Iha loron hirak nebá, ema lubun boot halibur hikas fali, tan sira la iha buat ida atu há; Jesus bolu nia escolante sira hodi dehan ba sira: “ha’u hanoin teb-tebes ema isra ne’e; loron tolu ona mak sira hela hamutuk ho ha’u; sira la iha buat ida atu há. Ha’u haruka sira ab uma karik hodi ba lori aihan, sira sei monu iha dalan; sira balun mai housi dook”. Escolante sira simu hodi dehan ba nia: “oinsá ita bele fó han ba sira, iha rai fuik maran ne’e?” maibé, Jesus husu fali ba sira: “ imi iha pão fuan hira?” sira hatan: “Ami iha pão fuan hitu”. Tuir mai, Jesus haruka sira atu tur hotu iha rai. Hafoin, Jesus káer tiha pão fuan hitu ne’e, fó agradece, silu, hodi fó ba nia escolante sira, atu fahe ba ema lubun boot ne’e. Sira há to’o bosu. Sira halibur baluk oan sira nebé resin iha ta’an hitu. Ema sira ne’e besik rihun háat. Tuir mai, Jesus husik hela sira hodi sa’e ba ró ho nia escolante sira, hodi ba iha rai Dalmanutá.

Lia Maksoyn.

Sexta-Feira, V Semana iha Tempo Comum (ANO A)

Prmeira Leitura     1Rs. 11. 29-32; 12. 19

Lia husi primeiro livro Liurai sira nian:

Iha loron hirak nebá, Jeroboão sai housi Jerusalém, iha dalan, profeta Aías housi Silo, mai hasouru nia. Profeta lori kapa foun ida mai no sira na’in rua mesa-mesak iha hela rai luan klaran. Aías káer tiha kapa foun nebé nia lori mai ne’e, lés fahe tiha iha baluk sanulu resin rua. Hafoin, dehan ba Jeroboão: “Simu hodi hela ba ó baluk sanulu, basá, Na’i Israel nia Maromak, dehan tiha ona: ‘Ha’u ba hasai tiha Salomão housi nia reino, no Ha’u sei fó ba ó, uma-kain sanulu. Maibé, nia sei hela ho uma-kain ida, tan Ha’u atan David no Jerusalém, cidade nebé Ha’u hili tiha ona iha uma-kain sira Israel nian, nia leet’.” Mosu tiha duni nune’e; uma-kain sira Israel nian hakotu tiha David nia uma-kain to’o ohin loron.

Maromak Futar Lia.

 

Salmo Responsorial                                                                                                     Sal. 80(81). 10-11ab. 12-13, 14-15 (R.11ª, 9ª)

Refrão : Ha’u mak Na’i, ó nia Maromak, rona Ha’u lian ba!!! Repete-se

Ó sei la iha maromak seluk ida,

Ó sei la adora maromak rai seluk nian ida.

Ha’u mak Na’i, ó nia Maromak,

Nebé hasai ó housi rai Egipto nia. Refrão

 

Ha’u Nia povo la rona Ha’u lian;

Israel la halo tuir Ha’u Nia liafuan,

Tan ne’e Ha’u saran sira ba sira fuan tós,

Husik sira tuir sira hakrak. Refrão

 

Oh! Ha’u nia povo rona karik Ha’u,

Israel tuir karik Ha’u nia dalan;

La kleur de’it funu baluk sira hakruuk ba sira,

Ha’u lia liman mai hasouru sira funu baluk sira. Refrão

 

Aclamaçào                                                                                                                                                                                       Act. 16. 14b

Refrão : Aleluia, Aleluia!! Repete-se

Loke, Na’i, ami fuan atu simu futar

liafuan housi Ita Oan Mane. Refrão

 

Evangelho                                                                                                                                                                                       Mc. 7. 31-37

Na’i Jesus Cristo nia Evangelho nu’udar São Marcos haktuir:

Iha tempo nebá, Jesus sai fali housi rai Tiro kona housi Sídon, hakatliu ba rai Decápole, iha tasi Galileia nian. Ema sira lori ema tilun diuk ida nebé atu ko’alia mós susar, hodi hatudu ba Nia. Sira harohan ba Jesus atu sadi’a nia. Jesus hadook-an tiha ho ema tilun diuk nee housi ema lubun. Nia hatama tiha liman fuan iha ema ne’e nia tilun, tau mós kabén oit-oan iha ema ne’e nia nanal. Hafoin, foti matan ba lalehan: Jesus dada íis maka’as, hodi dehan ba nia: “Effata”, katak “loke ba”. Ema nia tilun nakloke kedas; nia nanal mos mamar tiha kedas; hodi hahu ko’alia mós lós. Jesus hameno sira atu labele dehan sai baut ne’e ba ema ida. Maibé, maski Jesus hameno hela ba sira, sira hétok dehan sai maka’as liu tan. Hakfodak liu tebes, sira dehan: “Buat hotu Nia halo mesak di’ak: halo diuk sira rona, nunuk sira ko’alia”.

Lia Maksoyn.

Dom Virgílio do Carmo: Inan-Aman Sira Keta Discute Malu Perante Oan Sira

DCAD – Arcebispo Dili Dom Virgílio do Carmo da Silva, SDB iha ninia visita Pastoral nian iha Capela Santo António Urahou, Paróquia Ermera ne’ebe halao iha loron 15 fevereiro 2020 acentua liu ponto balun ne’ebe oras ne’e sarani sira enfrenta hela dau-daun iha moris, liu-liu kona ba moris família nian. Arcebispo Dili Dom Virgílio do Carmo da Silva, SDB cita mensagem Amo Papa nian ba família sira ne’ebe dehan; Inan-aman sira ha’u husu buat ida deit ba imi; keta histori no discute malu iha imi nia oan sira nia oin tanba Kanek boot ida ne’e oan sei lori liku-liku wainhira nia boot. Tanba ne’e nia parte husu atu ho celebração 75 missão nian ne’e buka sai ema ne’ebe brani hodi hadia ita nia an hodi hadomi família, Uma Creda no Rain.

“Histori malu ou discute malu ka lian la tuir malu ne’e nu’udar fen ho laen ne’e normal, maibe se imi hakarak discute malu karik, buka fatin ne’ebe dook hosi oan sira atu imi nia oan sira labele hare. Tanba imi nia oan ne’e kikoan wainhira hare imi nia trata malu, koalia liafuan kroat ba malu, tolok malu, dalaruma halo violência ba malu, oan sira lori iha sira nia fuan no neon trauma boot ida. Kanek boot ida oan ne’e lori liku-liku wainhira nia boot. Se nia hare nia aman usa força ida ne’e hasoru nia inan nia sei tau rai ódio hasoru nia aman. Nune’e mos ba nia inan halo hanesan ne’e ba nia aman, nia mos sei tau rai ódio ba nia inan. Ida ne’e mak dalan ida atu ita conserva nafatin oan sira ne’e ba futuro ne’ebe diak. Ida ne’e los duni responsabilidade inan-aman nian. Problema social sira ne’ebe mosu ne’e tanba ita tatoli ba malu; kikoan sira hare boot sira halo saida. se boot sira halo diak, sira aprende buat nebe diak. Se ita boot sira halo sabraut ruma iha kikoan sira nia oin sira mos aprende ida ne’e. ida ne’e mak Na’i Jesus Cristo bolu ‘Escândalo’. Jesus dehan; ó hanorin labarik ida ba a’at diak liu kesi fatuk ida iha ó nia ulun ba soe iha tasi, diak liu mate duque ó hanorin labarik ida atu halo aat. Ne’e buka atu hare ba espelho hodi hadia didiak ita nia an no ita nia família tanba laiha ema ida hakarak atu cria violência”.

