shadow
Diocese de Dili > NOTÍCIAS

Dom. Virgílio do Carmo da Silva, SDB, sai nudar Arcebispo ba Arquidiocese Dili

DCADD – Dia 11 de Setembro de 2019 lokraik iha missa celebração XXX Aniversário visita histórica housi Sua Santidade Papa João Paulo II iha Timor-Leste iha Catedral Amo Núncio Apostólico ba Timor-Leste Sua Excelência Reverendíssima Mgr. Joseph Marino, fo sai katak ho tulun no graça Maromak nian, Amo Papa Francisco foti Diocese Dili sai nu’udar Arquidiocese-Diocese Metropolitana ho ninia sufragâneo mak Diocese Baucau no Diocese Maliana. No Amo Bispo Diocese Dili nian Dom. Virgílio do Carmo da Silva, SDB, sai nudar Arcebispo ba Arquidiocese Dili.

Papa Francisco nia mensagem hirak ne’e tatoli liu housi Núncio Apostólico iha Timor-Leste Arcebispo Mgr. Joseph Marino iha SE Catedrla Dili hafoin atu remata celebração XXX Aniversário visita histórica housi Sua Santidade Papa João Paulo II iha Timor-Leste.

Núncio Apostólico iha Timor-Leste Arcebispo Mgr. Joseph Marino; “Honra no ksolok boot ida ba ha’u atu informa ba imi katak, iha momento ida ne’e kedas iha Vaticano Sua Santidade Papa Francisco eleva ka foti tiha ona Diocese Dili ba Nível ka grau Arquidiocese (Keuskupan Agung) no foti ona Sua Excelência Dom. Virgílio do Carmo da Silva, SDB, nu’udar Arcebispo ba dahuluk ba Arquidiocese Dili. Santo Padre mos cria tiha ona Província Ecleciástica Dili nian ho Diocese sira; Bauca no Maliana nu’udar nia sufragâneo sira mak; Diocese Baucau no Diocese Maliana. Ida ne’e sinal domin boot ida ne’ebe Santo Padre iha ba Creda iha rai Timor-Leste no reconhecimento ba fiar ne’ebe klean povo Timor nian”.

Sua Excelência Reverendíssima Arcebispo ba Arquidiocese Dili Dom. Virgílio do Carmo da Silva, SDB iha nia novidade hateten, “Hanesan ita hotu rona Carta Propaganda da Fe housi Cardeal Filoni nian dehan; laiha ema ida ne’ebe soi ereção ida ne’e no nomeiação ida ne’e, maibe nu’udar Bispo ha’u hakru’uk ba decisão Amo Papa nian. Ida ne’e laos onra ida ba ha’u, maibe hau hanoin ida ne’e tanba sarani Timor ninian. Tanba Amo Papa rasik hare katak tempo to’o ona atu foti as liu tan no hametin liu tan Uma Creda. Ne’e duni, criação Igreja Metropolitana província Eclesiástica ida ne’e laos tanba ha’u maibe ida ne’e tanba sarani sira. ida ne’e mai ita hotu agradece ba Na’i Maromak ne’ebe liu housi Amo Papa ninia iniciativa ida ne’e hakarak atu hametin liu tan, consolida liu tan Uma Creda iha rai Timor. Ne’e duni ha’u husu de’it ita boot sira nia oração atu ita hotu hamutuk bele hatan duni ba iha exigência Igreja Metropolitana-serviço Arcebispo ninian ne’ebe ha’u rasik de’it sidauk hatene serviço ne’e saida, maibe ita hamutuk sei aprende atu halo kna’ar ida ne’e”. (Alin)

SE MAK SÃO JOÃO PAULO II BA SARANI TIMOR !!

Ohin hamutuk ho representante Vaticano ninian, Diplomático sira, ho ukunnain sira nação ida ne’e nian, ita halibur hamutuk  atu reconhce ba Santo boot ida ne’e no contribução ne’ebe nia fo ba ita nia rai doben Timor-Leste. Sidauk termina iha ne’e no iha 30 de Outubro iha Tasi Tolu ita sei conserva celebração ne’e ho sarani hotu rai ida ne’e nian nudar sinal agradecimento boot ida ba ema hot-hotu.

Wainhira iha Tasi Tolu São João Paulo II rasik dehan; wainhira ha’u hahu ha’u nia Ponte Ficado, ha’u acompanha imi nia situação ho atenção boot. Kleur tebes ona duni mak ha’u hakarak atu hateten ba imi katak Igreja Universal particularmente São João Paulo II iha istima ida no mos afeição ida boot teb-tebes ba povo ida ne’e.

Cristo nia saseluk ida ne’ebe ba dala uluk sama ain iha rai ida ne’ebe nia destino no nia ukun sidauk los, povo ne’ebe moris iha opressão no tauk nia laran ho presença São João Paulo II nian hanesan iha Tasi Tolu nia dehan; “Ohin ha’u haksolok tebes celebra Eucaristia Santa ne’e hamutuk ho imi. Sarani Timor nia ksolok ita labele imagina. Sinal no esforço concreto ida tan ne’ebe nia halo atu hatudu katak nia hadomi duni povo ida ne’e mak nia hakasan atu aprende Tetum, tanba ita hotu hatene katak molok atu iha 12 de outubro ne’e iha Paróquia sira halo exercício, treino atu hatan missa iha Latin. Maibe wainhira nia to’o iha Tasi Tolu nia laos halo missa iha lian Latin, maibe nia hahu ho sinal hodi Padre ka reza missa ho Tetum. Tuir Dom. Norberto haktuir katak, wainhira Santo Padre hahu ho Hodi Padre Hodi Filho iha tetum, sarani barak balu hakilar no balun tanis ba hodi expressa ita nia sentimento hotu ne’ebe ita lori ita nia laran.

Rai kikoan ida nia existência iha mundo ema barak mos la hatene, maibe wainhira Uma Creda Católico nia boot nia presença sama ain iha rai ida ne’e foti fila fali povo ida ne’e nia dignidade nu’udar Maromak oan, fo hikas esperança ba povo ida ne’e, povo Timor sente tebes Jesus Cristo nia saseluk nia proximidade ho povo ida ne’e.

Tan ne’e, ha’u bele dehan katak São João Paulo II laos veterano de’it, maibe nia missionário boot ida, missionário ida esperança ninian ba povo ida ne’ebe desespero, Nia mak hanesan The Voice of the voiceless basá nia rasik dehan; hau mai hanesan Pedro nia saseluk ida iha imi nia le’et atu haforça ha’u nia maun-alin sira. Ida ne’e mak lori Ha’u mai iha Timor. Liafuan ida ne’e ita rona iha ohin loron nian sente bai-bain de’it, maibe iha tempo neba quando ita rona liafuan ida ne’e ita sente oin seluk. Laiha duni obstáculo ida atu impede visita ida ne’e masque dook e situação política iha tempo neba nian laos fácil, ida ne’e missão ida bibi atan sira nian tanba molok atu hahu Jesus nia paixão Nia hateten ba Pedro; wainhira to’o ona ó nia tempo, fo força ba ó nia maun alin sira liu-liu sira nebe fraku.