Jornalista: Silvestre

Editor: Angelson Soares

 

EMA IDA AI OAN IDA CONTRIBUI ONA BA REFLORESTAÇÃO

DCAD, Arcebispo Dili Dom Virgílio do Carmo da Silva, SDB hamutuk Pároco no Vigário Ermera, Madres, ho tan Autoridade Municipal sira hanesan; Presidente da Autoridade Município Ermera, Nai Deputados, Comandante Polícia Nacional Timor-Leste (PNTL) Município Ermera, Veterano Autoridades Locais, inclui sarani hosi Suco rua; Urahou no Maubu iha loron 15 Fevereiro realiza acção ema ida ai oan hodi halo hikas reflorestação iha Urahou ne’e iha fulan sira liu ba acontece Incêndio hodi resulta uma no sasan barak estragos.

“Iha Arcebispo Dili Dom Virgílio do Carmo da Silva, SDB nia mensagem relaciona ho acção ne’e hateten “ohin ho simbolicamente ita atu kuda ai oan, hanesan sinal ida katak ita hotu iha missão ida deit. iha moris ne’e se ema la hakerek livro ida pelo menos kuda netik ai oan ida. maibe laos kuda de’it, maibe tem que cuida mos. Se jovem ida kuda ai oan ida iha nia uma nia mos koko atu cuida ai oan ne’e to’o boot ne’e contribuição boot ida ne’ebe ita halo. Ne’e duni atu cuida ne’e imi hirak be hela iha ne’e hamutuk ho autoridades local sira. ne’e duni ami nia presença iha fatin ida ne’e atu hamanas deit. Imi rasik mak tem que sai nain. Ne’u duni ita hein katak ida ne’e sai cultura ita nian atu haburas ita nia rain, dehan Arcebispo Dili Dom Virgílio do Carmo da Silva, SDB (15/02)

Liu tan ne’e, Pároco Paróquia Nossa Senhora de Lourdes Ermera Pe. Deonildo de Andrade iha ninia discurso encoraza sarani sira atu cuidado ita nia moris fatin; “ho incêndio ne’ebe acontece ona iha fatin ida ne’e hodi resulta uma barak estraga, uma lisan sira mos hetan estraga inclui sasan cultura sira kona história geração nian mos estragados, iha momento sira hanesan ne’e ema barak tebes mak lolo liman mai ho meios oi-oin ho maneira oi-oin. Ne’e duni, ohin Arcebispo Dili Dom Virgílio do Carmo da Silva, SDB ho autoridade sira mai to’o iha fatin ida ne’e hodi fo apoio ba ita ho sentido atu loke tan ita nia hanoin nune’e ita hodi conciênte katak ita rasik mak tem que cuidado ita nia moris fatin”.

Iha fatin hanesan Presidente da Autoridade Município Ermera José Martinho dos Santos Soares iha ninia intervensão husu ba povo sira atu hatoman an ho kuda ai oan hodi hamtak fila fali rai Ermera laos matak de’it iha tempo udan maibe iha mos tempo bailoron. Nia parte hanesan autoridade mos husu atu povo Ermera labele repete tan sunu rai hanesan iha fulan sira liu ba acontece hodi resulta uma no sasan barak estraga.

Jornalista; Silvestre

Editor; Angelson Soares

Suco Urahou – Maubu Enfrenta Caso Kaben Cedo No Artemarciais

DCAD, Pároco da Paróquia de Nossa Senhora de Lourdes Pe. Deonildo de Andrade fo sai informação ne’e perante Arcebispo de Dili Dom Virgílio do Carmo da Silva, SDB, visita fatin refere iha loron 15 Fevereiro 2020. Perante Arcebispo de Dili Dom Virgílio do Carmo da Silva, SDB, Presidente da Autoridade Município Ermera, Deputados, Comandante PNTL Município Ermera, Veteranos, Autoridades Locais, inclui sarani hosi Suco rua; Urahou no Maubu nia oin, Pároco da Paróquia de Nossa Senhora de Lourdes Pe. Deonildo de Andrade iha ninia dircurso hateten;

 “iha Município Ermera liu-liu iha Urahou no Maubu, caso kaben cedo sei acontece bebeik. Ne’e hotu acontece tanba ita nia acesso ba informação, ba educação dala barak la to’o iha fatin sira hanesan ne’e. Então jovem sira nia mundo mak iha ne’e de’it ona. Ho ida ne’e dalaruma halo sira fácil atu monu iha casamento cedo.