Ohin ita mai iha ne’e laiha razão ida atu ita husik leet de’it momento especial ida ne’e atu agradece Maromak ne’ebe haraik wa’in ba Uma Creda figura João Paulo II ninian, ita la hare ba Nia nu’udar Papa de’it, maibe hare ba nia nu’udar Santo ida, liu-liu nia presença iha história Timor nian. Ida ne’e mak ita keta haluhan nia importância visita João Paulo II ninian mai ita nia rai doben.

“Imi mak masin rai nian no imi mak naroman mundo nian”. Nune’e Nia uza imagen naroman atu refere de’it revelação Divina maibe mos sabedoria ne’ebe hatudu iha Nia moris. Sabedoria ida ne’ebe mai housi experiência ita moris nian nune’e sabedoria ida ne’ebe fo moris, sabedoria ida fo naroman fiar ninian. Iha nebe deit mak iha naroman ida  ne’e fo forma ba ema nia moris, orienta ema ba Na’i Maromak.

Sabedoria ida ne’e ita hare uluk liu-liu iha ita nia missionário sira ne’ebe hatudu iha ita nia rain iha tinan barak nia laran serviço maka’as iha rai ida ne’e atu habelar no harii Maromak ninia reino. Balun mos to’o fakar sira nia ran iha rai ida ne’e tanba Cristo, tanba Maromak ninia reino. Missionário sira nia sasin hanesan naroman ida nebe ita labele subar iha kama okos maibe tem que foti aas no hatudu ba ema hotu.

Timor ne’e santo missionario barak nebe fakar duni sira nia ran ba creda Timor ninian, balu mate tanba kole, balu mate tanba moras no balu mos tanba martírio masque to’o ohin loron Uma Creda seidauk identifica hotu sira nia rate ne’ebe namkari iha rai doben ida ne’e.

Uma Creda Timor ne’e buras tanba sosa ho missionário sira nia ran hanesan Cristo ninian. Tan ne’e iha razão tomak atu hanaran; Terra Santa. Tanba hasanto ho missionário sira nia ran. Ohin loron mak tanba direito no liberdade religiosa no missionário oi-oin ne’ebe lori osan, sasan ho ideologia oi-oin atu sobu unidade povo ida ne’e nian. Ne’e duni precisa matan moris no neon na’in. Kaer karik Papa Atual nia liafuan ita tem que hateten ba ita nia abut, ita nia história nune’e ita bele lao iha dalan ne’ebe los nu’udar sarani, nu’udar povo hatene mai housi ne’ebe no atu ba iha ne’ebe.

Horseik iha encontro religioso/a sira nian ho Núncio Apostólico, preocupação ida mos ne’ebe religioso/a sira hasa’e mak ne’e: oinsá mak ita ohin loron bele ba sasin kona ba fiar sarani iha Timor iha momento ida ne’e? Ida ne’e pergunta ida ne’ebe convida ita hotu atu continua reflete kona ba ita nia papel nu’udar sarani.

Ohin ita comemora vizéssimo aniversário referendum consulta popular, ita hateke fila ba kotuk ita hare mudança lubuk ida. Nu’udar nação ita iha liberdade atu halo buat hot-hotu no ko’alia buat ne’ebe ita sente iha ita nia rai laran. Ema barak nia moris sai diak daudaun, iha buat barak lao ho lalais, maibe mos iha parte seluk nu’udar sarani no Timor oan ita hare katak iha mos buat lubuk boot ida sai hanesan ameaça ba ita nia valor sira, valor sarani ninian no moral nian, ita nia identidade sarani ninian. Ita tem que sai masin atu conserva identidade fiar sarani nian.

Rai ida ne’e precisa nafatin atu kura kanek sira ho reconciliação. Comunidade sarani mak tem que sai comunidade ida ne’ebe hatene reconcília, se ita husik atu Jesus nia futar liafuan “Imi mak Masin Rai ninian, Imi mak Naroman” Toca ita nia moris.

Tebes atu Eucaristia nebe oras ne’e ita atu hala’o daudaun hodi comemora Trizéssima aniversário São João Paulo II ninian bele tulun ema hotu iha rai ida ne’e atu ita hotu bele nakfilak an los liu ho fuan ida no neon ida nu’udar cidade ida ne’ebe harii iha foho leten ne’ebe la monu, nu’udar naroman nebe leno ema hotu iha uma laran.

Maluk doben sira mai ita harohan liu housi São João Paulo II ninian atu sarani Timor liu-liu foinsa’e timoroan sira la hare momento ne’e hanesan momento ne’ebe história atu comemora deit, maibe bele hakiak no haburas Espírito missionário ninian iha ita nia fuan liu-liu sai missionário ida esperança ninian ba rai ida ne’e e liu-liu ba maluk sira ne’ebe sei hela iha fatin ne’ebe precisa duni naroman Cristo nian.

Sexta – Feira, XXIII Semana do Tempo Comum (Ano C)

Primeira Leitura           1Tim. 1. 1-2, 12-14

Lia housi São Paulo nia primeira Surat ba Timóteo:

Paulo, Jesus Cristo nia apóstolo tanba Maromak, ita Maksoyn, no tan Jesus Cristo, ita nia esperança; ba Timóteo, ha’u nia oan lolós iha fiar: Aman Maromak no Cristo Jesus, ita Na’i, haraik graça, laran di’ak no dame ba ó.

Ha’u fó agradece ba Cristo Jesus, ita Na’i, nebé haraik kbiit mai ha’u, basá Nia haré ha’u laran metin hodi bolu ha’u atu serbi Nia, maski uluk ha’u hateten áat Maromak no halo áat no hateten liafuan áat ba Nia. Maibé, Na’i hatudu Nia laran luak mai ha’u, tanba ha’u halo buat hotu hodi la hateten buat ida kona ba fiar. Tebes, ita Na’i nia graça barak liu, hodi hakonu ha’u ho fiar no domin iha Cristo Jesus.

Maromak Futar Lia.

 

Salmo Responsorial                                                                                                                          Sal. 15(16). 1-2a, 5, 7-8, 11 (R. 5a)

Refrão : Na’i, Ita mak ha’u nia liman-rohan!!! Repete-se

Tahan ha’u, Na’i, tan Ita ha’u nia heli-an-fatin,

Ha’u dehan ba Na’i, “Ita, ha’u nia Maromak”.

Na’i, Ita ha’u nia liman-rohan no cálice,

Ha’u nia moris iha Ita futar liman. Refrão

 

Ha’u sei hahí Na’i tan Nia mak ha’u mahein;

Iha kalan Nia fó lia menon mai ha’u ne’on.

Na’i iha nafatin ha’u matan nia oin,

Nia iha ha’u sorin kuana, ha’u sei la monu. Refrão

 

Na’i, hatudu dalan moris nian mai ha’u,

Haraik ksolok boot iha Ita furar oin,

Iha Ita sorin kuana, haksolok ba nafatin. Refrão

 

Aclamação                                                                                                                                                                                       Jo. 17. 17b,a

Refrão : Aleluia, Aleluia! Repete-se

Ita liafuan, Na’i, mak lialós tebes;

Hametin ami iha lialós. Refrão

 

Evangelho                                                                                                                                                                                       Lc. 6. 39-42

Na’i Jesus Cristo nia Evangelho tuir São Lucas

Iha tempo nebá, Jesus dehan aiknanoik ne’e ba escolante sira: “Ema matan delek ida bele hatudu ba ema matan delek seluk? Sira na’in rua la monu hotu iha kuak laran? Escolante ida la bele sai boot liu dali nia mestre, basá escolante di’ak ne’e sei halo hanesan nia mestre. Tan sá ó haré ai rahun iha ó nia maun eh alin nia matan, maibé la haré ai kabelak iha ó nia matan rasik? Oin sá ó bele dehan ó nia maun eh alin: ‘Maun eh alin, husik ha’u hasai ai rahun housi ó nia matan, maibé ó la hare ai kabelak iha ó nia matan rasik? Laran makerek! Hasai uluk lai ai kabelak housi ó nia matan, hafoin ó sei bele haré momós atu hasai ai rahn housi ó nia maun eh alin nia matan”.

Lia Maksoyn.

COMUNICADO

Secretáriado Conferência Episcopal (CET), liu husi comunicado ida ne’e hakarak hato’o ba Igreja Católica Timor-Leste tomak katak, dia 11 de Setembro de 2019 lokraik iha misa iha Catedral Amo Núncio Apostólico ba Timor-Leste Sua Excelência Reverendíssima Mgr. Joseph Marino, fo sai katak ho tulun no graça Maromak nian, Amo Papa Francisco foti Diocese Dili sai nudar Arquidiocese – Diocese Metropolitana ho ninia sufragâneo mak Diocese Baucau no Diocese Maliana. No Amo Bispo Diocese Dili nian Dom. Virgílio do Carmo da Silva, SDB, sai nudar Arcebispo ba Arquidiocese Dili.

Igreja Timor-Leste marca tan ninia história ida, tan ne’e husu ba Na’i-lúlik sira, ba sarani sira hotu atu ita fo agradece ba Maromak ba graça kmanek ida ne’e.

Ne’e duni, mai ita hotu ho laran no fuan tomak husu nafatin Maromak nia tulun no bênção ba ita nia Arcebispo no Bispo sira seluk atu bele halao nafatin sira nia kna’ar nudar bibi atan diak.

Comunicado público ne’e fo sai hodi fo hatene ba Nai-lúlik sira, Religioso no Religiosa sira no mos comunidade sarani católica tomak iha Timor-Leste nian atu hatene.

 

 

 

Quinta – Feira, XXIII Semana do Tempo Comum (Ano C)

Primeira Leitura                         Col. 3. 1-11

Lia housi livro São Paulo nia Surat ba sarani sira iha Colossos:

Maun alin sira: Nu’udar ema sira nebé Maromak fihir ona, nebé santo no Maromak hadomi, tau laran luak, laran maus, haraik an, laran sadia no paciência nu’udar imi nia hatais. Simu malu didi’ak, tahan malu wainhira imi iha buat ruma hasouru ema seluk. Imi sei perdua malu nu’udar Na’i fó perdua ona ba imi. Iha sira ne’e hotu nia leten, tau tan domin nebé kesi metin sira seluk atu sai buat furak ida de’it. Husik Cristo nia dame ukun imi nia fuan, basá tan ne’e mak Maromak bolu imi nu’udar liman-ain isin lolon ida de’it nian. Fó agradece nafatin.

Halo Cristo nia lia menon iha nia rikusoin tomak hela iha imi laran. Hanourin malu ba, fó liafuan di’ak ba malu ho matenek tomak, no fó agradece nafatin, hananu salmu no knananuk ho laran ba Maromak; keta halo buat ruma eh dehan buat ruma la hodi Na’i Jesus nia naran, hodi fó agradece ba Aman Maromak housi Nia.

Maromak Futar Lia.

 

Salmo Responsorial                                                                                                                               Sal. 150. 1-2, 3-4, 5-6 (R. cf. 6)

Refrão : Buat tomak be moris no dada iis, hahí Na’i!!! Repete-se

Ou           Aleluia!

Hahí Na’i iha Nia santuário,

Hahí Na’i iha Nia hôrik fatin kmo’ok Lalehan!

Hahí Na’i tan kmanek wa’in be Nia halo,

Hahí Na’i tan Nia kbiit-liurai be rohan laek. Refrão

 

Hahí Nai ho trombeta nia lian,

Hahí Nia ho lira no cítara lian!

Hahí Nia hodi bidu ho ksolok,

Hahí Nia ho harpa no flauta lian. Refrão

 

Hahí Na’i,

Hahí Nia hodi címbalos nia lian;

Hahí Nia ho música címbalos nian,

Buat hotu nebé dada iis hahí Na’i. Refrão

 

Aclamação                                                                                                                                                                                            1Jo. 4.12

Refrão : Aleluia, Aleluia! Repete-se

Ita hadomi malu karik Maromak hôrik ho ita no

Nia domin sai tuir lolós iha ita. Refrão

 

Evangelho                                                                                                                                                                                       Lc. 6. 27-38

Na’i Jesus Cristo nia Evangelho tuir São Lucas

Iha tempo nebá, Jesus lia tun ba nia escolante sira nune’e: “Ha’u dehan ba imi sira nebé hirus imi; fó nia funu baluk sira, halo di’ak ba sira nebé hirus imi, harohan ba sira nebé ko’alia áat imi; ba ida nebé basá ó nia hasan ida, fó tan ó nia hasan seluk: ba ida nebé hadau ó nia unuk, fó tan ó nia hatais; ba ida anebé husu buat ruma, fó ba; ba ida nebé hola ó nia sasan sira, keta husu fali. Nu’udar imi hakarak ema halo ba imi, halo mós nune’e ba sira. Imi hadomi karik sira nebé hadomi imi, imi soi sáida? Ema maksalak sira mós hadomi sira nebé hadomi sira. Imi halo diak karik ba sira de’it nebé halo di’ak ba imi, imi soi di’ak sá? Ema maksalak sira mós halo nune’e. Imi impresta de’it karik ba ema nebé imi hein atu simu fali, imi soi sáida?ema maksalak sira mós impresta, hodi hein atu simu fali nia folin. Maibé hadomi imi nia funu baluk sira ba; halo di’ak no impresta hodi la hein atu simu fali buat ida. Nune’e imi nia kolen sei sai boot teb-tebes: imi sei sai Na’i aas liu hotu nia oan, basá Nia laran di’ak ba ema áat no ema laran áat sira.

Buka sai ema laran luak hanesan imi Aman laran luak. Keta hanoin áat ema, no ema sei la hanoin áat imi; keta duu matak ema, no ema sei la duu matak imi; Fó perdua ba, no imi sei hetan perdua. Fó ba, no imi sei simu; ema sei tau ba imi nia liman buat di’ak barak, hanesan tun, doko tan to naresin. Basá imi sura oin sá ba ema, nune’e mós ema sei sura ba imi.”

Lia Maksoyn.