Pe. Deonildo de Andrade haklean tan katak “Iha ne’e mos iha Artemarciais. Dala ruma ho ita nia conhecimento, ho ita nia experiências ne’ebe la to’o então hirak ne’e mos bele hamosu problema. Tanba ne’e mak ha’u hanoin Município Ermera liu-liu Suco Urahou tama iha risco sira ba buat hirak ne’e. Tanba ne’e, liu-liu ba jovem sira Arcebispo nia mensagem ne’ebe ohin dehan; buka sai sarani dame nain. Ne’e duni ho sacramento sira be ohin imi simu buka atu sai ema dame nain ba iha Uma Creda, ba família no ba sociedade.

Iha sorin seluk Comandante Polícia Nacional Timor-Leste (PNTL) Município Ermera Superintendente Polícia Natércia Eufrásia S. Martins hateten; “iha município halo serviço parseira ne’ebe composto hosi Polícia, autoridade Governo local, Igreja, Jovem Veterano no Cordenador Partido Político ne’ebe existe iha Ermera. Maibe oras ne’e tuir daduz crime ne’ebe acontece iha ita nia Município katak iha Ermera Zona B, Suco Urahou no Maubu sei concidera risco. Tanba ne’e iha ninia mandato nu’udar Comandante Polícia Nacional Timor-Leste (PNTL) Município Ermera nia sente triste tanba iha Autoridade balun envolve an iha grupo Artemarciais hodi provoca situação.

Natércia Eufrásia S. Martins hateten; “Hau hakarak hateten momos iha ne’e hanesan ne’e atu los ou lae depois mak Autoridade sira halo took reflexão. Informação ne’ebe commando simu tansa iha Suco Urahou sempre mosu problema entre invido no ikus mai halai ba grupo. Katak individo sira ne’e sira dehan katak sira nia força iha mak Autoridades Sucos ne’ebe hola parte mos iha grupo sira ne’e. Ne’e conforme informação ne’ebe ami hetan.

Natércia Eufrásia S. Martins hateten tan katak; “Hanesan Autoridade máximo Segurança iha Município hau sente ida ne’e triste boot ida tanba cada fulan ha’at (4) ita halo encontro Conselho Segurança Município koalia de’it kona ba causa no efeitos. No ida ne’e sai nu’udar preucupação nacional ninian dehan ita nia Município Ermera sei tama ba iha risco 8%.

Iha sorin seluk Natércia Eufrásia S. Martins hateten; “Problema violência Domêstica tuir ami nia analização, causa ne’e mai hosi ita ni oan sira ne’ebe halo hahalok iresponsabilidade família. tanba kaben cedo nia sidauk bele responsabiliza nia família tanba hahalok sei hanesan labarik. Mane no feto ho idade sidauk to’o, sidauk bele atu gere gestão uma laran nian. Então oinsa gere emocional bainhira hasoru desafio uma laran ninian; hanesan falta economia, oinsa atu sustenta oan sira. Ne’e duni, husu ba inan-aman sira atu orienta oan sira concentra escola to’o remata no adulto didiak no hatene ona ninia responsabilidade no idade to’o ona mak foin bele fo espaço ba sira forma família, tenik Comandante Polícia Nacional Timor-Leste (PNTL) Município Ermera Superintendente Polícia Natércia Eufrásia S. Martins iha Urahou Município Ermera (15/02).

Jornalis: Silvestre

Editor: Angelson soares