Quarta – Feira, XXIII Semana do Tempo Comum (Ano C)

Primeira Leitura                       Col. 3. 1-11

Lia housi livro São Paulo nia Surat ba sarani sira iha Colossos:

Maun alin sira: Imi moris hi’as ona hamutuk ho Cristo, ne’e duni imi buka buat nebé leten nian; iha nebé Cristo tur iha Maromak nia sorin kuana; imi sei hanoin kona ba buat nebé leten nian, la’os kona ba sasan rai ne’e nian. imi mate ona, no imi nia moris subar hela hamutuk ho Cristo iha Maromak. Wainhira Cristo, ita nia moris, mosu mai, imi mós sei mosu ho kmanek wa’in hamutuk ho Nia.

Ne’e duni, imi sei oho hakarak rai ne’e nian nebé book imi nia laran, hanesan sala fo’er, hanoin fo’er, hakarak fo’er, laran áat, laran karakten, nebé hanesan adora lulik, tan sira ne’e mak Maromak nia laran nakali tun ba ema laran tos nia oan sira. Uluk imi mós la’o tuir dalan ne’e wainhira imi moris iha sira laran. Maibé ohin, imi sei halakon sira ne’e hotu: hirus, hakarak áat, laran nakali, laran áat, lia bosok kona ba ema, eh lia fo’er. Keta lohi malu; tan imi hasai tiha housi imi an rasik ema tuan ho nia hahalok áat sira no tau fali ema foun, nebé hafoun an nafatin atu nia bele to’o ba matenek lolós tuir Maromak nia ilas. Iha Maromak la iha ema grego eh judeu, ema nebé circuncisão eh ema nebé la simu circuncisão, bárbaro eh ema housi rai Cita, atan eh la atan, maibé Cristo de’it, nebé hotu no iha ema hotu.

Maromak Futar Lia.

 

Salmo Responsorial                                                                                                       Sal. 144(145). 2-3, 10-11, 12-13ab (R. cf. 9ª)

Refrão : Na’i di’ak ba criatura tomak!!! Repete-se

Ha’u hahí Itaboot loron kalan,

Haklaken Ita naran ba nafatin.

Na’i boot tebes, soi simu hahí tomak!

La bele sukat Nia grandeza. Refrão

 

Na’i, criatura haklaken Ita,

Sarani hotu hahí hananu ba Ita,

Haklaken glória Ita reino nian,

Haklaken Ita hahalok kmanek hotu. Refrão

 

Fó hatene Ita Nia kbiit ba ema tomak,

Glória no nabilan Ita reino nian.

Ita Nia reino, reino rohan laek,

Ita ukun to’o derasaan hot-hotu. Refrão

 

Aclamação

Refrão : Aleluia, Aleluia!! Repete-se   

Na’i dehan, imi haksolok ba,

basá imi nia kolen ua’in tebes iha lalehan. Refrão

 

Evangelho                                                                                                                                                                                       Lc. 6. 20-26

Na’i Jesus Cristo nia Evangelho tuir São Lucas 

Iha tempo nebá, Jesus foti tiha matan ba nia escolante sira, nia dehan: “Ksolok ba sira nebé kiak, basá Maromak nia reino imi nian. Ksolok ba sira ohin nebé hamlaha, basá imi sei bosu. Ksolok ba sira nebé ohin tanis, basá imi sei hamnasa. Ksolok ba imi, uainhira ema hirus imi, uainhira ema duni sai imi, hotar  imi, heuuai imi nia naran hanesan buat áat, tan de’it Oan Mane. Iha loron nebá, haksolok ba hodi haksoit ho laran ksolok, basá imi nia kolen boot tebes iha lalehan. Nune’e mak sira nia aman sira halo ba profeta sira. Maibé susar ba imi nebé ohin hamnasa, basá imi sei halerik no tanis. Susar ba imi, uainhira ema hotu ko’alia di’ak kona ba imi, basá imi nia bei ala sira halo mós nune’e ba profeta falso sira.”

Lia Maksoyn.  

Terça – Feira, XXIII Semana do Tempo Comum (Ano C)

Primeira Leitura                         Col. 2. 6-15

Lia housi livro São Paulo nia Surat ba sarani sira iha Colossos:

Maun alin sira: tanba imi simu ona Cristo Jesus nu’udar Na’i, haka’as an atu moris iha Nia. Halo imi nia abut naruk iha Nia; hari imi nia moris imi nia moris iha Nia, no sai maka’as liu tan iha imi nia fiar, nu’udar eam hanourin imi. Fó agradece nafatin ba.

Haré ba katak ema ida la halo imi sai atan hodi lohi imi ho liafuan nebé mai housi matenek ema nian, no housi neon sira nebé ukun mundo ne’e, la’os housi Cristo. Basá Maromak nia An tomak hela iha Cristo, nu’udar ema, no imi simu ona moris lolós tomak hamutuk ho Nia nebé liu kbiit na’in no ukun na’in sira hotu.

Iha Cristo mak imi simu circuncisão, la’os circuncisão nebé ema mak halo, maibé circuncisão nebé Cristo rasik mak halo, katak Cristo hasai imi housi ema maksalak nia ukun. Basá wainhira imi simu baptismo , imi hakoi tiha ona hamutuk ho Cristo, no iha baptismo mak imi moris hi’as tanba imi nia fiar iha Maromak nia kbiit nebé maka’as, nebé halo Nia moris hi’as housi mate. Uluk, imi mate iha imi nia klamar tanba imi nia sala, no tanba imi gentio nebé ukunfuan la iha. Maibé Maromak lori ona imi ba moris hamutuk ho Cristo. Maromak kasu tiha ita nia sala tomak. Nia kasu tiha naran fo’er ita nia lisan nian housi ukunfuan nebé kesi ita, hodi halakon nia tomak wainhira Nia hedi nia iha cruz. Iha cruz ne’e, Cristo hasai nia housi kbiit na’in no na’i ulun sira nia ukun; Nia hamoe sira hodi halo sira sai dadur na’in wainhira Nia manan sira.

Maromak Futar Lia.

 

Salmo Responsorial                                                                                                               Sal. 144(145). 1-2, 8-9, 10-11 (R. cf. 9ª)

Refrão : Na’i di’ak ba criatura tomak!!! Repete-se

Ha’u hahí Na’i, ha’u nia Maromak, ha’u nia Liurai,

Ha’u hahí nafatin Ita naran.

Kalan loron ha’u hana’i Ita,

Hahí nafatin Ita naran. Refrão

 

Na’i laran maus no laran di’ak,

La rai hirus, perdua nafatin.

Na’i hatudu laran di’ak ba ema tomak,

Hadomi nafatin Nia criatura tomak. Refrão

 

Na’i, criatura hotu hana’i Ita;

Ema sarani sira hahí Ita.

Sira haklaken Ita reino Nia glória,

Haklaken kmanek sira be Ita halo. Refrão

 

Aclamação                                                                                                                                                                                     cf. Jo. 15. 16

Refrão : Aleluia, Aleluia! Repete-se

Ha’u mak hili imi hodi haruka imi ba atu bele fó fuan no

imi nia fuan bele hela ba nafatin, Na’i dehan. Refrão

 

Evangelho                                                                                                                                                                                        Lc. 6. 12-19

Na’i Jesus Cristo nia Evangelho tuir São Lucas:

Iha loron hirak nebá, Jesus sae ba foho ida atu harohan; kalan tomak Nia harohan ba Maromak. Iha dader, Nia bolu ba nia An escolante sira, hodi fihir housi sira leet na’in sanulu resin rua nebé Nia hanaran ‘Apostolo’ Simão, nebé nia hanaran Pedro, ho nia alin Andrée; Tiago, João, Filipe ho Bartolomeu; Mateus, Tomé; Tiago, Alfeu nia oan; Simão nebé hanaran Zeloso; Judas, Tiago nia oan, no Judas Iscariotes nebé sei saran Nia.

Tun tiha hamutuk ho sira, Jesus tur iha rai tetuk ida. Iha nebá escolante barak ho tan ema lubun boot housi rai Judeia tomak, housi Jerusalém no housi tasi ibun Tiro no Sidónia nian, mai atu rona Nia no mós atu hetan isin di’ak housi sira nia moras no sira nebé espírito fo’er sira book, no sira hotu hetan di’ak. Sira hotu buka atu kona Nia, basá biit sai housi Nia hodi fó isin di’ak ba sira hotu.

Lia Maksoyn.

Segunda – Feira, XXIII Semana do Tempo Comum (Ano C)

Primeira Leitura                  Col. 1. 24-2. 3

Lia housi livro São Paulo nia Surat ba sarani sira iha Colossos:

Maun alin sira: Ohin ha’u haksolok wainhira ha’u terus tanba imi; ha’u halo lós iha ha’u nia isin lolon buat nebé sei kuran hela ba Cristo nia terus tan nia isin, katak Kreda. Basá ha’u serbi Kreda, basá Maromak saran tiha mai ha’u knaar ida atu hala’o Nia hakarak kona ba Kreda. Ha’u ko’alia kona ba plano nebé ema nia hanoin la bele to’o, nebé housi otas ba otas, rai subar hela, no nebé ohin Maromak fó sai tiha ona ba Nia Santo sira.

Maromak hakarak fó hatene ba sira ne’e Nia plano rikusoin no glória nian, nebé ema nia hanoin la bele to’o, nebé rai hela ba gentio sira: katak Cristo rasik nebé hela iha imi leet mak esperança Maromak Nia glória nian.

Ne’e mak buat nebé ami haklaken. Ami fó sai no hanourin ba ema hotu matenek lolós, hodi hakarak katak ema hotu bele sai ema lolós iha Cristo. Tan ne’e mak ha’u seivisu haka’as an ho Cristo nia kbiit nebé moris maka’as iha ha’u laran.

Husik ha’u dehan ba imi oinsá ha’u servisu maka’as ba imi no ba sira iha rai Laodiceia no ba sira seluk nebé la hatene ha’u. Ha’u halo ne’e atu sira bele hetan aten barani no bele halibur hamutuk iha domin; nune’e sira bele laran metin teb-tebes tan matenek no hatene lolós Maromak nia mistério, katak Cristo; iha Nia mak subar hela matenek nia rikusoin tomak.

Maromak Futar Lia.

 

Salmo Responsorial                                                                                                                                         Sal. 61(62). 6-7, 9 (R. 8ª)

Refrão : Maromak ha’u maksoyn no ha’u glória!!! Repete-se

Ha’u klamar hetan matenek iha Maromak,

Basá, ha’u laran metin ba Nia,

Nia ha’u heli an fatin no maksoyn;

Ha’u nia kota; ha’u sei la ta’uk buat ida. Refrão

 

Na’i Nia povo,

Iha tempo hotu, tau laran metin iha Nia,

Hasai imi fuan nia todan iha Nia futar oin,

Na’i mak ita nia subar fatin. Refrão

 

Aclamação                                                                                                                                                                                           Jo. 10. 27

Refrão : Aleluia, Aleluia!! Repete-se

Ha’u Nia bibi sira rona Ha’u lian, Na’i lia tun;

Ha’u hatene sira, sira mai tuir Ha’u. Refrão

 

Evangelho                                                                                                                                                                                          Lc. 6. 6-11

Na’i Jesus Cristo nia Evangelho nu’udar São Lucas haktuir:

Iha tempo nebá, iha loron sábado ida Jesus tama iha sinagoga hodi hanourin. Iha nebá iha ema ida ho liman lós mate. Escriba no fariseu sira hateke hela ba Nia atu haré Nia sei fó isin dia’k iha loron sábado ka lae, atu nune’e sira bele hetan lia ruma hasouru Nia. Maibé, tan hatene ona sira nia hanoin, Nia dehan ba ema liman lós mate ne’e: “Hamriik ba, mai iha klaran!” Nia mai hamriik duni. Tuir mai Jesus dehan ba sira: “Ha’u husu imi: iha loron sábado, bele halo halo di’ak eh halo áat, soi ema nia moris ka halo áat nia?” Hafoin, hateke hale’u ba sira hotu, Nia dehan ba ema ne’e: “Lolo ó nia liman ba!” Nia lolo duni, nia liman sai di’ak fali. Sira laran nakali, hodi ko’alia ba malu atu halo oin sá lós ho Jesus.

Lia Maksoyn.

DOMINGO XXIII TC.A.C 2019

Maun alin sarani doben sira Nai Maromak ukun fuan sanulu hetan ninia centro mak iha Maromak no iha ita ema sira. Iha Maromak ho ema sira ninia moris, moris ida nebe Hahu mai husi Maromak, ema halao no sei hetan rohan laek iha fila fali Maromak. Moris nee halao iha no ho ukun ida nebe hanarn domin. Ukun domin nian nee iha sanulu hanesan ita hatene nebe habadak ba “Hadomi Maromak liu sasan hotu hotu no hadomi ema seluk hanesan ita ninia an rasik”.

Evangelho ohin nian Jesus hanorin ita atu kona ba ukun fuan uluk liu be dehan Hadomi Maromak liu sasan hotu hotu. Nai Jesus dehan “Ema se mai buka hau maibe la husik hadomi aman ho inan, kaben, oan, alin, maun no moris. La bele sai hau nia escolante. Ema se la lori ninia cruz lao tuir hau, labele sai hau nia escolante”. Maun alin doben sira, buat nebe Nai Jesus dehan la katak ita labele hadomi ita nia aman inan, bin feton, maun  alin, kaben no oan sira, maibe ao contrário buat nebe nia dehan nee katak ita tem que hadomi no hadomi lolos sira maibe ita percisa hadomi nai Maromak liu sira hotu. Ita nia domin la para deit iha sira maibe tem que lori to’o ba iha hadomi lolos mos Nai Maromak. Cristo ninia liafuan ne’e nia dehan no convida ita atu moris tuir iha contexto Maromak ninia ukunfuan hadomi Maromak liu sasan hotu hotu ne’e. Wainhira ita ninia domin para deit iha ema sira, la to’o iha hadomi mos Na’i Maromak ita ninia domin ne’e sei la nakonu ida, loron ida sei maran fila fali basa la hetan ninia abut iha Maromak be domin ninia hun ne’e, maibe wainhira ita ninia domin hahu husi ema no lori ba to’o iha hadomi mos Nai Maromak domin ne’e sei la maran, sei nakonu nafatin basa ita hakat to’o iha domin ninia hun be mak Maromak rasik.  Segunda leitura S.Paulo hanorin ita atu moris tuir ukun fuan boot liu daruak nian “Hadomi ema seluk nundar ita-an rasik. Iha ninia carta ba Filemon, Paulo husu atu Filemon bele simu Onésimo nundar alin ida laos ona nundar atan ida. Hare malu nundar maun ho alin hamoris no haburas ksolok lolos ida iha ita nia an, ita nia familia no ita ninia sociedade basa ita nia hahalok ida nune’e tidin-an iha domin, hetan ninia razão iha domin lolos. Wainhira ema hadomi malu lolos nundar maun ho alin nee katak ema hadomi ninia-an rasik, basa ninia maun alin nee mos mai husi Maromak, mesak Maromak ninia criatura be hanesan mos ho nia. Na’i Maromak husu ita hadomi malu tuir ninia ukun fuan domin nian atu nune’e domin nee la menus, la maran no la mohu iha ita, maibe buras nakonu no naresin nafatin ba nafatin iha ita nia moris tomak.

Iha ita nia experiência moris nian dala barak mos mak ita experimenta moris ida la tuir Maromak ninia ukun fuan ida nee. Ita rejeita, la simu ita nia maun alin sira tamba sira salan hasoru ita, tamba riku soin, tamba laran moras, tamba rai odio no sira seluk seluk tan. Buat hirak nee lori ita ba halao moris ida nakonu ho terus no terus leet deit nia laran. Maromak bolu nafatin ita atu husik dalan moris ida hanesan nee hodi fila fali ba dalan moris ksolok nian be hari iha moris ida metin tuir ukun fuan domin nian, hadomi maun ho alin ka ema seluk nundar ita ninia an rasik.

Maun alin doben sira, Nai Maromak ninia ukun fuan ne’e mak expressão clara, real no concreta ninia hakarak mai ita ema sira. Iha primeira leitura haktuir katak laiha ema ida mak hatene Maromak ninia hakarak no Maromak ninia hanoin. So Maromak rasik mak fo hatene mai ita ninia hanoin no ninia hakarak sira. Nia halo ida ne’e liu husi ninia revela-an ba ema sira hotu nebe hatudu iha história ita ema nian iha ita ninia relação ho Maromak no ho maun alin sira. Maromak ninia hanoin no ninia hakarak mak ida ne’e atu ita hotu moris iha domin lolos ba Maromak no ba maun alin ka ema seluk. Ninia hanoin no hakarak ne’e realiza sai nakonu lolos to’o rohan laek iha ita Nain Jesus Cristo nebe fo ninia-an terus to mate iha Cruz atu soi ita hotu no atu nune’e ema bele hatene domin lolos nee mak ida oinsa liu husi moris lao tuir lolos Jesus Cristo iha buat hotu. Nai Maromak husu atu ita hotu moris tuir no hanorin tutan ba ema hotu to’o mundo nee nia rohan hadomi Maromak no hadomi ema seluk nundar ita-an rasik nafatin ba nafatin. Amen.       

Bidau, 08.09.19, Pb.

TUIR JESUS…!! TODAN DEMAIS?

Leitura no Reflexão DOMINGO COMUM XXIII-Ano C 2019

 

Primeira Leitura        Sab. 9, 13-19 (13-18b)

Lia housi livro Sabedoria:

Ema sé mak bele hatene Maromak nia hanoin? Ema sé mak bele hanoin kona Na’i nia hakaran? Ita ema nia hanoin namlele; ita nia matenek ábut laek. Isin lolon dodok ida ne’e halo todan klamar; horik fatin rai ne’e nian hanesan klamar be hanoin buat oin-oin. Susar atu hatene buat hira-hirak iha rai leten; ho haka’as-an mak ita hetan buat nebe iha ita nia liman. Se mak bele hetan buat nebe iha lalehan? Na’i, ita boot la haraik karik neon naroman, ita la haraik karik ita Espiríto Santo, ema sé mak bele hatene ita nia hanoin? Nuné mak ita haloos ema horik rai sira dalan, hodi hanorin ema sira tuir ita hakarak.

Maromak Futar Lia.

 

Salmo Responsorial                                                                                                                         Sal. 89(90), 3-4. 5-6. 12-13.  14-17

Refrão : Na’i houri uluk kedas Ita boot ami mahan!!! Repete-se

Na’i, Ita Boot bele fila ema sira ba rai rahun,

Hodi dehan: “ Ema oan sira, imi fila”

Na’i, iha Ita Boot futar oin

Tinan rihun ida, nu’udar loron horik-seik be liu ona. Refrão

 

Na’i, Ita lori sira,

Sira la’o liu, lais hanesan  mehi rai-hun mutin;

Hanesan du’ut matak dader’

Namlaik loraik. Refrão

 

Na’i, hanorin ami sura ami loron,

Atu hetan fuan matenek.

Na’i, fila hi’as mai bainhira los?

Bainhira Ita sei hanoin ita atan sira? Refrão

 

Tulun ami lalais ho Ita laran luak,

Atu ami moris ho ksolok!

Hatudu ita boot laran di’ak

Atu ami kosar-wen hetan folin. Refrão

 

Segunda Leitura                                                                                                                                                                 Flm. 9b-10, 12-17

Lia husi São Paulo nia surat ba Filemon:

Doben: ha’u, Paulo, katuas ona, oras ne’e, dadur hela tan Cristo Jesus, ha’u husu ba ó  atu tulun Onésimo, ha’u nia oan nebé haki’ak iha terus laran. Ha’u haruka nia ba ó; nia nu’udar ha’u fuan rasik. Ha’u hakarak duni nia hela hamutuk ho ha’u, iha ó nia fatin atu tulun ha’u terus, tan Evangelho. Maibé, la hodi ó nia hakarak ha’u la bele halo buat ida: atu buat di’ak nebé ó halo, tan ó nain rasik hakarak halo ho laran di’ak ema ida la obriga.  Nia kala dook tiha oituan housi ó; maibé ó simu fali nia hela nafatin ho ó, la’os hanesan atan oan, maibé liu fali atan, nu’udar alin doben ida. Nia mai ha’u nune’e duni: oinsa tan fali ba ó la’os de’it tuir ema moris, iha mos Maromak futar oin. Ne’e duni, ó haré duni katak ita Na’in rua hamutuk tebes, ne’e sá, ó simu nia ba, nu’udar ó simu ha’u-an rasik.

Maromak Futar Lia.

 

Aclamaҫão                                                                                                                                                                                          1 Jo. 4, 12

Refrão : Aleluia, Aleluia!! Repete-se

Ita hadomi malu, Maromak horik ho ita,

Nia domin boot duni iha ita, Refrão

 

Evangelho                                                                                                                                                                                     Lc. 14, 25-34

Na’i Jesus Cristo nia Evangelho Nu’udar São Lucas haktuir:

Iha tempo nebá, ema lubun boot tuir Jesus. Nia fila ba sira, hodi dehan:“Ema sé  mai buka Ha’u, maibé la husik hadomi aman-inan, kaben, oan, alin maun no moris, la bele sai ha’u nia escolante. Ema sé la lori nia Cruz la’o tuir ha’u, la bele sai ha’u nia escolante. Imi nebe ida mak, atu halo uma aas ida, la tur uluk hodi hare osan iha eh lae atu halo to’o rohan? Keta halo be, foin hahu hari, kbiit la iha atu halo to’o rohan; hafoin; ema sira be hare, hahu hamoe nia, hodi dehan: ema ne’e hahu hari, maibé la bele halo to’o rohan! Liurai ida nebé mak ba funu hasoru liurai seluk, la tur uluk lai hodi hanoin, nia bele eh lae, ho de’it soldadu rihun sanulu funu hasuru ida nebé mai hasoru ho soldadu rihun rua-nulu? Haré ba la bele, ida seluk sei dook hela, haruka ona manu ain ba husu dame. Nune’e mos imi nebe la husik nia riku soi, la bele sai ha’u nia Escolante”.

Lia Maksoyn.

 

 

Reflexão :

TUIR JESUS…!! AFINAL TODAN DEMAIS?

Ema latina sira dehan: SALUS VESTRA IN MANUS VESTRA; o nia salvação iha o nia liman rasik tanba Cristo mak dalan moris nian, então ita hatene oinsa atu hakbesik ba Jesus liu husi ita nia disponibilidade rasik. Kmanek liu wainhira ita moris banati tuir Cristo nia lalaok no hanorin sira. Ita ema nia hanoin namlele; ita nia matenek ábut laek. Isin lolon dodok ida ne’e halo todan klamar. Moris Hanesan du’ut matak dader’ Namlaik loraik.

Mundo oras nee fácil tebes fo acesso ba ema hotu. Uluk ema hamlaha precisa processo naruk hodi tein hahan maibé ohin loron instan (fácil & lalais), precisa deit minuto 3-5 hodi dan pop mie (Loke, tau be manas, hein too minuto 3, bele han ona). Nee exemplo ida husi mundo instan. Lalaok instan  nee neneik-neneik hanorin ema atu rejeita qualquer forma insegurança no sentido sacrifício. Nee significa katak buat nebe fácil halo ema la kohi moris iha terus, lakohi halo sacrifício iha moris, pior liu tan lakohi terus iha moris hodi entende sentido Cruz (sacrifício/terus). Ema buka dalan corta hodi atinge ninia mehi. Ukun nain ida buka dalan terik hodi kaer ukun too baruk, hodi riku lalais, hodi bele hetan riku soin barak tan.

Evangelho São Lucas Domingo semana nee, apresenta requésitos (persyaratan) balu nebe ema precisa cumpri, wainhira hakarak sai Jesus nia escolante. Persyratan eh requisitos hirak nee, balu Jesus temi claro no directamente ba ema hirak nebe rona Nia maibé, requesitos balu mos Jesus apresenta liu husi ai-knanoik sira.

Requesito absoluto (syarat mutlak) hodi sai Jesus nia escolante lolos iha 4 mak hanesan:

(1). La bele kesi-an metin ho família (Lc 14, 26).

(2). Riku soin (Lc 14,33).

(3). Pronto simu terus/sacrifício (Lc 14, 27).

(4). Pronto simu desafio no exigência sira (Lc 14, 28-32).

Sarani ohin loron considera terus (sacrifício) nudar lalaok negativo ida nebe precisa hasees tiha husi ema nia moris. Maibé Jesus fo sentido katak terus (sacrifício-Cruz) bele hanorin ema hatene depende no agradece ba Maromak. Ema otas nee nian entende sala katak se Maromak nee domin nain no ema nebe fiar nain, automaticamente Maromak tenke hasees nia husi terus no susar sira.

Igreja Católica basea ba Jesus nia hanorin nebe tenik katak:”Ema nebe la lori nia Cruz, nia la merece tuir Hau” (Mt 10,38). Nee significa katak ema hotu tanto kiik-tanto boot, tanto riku-tanto kiak, sei koko moris terus iha rai nee hodi hatene Maromak nia diak oinsa.

Cruz nudar dalan terus nebé ema (sarani sira) tenke hasoru molok ba too Jesus. Terus balu mosu tanba ema nia desejo rasik, terus balu mosu hodi prova ema nia fiar, terus balu mosu nudar realidade nebe ema la bele sees husi neba.

Santo Agostinho hanorin tipo Cruz Nai nian nebe precisa ita hatene; (1) Cruz físico no (2) Cruz Espiritual. Cruz físico refere ba ema nia paixão (nafsu) sira nebe iregualar (tak teratur) nebe relativo ho ema nia senso (tocar, sentir, visão,…etc), iha nee inclui kedas oinsa ema kaan kaer ukun, ema kaan halibur osan ba futuro tuir dalan ilegal, ema respeita malu tuir kor partido, tuir kor grupo, tuir cor família,…etc.

Enquanto Cruz espiritual, tuir Santo Agostinho hanorin katak; tuir Jesus nia haruka (doutrina) nudar assunto nebe precisamente ita tenke tau atenção; significa ita tenke hatene controla saida mak expressa iha Cruz físico nian hanesan menciona iha leten. Basá, criz espiritual bele halo ema controla kaan ten sira, necessidade iregualar sira, hatene haraik-an, simplicidad, respeita, bem comum, inclui mos ema nia hanoin aat ba ema seluk nebe la tuir ita nia vontade pessoal tanto iha sociedade nunee mos iha mundo político.

Jesus nia pergunta ba ema ida-idak nebe decide hakarak tuir Nia mak:”o pronto duni ona atu tuir Hau (Jesus)?” manan sa lerek wainhira o decide atu sai Hau (Jesus) nia escolante? Sai Hau (Jesus) nia escolante mak folin boot liu eh o nia laran kmaan (disponibilidade) mak dignidade aas liu? Ba se se deit, kiak eh riku, boot eh kiik, hetan cargo boot eh la iha serviço – ema hotu-hotu tem que foti decisão claro no hanesan.

Bele, disponível no hakarak duni selu valor aas (sacrifício) hodi tuir Jesus? Experiência hatudu katak; bai-bain quando ita hahu harí eh halao buat ida ou participa iha programa ruma, ita sente semangat los, entusiasmo forte, contente,…Maibé, liu tiha tempo ruma…ita hahu baruk ona, lakon esperança, entusiasmo menos, no seluk tan. Pergunta ba ita mak nee: nudar Católico, será que ita bele mantem posição, persistente no entusiasmo nafatin hodi sai Jesus nia emar ba qualquer situação? Hanoin ba Jesus nia lia fuan be hateten: “Ema nebe hakarak tuir Hau, sei loru nia Cruz hodi lao tuir Hau”. Se mak mantem posição, se sei manan.

Iha ai-knanoik nebe São Lucas apresenta iha Evangelho Domingo semana nee, tanto ema nebe atu harí torre aas ou ema nebe marca estrategia hodi ba halo funu, precisa halo calculação no considera mos risco hirak nebe sei mosu, molok foti decisão definitiva.

Nudar Jesus nia emar, precisa hatene katak; atu tuir Jesus exige fidelidade (kesetiaan) ida ba Jesus, nebe tem que tau iha prioridade. Em princípio, wainhira ita simu Jesus nia personalidade, automaticamente ita hakarak duni hulan mos Nia Cruz! Nunee, lalaok hirak nee hotu significa saida ba ita nia existência? Significa saida ba ita nia moris, significa saida ba ita nia knaar nudar Jesus nia escolante, nudar sarani, nudar Cristão Católico nebe simu ona we baptismo?

Ohin loron, ita moris iha sociedade pluralismo; significa ita hasoru situação oi-oin deit, cultura foun tama iha ita leet, religião mosu oi-oin ho figura ONG, partido bar-barak, grupo oioin, ema raça oi-oin,…situação ida nee hamosu desafio oi-oin, exigência bar-barak, no ikus mai lori ema ba hadau malu posição social, estatuto diak, popularidade, osan, riku soin, gosto, no iha tempo hanesan provoca mos ema compete, hadau malu poder, gap kiak-riku no injustiça.

Então, iha situação hirak hanesan nee mak, Cristão Católico sira hetan bolu atu banati tuir Jesus Cristo nia hahalok ho Ninia doutrina sira, nunee ita bele foti decisão claro ba hahalok no ba ita nia moris. Jesus rasik hateten: Ema sé la lori nia cruz la’o tuir ha’u, la bele sai ha’u nia escolante. Ida nee mak desafio boot ba Católico hotu. Ita haree fali ba kotuk, saida mak ita halo ona nudar sarani Católico? Dalabarak ita hakarak hili hotu kedas lalaok oi-oin iha ita nia sociedade. Nudar Cristão Católico, tuir los ita hili dalan ida deit mak Jesus Cristo nia exemplo moris no Ninia doutrina.

Lalaok Cristão nian nee hamosu perigo lobuk ida, ita sai ema nebe la iha decisão fixo ou la iha princípio (pendirian tidak tetap), sai oportunista; exemplo ema muda tun-muda sae husi partido ida ba partido seluk tanba buka poder no posição, muda religião husi ida ba ida seluk tanba ema fahe osan. Ita nia fiar nakdoko ba mai tanba ema seluk fácil influencia ita nia moris, ita fácil buka buat nebe fo gosto do que buat nebe exige sacrifício. Buat hirak nee halo ita la consegue moris tuir Jesus nia lalaok. Ita sai fiar nain Católico maibé, hahalok hanesan gentio, fiar roh-rohan deit, sai sarani maibé la brani simu consequência, hahalok la tuir fiar Cristão Católico nian. Dom Basílio ba hahalok hirak hanesan nee hatete: ohin loron ema sarani, sarani nafatin maibé, naok, naok nafatin, missa, missa nafatin maibé, corrupção, corrupção nafatin, kama, rua, kama tolu nafatin.

Liliu ba foin sae sira, importante teb-tebes atu hetan educação no hetan convite hodi foti decisão no hili tuir dalan los! Tansa? Tem que nunee? Tanba felicidade lolos laos temporário ou sementara deit, maibé, permanente no dura too tempo naruk. Felicidade eh ksolok nee, ita bele atinge wainhira ita halo buat ruma nakonu ho comitmento, esforço, consistência tuir lalaok moris Jesus nian.

Felicidade eh ksolok rohan laek ema Cristão Católico ida sei atinge duni wainhira, nia hakas-an hodi halo tuir decisão no escolha moris sarani nian. Decisão ida nee mak oinsa ita nia moris banati tuir saida mak Cristo haruka. Tanba nee mak ema religioso sira hateten: para ser feliz de verdade, é preciso, primeiramente e essencialmente, ter uma vida espiritual bem estruturada. Não estruturada em uma mera crença ou religião cheia de regras e proibições, mas etrutura na verdadeira esséncia da vida…quotação nee significa; Felicidade rohan laek ba moris nee, laos tanba ita halo tuir taka matan deit ba regra sira nebe religião estabelece maibé, felicidade eh ksolok rohan laek nee hetan wainhira ita hatene comporta no compreende sentido essencial moris nee tuir Maromak nia hakarak iha Jesus nia hanorin sira.

Atu sai Jesus nia escolante lolos, ita precisa hatene no brani atu simu dificuldade sira nebe ita hasoru iha moris nee. Sai Católico autêntico, sarani ida la bele sai ema oportunista, la bele buka diak deit hodi fo todan ba ema seluk maibé, sarani ida precisa moris adulto iha nia fiar no hatene simu eh halo sacrifício iha moris. Dala ida tan Jesus rasik hatete:Ema sé la lori nia cruz la’o tuir ha’u, la bele sai ha’u nia escolante”.

Tanba nee mak, atu sai Cristão Católico diak eh sai seguidor Cristo nian, ita precisa sai adulto iha fiar basá, ita nia Salvação mai husi Maromak. Problema oinsa atu atinge salvação nee, ita tem que hatene colabora ho Maromak, hatene halo sacrifício no hatene conduz moris nee iha Maromak nia mahan. Iha situação no condição moris iha sociedade nebe deit, Jesus haruka: “Foti decisão ba!” Jesus convida ita nobun hodi sai nia manu-ain eh sai escolante autêntico (asli)

Iha relato Evangelho São Lucas nian justifica katak; Jesus la tolera nem compromi ho ema nebe iha ibun hakarak sai escolante maibé, laran la fo ba Jesus, moris la tuir Jesus nia hanorin. Ba ida nee, Papa Francisco dala ida hateten; “Pecador sim – traidor não”; lia fuan nee significa katak; ema moris sempre monu ba sala ho comete pecado maibé, kmanek liu tan atu ema la bele sai traidor. Sai Cristão Católico precisa ema hirak nebe iha comitmento ba nia moris tomak. Hadook-an husi kaan naresin ba material rai klaran nian, haluha tiha hahalok uluk nian hodi hahu moris foun, tau neon ba família no hatene pratica hahalok caridade tuir dalan Cristão nian (Cf Lc 9, 57-62; 14, 26-33).

Sarani nia laran kmaan (disponibilidade) hodi lori rasik nia Cruz lao tuir Jesus, maske liu husi dalan oi-oin, sacrifício bar-barak, desafio reb-rebo, Jesus fo aten brani ita hodi dehan: ”Jikalau seorang datang kepada-Ku dan ia tidak membenci bapanya, ibunya, isterinya, anak-anaknya, saudara-saudaranya, laki-laki atau perempuan, bahkan nyawanya sendiri, ia tidak dapat menjadi murid-Ku”//«Se alguém vem ter comigo e não me tem mais amor que ao seu pai, à sua mãe, à sua esposa, aos seus filhos, aos seus irmãos, às suas irmãs e até à própria vida, não pode ser meu discípulo (Luk 14:26)”.

Ita ema nia hanoin namlele; ita nia matenek ábut laek. Isin lolon dodok ida ne’e halo todan klamar. Moris Hanesan du’ut matak dader’ Namlaik loraik. Lia fuan Bíblica nee, endereça directamente ba ita nobun nebe sente-an simu ona we baptismo iha Igreja Católica, hakarak lori rasik Cruz tuir Jesus ka lae? …….Seja Louvado Nosso Senhor Jesus Cristo…Para sempre Seja Louvado a Sua mãe Maria Santíssima. (ignaslopes)